ងងុយគេង Archives - Kampuchea Thmey Daily

ប៉ុន្មានវិធីនេះ អាចដោះស្រាយបញ្ហាងងុយគេង ក្រោយបាយថ្ងៃត្រង់

សាង ស្រីល័ក្ខ — Fri, 10 Feb 2023 06:00:00 +0000

បន្ទាប់ពីម៉ោងបាយថ្ងៃត្រង់ហើយស្រាប់តែមានមានអារម្មណ៍ថា ងងុយគេង ទន់ភ្នែក អស់កម្លាំង ដែលនេះស្ទើរតែក្លាយជាទម្លាប់ប្រចាំថ្ងៃទៅហើយ។ មកទល់ពេលនេះក៏មិនទាន់មានការសិក្សាណាអាចស្រាយបង្ហាញពីមូលហេតុឲ្យបានច្បាស់លាស់នៅឡើយទេ ប៉ុន្ដែយើងអាចដោះស្រាយទម្លាប់នេះបានដោយសាកល្បងអនុវត្ដវិធីមួយចំនួន។

១.ធ្វើសម្មភាពរាងកាយ

បន្ទាប់ពីញ៉ាំបាយហើយ មានអារម្មណ៍ថាងងុយគេង យើងអាចធ្វើសកម្មភាពផ្សេងៗបានដូចជា ការដើរទៅនេះទៅនោះ ឬការនិយាយលេងជាមួយមិត្ដភក្ដិជាដើម។ ការធ្វើសកម្មភាពរាងកាយ ជួយឲ្យសាច់ដុំធ្វើចលនាប្រើប្រាស់ថាមពល និងចរន្ដឈាមដំណើរការស្រួល ដូច្នេះយើងអាចចំណាយពេល យ៉ាងហោចបានចន្លោះពី ៥ ទៅ ១០នាទី បន្ទាប់ពីញ៉ាំអាហារគឺគ្រប់គ្រាន់ហើយ។

២.ញ៉ាំចំណីចំណុក

ញ៉ាំចំណីចំណុកបន្ដិចបន្ដួច ប៉ុន្ដែច្រើនដងអាចជួយបន្លប់អារម្មណ៍យើងមិនឲ្យងងុយគេងបាន។ ពិសេសពពួកផ្លែឈើសម្បូរវីតាមីន C, B, A, ប៉ូតាស្យូម ដែលជំនួយដល់ស្មារតី និង ខួរក្បាល។

៣.ផឹកទឹកឲ្យបានគ្រប់គ្រាន់

ការញ៉ាំទឹកឲ្យបានគ្រប់គ្រាន់គឺជួយទៅដល់ការបំពេញជាតិទឹកក្នុងរាងកាយ មិនតែប៉ុណ្ណោះ ក៏ជាចំណែកមួយជួយបង្កើនថាមពលផងដែរ។ ការសិក្សាបានបង្ហាញថា រាងកាយបាត់បង់ជាតិទឹក ១% អាចធ្វើឲ្យថាមពលយើងចុះខ្សោយដល់ទៅ ១០%។

៤.ញ៉ាំតែ ឬកាហ្វេ

ជាតិកាហ្វេអ៊ីនដែលមាននៅក្នុងតែ ឬ កាហ្វេទោះមានបរិមាណតិច ក៏អាចជួយកាត់បន្ថយអាការៈងងុយគេងបានដែរ។ ដូច្នេះយើងអាចអនុវត្ដវិធីនេះបាន ត្រឹមកាហ្វេ ឬតែមួយពែង អាចជួយដាស់ស្មារតីឲ្យរឹងមាំ ប៉ុន្ដែត្រូវប្រយ័ត្នប្រយែង ពេលឆុងកាហ្វេ ឬតែ គួរកាត់បន្ថយការបន្ថែមស្ករ ព្រោះស្ករច្រើនអាចធ្វើឲ្យយើងមានអារម្មណ៍ងងុយគេងវិញ។

៥.មើលវីដេអូ ឬស្ដាប់ចម្រៀង

ការមើលរឿងកំប្លែង ឬស្ដាប់ចម្រៀង ដែលយើងចូលចិត្ដ ជួយឲ្យអារម្មណ៍សប្បាយៗក៏អាចជំនួយដល់ស្មារតី និង បង្កើតអារម្មណ៍ស្រស់ស្រាយ កាត់បន្ថយភាពតានតឹង និង ស្រ្ដេស បានខ្លះដែរ។

អត្ថបទផ្ដល់ដោយ Hello Krupet

The post ប៉ុន្មានវិធីនេះ អាចដោះស្រាយបញ្ហាងងុយគេង ក្រោយបាយថ្ងៃត្រង់ appeared first on Kampuchea Thmey Daily.

