ឋានព្រះចន្ទ Archives - Kampuchea Thmey Daily

NASA នឹងបញ្ជូនអវកាសយានិកទៅភពព្រះចន្ទក្នុងខែមីនា ក្រោយជោគជ័យតេស្តចាក់អ៊ីដ្រូសែន

Chheang — Sat, 21 Feb 2026 02:19:05 +0000

ភ្នាក់ងារអវកាស NASA កំពុងកំណត់គោលដៅបញ្ជូនអវកាសយានិក៤រូប ក្នុងបេសកកម្ម Artemis II ដើម្បីហោះក្រឡឹងជុំវិញភពព្រះចន្ទ នៅថ្ងៃទី៦ខែមីនាខាងមុខនេះ ចេញពីមជ្ឈមណ្ឌលអវកាស Kennedy ក្នុងរដ្ឋផ្លរីដា។ នេះបើយោងតាមការផ្សាយរបស់ទីភ្នាក់ងារព័ត៌មាន AP នាថ្ងៃសៅរ៍ទី២១ខែកុម្ភៈឆ្នាំ២០២៦។

(រូបថត៖ Shutterstock)

លោក Jared Isaacman នាយកគ្រប់គ្រង NASA បានថ្លែងកាលពីថ្ងៃសុក្រថា ក្រុមការងារសម្រេចបាន «វឌ្ឍនភាពដ៏សំខាន់» បន្ទាប់ពីការធ្វើតេស្តសាកល្បងលើកទីពីរបានបញ្ចប់ដោយជោគជ័យ ដោយគ្មានការលេចធ្លាយឧស្ម័នអ៊ីដ្រូសែន ក្រោយពេលដែលបញ្ហានេះបានបង្កការរំខានដល់ការសាកល្បងលើកដំបូង និងធ្វើឲ្យខកខានការបង្ហោះក្នុងខែកុម្ភៈ។

លោក Isaacman បានបញ្ជាក់នៅលើបណ្តាញសង្គម X ថា «ការធ្វើតេស្តនេះគឺជាជំហានដ៏ធំមួយឆ្ពោះទៅរកការវិលត្រឡប់របស់អាមេរិកទៅកាន់បរិយាកាសឋានព្រះចន្ទ»។ ដើម្បីត្រៀមលក្ខណៈឲ្យបានរួចរាល់ អវកាសយានិកអាមេរិក៣រូប និងកាណាដា១រូប បានចាប់ផ្តើមធ្វើចត្តាឡីស័ក ដើម្បីតាមដានសុខភាពរយៈពេល២សប្តាហ៍។ NASA មានរយៈពេលត្រឹមតែ៥ថ្ងៃប៉ុណ្ណោះក្នុងខែមីនា ដើម្បីបង្ហោះរ៉ុក្កែត Space Launch System មុនពេលត្រូវពន្យារពេលទៅដល់ខែមេសា៕

ប្រែសម្រួល៖ ឈាង

The post NASA នឹងបញ្ជូនអវកាសយានិកទៅភពព្រះចន្ទក្នុងខែមីនា ក្រោយជោគជ័យតេស្តចាក់អ៊ីដ្រូសែន appeared first on Kampuchea Thmey Daily.

រុស្ស៊ីគ្រោងបង្កើតរោងចក្រថាមពលនុយក្លេអ៊ែរនៅលើឋានព្រះចន្ទនៅឆ្នាំ២០៣៦

Minea Neu — Wed, 24 Dec 2025 09:19:13 +0000

រុស្ស៊ីគ្រោងនឹងដាក់ដំណើរការរោងចក្រថាមពលនុយក្លេអ៊ែរនៅលើឋានព្រះចន្ទក្នុងមួយទសវត្សរ៍ក្រោយ ដើម្បីផ្គត់ផ្គង់ថាមពលលើយានអវកាសរបស់ខ្លួន ដែលជាស្ថានីយ៍ស្រាវជ្រាវរួមរុស្ស៊ីនិងចិន ខណៈមហាអំណាចធំៗប្រញាប់រុករកផ្កាយរណបធម្មជាតិតែមួយគត់របស់ភពផែនដី។ នេះបើតាមសារព័ត៌មានរ៉យទ័រ។

ព្រះចន្ទនិងទង់ជាតិរុស្ស៊ី។ Reuters

ចាប់តាំងពីអាកាសយានិកសូវៀត លោក Yuri Gagarin បានក្លាយជាមនុស្សដំបូងគេដែលបានឡើងទៅកាន់ទីអវកាសក្នុងឆ្នាំ១៩៦១ ប្រទេសរុស្ស៊ីមានអំណួតថា ខ្លួនជាមហាអំណាចឈានមុខគេក្នុងការរុករកនៅឯទីអវកាស ប៉ុន្តែក្នុងរយៈពេលថ្មីៗនេះ រុស្ស៊ីបានធ្លាក់ចុះវិញ ក្រោយសហរដ្ឋអាមេរិក និងចិនកាន់តែមានអំណាចខ្លាំងជាង។

