ប្រទេសព្រុយណេ Archives - Kampuchea Thmey Daily

ស្ដេច ព្រុយណេ រុះរើគណៈរដ្ឋមន្ត្រី ដោយតែងតាំង បុត្រា Mateen ជារដ្ឋមន្រ្តីការបរទេសទាំងវ័យក្មេង

សាង ស្រីល័ក្ខ — Sat, 06 Jun 2026 02:31:00 +0000

ស្តេចស៊ុលតង់ Hassanal Bolkiah របស់ប្រទេសព្រុយណេ បានតែងតាំងព្រះបុត្រា Abdul Mateen ដែលទើបមានអាយុ៣៤ឆ្នាំ ជារដ្ឋមន្រ្តីការបរទេស នៅក្នុងការរុះរើគណៈរដ្ឋមន្រ្តីទ្រង់ទ្រាយធំមួយ ដែលត្រូវបានគេមើលឃើញយ៉ាងទូលំទូលាយថា ជាការរៀបចំយុទ្ធសាស្ត្រផ្ទេរអំណាចទុកជាមុន សម្រាប់អ្នកដឹកនាំជំនាន់ក្រោយ ក្នុងព្រះរាជាណាចក្រដ៏សម្បូរបែបដោយប្រេងកាតមួយនេះ។

ស្តេចស៊ុលតង់ Hassanal Bolkiah និងព្រះបុត្រា Abdul Mateen អំឡុងពេលចូលរួមកិច្ចប្រជុំកំពូលអាស៊ាននៅក្នុងប្រទេសកម្ពុជា

ក្នុងនាមជាព្រះរាជបុត្រទី ១០ និងជាបុត្រាទី ៤ របស់ព្រះចៅស៊ុលតង់ ព្រះអង្គម្ចាស់ Abdul Mateen ស្ថិតនៅលំដាប់ឆ្ងាយបន្តិចក្នុងការឡើងស្នងរាជ្យ ប៉ុន្តែរូបសម្រស់ដ៏ស្រស់សង្ហារបស់ព្រះអង្គ បានទាក់ទាញអ្នកគាំទ្រជាង ៣ លាននាក់នៅលើបណ្តាញសង្គម Instagram ដែលជួយផ្តល់នូវមុខមាត់បែបសម័យទំនើបសម្រាប់ព្រះរាជវង្សានុវង្ស។ នេះបើយោងតាមការចេញផ្សាយពីទីភ្នាក់ងារសារព័ត៌មាន Reuters ។

ចំពោះព្រះអង្គម្ចាស់ Mateen គឺជាមន្ត្រីយោធាដែលបានទទួលការបណ្តុះបណ្តាលពីអង់គ្លេស នៅក្នុងកងកម្លាំងប្រដាប់អាវុធព្រុយណេ ទ្រង់ក៏ជាអ្នកបើកបរឧទ្ធម្ភាគចក្រ និងជាអ្នកចូលចិត្តលេងកីឡាប៉ូឡូ (Polo)មួយរូបផងដែរ។ បុត្រអង្គនេះ តែងតែអមព្រះបិតាក្នុងដំណើរទស្សនកិច្ចផ្លូវការនៅបរទេស រួមទាំងកិច្ចប្រជុំកំពូលការទូតនានា ជាពិសេសទ្រង់បានយាងអមបិតាក្នុងអំឡុងពេលចូលរួមកិច្ចប្រជុំកំពូលអាស៊ានលើកទី៤០ និងទី៤១ នៅក្នុងប្រទេសកម្ពុជា កាលពីឆ្នាំ ២០២២។

ដោយឡែក ក្រៅពីព្រះអង្កម្ចាស់ Mateen, បុត្រាប៉ុន្មានអង្គទៀតក៏ត្រូវបានតែងតាំងផងដែរ។ ព្រះរាជបុត្រាច្បងទីពីររបស់ព្រះអង្គ គឺព្រះអង្គម្ចាស់ Abdul Malik ត្រូវបានតែងតាំងជារដ្ឋមន្ត្រីនៅខុទ្ទកាល័យនាយករដ្ឋមន្ត្រី ដែលនេះជាតួនាទីក្នុងគណៈរដ្ឋមន្ត្រីលើកដំបូងរបស់ព្រះអង្គ ។ ចំណែកឯព្រះរាជបុត្រច្បងគឺ ព្រះរាជទាយាទ Al-Muhtadee Billah នៅតែបន្តរក្សាតំណែងជារដ្ឋមន្ត្រីជាន់ខ្ពស់នៅខុទ្ទកាល័យនាយករដ្ឋមន្ត្រី (PMO) ដដែល ។ ព្រះអង្គគឺជាអ្នកបន្តវេនផ្ទាល់លំដាប់ទី១ ក្នុងការឡើងស្នងរាជ្យបល្ល័ង្ក។