ងងុយគេងនៅកន្លែងធ្វើការ សាកល្បងអនុវត្តគន្លឹះ ៥ យ៉ាងនេះភ្លាម

សាង ស្រីល័ក្ខ — Thu, 04 Aug 2022 06:05:00 +0000

សម្រាប់មនុស្សពេញវ័យ ការងារគឺជាកាតព្វកិច្ច មិនថាស្ថិតក្នុងស្ថានភាពបែបណានោះទេ អ្នកនៅតែត្រូវធ្វើការ ដើម្បីអាចបំពេញតម្រូវការនៃជីវិតបាន។ ប៉ុន្តែយើងខ្លួនឯងដឹងថា ឧបសគ្គដ៏ធំបំផុតក្នុងផលិតភាពការងារគឺរងងុយគេង។ ចុះធ្វើម៉េចមិនងងុយដេក ពេលធ្វើការនៅការិយាល័យ?

១ ត្រូវប្រាកដថាគេងបានគ្រប់គ្រាន់ ប្រសិនបើអ្នកមិនចង់ងងុយគេងពេលធ្វើការក្នុងការិយាល័យ រឿងដំបូងដែលត្រូវប្រាកដថា តើអ្នកគេងគ្រប់គ្រាន់ឬអត់។ ដោយសារតែគុណភាពនៃការគេងកាន់តែប្រសើរ និងបំពេញតម្រូវការសម្រាករបស់អ្នក វានឹងកាត់បន្ថយលទ្ធភាពនៃការងងុយគេង។ ដូច្នេះ នៅពេលអ្នកក្រោកពីដំណេកនៅពេលព្រឹក ហើយធ្វើការនៅក្នុងការិយាល័យ អ្នកនឹងរំភើប និងពោរពេញដោយថាមពល។

២ ផឹកទឹកក្រូចឆ្មារ ឬភេសជ្ជៈប៉ូវកម្លាំង គន្លឹះមួយទៀត ដើម្បីកុំឲ្យដេកលក់នៅការិយាល័យ គឺផឹកទឹកក្រូចឆ្មារ ឬភេសជ្ជៈប៉ូវកម្លាំង។ វិធីសាស្ត្រនេះមានប្រសិទ្ធភាពណាស់ ក្នុងការការពារពីការងងុយគេងពេលធ្វើការ។ ប៉ុន្តែសូមកុំផឹកកាហ្វេពេញមួយថ្ងៃ ព្រោះអាចប៉ះពាល់ដល់សុខភាព។ គ្រាន់តែផឹកអ្វីដែលអ្នកចូលចិត្ត និងធ្វើឲ្យមានអារម្មណ៍ស្រស់ស្រាយ ទៅបានហើយ។

៣ បំពេញក្រពះរបស់អ្នក ជាមួយនឹងអាហារពេលព្រឹក មូលហេតុដែលភាគច្រើនធ្វើឲ្យមនុស្សងងុយគេងនៅកន្លែងធ្វើការគឺដោយសារតែក្រពះទទេ និងឃ្លាន។ គន្លឹះទីបីនេះ គឺត្រូវប្រាកដថាអ្នកបានបំពេញក្រពះជាមួយនឹងអាហារពេលព្រឹក ។ អាហារពេលព្រឹកមិនចាំបាច់ជាអាហារឆ្ងាញ់ៗដូចជាបាយទេ អ្នកអាចមានបបរ គ្រាប់ធញ្ញជាតិ ផ្លែឈើ និងបន្លែ ឬសូម្បីតែនំប៉័ង។ មិនថាអាហារពេលព្រឹកអ្វីនោះទេ អ្វីដែលសំខាន់នោះគឺក្រពះរបស់អ្នកឆ្អែត ដើម្បីកុំឲ្យការផ្ដោតអារម្មណ៍ខុស ហើយមិនងងុយគេងដោយសារតែឃ្លាន។

៤ អ្នកអាចធ្វើការ ខណៈពេលកំពុងស្តាប់តន្ត្រី ប្រសិនបើអនុញ្ញាត គន្លឹះមួយទៀតដើម្បីកុំឲ្យងងុយគេងពេលធ្វើការក្នុងការិយាល័យ គឺអាចធ្វើវាបានពេលកំពុងស្តាប់តន្ត្រី។ ប៉ុន្តែជាការពិតណាស់ វាអាចធ្វើទៅបានលុះត្រាតែកន្លែងធ្វើការ និងចៅហ្វាយរបស់អ្នកអនុញ្ញាត ព្រោះគ្រប់ការិយាល័យមានច្បាប់ផ្សេងៗគ្នា។ ជៀសវាងតន្ត្រីសម្រាកលំហែជាមួយចង្វាក់ផ្អែមល្ហែម ប៉ុន្តែជ្រើសរើសតន្ត្រីដែលពោរពេញដោយថាមពលដូចជាបទញាក់ជាដើម។ ដោយសារ តន្ត្រីដែយើងស្តាប់អាចប៉ះពាល់ដល់ស្មារតី និងខួរក្បាល ដូច្នេះទើបមិនមានអារម្មណ៍ងងុយគេង។

