កំណើន​កម្តៅ​ផែនដី​​ធ្វើ​ឲ្យពេលថ្ងៃ​ អូសបន្លាយ​ពេល​យូរជាង​ពេលយប់

តាមការចុះផ្សាយរបស់ Daily Mail កាលពីថ្ងៃពុធទី១៧ខែកក្កដាឆ្នាំ២០២៤ ក្រុមអ្នកស្រាវជ្រាវនៅសាកលវិទ្យាល័យ ETH Zurich នៃប្រទេសស្វីស បានបង្ហាញថា បច្ចុប្បន្ននេះ ពេលថ្ងៃ នៅលើភពផែនដី មានរយៈពេលយូរជាងពេលយប់ ហើយនិន្នាការនេះនឹងកើនឡើងជាបន្តទៀត ដោយសារតែបម្រែបម្រួលអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលទឹកកកប៉ូលរលាយ នៅតំបន់ហ្គ្រីនលែននិងអង់តាក់ទិក ចំណុចកណ្តាលនៃទំនាញផែនដីបានងាកទៅរកខ្សែអេក្វាទ័រ ដោយបន្ថយល្បឿននៃបង្វិលជុំរបស់ភពផែនដីបន្តិចម្តងៗ ហើយក្រុមអ្នកស្រាវជ្រាវព្យាករថា ប្រសិនបើកម្រិតបំភាយឧស្ម័ន មិនកាត់បន្ថយទេនោះ រយៈពេលថ្ងៃនឹងកើនឡើង ២,៦២ មិល្លីវិនាទី ត្រឹមចុងឆ្នាំ២១០០។

ត្បិតតែផលប៉ះពាល់នេះ ទំនងជាមិនចោទជាបញ្ហាធំដល់មនុស្សភាគច្រើនក៏ពិតមែន ប៉ុន្តែក្រុមអ្នកស្រាវជ្រាវនិយាយថា វាអាចបង្កគ្រោះថ្នាក់ដល់ការធ្វើដំណើរក្នុងលំហអវកាសបាន។

សហអ្នកនិពន្ធឈ្មោះ Benedikt Soja នៅសាកលវិទ្យាល័យ ETH Zurich បាននិយាយថា៖«លឿនដំបូងរបស់ផែនដីនឹងយឺតជាងមុន ដោយសារតែម៉ាស់ផ្លាស់ទីឆ្ងាយចេញពីអ័ក្សបង្វិល។​ នៅពេលដំណើររបស់ផែនដីយឺតជាងមុន ពេលវេលាដែលខ្លួនត្រូវការដើម្បីបង្វិលលើអ័ក្សច្បាស់ជាកើនឡើងដែរ ជាហេតុធ្វើឲ្យរយៈពេលថ្ងៃមានកាន់តែយូរជាងកម្រិតស្តង់ដារ ៨៦ ៤០០វិនាទី»។

ទោះបីជាយ៉ាងណាក៏ដោយ ទ្រឹស្តីខាងលើនេះ មិនមែនជាបញ្ហាតែមួយ ដែលអាចបណ្តាលឲ្យផែនដីវិលយឺតជាងមុន នាំឲ្យពេលថ្ងៃយូរជាងពេលយប់នោះទេ។ ជាក់ស្តែង នៅក្នុងឯកសារមួយទៀត ក្រុមអ្នកស្រាវជ្រាវ ក៏បានរកឃើញបញ្ហាផ្សេងផងដែរ។

បញ្ហាមួយទៀតគឺ “Tidal Friction” ដែលបណ្តាលមកពីទំនាញរបស់ព្រះចន្ទនៅលើផ្ទៃមហាសមុទ្រ។ កត្តានេះ បានបន្ថែមពេលថ្ងៃប្រហែល ២,៤មិល្លីវិនាទី រៀងរាល់សតវត្ស ក្នុងរយៈពេលរាប់លានឆ្នាំមកនេះ៕

អត្ថបទ៖ សុខ សុវណ្ណ

ចុចអាន៖ ព្យុះព្រះអាទិត្យដ៏ធំមួយទៀត នឹងវាយប្រហារចំផែនដីពេញទំហឹង នៅសប្តាហ៍នេះ