ទោះបីជាប្រគល់តំណែងឲ្យបុត្រាក្ដី តែព្រះចៅស៊ុលតង់ Hassanal បានមានព្រះរាជបន្ទូលនៅក្នុងការប្រកាសតាមកញ្ចក់ទូរទស្សន៍ និងបានបង្ហោះនៅលើគេហទំព័រផ្លូវការរបស់រដ្ឋាភិបាលថា ព្រះអង្គនឹងនៅតែបន្តកាន់តំណែងសំខាន់ៗដដែល រួមមាន នាយករដ្ឋមន្ត្រី, រដ្ឋមន្ត្រីក្រសួងការពារជាតិ និងរដ្ឋមន្ត្រីក្រសួងហិរញ្ញវត្ថុ។

គួរបញ្ជាក់ថា ស្ដេចស៊ូលតង់ Hassanal Bolkiah សព្វថ្ងៃមានព្រះជន្ម៧៩ព្រះវស្សា ហើយមួយរយៈចុងក្រោយនេះ ព្រះអង្គមានបញ្ហាព្រះរាជសុខភាពមួយចំនួន ក្នុងនោះមានទាំងការវះកាត់ផ្លាស់ប្តូរក្បាលជង្គង់ កាលពីខែមករា ហើយទ្រង់បានបង្ហាញព្រះរាជវត្តមានជាសាធារណៈតិចជាងមុន ក្នុងឆ្នាំនេះ។ កាលពីឆ្នាំមុន ព្រះអង្គក៏ត្រូវបានគេបញ្ជូនទៅមន្ទីរពេទ្យ ដោយសារតែព្រះកាយពលទន់ខ្សោយខ្លាំង អំឡុងពេលចូលរួមកិច្ចប្រជុំកំពូលអាស៊ាន នៅក្នុងរដ្ឋធានីគូឡាឡាំពួរ ប្រទេសម៉ាទ្បេស៊ី៕

អត្ថបទ ៖ សាង ស្រីល័ក្ខ

បុត្រាបុត្រីទាំង ១២ អង្គរបស់ស្ដេចស៊ុលតង់ សុទ្ធតែមានព្រះរាជកិច្ចធំៗក្នុងជួររាជវាំង ព្រុយណេ

The post ស្ដេច ព្រុយណេ រុះរើគណៈរដ្ឋមន្ត្រី ដោយតែងតាំង បុត្រា Mateen ជារដ្ឋមន្រ្តីការបរទេសទាំងវ័យក្មេង appeared first on Kampuchea Thmey Daily.

ចៅស្តេចព្រុយណេ Muntaqim កំពុងអភិវឌ្ឍខ្លួនយ៉ាងល្អនៅលីគព្រុយណេ

chean virakbot — Mon, 25 Nov 2024 05:09:33 +0000

ចៅរបស់ស្តេចព្រុយណេ ព្រះអង្គម្ចាស់ Abdul Muntaqim ស៊ុតបាន២គ្រាប់ឲ្យក្រុម DPMM FC ក្នុងលីគកំពូលព្រុយណេ Brunei Super League នៅពេលយកឈ្នះក្រុម Wijaya FC ដោយលទ្ធផល ៧-០ កាលពីថ្ងៃអាទិត្យ ទី២៤ ខែវិច្ឆិកា ឆ្នាំ២០២៤។

ព្រះអង្គម្ចាស់ Abdul Muntaqim មិនត្រឹមតែជាកីឡាករវ័យក្មេងរកបានគ្រាប់បាល់ប៉ុណ្ណោះទេ ប៉ុន្តែព្រះអង្គម្ចាស់ជាប្រធានក្រុមវ័យក្មេងទៀតផង។ បច្ចុប្ប ក្លិប DPMM FC មិនទាន់ស្គាល់បរាជ័យឡើយ ក្នុងចំណោម៥ប្រកួតគឺឈ្នះទាំងអស់ កំពុងឈរលេខ៣ តាមពីក្រោយក្រុមលេខ១ Kasuka ដែលបានលេងបាន៦ប្រកួត និងក្រុមលេខ២ Kota Ranger លេងបាន៧ប្រកួត។