៥ ធ្វើការលាតសន្ធឹង ប្រសិនបើមានអារម្មណ៍ងងុយគេង ការងងុយគេងពេលធ្វើការនៅក្នុងការិយាល័យ គឺជារឿងធម្មតាដែលកើតឡើងចំពោះយើង ហើយវិធីមួយដើម្បីយកឈ្នះវា គឺការលាតសន្ធឹងរាងកាយ។ ជាឧទាហរណ៍ ប្រសិនបើអ្នកស្ងាបច្រើនជាងមួយដង ចូរលាតសន្ធឹងលាតរាងកាយ ហើយធ្វើលំហាត់ប្រាណបន្តិច។ ប្រសិនបើមានការខ្មាសអៀនចំពោះមិត្តរួមការងារផ្សេងទៀត អ្នកអាចធ្វើវានៅកន្លែងស្ងាត់ ឬបន្ទប់។

ប្រសិនបើអ្នកងងុយគេង នោះផលិតភាពការងារនឹងត្រូវបានរារាំង ដូច្នេះសាកធ្វើគន្លឹះទាំង៥នេះ ដើម្បីកុំឲ្យខ្លួនឯងទោរទន់នឹងដំណេកនៅការិយាល័យ៕

ប្រែសម្រួល៖ សាង ស្រីល័ក្ខ

ចុចអាន៖ក្នុងពិភពការងារ គួរចៀសវាង ៥ ចំណុចនេះឲ្យមែនទែន

ចុចអាន៖៣ វិធី ព្យាបាលការងងុយគេង ក្រោយញ៉ាំអាហារថ្ងៃត្រង់រួច

The post ងងុយគេងនៅកន្លែងធ្វើការ សាកល្បងអនុវត្តគន្លឹះ ៥ យ៉ាងនេះភ្លាម appeared first on Kampuchea Thmey Daily.

គន្លឹះ ៤ យ៉ាង ជួយដោះស្រាយបញ្ហាងងុយគេង ពេលបើកបរផ្លូវឆ្ងាយ

សាង ស្រីល័ក្ខ — Thu, 14 Jul 2022 07:06:05 +0000

ការបើកបរផ្លូវឆ្ងាយ អាចបង្កើតភាពអស់កម្លាំងដល់អ្នកបើកបរដោយមិនដឹងខ្លួន។ ជាពិសេស អាចបណ្តាលឲ្យងងុយដេក ដែលត្រូវបានចាត់ទុកថាជាហានិភ័យ នៃគ្រោះថ្នាក់បានយ៉ាងងាយស្រួល។ ដូច្នេះ យើងខ្ញុំសូមណែនាំគន្លឹះ ៤ យ៉ាងសម្រាប់ដោះស្រាយបញ្ហាងងុយគេង ពេលកំពុងបើកបរលើផ្លូវឆ្ងាយ។

១ សម្រាកឲ្យបានគ្រប់គ្រាន់មុនពេលចេញដំណើរ

អ្នកបើកបរត្រូវប្រើរាងកាយ និងភ្នែកក្នុងរយៈពេលយូរ។ ដូច្នេះហើយ អ្នកត្រូវតែគេងឲ្យបានច្រើន ដើម្បីរក្សារាងកាយឲ្យមានអារម្មណ៍ស្រស់ស្រាយ និងមានភាពស្រស់ថ្លាឡើងវិញ។ ម៉្យាងទៀត វាក៏ជួយទប់ទល់នឹងស្ថានភាពដែលកើតឡើងនៅលើផ្លូវផងដែរ។

២ រៀបចំផែនការមុនពេលធ្វើដំណើរ

ការរៀបចំផែនការ ជួយឲ្យអ្នកបានដឹងថា តើវាជាការបើកបរនៅលើផ្លូវដែលធ្លាប់ស្គាល់ ឬផ្លូវដែលមិនធ្លាប់ស្គាល់។ ប្រើកម្មវិធីរុករកតាមទូរសព្ទ នឹងជួយចៀសវាងការកកស្ទះចរាចរណ៍ មិនបើកបរទៅកាន់គោលដៅក្នុងពេលតែមួយ វានឹងជួយកាត់បន្ថយភាពអស់កម្លាំង។

៣ សម្រាករៀងរាល់ ២ម៉ោងម្តង

ឈប់នៅស្ថានីយប្រេងឥន្ធនៈ ហាងកាហ្វេ នៅតាមផ្លូវ ដើម្បីឲ្យសាច់ដុំ និងសរសៃប្រសាទរបស់អ្នកស្មារតី ជួយការពារអារម្មណ៍នឿយហត់បានថែមទៀតផង។

៤ បង្កើតបរិយាកាសនៅក្នុងឡាន

គួរតែចាក់បទចម្រៀងពិរោះៗ ឬនិយាយទៅកាន់អ្នកដំណើរនៅក្នុងឡាន។ អ្នកក៏គួរតែមានអាហារសម្រន់ ឬស្ករគ្រាប់មានរសជាតិជីអង្កាមក្នុងរថយន្តរបស់អ្នកផងដែរ។ វានឹងជួយឲ្យអ្នកបើកបរមានការប្រុងប្រយ័ត្ន និងសម្រាកពេញមួយការធ្វើដំណើរ។