មហិច្ឆតារបស់រុស្ស៊ីបានរងការវាយប្រហារយ៉ាងខ្លាំងនៅក្នុងខែសីហា ឆ្នាំ២០២៣ នៅពេលដែលបេសកកម្មយន្តហោះ Luna-២៥ គ្មានមនុស្សបើករបស់ខ្លួនបានបុកទៅលើផ្ទៃភពព្រះចន្ទ ខណៈដែលព្យាយាមចុះចត។ ចំណែកលោក Elon Musk បានដំណើរការបង្ហោះយានអវកាសរបស់ខ្លួនជំនួសវិញ ដែលនេះធ្លាប់ជាជំនាញរបស់ប្រទេសរុស្ស៊ី។

ក្រុមហ៊ុនអវកាសរដ្ឋរបស់រុស្ស៊ី Roscosmos បាននិយាយនៅក្នុងសេចក្តីថ្លែងការណ៍មួយថា ខ្លួនគ្រោងនឹងសាងសង់រោងចក្រថាមពលនៅលើភពព្រះចន្ទនៅឆ្នាំ២០៣៦ និងបានចុះហត្ថលេខាលើកិច្ចសន្យាជាមួយក្រុមហ៊ុនអាកាសចរណ៍ Lavochkin Association ដើម្បីធ្វើវា។

ក្រុមហ៊ុន Roscosmos បាននិយាយថា គោលបំណងនៃការបង្កើតរោងចក្រនេះគឺដើម្បីផ្តល់ថាមពលតាមរយៈកម្មវិធីចន្ទគតិរបស់រុស្ស៊ី រួមទាំងរថយន្តរ៉ូវ័រ (rovers) ដែលជាកន្លែងសង្កេត និងហេដ្ឋារចនាសម្ព័ន្ធនៃស្ថានីយស្រាវជ្រាវភពព្រះចន្ទអន្តរជាតិរួមរុស្ស៊ី-ចិនផងដែរ។

ក្រុមហ៊ុន Roscosmos បន្តថា៖«គម្រោងនេះគឺជាជំហានដ៏សំខាន់មួយឆ្ពោះទៅរកការបង្កើតស្ថានីយ៍តាមរយៈព្រះចន្ទ និងជាវិទ្យាសាស្ត្រដែលដំណើរការជាអចិន្ត្រៃយ៍ ហើយផ្លាស់ប្តូរពីបេសកកម្មក្នុងរយៈពេលខ្លី ទៅជាកម្មវិធីរុករកតាមព្រះចន្ទក្នុងរយៈពេលវែង»។

ប្រធានរបស់ក្រុមហ៊ុនអវកាស Roscosmos លោក Dmitry Bakanov បាននិយាយកាលពីខែមិថុនាថា៖«គោលបំណងតែមួយរបស់យើងគឺដើម្បីដាក់រោងចក្រថាមពលនុយក្លេអ៊ែរនៅលើព្រះចន្ទ និងដើម្បីស្វែងយល់ពីភព Venus ដែលត្រូវបានគេស្គាល់ថាជាភព «បងប្អូនស្រី» របស់ផែនដី។

ព្រះចន្ទស្ថិតនៅចម្ងាយ ៣៨៤,៤០០គីឡូម៉ែត្រ ពីភពផែនដី ដើម្បីសម្រួលនៃការវិលជុំវិញរបស់ផែនដីលើអ័ក្សរបស់វា ដែលធានាបាននូវអាកាសធាតុមានស្ថេរភាពជាងមុន។ វាក៏បណ្តាលឱ្យមានខ្យល់ជំនោរនៅក្នុងមហាសមុទ្រពិភពលោកផងដែរ៕

ប្រែសម្រួល៖ ណឺ មិនា

The post រុស្ស៊ីគ្រោងបង្កើតរោងចក្រថាមពលនុយក្លេអ៊ែរនៅលើឋានព្រះចន្ទនៅឆ្នាំ២០៣៦ appeared first on Kampuchea Thmey Daily.

អវកាសយានិកចិន២រូប អាចដើរក្នុងលំហរយៈពេល៩ម៉ោង បំបែកកំណត់ត្រាអាមេរិក

Chheang — Wed, 18 Dec 2024 09:14:44 +0000

ចិន ប្រកាសថា អវកាសយានិក២នាក់របស់ខ្លួន បានបញ្ចប់ការដើរក្នុងលំហអាកាសរយៈពេល៩ម៉ោង ដែលជាការបំបែកកំណត់ត្រាចាស់របស់សហរដ្ឋអាមេរិកកាលពីឆ្នាំ២០០១។ នេះបើយោងតាមការចុះផ្សាយរបស់សារព័ត៌មាន CNN នៅថ្ងៃទី១៨ខែធ្នូឆ្នាំ២០២៤។

(រូបភាព៖ ទីភ្នាក់ងារអវកាសចិន Manned Space Agency)

បើយោងតាមទីភ្នាក់ងារអវកាសចិន Manned Space Agency អវកាសយានិកទាំង២រូប មានឈ្មោះថា Cai Xuzhe និង Song Lingdong ជាសមាជិកនៃយានអវកាស Shenzhou-19។ ពួកគេ បានបិទបញ្ចប់សកម្មភាពដើរក្នុងលំហ នៅមុនម៉ោង១០យប់ថ្ងៃអង្គារទី១៧ខែធ្នូឆ្នាំ២០២៤។

វាជាជោគជ័យថ្មីមួយទៀត និងចុងក្រោយបង្អស់សម្រាប់មហាយក្សចិន ចំពោះមហិច្ឆតាកម្មវិធីអវកាសរបស់ខ្លួន។