ព្រះអង្គម្ចាស់ Abdul Muntaqim ប្រសូតនៅថ្ងៃទី១៧ ខែមីនា ឆ្នាំ២០០៧ ដែលគិតត្រឹមចុងឆ្នាំ២០២៤ ទើបព្រះជន្ម១៧វស្សា។ ព្រះអង្គម្ចាស់ជាបុត្រច្បងរបស់ព្រះអង្គម្ចាស់ Al-Muhtadee Billah ដែលជាបុត្រាច្បងរបស់ស្តេចព្រុយណេ Hassanal Bolkiah និងមាតាព្រះនាម Sarah។

មុនពេលចាប់ផ្តើមលេងបាល់ទាត់អាជីព ព្រះអង្គម្ចាស់ Abdul Muntaqim បានលេងកីឡាបញ្ចសីឡាត។ បន្ទាប់មកព្រះអង្គម្ចាស់បានចាប់ផ្តើមហ្វឹកហាត់កីឡាហែលទឹកដែលបានចូលរួមប្រកួតជើងឯកព្រុយណេលើកទី៥ Brunei Open & Master ដែលពេលនោះព្រះអង្គបានបង្កើតកំណត់ត្រាថ្នាក់ជាតិ២គឺ វិញ្ញាសាហែលសេរី១០០ម៉ែត្រដោយប្រើថិរវេលា ១.៣៣.០៥នាទី និងវិញ្ញាសាហែល Backstroke ចម្ងាយ៥០ម៉ែត្រដោយថិរវេលា៥១.១២វិនាទី។

ក្រោយមក ព្រះអង្គម្ចាស់ចាប់លេងបាល់បោះដោយបានចូលរួមប្រកួតយុវជនថ្នាក់ជាតិជាច្រើនក្នុងនោះមានពានរង្វាន់ Brunei Youth Cup អាយុ១៣ឆ្នាំ មុនពេលចាប់ផ្តើមហ្វឹកហាត់កីឡាបាល់ទាត់បន្ថែមទៀត។

ព្រះអង្គម្ចាស់ Abdul Muntaqim បានចូលរួមជាមួយក្រុមយុវជនរបស់ក្លិប DPMM FC ក្នុងឆ្នាំ២០២១ ដែលលេងក្នុងលីគយុវជនព្រុយណេ។ ឆ្នាំ២០២៣ ព្រះអង្គម្ចាស់មានឈ្មោះនៅក្នុងក្រុមយុវជន DPMM FC សម្រាប់ការចូលរួមប្រកួតលីគយុវជនអាយុក្រោម២០ឆ្នាំដែលក្រុមរបស់ព្រះអង្គបានឈ្នះជើងឯក ប៉ុន្តែព្រះអង្គម្ចាស់មិនបានចូលរួមទទួលពានរង្វាន់ទេ ដោយសារជាប់ព្រះរាជកិច្ចនៅប្រទេសជប៉ុន។ ដោយសមត្ថភាពលេចធ្លោជាលំដាប់ ព្រះអង្គម្ចាស់ត្រូវបានដាក់បញ្ចូលឈ្មោះក្នុងក្រុមធំ ហើយបានបង្ហាញខ្លួនក្នុងលីគកំពូលរបស់ប្រទេសព្រុយណេ។

កាលពីថ្ងៃអាទិត្យ ទី២៤ ខែវិច្ឆិកា ឆ្នាំ២០២៤ ព្រះអង្គម្ចាស់ Abdul Muntaqim រកបានគ្រាប់បាល់ដំបូងក្នុងលីគដោយរកបានដល់ទៅ២គ្រាប់ថែមទៀតក្នុងលទ្ធផលដែលក្រុម DPMM FC បានយកឈ្នះ Wijaya FC ដោយលទ្ធផល ៧-០។

និយាយពីជម្រើសជាតិវិញ ឆ្នាំ២០២២ ព្រះអង្គម្ចាស់ត្រូវបានកោះហៅចូលរួមក្នុងក្រុមជម្រើសជាតិព្រុយណេអាយុក្រោម១៦ឆ្នាំ (U16) ដែលព្រះអង្គបានក្លាយជាប្រធានក្រុមសម្រាប់ការចូលរួមប្រកួតពានរង្វាន់យុវជនអាស៊ាន AFF U16 Championship ឆ្នាំ២០២២ នៅប្រទេសព្រុយណេ។