បន្ថែមពីលើគន្លឹះទាំង៤នេះ រថយន្តដែលប្រើដើម្បីបើកបរគួរស្ថិតក្នុងស្ថានភាពល្អ និងត្រៀមខ្លួនជាស្រេចក្នុងការធ្វើដំណើរផ្លូវឆ្ងាយ។ ដូច្នេះការត្រួតពិនិត្យរថយន្តជាបឋមត្រូវពិនិត្យមុនពេលចេញដំណើរ។ មិនថាសារធាតុរាវនៅក្នុងម៉ាស៊ីន ស្ថានភាពហ្វ្រាំង ស្ថានភាពសំបកកង់ និងសម្ពាធសំបកកង់ ទាំងនោះសុទ្ធតែអាចជួយអ្នក ទៅដល់គោលដៅដោយសុវត្ថិភាព៕

ប្រែសម្រួល៖ សាង ស្រីល័ក្ខ

ចុចអាន៖៣ វិធី ព្យាបាលការងងុយគេង ក្រោយញ៉ាំអាហារថ្ងៃត្រង់រួច

ចុចអាន៖ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ?

The post គន្លឹះ ៤ យ៉ាង ជួយដោះស្រាយបញ្ហាងងុយគេង ពេលបើកបរផ្លូវឆ្ងាយ appeared first on Kampuchea Thmey Daily.

៣ វិធី ព្យាបាលការងងុយគេង ក្រោយញ៉ាំអាហារថ្ងៃត្រង់រួច

សាង ស្រីល័ក្ខ — Fri, 01 Jul 2022 08:26:25 +0000

មនុស្សជាច្រើនមានទំនោរទៅរកការងងុយគេងនៅពេលថ្ងៃ។ ជាពិសេសបន្ទាប់ពីអាហារថ្ងៃត្រង់ ដូច្នេះកម្ពុជាថ្មីសូមបង្ហាញពីមូលហេតុ នៃការងងុយគេងពេលថ្ងៃ ឲ្យកាន់តែលម្អិតជាងនេះ។

មូលហេតុនៃការងងុយគេងពេលថ្ងៃ មូលហេតុចម្បងដែលមនុស្សភាគច្រើន មានអារម្មណ៍ងងុយគេងច្រើនជាងធម្មតាគឺបណ្ដាលមកពីកង្វះជាតិដែកនៅក្នុងខ្លួន ដែលជាសមាសធាតុសំខាន់នៃប្រូតេអ៊ីនអេម៉ូក្លូប៊ីននៅក្នុងឈាម។ កង្វះជាតិដែកបង្អាក់សមត្ថភាពដឹកអុកស៊ីសែនពីសួតទៅផ្នែកផ្សេងៗនៃរាងកាយ។ អេម៉ូក្លូប៊ីនប្រូតេអ៊ីនរបស់រាងកាយថយចុះ នេះបណ្តាលឲ្យដកដង្ហើមខ្លីៗ និងញ័រទ្រូង។ អត្រារំលាយអាហាររបស់រាងកាយថយចុះ មានអារម្មណ៍ក្រៀមក្រំនៅពេលថ្ងៃ មានបញ្ហាក្នុងការគេង រហូតដល់ធ្វើឲ្យអ្នកមានអារម្មណ៍ងងុយគេងគ្រប់ពេល។

ហេតុអ្វីបានជាយើងតែងតែមានអារម្មណ៍ងងុយគេង បន្ទាប់ពីញ៉ាំអាហារថ្ងៃត្រង់? ការទទួលទានអាហារថ្ងៃត្រង់ នឹងបង្កើនកម្រិតជាតិស្ករក្នុងឈាមរបស់អ្ន កយ៉ាងឆាប់រហ័ស។ ជាលទ្ធផល កោសិកាខួរក្បាលផលិតប្រូតេអ៊ីនបញ្ជូនសរសៃប្រសាទតិចជាងមុន ដែលរំញោចខួរក្បាលហៅថា Orexin ដែលបណ្តាលឲ្យមនុស្សមានអារម្មណ៍ងងុយគេង បន្ទាប់ពីអាហាររួច។

កត្តាសំខាន់សម្រាប់ការពារការងងុយគេង បន្ទាប់ពីអាហារថ្ងៃត្រង់ ៖

១ ញ៉ាំយឺតៗ ហើយទំពារឲ្យបានហ្មត់ចត់ ការទំពារយឺតៗ នឹងធ្វើឲ្យអ្នកមានអារម្មណ៍ឆ្អែត។ នេះនឹងការពារអ្នកពីការងងុយគេងក្រោយអាហារ និងការពារការធាត់។