យោងតាមអង្គការ NASA កំណត់ត្រាដើរលំហលើកមុន មានរយៈពេល៨ម៉ោង៥៦នាទី ធ្វើឡើងដោយអវកាសយានិកអាមេរិក លោក James Voss និងលោកស្រី Susan Helms នៅថ្ងៃទី១២ខែមីនាឆ្នាំ២០០១។

ចិន បានខិតខំប្រឹងប្រែងយ៉ាងខ្លាំង ក្នុងការធ្វើខ្លួនជាតួអង្គសំខាន់ក្នុងលំហអវកាស ប្រជែងជាមួយសហរដ្ឋអាមេរិក និងបណ្ដាប្រទេសដទៃ។ សកម្មភាពលំហអវកាសរបស់ចិន កំពុងសម្លឹងមើលកាន់តែខ្លាំងលើផលប្រយោជន៍ផ្នែកវិទ្យាសាស្ត្រ ធនធាន និងសន្តិសុខជាតិ។

រដ្ឋបាលអវកាសជាតិចិន ក្នុងរយៈពេលប៉ុន្មានឆ្នាំចុងក្រោយនេះ បានអនុវត្តជាបន្តបន្ទាប់នូវបេសកកម្មមនុស្សយន្តនៅលើភពព្រះចន្ទ។ កាលពីពាក់កណ្ដាលឆ្នាំ២០២៤ យានអវកាសចិន Chang’e-6 បានវិលត្រឡប់មកភពផែនដីវិញ ដោយពាំនាំមកជាមួយនូវសំណាកដ៏កម្រយកពីតំបន់មួយចំហៀងទៀតនៃព្រះចន្ទ ហើយរឿងនេះ ត្រូវបានគេសាទរថា ជាគន្លឹះដ៏សំខាន់ ជួយឲ្យក្រុមអ្នកវិទ្យាសាស្រ្ត សិក្សាកាន់តែច្បាស់អំពីរបៀបដែលភពទាំងឡាយកកើតឡើង៕

ដោយ៖ ឈាង

The post អវកាសយានិកចិន២រូប អាចដើរក្នុងលំហរយៈពេល៩ម៉ោង បំបែកកំណត់ត្រាអាមេរិក appeared first on Kampuchea Thmey Daily.

រុស្ស៊ី ឥណ្ឌា និងចិន គ្រោងចាប់ដៃគ្នាបង្កើតរោងចក្រនុយក្លេអ៊ែរលើភពព្រះចន្ទ

Chheang — Mon, 09 Sep 2024 09:12:34 +0000

ឥណ្ឌា និងចិន អាចនឹងចាប់ដៃសហការគ្នាជាមួយរុស្ស៊ី ក្នុងការបង្កើតរោងចក្រថាមពលនុយក្លេអ៊ែរនៅលើភពព្រះចន្ទ។ គម្រោងនេះ ត្រូវបានដឹកនាំដោយក្រុមហ៊ុនអវកាសរដ្ឋរុស្ស៊ី Rosatom ដែលមានបំណងបង្កើតរោងចក្រថាមពលនុយក្លេអ៊ែរតូចមួយទំហំ ០,៥មេហ្គាវ៉ាត់ សម្រាប់ប្រើប្រាស់ក្នុងមូលដ្ឋាននៅលើភពព្រះចន្ទ។ នេះបើយោងតាមការចុះផ្សាយរបស់ទីភ្នាក់ងារព័ត៌មានរដ្ឋរុស្ស៊ី Tass ដែលបានដកស្រង់ប្រភពពីលោក Alexey Likhachev ប្រធានក្រុមហ៊ុន Rosatom។

(រូបភាព៖ Bing Image Creator)

ថ្លែងនៅវេទិកា Eastern Economic Forum កាលពីសប្ដាហ៍មុន លោក Likhachev បានបង្ហើបឲ្យដឹងថា ប្រទេសឥណ្ឌា និងចិន មានការចាប់អារម្មណ៍ក្នុងកិច្ចសហការជាមួយរុស្ស៊ី ដើម្បីបង្កើតរោងចក្រថាមពលនុយក្លេអ៊ែរនៅលើព្រះចន្ទ ដែលជាតម្រូវការផ្គត់ផ្គង់ថាមពលចាំបាច់សម្រាប់គម្រោងសង់មូលដ្ឋានអចិន្ត្រៃយ៍នៅទីនោះ។

ឥណ្ឌាបានបង្ហាញពីបំណងចង់ចូលរួមវិនិយោគ ដោយហេតុថាគម្រោងនេះគាប់ជួននឹងគម្រោងបេសកកម្មបញ្ជូនយានគ្មានមនុស្សបើក និងសង់មូលដ្ឋានអចិន្ត្រៃយ៍របស់ខ្លួនលើភពព្រះចន្ទនាឆ្នាំ២០៤០ខាងមុខ។

ចំណែក រុស្ស៊ី និងចិន បានប្រកាសគម្រោងសាងសង់មូលដ្ឋាននៅលើព្រះចន្ទរួមគ្នា កាលពីឆ្នាំ២០២១ ដែលមានឈ្មោះថា International Lunar Research Station (ILRS) ត្រៀមដាក់ឲ្យដំណើរការចន្លោះពីឆ្នាំ២០៣៥ និងឆ្នាំ២០៤៥។

