NASA នឹងបញ្ជូន​អវកាសយានិកទៅភពព្រះចន្ទក្នុងខែមីនា ក្រោយជោគជ័យតេស្តចាក់អ៊ីដ្រូសែន

ភ្នាក់ងារអវកាស NASA កំពុងកំណត់គោលដៅបញ្ជូន​អវកាសយានិក៤រូប ក្នុងបេសកកម្ម Artemis II ដើម្បីហោះក្រឡឹងជុំវិញ​ភព​ព្រះចន្ទ នៅថ្ងៃទី៦ខែមីនាខាងមុខនេះ ចេញពីមជ្ឈមណ្ឌលអវកាស Kennedy ក្នុងរដ្ឋផ្លរីដា។ នេះ​បើយោង​តាម​ការ​ផ្សាយ​របស់​​ទីភ្នាក់ងារ​ព័ត៌មាន AP នា​ថ្ងៃសៅរ៍​ទី​២១​ខែ​កុម្ភៈ​ឆ្នាំ​២០២៦។

លោក Jared Isaacman នាយកគ្រប់គ្រង NASA បានថ្លែងកាលពីថ្ងៃសុក្រ​ថា ក្រុមការងារសម្រេចបាន «វឌ្ឍនភាពដ៏សំខាន់» បន្ទាប់ពីការធ្វើតេស្តសាកល្បងលើកទីពីរបានបញ្ចប់ដោយជោគជ័យ ដោយគ្មានការលេចធ្លាយឧស្ម័នអ៊ីដ្រូសែន ក្រោយពេលដែលបញ្ហានេះបានបង្កការរំខានដល់ការសាកល្បងលើកដំបូង និងធ្វើ​ឲ្យ​ខកខានការបង្ហោះក្នុងខែកុម្ភៈ។

លោក Isaacman បានបញ្ជាក់នៅលើបណ្តាញសង្គម X ថា «ការធ្វើតេស្តនេះគឺជាជំហានដ៏ធំមួយឆ្ពោះទៅរកការវិលត្រឡប់របស់អាមេរិកទៅកាន់បរិយាកាសឋាន​ព្រះចន្ទ»។ ដើម្បីត្រៀមលក្ខណៈ​ឲ្យបានរួចរាល់ អវកាសយានិកអាមេរិក៣រូប និងកាណាដា១រូប បានចាប់ផ្តើមធ្វើ​ចត្តាឡីស័ក ដើម្បីតាមដានសុខភាពរយៈពេល​២សប្តាហ៍។ NASA មានរយៈពេលត្រឹមតែ​៥ថ្ងៃប៉ុណ្ណោះក្នុងខែមីនា ដើម្បីបង្ហោះរ៉ុក្កែត Space Launch System មុនពេលត្រូវពន្យារពេលទៅដល់ខែមេសា៕

ប្រែសម្រួល៖ ឈាង