នៅឆ្នាំ២០២៤ ព្រះអង្គម្ចាស់ Abdul Muntaqim ត្រូវបានកោះហៅចូលរួមក្នុងក្រុមជម្រើសជាតិព្រុយណេអាយុក្រោម១៩ឆ្នាំ នៅពេលព្រះអង្គទើបតែព្រះជន្ម១៧វស្សាដើម្បីចូលរួមប្រកួតពានរង្វាន់ ASEAN U-19 Boys Championship នៅប្រទេសឥណ្ឌូណេស៊ី។

បច្ចុប្បន្ន ក្រៅពីការសិក្សា ព្រះអង្គម្ចាស់កំពុងផ្តោតជាចម្បងលើអាជីពបាល់ទាត់ទាំងនៅក្លិប DPMM FC និងក្រុមជម្រើសជាតិព្រុយណេ ដោយមិនខ្វល់អ្វីទាំងអស់ពាក់ព័ន្ធលុយកាក់ ពីព្រោះមាតាបិតារបស់ព្រះអង្គម្ចាស់មានទ្រព្យសម្បត្តិរាប់រយលានដុល្លារសម្រាប់ហើយ៕

អត្ថបទ៖ វីរបុត្រ

The post ចៅស្តេចព្រុយណេ Muntaqim កំពុងអភិវឌ្ឍខ្លួនយ៉ាងល្អនៅលីគព្រុយណេ appeared first on Kampuchea Thmey Daily.

ស្ងប់ស្ងាត់មួយរយៈ ព្រះអង្គម្ចាស់ Mateen ដឹកដៃមហេសី យាងទៅក្រេបទឹកឃ្មុំនៅ អ៊ីតាលី

សាង ស្រីល័ក្ខ — Tue, 28 May 2024 04:05:19 +0000

បន្ទាប់ពីបាត់ព្រះភ័ក្រនិងស្ងប់ស្ងាត់មួយរយៈធំ ព្រះអង្គម្ចាស់ Mateen បានបង្ហោះរូបភាពនៅលើគណនី Instagram ផ្ទាល់របស់ព្រះអង្គ ជាមួយនឹងមហេសី Anisha Rosnah អំឡុងពេលទ្រង់យាងទៅក្រេបទឹកឃ្មុំ ក្នុងទីក្រុង Tuscany ប្រទេសអ៊ីតាលីជាលើកដំបូង។

ព្រះអង្គម្ចាស់ Mateen និងមហេសី Anishaនៅ Tuscany ប្រទេសអ៊ីតាលី

នៅក្នុងរូបភាពដែលបានបង្ហោះកាលពីថ្ងៃសុក្រ ព្រះអង្គម្ចាស់និងមហេសីទ្រង់ស្លៀកសំលៀកបំពាក់ពណ៌ស និងខោពណ៌ទឹកដោះគោ អមដោយទេសភាពបៃតងដ៏រស់រវើកនៃវាលស្មៅ ដើមឈើ និងផ្លូវក្រួស។ វិស្សមកាលនេះស្ថិតនៅ Tuscany គឺជាដំណើរកម្សាន្តឯកជនលើកដំបូងរបស់គូស្នេហ៍រាជវង្ស ចាប់តាំងពីពិធីរៀបអភិសេកក្នុងខែមករារបស់ទ្រង់។ ប៉ុន្តែដោយសារទំនួលខុសត្រូវរបស់ព្រះអង្គម្ចាស់ Mateen រួមទាំងការអមដំណើរព្រះបិតាស្ដេចស៊ុលតង់Hassanal Bolkiah ក្នុងការធ្វើដំណើរយាងផ្លូវការជាច្រើន ទើបធ្វើឲ្យទ្រង់រវល់ពុំមានពេលវេលាគ្រប់គ្រាន់ក្រោយអភិសេករួច។

សម្រាប់ Tuscany គឺជាទិសដៅស្នេហាដ៏ពេញនិយមសម្រាប់គូស្នេហ៍តារាល្បីៗ ក្នុងការក្រេបទឹកឃ្មុំរបស់ពួកគេជាមួយតារាសម្តែងជនជាតិអាមេរិក George Clooney និងមេធាវីអង់គ្លេស Amal Alamuddin អ្នកសង្គមអាមេរិក Kim Kardashian និងតារារ៉េប Kanye West និងតារាសម្តែងអាមេរិក Jessica Biel និងតារាចម្រៀង Justin Timberlake ទាំងអស់បានចំណាយពេលក្រេបទឹកឃ្មុំនៅក្នុងតំបន់អ៊ីតាលី។