ទីភ្នាក់ងារអវកាសរុស្ស៊ី Roscosmos ធ្លាប់បានប្រកាសកាលពីខែឧសភាថា ការងារពាក់ព័ន្ធនឹងគម្រោងសង់រោងចក្រថាមពលនុយក្លេអ៊ែរកំពុងដំណើរការ ហើយត្រៀមតំឡើងម៉ាស៊ីនរ៉េអាក់ទ័រនុយក្លេអ៊ែរលើព្រះចន្ទនៅឆ្នាំ២០៣៦។

ការសាងសង់រោងចក្រថាមពលនុយក្លេអ៊ែរលើព្រះចន្ទ ត្រូវបានគេរំពឹងថានឹងមានភាពស្មុគស្មាញខ្លាំង។ រុស្ស៊ីបានស្នើថា ការសាងសង់ភាគច្រើនអាចត្រូវបានអនុវត្តដោយស្វ័យភាព ដោយកាត់បន្ថយតម្រូវការសម្រាប់ការចូលរួមដោយផ្ទាល់របស់មនុស្ស៕

ដោយ៖ ឈាង

The post រុស្ស៊ី ឥណ្ឌា និងចិន គ្រោងចាប់ដៃគ្នាបង្កើតរោងចក្រនុយក្លេអ៊ែរលើភពព្រះចន្ទ appeared first on Kampuchea Thmey Daily.

របកគំហើញថ្មី! អ្នកវិទ្យាសាស្ត្រចិន ប្រើដីភពព្រះចន្ទផលិតជាទឹក

Chheang — Sat, 24 Aug 2024 00:30:00 +0000

អ្នកវិទ្យាសាស្ត្រចិន បានរកឃើញ «វិធីសាស្រ្តថ្មី» ផលិតទឹកក្នុងបរិមាណដ៏ច្រើនដោយប្រើគំរូដី ដែលយកមកពីភពព្រះចន្ទក្នុងបេសកកម្មមួយកាលពីឆ្នាំ២០២០។

(រូបភាព៖ EPA)

នៅឆ្នាំ២០២០ បេសកកម្ម Chang’e-5 របស់ប្រទេសចិន បានក្លាយជាជោគជ័យដំបូងរបស់មនុស្សជាតិក្នុងរយៈពេល៤៤ឆ្នាំកន្លងទៅ ដែលបានពាំនាំយកគំរូដីភពព្រះចន្ទមកសិក្សា។ ទូរទស្សន៍ររដ្ឋចិន CCTV បានរាយការណ៍កាលពីថ្ងៃទី២២ខែសីហាថា ក្រុមអ្នកស្រាវជ្រាវមកពីបណ្ឌិតសភាវិទ្យាសាស្ត្រចិន បានរកឃើញថា សារធាតុរ៉ែនៅក្នុងដីភពព្រះចន្ទមានផ្ទុកអ៊ីដ្រូសែនច្រើន ហើយពេលធ្វើប្រតិកម្មជាមួយសារធាតុផ្សេងទៀតខណៈកម្ដៅឡើងខ្ពស់ខ្លាំងបំផុត វាអាចបង្កើតបានជាចំហាយទឹក។

តាមរយៈវិធីសាស្ត្រថ្មីនេះ ដីភពព្រះចន្ទ១តោននឹងអាចផលិតទឹកបានប្រហែល ៥១ទៅ៧៦គីឡូក្រាម ស្មើនឹងទឹកចំណុះជាង៥ម៉ឺនមីលីលីត្រ ឬស្មើនឹងទឹកប្រើប្រាស់ប្រចាំថ្ងៃរបស់មនុស្ស ៥០នាក់។

CCTV បានផ្សាយថា៖ «បន្ទាប់ពីរយៈពេល៣ឆ្នាំនៃការស្រាវជ្រាវស៊ីជម្រៅ និងការផ្ទៀងផ្ទាត់ម្តងហើយម្តងទៀត វិធីសាស្រ្តថ្មីនៃការប្រើប្រាស់ដីភពព្រះចន្ទដើម្បីផលិតទឹកក្នុងបរិមាណដ៏ច្រើន ត្រូវបានរកឃើញ ដែលត្រូវបានគេរំពឹងថានឹងផ្តល់នូវមូលដ្ឋានគំរូដ៏សំខាន់ សម្រាប់ការសាងសង់ស្ថានីយ៍ស្រាវជ្រាវវិទ្យាសាស្ត្រភពព្រះចន្ទ និងលំហអវកាសនាពេលអនាគត»។

របកគំហើញនេះអាចផ្ដល់ជាសារប្រយោជន៍ចម្បង សម្រាប់គម្រោងរយៈពេលជាច្រើនសិបឆ្នាំរបស់រដ្ឋាភិបាលក្រុងប៉េកាំង ក្នុងការកសាងស្ថានីយអវកាសអចិន្ត្រៃយ៍ ចំពេលមានការប្រកួតប្រជែងរវាងសហរដ្ឋអាមេរិក និងចិន ដើម្បីស្វែងរកនិងជីកយកធនធានរ៉ែនៅលើភពព្រះចន្ទ។