២ ញ៉ាំបន្លែ ផ្សិត និងសារ៉ាយជាមុនសិន ជាតិសរសៃអាហារដែលមាននៅក្នុងបន្លែ ផ្សិត និងសារ៉ាយសមុទ្រជាដើម នឹងជួយពន្យឺតការរំលាយអាហារ និងការស្រូបជាតិស្ករចូលទៅក្នុងរាងកាយ។ ការទទួលទានអាហារបែបនេះ មុនពេលម្សៅ គឺល្អក្នុងការទប់ស្កាត់ការកើនឡើងយ៉ាងខ្លាំង នៃកម្រិតជាតិស្ករក្នុងឈាម។

៣ ជ្រើសរើសអាហារដែលមិនធ្វើឲ្យកម្រិតជាតិស្ករក្នុងឈាមកើនឡើង នេះត្រូវបានធ្វើ ដោយការចៀសវាងអាហារដែលមានជាតិស្ករខ្ពស់ និងម្សៅស។ ប៉ុន្តែជ្រើសរើសទទួលទានអង្ករសំរូប បបរ ស្រូវសាលី និងគ្រាប់ធញ្ញជាតិ ដែលមិនបណ្តាលឲ្យមានការកើនឡើងជាតិស្ករក្នុងឈាម។

យ៉ាងណាមិញ ប្រសិនបើអ្នកមានបញ្ហាងងុយគេងពេញមួយថ្ងៃ និងក្រោយអាហារថ្ងៃត្រង់ សូមសាកល្បងវិធីនេះ។ ប៉ុន្តែនេះជាវិធីសាស្ត្រដ៏សំខាន់មួយទៀត ក្នុងការបង្ការ និងដោះស្រាយបញ្ហាទាំងនេះ គឺបង្កើតទម្លាប់គេងឲ្យមានសុខភាពល្អ យ៉ាងហោចណាស់ ៦ ម៉ោងក្នុងមួយថ្ងៃ៕

ប្រែសម្រួល៖ សាង ស្រីល័ក្ខ

ចុចអាន៖ការទទួលទានអាហារពេលល្ងាច រៀងរាល់ម៉ោង ៧ យប់ ជួយឲ្យរស់បានយូរជាងមុន?

ចុចអាន៖ក្រៅពីរសជាតិឆ្ងាញ់ បង្កងអាចផ្ដល់អត្ថប្រយោជន៍សុខភាពច្រើនយ៉ាង

The post ៣ វិធី ព្យាបាលការងងុយគេង ក្រោយញ៉ាំអាហារថ្ងៃត្រង់រួច appeared first on Kampuchea Thmey Daily.

ហេតុអ្វីពេលកំពុងអានសៀវភៅ តែងតែងងុយគេងជានិច្ច?

សាង ស្រីល័ក្ខ — Fri, 01 Apr 2022 06:55:01 +0000

អ្នកណាខ្លះដែលអានអានសៀវភៅ ហើយតែងងងុយគេង? ជាការពិតណាស់ សឹងតែភាគច្រើននៃមនុស្សគ្រប់គ្នាធ្លាប់អានសៀវភៅ តែងងងុយគេងមិនដឹងមូលហេតុ វាប្រៀបដូចជាសារធាតុអ្វីម៉្យាង ដែលដាក់ឲ្យយើងកាន់តែឆាប់ងងុយខ្លាំងលើសមុន។

ហេតុអ្វីបានជា អានសៀវភៅ យើងប្រែជាងងុយគេង?

១ មកពីយើងងងុយដេកហើយ មូលហេតុដំបូងបំផុតគឺ អាចមកពីយើងងងុយដេកស្រាប់ ពេលខ្លះយើងសម្រាកមិនបានគ្រប់គ្រាន់ ធ្វើឲ្យយើងងងុយគេង ប៉ុន្តែយើងត្រូវបង្ខំខ្លួនឯងឲ្យអាន ឧទាហរណ៍ យើងត្រូវអានសៀវភៅ ព្រោះថ្ងៃស្អែកត្រូវប្រឡង តែត្រូវតែបង្ខំចិត្តអាន វាមិនចម្លែកទេ ដែលធ្វើឲ្យយើងងងុយគេង។

២ មាតិកាពីសៀវភៅមិនគួរឲ្យចាប់អារម្មណ៍ មាតិកាដែលមិនចាប់អារម្មណ៍ពីក្នុងសៀវភៅ អាចនឹងធ្វើឲ្យយើងមានអារម្មណ៍ធុញទ្រាន់។ ភាពអផ្សុកនេះ ធ្វើឲ្យខួរក្បាលមិនសូវមានកម្លាំង នោះធ្វើឲ្យយើងកាន់តែងងុយគេងលើសមុនថែមទៀត។

៣ ភ្នែកធ្ងន់ ភ្នែកត្រូវផ្លាស់ទីជុំវិញពេលកំពុងអាន ហើយភ្នែកធ្វើការជាមួយនឹងខួរក្បាលដើម្បីបកស្រាយ និងដំណើរការអ្វីដែលបានអាន ពេលអ្នកទាំងពីរខំប្រឹងធ្វើការ វានឹងធ្វើឲ្យអស់កម្លាំង ហើយធ្វើឲ្យខ្ញុំចង់សម្រាក ។