សូមរម្លឹកដែរថា ពិធីអភិសេករបស់ទ្រង់បានប្រារព្ធឡើង កាលពីថ្ងៃទី ០៧ ដល់ថ្ងៃទី ១៦ ខែមករា នៅរដ្ឋធានី Bandar Seri Begawan នៃប្រទេសព្រុយណេ ដោយមានភ្ញៀវប្រមាណ ៥,០០០ នាក់ ដែលរួមមានសែរាជវង្ស, ឥស្សរជន និងមេដឹកនាំនយោបាយល្បីៗមកពីជុំវិញពិភពលោកបានចូលរួមពិធីអភិសេករបស់ព្រះរាជបុត្រ Abdul Mateen និងព្រះនាង Anisha Rosnah Adam សរបញ្ជាក់ពីសារៈសំខាន់ជាសកល នៃព្រឹត្តិការណ៍មួយនេះផងដែរ៕

អត្ថបទ៖ សាង ស្រីល័ក្ខ

ចុចអាន៖គ្រងឈុតអប្សរាយប់មិញ ឌីជេ សូដា ទទួលការសរសើរយ៉ាងព្រោងព្រាតពីទស្សនិកជន កម្ពុជា

The post ស្ងប់ស្ងាត់មួយរយៈ ព្រះអង្គម្ចាស់ Mateen ដឹកដៃមហេសី យាងទៅក្រេបទឹកឃ្មុំនៅ អ៊ីតាលី appeared first on Kampuchea Thmey Daily.

សែរាជវង្ស, ឥស្សរជន និងមេដឹកនាំនយោបាយជុំវិញពិភពលោក បង្ហាញវត្តមានក្នុងពិធីអភិសេកបុត្រាស្ដេចស៊ុលតង់

សាង ស្រីល័ក្ខ — Thu, 18 Jan 2024 02:03:24 +0000

ភ្ញៀវប្រមាណ ៥,០០០ នាក់ ដែលរួមមានសែរាជវង្ស, ឥស្សរជន និងមេដឹកនាំនយោបាយល្បីៗមកពីជុំវិញពិភពលោកបានចូលរួមពិធីអភិសេករបស់ព្រះរាជបុត្រ Abdul Mateen និងព្រះនាង Anisha Rosnah Adam ដោយបញ្ជាក់ពីសារៈសំខាន់ជាសកលនៃព្រឹត្តិការណ៍នេះ។

ទស្សនាវដ្ដី Time បានរាយការណ៍ថា អ្នកចូលរួមរួមមានសមាជិកនៃគ្រួសាររាជវង្សដូចជាស្តេច Abdullah នៃម៉ាឡេស៊ី និងម្ចាស់ក្សត្រី Azizah, ស្តេចប៊ូតង់ Jigme និងម្ចាស់ក្សត្រី Jetsun Pema, ព្រះនាង Noor Asem នៃប្រទេសហ្ស៊កដានី និងព្រះស្វាមី Amr Fareed Zaidan ។

ចំណែកឯ មេដឹកនាំនយោបាយរួមមាន នាយករដ្ឋមន្ត្រីម៉ាឡេស៊ី Anwar Ibrahim, ប្រធានាធិបតីឥណ្ឌូណេស៊ី Joko Widodo, នាយករដ្ឋមន្ត្រីសិង្ហបុរី Lee Hsien Loong និងប្រធានាធិបតីហ្វីលីពីន Ferdinand Marcos Jr. ក៏មានវត្តមានផងដែរ។

ដោយឡែក យោងតាមគេហទំព័រ Harper’s Bazaar Arabia បានផ្សាយថា ព្រះនាង Hanouf នៃប្រទេសអារ៉ាប៊ីសាអូឌីត ព្រះអង្គម្ចាស់ Nasser នៃប្រទេសបារ៉ែន ព្រះនាង Noor នៃប្រទេស Jordan និង Rashid Bin Humaid Al Nuaimi មកពីគ្រួសាររាជវង្ស Emirati ក៏ត្រូវបានគេប្រទះឃើញនៅក្នុងព្រឹត្តិការណ៍នោះដែរ។