ដីភពព្រះចន្ទ (រូបភាព៖ NASA)

ប្រធានអង្គការ NASA លោក Bill Nelson បានលើកឡើងម្តងហើយម្តងទៀតអំពីការព្រមានចំពោះភាពជឿនលឿននៃកម្មវិធីអវកាសរបស់ប្រទេសចិន និងលទ្ធភាពនៃទីក្រុងប៉េកាំងកាន់កាប់ទីតាំងដែលសម្បូរធនធានបំផុតនៅលើភពព្រះចន្ទ។

ចិនសង្ឃឹមថា បេសកកម្មភពព្រះចន្ទនាពេលថ្មីៗនេះ និងនាពេលអនាគតនឹងបង្កើតមូលដ្ឋានគ្រឹះ ដើម្បីសាងសង់ស្ថានីយ៍ស្រាវជ្រាវភពព្រះចន្ទអន្តរជាតិ (ILRS) ដែលជាគំនិតផ្តួចផ្តើមមួយដែលខ្លួនកំពុងដឹកនាំរួមគ្នាជាមួយប្រទេសរុស្ស៊ី។

ទីភ្នាក់ងារអវកាសចិន បានកំណត់យកឆ្នាំ២០៣៥ ជាកាលបរិច្ឆេទដែល «ស្ថានីយ៍មូលដ្ឋាន» នៅលើប៉ូលខាងត្បូងរបស់ព្រះចន្ទនឹងត្រូវបានសាងសង់ ជាមួយនឹងការបន្ថែមស្ថានីយអវកាសវិលជុំវិញព្រះចន្ទនៅឆ្នាំ២០៤៥។

សូមបញ្ជាក់ថា សារៈសំខាន់នៃទឹកនៅលើភពព្រះចន្ទ ក្រៅតែពីជួយឲ្យវត្តមានជាអចិន្ត្រៃយ៍របស់មនុស្សជាតិអាចដំណើរការបាន វាក៏នឹងជួយជំរុញការរុករកលំហនាពេលអនាគតផងដែរ។ ប្រធានអង្គការ NASA ធ្លាប់បានលើកឡើងកាលពីខែឧសភាថា ទឹកដែលបានរកឃើញនៅលើភពព្រះចន្ទ អាចប្រើដើម្បីបង្កើតឥន្ធនៈគ្រាប់រ៉ុកកែតអ៊ីដ្រូសែន ដែលជំរុញការរុករកអវកាសបន្ថែមទៀតទៅកាន់ភពព្រះអង្គារ និងភពដទៃទៀត៕

ដោយ៖ ឈាង

The post របកគំហើញថ្មី! អ្នកវិទ្យាសាស្ត្រចិន ប្រើដីភពព្រះចន្ទផលិតជាទឹក appeared first on Kampuchea Thmey Daily.

២០០លានឆ្នាំទៀត មួយថ្ងៃនឹងមានរយៈពេល២៥ម៉ោង

Sok Sovann — Sat, 17 Aug 2024 02:47:38 +0000

ការស្រាវជ្រាវថ្មីមួយបានបង្ហាញថា ពេលថ្ងៃនៅលើផែនដី កាន់តែមានរយៈពេលយូរជាងមុន ព្រោះថា ព្រះចន្ទកាន់តែឃ្លាតចេញពីភពផែនដី ហើយបើតាមការព្យាកររបស់ក្រុមអ្នកវិទ្យាសាស្រ្ត ប្រហែល២០០លានឆ្នាំទៀត មួយថ្ងៃលើភពផែនដីនឹងមានរយៈពេល២៥ម៉ោង។

(រូបថត៖ NOAA)

តាមការចុះផ្សាយរបស់ Daily Mail កាលពីថ្ងៃសុក្រទី១៦ខែសីហា, អ្នកវិទ្យាសាស្ត្របានរកឃើញថា នៅពេលព្រះចន្ទផ្លាស់ទីកាន់តែឆ្ងាយ ឥទ្ធិពលនៃទំនាញរបស់វា ធ្វើឲ្យផែនដីវិលកាន់តែយឺតហើយមានពេលថ្ងៃកាន់តែយូរ។

លោក Stephen Meyers សាស្ត្រាចារ្យផ្នែកភូគព្ភសាស្ត្រនៅសាកលវិទ្យាល័យ Wisconsin-Madison សហរដ្ឋអាមេរិក បានពន្យល់ថា នៅពេលដែលព្រះចន្ទរំកិលទៅឆ្ងាយផែនដី ទំនាញក៏កាន់តែថយចុះ ហើយផែនដីវិលយឺតជាងមុន។

(រូបថត៖ AP)

ព្រះចន្ទស្ថិតនៅចម្ងាយប្រហែល ៣៨៣ ០២៣ គីឡូម៉ែត្រពីភពផែនដីរបស់យើង ប៉ុន្តែការស្រាវជ្រាវពីមុនបានរកឃើញថា ព្រះចន្ទកំពុងរសាត់ទៅឆ្ងាយប្រហែល ៣.៨១សង់ទីម៉ែត្រក្នុងមួយឆ្នាំ ដែលនេះមានន័យថា វាចំណាយពេលយូរជាងមុន ដើម្បីវិលជុំវិញភពផែនដី។