៤ ពេលអាន តែងតែស្ថិតក្នុងទីតាំងស្រួលពេក នៅពេលដែលយើងអាន យើងមានទំនោរទៅកន្លែងដែលមានផាសុកភាព ដូចជានៅលើគ្រែ លើសាឡុងដែលយើងចូលចិត្ត។ នៅពេលដែលរាងកាយចូលទៅក្នុងស្ថានភាពនៃការសម្រាក នៅក្នុងទីតាំងសុខស្រួល សាច់ដុំនឹងចាប់ផ្ដើមសម្រាក ហើយអ្នកនឹងមានអារម្មណ៍ងងុយគេង កាន់តែខ្លាំងលើសដើម។

ធ្វើម៉េចឲ្យអានសៀវភៅហើយមិនងងុយ? ត្រូវអានសៀវភៅបន្ទាប់ពីសម្រាកឲ្យបានពេញ ហើយអានឲ្យខ្លាំងៗផងដែរ។ មួយវិញទៀត គួរអាននៅកន្លែងដែលមានពន្លឺល្អ និងអង្គុយអាននៅលើកៅអី ផឹកទឹកពេលកំពុងអាន ហើយសម្រាកខ្លះៗ ។ វិធីសាស្ត្រទាំងនេះ អាចជួយអ្នកឲ្យអានបានយូរ ហើយមិនងងុយគេងថែមទៀត៕

ប្រែសម្រួល៖ សាង ស្រីល័ក្ខ

ចុចអាន៖ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ?

ចុចអាន៖អ៉ិន បូបូ ៖ តើយើងយល់បែបណា ចំពោះការរៀនអភ័យទោស?

The post ហេតុអ្វីពេលកំពុងអានសៀវភៅ តែងតែងងុយគេងជានិច្ច? appeared first on Kampuchea Thmey Daily.

ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ?

សាង ស្រីល័ក្ខ — Thu, 13 Jan 2022 06:05:00 +0000

ងងុយគេងបន្ទាប់ពីស្ងាបច្រើនដង គឺជាយន្តការមួយដែលរាងកាយត្រូវការ ដើម្បីយកអុកស៊ីសែនពីខ្យល់ចូលទៅក្នុងចរន្តឈាម។ ក្នុងពេលជាមួយគ្នា នេះវាជួយជំរុញកាបូនឌីអុកស៊ីតនៅក្នុងឈាម ដើម្បីរក្សាតុល្យភាពនៃរាងកាយ។ វាក៏កើតឡើងនៅពេលដែលរាងកាយមិនមានអុកស៊ីសែនគ្រប់គ្រាន់ ឬមានកាបូនឌីអុកស៊ីតច្រើនពេក នៅក្នុងឈាម រហូតដល់ធ្វើឲ្យងងុយដេក។

ការស្ងាបច្រើនដង ជារឿងធម្មតា តែស្ថានភាពខ្លះ យើងក៏គួរទៅពិគ្រោះជាមួយគ្រូពេទ្យឲ្យច្បាស់ ព្រោះករណីមួយទៀត អាចជាជំងឺ។

១ ការគេងមិនគ្រប់គ្រាន់

ការគេងមិនគ្រប់គ្រាន់ អាចបណ្តាលឲ្យងងុយគេងពេលថ្ងៃ ទោះបីជាវាមិនធ្ងន់ធ្ងរក៏ដោយ។ ប៉ុន្តែអាចប៉ះពាល់ដល់ប្រព័ន្ធភាពស៊ាំ វាក៏បង្កហានិភ័យនៃការវិវត្តទៅជាជំងឺធ្ងន់ធ្ងរដូចជា ជំងឺធាត់ បេះដូង ឬធ្លាក់ទឹកចិត្តជាដើម។ ទោះជាយ៉ាងណាក៏ដោយ ព្យាយាមពិនិត្យមើលខ្លួនឯង ប្រសិនបើដូច្នេះមែន ចូរកែសម្រួលទម្លាប់គេងរបស់អ្នក និងកំណត់កាលវិភាគគេងថ្មី។

២ ដេកអត់លក់

ការគេងមិនលក់ គឺជារោគសញ្ញាដែលរាងកាយមានអារម្មណ៍ថាចង់គេង ប៉ុន្តែមិនអាចគេងបានដោយត្រូវចំណាយពេលយូរជាងធម្មតា។ យើងងងុយគេង ប៉ុន្តែក្រោកពីព្រលឹម ឬភ្ញាក់ឡើងនៅពាក់កណ្តាលយប់ និងមិនអាចគេងបានទៀតទេ ធ្វើឲ្យរាងកាយមានអារម្មណ៍ខ្សោយ ។