បន្ទាប់ពីចូលរួមពិធីអភិសេកស្ដេចស៊ុលតង់ Hassanal Bolkiah នាយករដ្ឋមន្ត្រីសិង្ហបុរី លោក Lee Hsien Loong បានសម្តែងនូវសេចក្តីរីករាយនៅលើប្រព័ន្ធផ្សព្វផ្សាយសង្គមហ្វេសបុកតាមរយៈការចែករំលែករូបថត និងអបអរសាទរដល់គូស្នេហ៍រាជវង្សថា “តាងនាមរដ្ឋាភិបាល និងប្រជាជនសិង្ហបុរី ខ្ញុំសូមជូនពរព្រះអង្គម្ចាស់ Mateen និងព្រះនាង Anisha Rosnah Adam សូមមានសុភមង្គល និងជោគជ័យក្នុងការធ្វើដំណើររួមគ្នានាពេលខាងមុខ”។

ព្រះអង្គម្ចាស់ Mateen ជាព្រះរាជបុត្ររបស់ស្តេចស៊ុលតង់ Hassanal Bolkiah បានរៀបអភិសេកជាមួយចៅស្រីរបស់ទីប្រឹក្សារាជវាំង Yang Mulia Anisha Rosnah ក្នុងការប្រារព្ធពិធីរយៈពេល ១០ ថ្ងៃ ចាប់ពីថ្ងៃទី ៧ ដល់ថ្ងៃទី ១៦ ខែមករា។ គូស្នេហ៍រាជវង្សបានចូលរួមក្នុងពិធីផ្សេងៗរួមទាំងព្រឹត្តិការណ៍ Khatam Quran នៅថ្ងៃទី ០៨ ខែមករា ពិធីបុណ្យ Berbedak Mandi ឬពិធីម្សៅនៅថ្ងៃទី ១០ ខែមករា និងពិធីបុណ្យដ៏ឧឡារិកនៅវិហារ Sultan Omar Ali Saifuddien នៅថ្ងៃទី ១១ ខែមករា។

យ៉ាងណាក៏ដោយ ដូចដែលបានរាយការណ៍ដោយសារព័ត៌មាន CNN ព្រឹត្តិការណ៍ដ៏ធំបានឈានដល់កម្រិតកំពូលនៅថ្ងៃទី ១៤ ខែមករា ជាមួយនឹងពិធីអភិសេកផ្លូវការរបស់ព្រះអង្គម្ចាស់ Mateen ក្នុងឯកសណ្ឋានយោធា និងកូនក្រមុំរបស់ទ្រង់ ក្នុងឈុតពណ៌សតុបតែងគ្រឿងអលង្ការជាមួយពេជ្រ tiara យ៉ាងភ្លឺចែងចាំង៕

អត្ថបទ៖ សាង ស្រីល័ក្ខ

ចុចអាន៖មនុស្សរាប់ម៉ឺននាក់តម្រង់ជួរតាមដងផ្លូវ ស្វាគមន៍រាជបុត្រ Mateen និងព្រះនាង Anisha យ៉ាងគគ្រឹកគគ្រេង

The post សែរាជវង្ស, ឥស្សរជន និងមេដឹកនាំនយោបាយជុំវិញពិភពលោក បង្ហាញវត្តមានក្នុងពិធីអភិសេកបុត្រាស្ដេចស៊ុលតង់ appeared first on Kampuchea Thmey Daily.

មនុស្សរាប់ម៉ឺននាក់តម្រង់ជួរតាមដងផ្លូវ ស្វាគមន៍រាជបុត្រ Mateen និងព្រះនាង Anisha យ៉ាងគគ្រឹកគគ្រេង

សាង ស្រីល័ក្ខ — Tue, 16 Jan 2024 02:15:50 +0000

ទាំងប្រជាជនក្នុងស្រុកនិងអ្នកទេសចរមកពីគ្រប់មជ្ឈដ្ឋាន បានប្រមូលផ្តុំគ្នានៅរាជធានី Bandar Seri Begawan កាលពីថ្ងៃទី១៤ ខែមករា ឆ្នាំ២០២៤ ដើម្បីស្វាគមន៍គូស្វាមីភរិយារាជវង្សព្រះអង្គម្ចាស់ Abdul Mateen និងព្រះនាង Anisha Rosnah Adam យ៉ាងគគ្រឹកគគ្រេង។