ការសិក្សានេះ ធ្វើឲ្យគេនឹកឃើញដល់របកគំហើញរបស់ក្រុមអ្នកស្រាវជ្រាវនៅសាកលវិទ្យាល័យ ETH Zurich នៃប្រទេសស្វីស ដែលបង្ហាញថា បច្ចុប្បន្ន ពេលថ្ងៃ នៅលើភពផែនដី មានរយៈពេលយូរជាងពេលយប់ ហើយនិន្នាការនេះនឹងកើនឡើងជាបន្តទៀត ដោយសារតែបម្រែបម្រួលអាកាសធាតុ។

(រូបថត៖ Shutterstock)

នៅពេលទឹកកកប៉ូលរលាយ នៅតំបន់ហ្គ្រីនលែននិងអង់តាក់ទិក ចំណុចកណ្តាលនៃទំនាញផែនដីបានងាកទៅរកខ្សែអេក្វាទ័រ ដោយបន្ថយល្បឿននៃបង្វិលជុំរបស់ភពផែនដីបន្តិចម្តងៗ ហើយក្រុមអ្នកស្រាវជ្រាវព្យាករថា ប្រសិនបើកម្រិតបំភាយឧស្ម័ន មិនកាត់បន្ថយទេនោះ រយៈពេលថ្ងៃនឹងកើនឡើង ២.៦២ មិល្លីវិនាទី ត្រឹមចុងឆ្នាំ២១០០។

ត្បិតតែផលប៉ះពាល់នេះ ទំនងជាមិនចោទជាបញ្ហាធំដល់មនុស្សភាគច្រើនក៏ពិតមែន ប៉ុន្តែក្រុមអ្នកស្រាវជ្រាវនិយាយថា វាអាចបង្កគ្រោះថ្នាក់ដល់ការធ្វើដំណើរក្នុងលំហអវកាសបាន៕

អត្ថបទ៖ សុខ សុវណ្ណ

ចុចអាន៖ កំណើនកម្តៅផែនដីធ្វើឲ្យពេលថ្ងៃ អូសបន្លាយពេលយូរជាងពេលយប់

The post ២០០លានឆ្នាំទៀត មួយថ្ងៃនឹងមានរយៈពេល២៥ម៉ោង appeared first on Kampuchea Thmey Daily.

រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស

Chheang — Tue, 16 Jul 2024 09:04:19 +0000

ជាលើកដំបូង អ្នកវិទ្យាសាស្ត្របានរកឃើញរណ្ដៅល្អាងដ៏ជ្រៅមួយកន្លែងនៅលើភពព្រះចន្ទ ដែលមានជម្រៅយ៉ាងហោចណាស់ ១០០ម៉ែត្រ ហើយវាអាចក្លាយជាកន្លែងដ៏ល្អសម្រាប់មនុស្សក្នុងការកសាងមូលដ្ឋានអចិន្ត្រៃយ៍នៅទីនោះបាន។

(រូបភាព៖ NASA)

យោងតាមការចុះផ្សាយរបស់សារព័ត៌មាន BBC កាលពីថ្ងៃទី១៥ ខែកក្កដា ឆ្នាំ២០២៤ រណ្ដៅដែលទើបរកឃើញថ្មីនេះ គ្រាន់តែជារណ្ដៅមួយប៉ុណ្ណោះក្នុងចំណោមរណ្ដៅរាប់រយកន្លែងទៀត ដែលក្រុមអ្នកវិទ្យាសាស្ត្រមិនទាន់រកឃើញនៅលើភពព្រះចន្ទ។ អ្នកវិទ្យាសាស្ត្រ២រូបគឺលោក Lorenzo Bruzzone និងលោក Leonardo Carrer នៅសកលវិទ្យាល័យ Trento ប្រទេសអ៊ីតាលី បានប្រើបច្ចេកវិទ្យាប្រព័ន្ធរ៉ាដា Mare Tranquillitatis ក្នុងការវាស់ជម្រៅ និងសណ្ឋានរណ្ដៅល្អាង។

បើតាមពិតទៅ ព្រោះតែមានទំហំធំខ្លាំង រណ្ដៅនេះអាចមើលឃើញដោយភ្នែកទទេពីផែនដី ហើយវាក៏ជាកន្លែងមួយនៅជិតកន្លែងដែលយាន Apollo ទី១១ ធ្លាប់បានចុះចតដែរ កាលពីឆ្នាំ១៩៦៩។ រណ្ដៅនេះទៀតសោត ទំនងជាត្រូវបានបង្កើតឡើងកាលពីរាប់លាន ឬរាប់ពាន់លានឆ្នាំមុន នៅពេលមានកម្អែភ្នំភ្លើងហូរនៅលើភពព្រះចន្ទ ហើយបង្កើតបានជាផ្លូវរូងក្រោមដីយ៉ាងដូច្នេះ។ ឧទាហរណ៍ក្នុងករណីស្រដៀងគ្នាដែលបង្កើតឲ្យមានរណ្ដៅដ៏ជ្រៅបែបនេះនៅលើព្រះចន្ទ គឺរណ្ដៅភ្នំភ្លើងនៅលើកោះ Lanzarote ប្រទេសអេស្ប៉ាញ ដែលក្រុមអ្នកវិទ្យាសាស្ត្របាននាំគ្នាទៅសិក្សានៅទីនោះ ដើម្បីស្វែងយល់បន្ថែមទៀតពីគម្រោងតាំងមូលដ្ឋាននៅលើភពព្រះចន្ទ។