ដូច្នេះគួរចៀសវាងភេសជ្ជៈដែលមានសារធាតុរំញោចខួរក្បាល ដូចជា ជាតិកាហ្វេអ៊ីន ដែលមាននៅក្នុងតែ កាហ្វេ ភេសជ្ជៈប៉ូវកម្លាំង ជាដើម ប៉ុន្តែប្រសិនបើអ្នកចង់ផឹក គួរតែជ្រើសរើសផឹកមុនម៉ោង ២រសៀល ព្រោះបើផឹកក្រោយម៉ោង ២រសៀល អាចបណ្តាលឲ្យរាងកាយមានបញ្ហាគេងមិនលក់ ប្រសិនបើមានការគេងមិនលក់ញឹកញាប់ អ្នកគួរតែទៅជួបគ្រូពេទ្យ។

៣ ផលប៉ះពាល់នៃថ្នាំ

ក្រុមមនុស្សដែលប្រើថ្នាំ ដូចជាថ្នាំប្រឆាំងនឹងជំងឺធ្លាក់ទឹកចិត្ត ឬក្រុមថ្នាំថប់បារម្ភ អាចបណ្តាលឲ្យមានផលប៉ះពាល់ ងងុយដេក គេងមិនលក់។

៤ ផលវិបាកពីជំងឺដែលមានស្រាប់

មានជំងឺជាច្រើន ដែលធ្វើឲ្យរាងកាយស្រវាំងជាងធម្មតាដូចជា MS (multiple sclerosis) ដុំសាច់ក្នុងខួរក្បាល។ ជំងឺដាច់សរសៃឈាមខួរក្បាល ជំងឺឆ្កួតជ្រូក ជំងឺខ្សោយថ្លើម ជំងឺដាច់សរសៃឈាមខួរក្បាលស្រួចស្រាវ ជាដើម។

វិធីព្យាបាលការអាការស្ងាបញឹកញាប់

ប្រសិនបើយើងជាមនុស្សម្នាក់ដែលស្ងាបច្រើន ហើយបង្កបញ្ហាដូចជា ងងុយដេកអំឡុងពេលធ្វើការ រៀនសូត្រ ឬកិច្ចប្រជុំញឹកញាប់ ខាងក្រោមនេះជាដំណោះស្រាយមួយចំនួន៖

-គេងឲ្យបានគ្រប់គ្រាន់ ដើម្បីបំពេញតម្រូវការរបស់រាងកាយ ជាធម្មតា ៦-៩ ម៉ោង។
-បន្តធ្វើលំហាត់ប្រាណឲ្យបានទៀងទាត់ ដើម្បីរក្សារាងកាយឲ្យស្រស់ថ្លា ។
-ផឹកទឹកឲ្យបានច្រើន ដើម្បីបន្ថែមភាពស្រស់ស្រាយដល់រាងកាយ។
-ចៀសវាងអាហារម្សៅ និងជាតិស្ករលើស ព្រោះញ៉ាំម្សៅ និងស្ករច្រើនពេកនឹងធ្វើឲ្យរាងកាយងងុយគេង។

-ដោយសារតែលំពែងបញ្ជូនអាំងស៊ុយលីនចេញ ដើម្បីរំលាយជាតិស្ករក្នុងបរិមាណច្រើន។ ជាលទ្ធផល កម្រិតជាតិស្ករក្នុងឈាមកើនឡើង បណ្ដាលឲ្យងងុយដេក។
-ក្រោកពីកៅអី នៅពេលអង្គុយនៅក្នុងថ្នាក់ អង្គុយក្នុងទីតាំងដដែលរយៈពេលយូរ។
-បដិសេធ ឬកាត់បន្ថយគ្រឿងស្រវឹង និងភេសជ្ជៈដែលមានជាតិកាហ្វេអ៊ីន។

យ៉ាងណាមិញ ប្រសិនបើយើងបានព្យាយាមកែតម្រូវអាកប្បកិរិយាអាក្រក់នេះរួច ហើយការងងុយគេងញឹកញាប់ នៅតែមិនប្រសើរឡើង នោះគួរតែទៅពិគ្រោះជាមួយវេជ្ជបណ្ឌិត ដើម្បីស្វែងរកមូលហេតុពិតប្រាកដ និងបន្តការព្យាបាលនៅនឹងកន្លែងតែម្ដង៕

ប្រែសម្រួល៖ សាង ស្រីល័ក្ខ

ចុចអាន៖គេងមិនលក់ចង់ប្រើថ្នាំ ត្រូវស្គាល់ប្រភេទថ្នាំ និងវិធីប្រើមានសុវត្ថិភាព

ចុចអាន៖អាហារ ៦ ប្រភេទមិនគួរហូបច្រើនពេកនៅពេលល្ងាច ដែលអាចប៉ះពាល់ដល់ដំណេកធ្ងន់ធ្ងរ

The post ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ? appeared first on Kampuchea Thmey Daily.