យោងតាមប្រភពពី Borneobul របស់ព្រុយណេ បានបង្ហាញនូវទិដ្ធភាពមនុស្សរាប់ពាន់នាក់តម្រង់ជួរនៅតាមដងផ្លូវ ដោយគ្រវីទង់ជាតិ និងការស្វាគមន៍របស់ពួកគេដោយក្នុងនោះមានអ្នកខ្លះនាំមកនូវតន្ត្រី ការអបអរសាទរ និងភាពរំភើបទៅកាន់រាជធានីយ៉ាងច្រើនកុះករ។

ក្នុងនោះផងដែរ គេសង្កេតឃើញងថា ព្រះអង្គម្ចាស់ Abdul Mateen ទ្រង់បានគ្រងនូវឯកសណ្ឋានយោធា ខណៈព្រះនាង Anisha Rosnah Adam ស្ថិតក្នុងសំលៀកបំពាក់ពណ៌សវែងឆើតឆាយ តុបតែងដោយគ្រឿងអលង្ការភ្លឺចែងចាំងតម្លៃរាប់ម៉ឺនដុល្លារ។ ទ្រង់ទាំងពីរអង្គបានឈរនៅក្នុងរថយន្ត Rolls Royce បើកចំហរដែលនៅខាងមុខដោយមន្ត្រីដែលកាន់គ្រឿងរាជវាំង ហើយគ្រវីដៃទៅកាន់ហ្វូងមនុស្សដែលមានចិត្តរំភើប និងបង្ហាញភាពសប្បាយរីករាយយ៉ាងខ្លាំង នៅពេលទ្រង់បានធ្វើដំណើរឆ្លងកាត់រាជធានីមួយនេះ។

ទោះយ៉ាងណាក៏ដោយ ផ្នែកមួយនៃហ្វូងមនុស្សបានក្រឡេកមើលពិធី Majlis Istiadat Bersanding Pengantin Diraja នៅវិមានដ៏ប្រណិត Istana Nurul Iman ដែលបានផ្សាយបន្តផ្ទាល់នៅលើអេក្រង់ដ៏ធំនៅកណ្ដាលអគារ Bank Islam Brunei Darussalam ស្របពេលដែលក្បួនដង្ហែនេះ បានចាប់ផ្តើមភ្លាមៗបន្ទាប់ពី ពីធី Majlis Istiadat Bersanding Pengantin Diraja បានបញ្ចប់រួចរាល់ ក្រោមព្រះវត្តមានស្ដេចស៊ុលតង់ជាបិតា។

ពិធី Majlis Istiadat Bersanding Pengantin Diraja នៅវិមានដ៏ប្រណិត Istana Nurul Iman

មុនពីធីដង្ហែបង្ហាញព្រះភ័ក្រគូស្នេហ៍រាជវង្សដល់បណ្ដាប្រជានុរាស្រ្ត ព្រះអង្គម្ចាស់Abdul Mateen និងព្រះនាង Anisha Rosnah Adam បានធ្វើពិធីដ៏ឧឡារិកមួយនៅវិហារឥស្លាមមួយកាលពីថ្ងៃព្រហស្បតិ៍។ ដោយឡែក កាលពីថ្ងៃអាទិត្យគូស្នេហ៍រាជវង្សនឹងត្រូវទទួលភ្ញៀវទាំងជាតិនិងអន្តរជាតិរួមទាំងឥស្សរជនជាន់ខ្ពស់ក្នុងពិធីជប់លៀងមួយនៅឯវាំងដែលមានបន្ទប់ ១៧៨៨ ដែលជាព្រឹត្តិការណ៍សាធារណៈចុងក្រោយរបស់សែរាជវង្ស។ នៅថ្ងៃចុងក្រោយ សមាជិករាជវង្សនឹងធ្វើពិធីបួងសួងព្រមគ្នា ដើម្បីប្រារព្ធពិធីបញ្ចប់ជាផ្លូវការរយៈពេល ១០ ថ្ងៃ ប៉ុន្តែដោយគ្មានព្រះវត្តមាន ព្រះអង្គម្ចាស់Abdul Mateen និងព្រះនាង Anisha Rosnah Adam ឡើយ។

យ៉ាងណាមិញ ព្រះរាជពិធីដង្ហែតាមប្រពៃណី ដែលបង្ហាញព្រះភ័ក្រសែរាជវង្សត្រូវបានគេដឹងថា វាមានអាយុកាលរាប់សតវត្ស ជាពិសេសពិធីនេះបានផ្សាយបន្តផ្ទាល់តាមវិទ្យុទូរទស្សន៍ព្រុយណេ និងសេវាផ្សាយបន្តផ្ទាល់ផ្សេងទៀតយ៉ាងគគ្រឹកគគ្រេង៕