លោកសាស្ត្រចារ្យ Leonardo Carrer បានរៀបរាប់ថា ជីវិតដំបូងនៅលើផែនដីផ្ដើមចេញពីការរស់នៅក្នុងរណ្ដៅល្អាង ហេតុដូច្នោះហើយវាជារឿងសមហេតុផលដែលមនុស្សគួរតែអាចរស់នៅក្នុងរណ្ដៅល្អាងលើភពព្រះចន្ទដូចគ្នា។

កន្លងមក ប្រទេសជាច្រើន កំពុងប្រជែងគ្នា ដើម្បីពាំនាំនូវវត្តមានរបស់មនុស្សទៅតាំងមូលដ្ឋានអចិន្ត្រៃយ៍នៅលើព្រះចន្ទ ខណៈបញ្ហាប្រឈមនាពេលបច្ចុប្បន្ននេះ គឺពួកគេត្រូវការពារអវកាសយានិកពីវិទ្យុសកម្ម បម្រែបម្រួលសីតុណ្ហភាព និងអាកាសធាតុនៅក្នុងលំហ។

អ្នកស្រី Helen Sharman ដែលជាអវកាសយានិកអង់គ្លេសដំបូងគេធ្វើដំណើរទៅកាន់ទីអវកាស បានប្រាប់ BBC ថា រណ្ដៅដែលទើបរកឃើញថ្មី ទំនងជាកន្លែងល្អ អាចយកប្រើប្រាស់សម្រាប់សាងសង់មូលដ្ឋាន។ ទន្ទឹមនោះ អវកាសយានិករូបនេះ បានប៉ាន់ប្រមាណថា មនុស្សអាចទៅរស់នៅក្នុងរណ្ដៅនេះនៅក្នុងរយៈពេល២០ ទៅ៣០ឆ្នាំខាងមុខ។

រណ្ដៅល្អាងនៅលើភពព្រះចន្ទ នឹងផ្ដល់ជាប្រយោជន៍ចំពោះមនុស្សជាតិ ដែលអាចឲ្យយើងដឹងពីប្រវត្តិនៃការកកើតភពព្រះចន្ទ ព្រមទាំងប្រព័ន្ធព្រះអាទិត្យថែមទៀតផង ដោយផ្អែកលើការសិក្សាផ្ទាំងថ្មនៅខាងក្នុងរណ្ដៅល្អាង ដែលមិនធ្លាប់រងការខូចខាត ឬបំផ្លាញដោយសារកត្តាអាកាសធាតុនៅក្នុងលំហនោះទេ ដូច្នេះវាអាចផ្តល់នូវកំណត់ត្រាភូមិសាស្ត្រយ៉ាងទូលំទូលាយដែលមានអាយុកាលរាប់ពាន់លានឆ្នាំ៕

(រូបភាព៖ BBC)

ដោយ៖ ឈាង

The post រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស appeared first on Kampuchea Thmey Daily.

យានអវកាសចិន ជោគជ័យ នាំយកសំណាកដ៏កម្រពីឋានព្រះចន្ទ មកផែនដីដើម្បីសិក្សា

Sok Sovann — Tue, 25 Jun 2024 07:29:56 +0000

នៅទីបំផុត ក្រោយបំពេញបេសកកម្មអស់រយៈពេល២ខែនៅឋានព្រះចន្ទ យានអវកាសរបស់ចិនឈ្មោះ Chang’e-6 បានវិលត្រឡប់មកភពផែនដីវិញហើយ ដោយពាំនាំមកជាមួយនូវសំណាកដ៏កម្រយកពីតំបន់មួយចំហៀងទៀតនៃព្រះចន្ទ ហើយរឿងនេះ ត្រូវបានគេសាទរថា ជាគន្លឹះដ៏សំខាន់ ជួយឲ្យក្រុមអ្នកវិទ្យាសាស្រ្ត សិក្សាកាន់តែច្បាស់អំពីរបៀបដែលភពទាំងឡាយកកើតឡើង។

(រូបថត៖ Weibo)

តាមសេចក្តីរាយការណ៍របស់ប្រព័ន្ធផ្សព្វផ្សាយរដ្ឋចិន នៅថ្ងៃអង្គារទី២៥ខែមិថុនា, យានអវកាស Chang’e-6 បានចុះចតដោយជោគជ័យនៅស្ថានីយ៍ក្នុងតំបន់ Inner Mongolia នាវេលាម៉ោង ២:០៧នាទីរសៀល (ម៉ោងនៅទីក្រុងប៉េកាំង)។

ចំពោះបេសកកម្មនេះផងដែរ បានធ្វើឲ្យចិន ក្លាយជាប្រទេសដំបូងគេលើពិភពលោក ដែលបញ្ជូនយានអវកាសទៅដល់តំបន់មួយចំហៀងទៀតនៃព្រះចន្ទសែនឆ្ងាយ ជាកន្លែងដែលមនុស្សមិនធ្លាប់មើលឃើញទាល់តែសោះ ដោយសារតែវាមានចម្ងាយឆ្ងាយហួស និងស្ថានភាពផ្ទៃព្រះចន្ទ ពោរពេញទៅដោយរណ្តៅយក្ស។