គេងបានច្រើនម៉ោងដែរ តែនៅស្ងាបរហូត មកពីអ្វីទៅ? ផឹកកាហ្វេ ឬភេសជ្ជៈផ្អែមៗល្អអត់?

Sonya — Thu, 15 Jul 2021 01:44:02 +0000

មានមនុស្សជាច្រើនតែងតែជួបប្រទះអាការៈស្ងាប បើទោះជាគេងបានច្រើនហើយក៏ដោយ តើនោះមកពីបញ្ហាអ្វីទៅ ទើបចេះតែស្ងាបមិនឈប់ ហើយការផឹកកាហ្វេ ឬភេសជ្ជៈកំប៉ុងផ្អែមៗដែលជួយឲ្យស្វាងជាដំណោះស្រាយល្អ ឬទេ?

វេជ្ជបណ្ឌិត ហ៊ាង រតនា បានឲ្យដឹងថា អាការៈងុយគេងទាំងដែលគេងឆ្អែតហើយនោះមកពីមូលហេតុផ្សេងច្រើន។ លោកបន្តទៀត មានថ្នាំមួយចំនួនធ្វើឲ្យយើងស្ងាបផងដែរដូចជា ថ្នាំបំបាត់ការឈឺចាប់ ថ្នាំព្យាបាលជំងឺផ្ដាសាយ ថ្នាំប្រឆាំងនឹងការបាក់ទឹកចិត្ត និងថ្នាំសសៃប្រសាទជាដើម។

មួយវិញទៀតសម្រាប់អ្នកដែលមិនបានផឹកទឹកគ្រប់គ្រាន់ ក៏បណ្ដាលឲ្យស្ងាបផងដែរ ព្រោះនៅពេលរាងកាយខ្វះជាតិទឹក បរិមាណឈាមរបស់យើងនឹងធ្លាក់ចុះ។ ជាទូទៅឈាមគឺជាអ្នកបញ្ជូនអុកស៊ីសែនទៅកាន់សរីរាង្គផ្សេងៗនៃរាងកាយរួមមានទាំងខួរក្បាល ដូច្នេះហើយបានជាបរិមាណឈាមចុះទាប មិនអាចបញ្ជូនអុកស៊ីសែនគ្រប់គ្រាន់ទៅកាន់ខួរ និងរាងកាយយើងបាននោះទេ ហើយវាក៏ធ្វើឲ្យរាងកាយគ្មានកម្លាំងកំហែង ស្ងាប និងងងុយដេកតែម្ដង។

វេជ្ជបណ្ឌិតឯកទេសទូទៅបកស្រាយបន្តទៀតថា មកពីអាការៈខ្វះឈាម ដែលធ្វើឲ្យរាងកាយយើងមិនអាចទទួលបានអុកស៊ីសែនគ្រប់គ្រាន់ទៅចិញ្ចឹមខួរក្បាល និងរាងកាយ ទើបនាំឲ្យស្ងាបច្រើន។ ទាំងនេះហើយជាមូលហេតុនាំឲ្យស្ងាប ហើយបើសង្កេតឃើញថាខ្លួនស្ងាបមិនឈប់ទោះជាគេងស្កប់ ត្រូវប្រញាប់ទៅជួបគ្រូពេទ្យ ដើម្បីស្វែងរកមូលហេតុច្បាស់លាស់។

ចំពោះដំណោះស្រាយពេលស្ងាបងុយគេង ដោយទៅផឹកកាហ្វេ ឬភេសជ្ជៈប៉ូវកម្លាំង ដើម្បីឲ្យស្វាងមិនល្អចំពោះសុខភាពឡើយ។ ផឹកភេសជ្ជៈភ្លាមអាចមានសមត្ថភាពធ្វើឲ្យស្វាងចែស ព្រោះភេសជ្ជៈទាំងនោះមានជាតិកាហ្វេអ៊ីនខ្ពស់ដែលចូលទៅទប់សកម្មភាព pineal gland ដែល pineal gland នេះ មានតួនាទីផលិតមេឡាតូនីនធ្វើឲ្យងងុយដេក។ ទម្លាប់ផឹកភេសជ្ជៈអស់ទាំងនោះយូរៗទៅ អាចកើតជំងឺទឹកនោមផ្អែម លើសសម្ពាធឈាម តម្រងនោម ថ្លើម និងជំងឺបេះដូងច្រើនប្រភេទទៀត៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ប្រើទូរសព្ទច្រើននៅពេលយប់ អាចប៉ះពាល់ដល់គុណភាពដំណេក

ចុចអាន៖ គេងច្រើនជាង ៩ ម៉ោងក្នុងមួយថ្ងៃ អាចជាសញ្ញាមួយនៃបញ្ហាសុខភាព

The post គេងបានច្រើនម៉ោងដែរ តែនៅស្ងាបរហូត មកពីអ្វីទៅ? ផឹកកាហ្វេ ឬភេសជ្ជៈផ្អែមៗល្អអត់? appeared first on Kampuchea Thmey Daily.