(រូបថត៖ BBC)

សូមបញ្ជាក់ថា យាន Chang’e 6 ត្រូវបានបាញ់បង្ហោះចេញពីមជ្ឈមណ្ឌលអវកាស Wenchang លើកោះហៃណាន ភាគខាងត្បូងប្រទេសចិន កាលពីថ្ងៃទី៣ខែឧសភា ហើយប៉ុន្មានសប្តាហ៍ក្រោយមក វាបានចុះចតដោយជោគជ័យនៅជិតប៉ូលខាងត្បូងរបស់ព្រះចន្ទ។ នៅពេលទៅដល់ មនុស្សយន្ត បានជីកយកដីនិងថ្ម ព្រមទាំងថតរូបផ្ទៃខាងលើ និងដោតទង់ជាតិចិននៅលើនោះផងដែរ។

បច្ចុប្បន្ននេះ ប្រទេសមហាអំណាចពិភពលោក មិនត្រឹមតែប្រជែងគ្នាលើភពផែនដីប៉ុណ្ណោះទេ ប៉ុន្តែក៏កំពុងឈ្លោះទាស់ទែងគ្នានៅទីអវកាសផងដែរ។ ជាក់ស្តែងទីក្រុងប៉េកាំង បានជះធនធានយ៉ាងសន្ធឹកចូលទៅក្នុងកម្មវិធីអវកាសរបស់ខ្លួន នារយៈពេលមួយទសវត្សរ៍កន្លងមកនេះ ដើម្បីតាមឲ្យទាន់សហរដ្ឋអាមេរិក និងរុស្ស៊ី៕

អត្ថបទ៖ សុខ សុវណ្ណ

ចុចអាន៖ យានអវកាសចិន ជោគជ័យ នាំយកសំណាកដ៏កម្រពីឋានព្រះចន្ទ មកផែនដីដើម្បីសិក្សា

The post យានអវកាសចិន ជោគជ័យ នាំយកសំណាកដ៏កម្រពីឋានព្រះចន្ទ មកផែនដីដើម្បីសិក្សា appeared first on Kampuchea Thmey Daily.

ឋានព្រះចន្ទ Archives - Kampuchea Thmey Daily

NASA នឹងបញ្ជូន​អវកាសយានិកទៅភពព្រះចន្ទក្នុងខែមីនា ក្រោយជោគជ័យតេស្តចាក់អ៊ីដ្រូសែន

រុស្ស៊ី​​គ្រោង​​បង្កើត​​រោង​ចក្រ​​ថាមពល​​នុយក្លេអ៊ែរ​​នៅ​លើ​​ឋាន​ព្រះចន្ទ​នៅឆ្នាំ​២០៣៦

អវកាសយានិក​ចិន​២​រូប អាច​ដើរ​ក្នុង​លំហរយៈពេល​៩ម៉ោង បំបែក​កំណត់ត្រា​អាមេរិក

រុស្ស៊ី ឥណ្ឌា និងចិន គ្រោង​ចាប់​ដៃ​គ្នា​បង្កើត​រោងចក្រ​នុយក្លេអ៊ែរ​លើ​ភព​ព្រះ​ចន្ទ

របកគំហើញ​ថ្មី! អ្នក​វិទ្យាសាស្ត្រ​ចិន ប្រើ​ដី​ភព​ព្រះ​ចន្ទ​ផលិត​ជា​ទឹក

២០០លានឆ្នាំទៀត មួយថ្ងៃនឹងមានរយៈពេល២៥ម៉ោង

រកឃើញ​រណ្ដៅល្អាង​ដ៏​ជ្រៅ​នៅ​លើភព​ព្រះ​ចន្ទ ទំនង​អាច​សង់​មូលដ្ឋាន​អចិន្ត្រៃយ៍​សម្រាប់​មនុស្ស

យានអវកាសចិន ជោគជ័យ នាំយកសំណាកដ៏កម្រពីឋានព្រះចន្ទ មកផែនដីដើម្បីសិក្សា

NASA នឹងបញ្ជូនអវកាសយានិកទៅភពព្រះចន្ទក្នុងខែមីនា ក្រោយជោគជ័យតេស្តចាក់អ៊ីដ្រូសែន

រុស្ស៊ីគ្រោងបង្កើតរោងចក្រថាមពលនុយក្លេអ៊ែរនៅលើឋានព្រះចន្ទនៅឆ្នាំ២០៣៦

អវកាសយានិកចិន២រូប អាចដើរក្នុងលំហរយៈពេល៩ម៉ោង បំបែកកំណត់ត្រាអាមេរិក

រុស្ស៊ី ឥណ្ឌា និងចិន គ្រោងចាប់ដៃគ្នាបង្កើតរោងចក្រនុយក្លេអ៊ែរលើភពព្រះចន្ទ

របកគំហើញថ្មី! អ្នកវិទ្យាសាស្ត្រចិន ប្រើដីភពព្រះចន្ទផលិតជាទឹក

រកឃើញរណ្ដៅល្អាងដ៏ជ្រៅនៅលើភពព្រះចន្ទ ទំនងអាចសង់មូលដ្ឋានអចិន្ត្រៃយ៍សម្រាប់មនុស្ស