អត្ថបទ៖ សាង ស្រីល័ក្ខ

ចុចអាន៖ទស្សនាទិដ្ឋភាពនៃពិធីគ្រងឈុតប្រពៃណីព្រុយណេ របស់ព្រះបុត្រា Abdul Mateen និងព្រះនាង Anishm

The post មនុស្សរាប់ម៉ឺននាក់តម្រង់ជួរតាមដងផ្លូវ ស្វាគមន៍រាជបុត្រ Mateen និងព្រះនាង Anisha យ៉ាងគគ្រឹកគគ្រេង appeared first on Kampuchea Thmey Daily.

ម្ចាស់ជំនួញធំនៅថៃ ២ រូប លេចមុខក្នុងព្រះរាជពិធីអភិសេក បុត្រាស្ដេចព្រុយណេយ៉ាងស្និទ្ធស្នាលបំផុត

សាង ស្រីល័ក្ខ — Sat, 13 Jan 2024 02:20:00 +0000

ជារឿងមួយគួរឲ្យភ្ញាក់ផ្អើលជាខ្លាំង ក្រោយប្រព័ន្ធផ្សព្វផ្សាយក្នុងប្រទេសថៃជាច្រើនសរសេរថា អ្នកជំនួញថៃស្រីមួយរូប Janetira Attaskulchai ដែលមកពីសង្គមអភិជនជាន់ខ្ពស់ ត្រូវបានគេអញ្ជើញឲ្យចូលរួមក្នុងពិធីនេះក្នុងនាមជាសាច់ញាតិជិតស្និទ្ធខាងកូនក្រមុំ។

តាមរយៈរូបភាពពីបណ្ដាញអ៉ិនធើណេតបានបង្ហាញឲ្យឃើញពីសម្រស់របស់ស្រ្តីអ្នកជំនួញរូបនេះ ឈរកៀកព្រះនាង Anisha Isa Kalebik យ៉ាងស្និតស្នាលបំផុត។ ក្រោយមកទើបគេទម្លាយថា នាងជាស្រ្តីនៃក្រុមលំដាប់អ្នកមានឈ្មោះថា Janetira Attaskulchai ជាអ្នកស្នងមរតកជំនាន់ទី៣របស់ក្រុមហ៊ុន Betagen Yogurt។

ទោះយ៉ាងនេះក្ដី ចំពោះមូលហេតុដ៏ធំដែលនាងអាចក្លាយជាភ្ញៀវសំខាន់ក្នុងថ្ងៃអភិសេក ហើយមានតែសមាជិករាជវង្សនោះ ដោយសារតែអ្នកជំនួញប្រាក់លាន Janetira Attaskulchai ត្រូវបានគេអញ្ជើញឲ្យចូលរួមក្នុងពិធីនេះក្នុងនាមជាសាច់ញាតិរបស់កូនក្រមុំ ខណៈដែលស្វាមីនាងគឺ Danial Deen Isa-Kalebic លោកជាអ្នកជំនួញជនជាតិព្រុយណេ និងជាបងប្រុសរបស់កូនក្រមុំផ្ទាល់តែម្ដង។

អ្នកជំនួញប្រាក់លាន Janetira Attaskulchai

ដោយឡែក យោងតាមការចុះផ្សាយរបស់កាសែតថៃ thethaiger ឯណោះវិញ បានបង្ហាញនូវរូបរាងដ៏សង្ហារបស់អ្នកជំនួញប្រុសម្នាក់ទៀត លោក Boss Minchaiynunt ក្នុងវិមានប្រណិត Istana Nurul Iman របស់សែរាជវង្ស។ ជាចម្ងល់យ៉ាងខ្លាំងរបស់មហាជនថា តើបុរសអ្នកជំនួញរូបនេះត្រូវជាអ្វីនឹងស្ដេចព្រុយណេ។

មិនឲ្យមហាជនមានចម្ងល់យូរនោះឡើយ thethaiger បានទម្លាយពីលោក Boss Minchaiynunt ថា តាមពិតលោកគឺជាមិត្តជិតស្និទ្ធនឹងព្រះរាជបុត្រាព្រុយណេ កាលនៅសិក្សានៅសាកលវិទ្យាល័យ University College London (UCL)។

លើសពីនេះទៀតសោត របាយការណ៍ពីប្រភពដដែលបញ្ចាក់ទៀតថា Boss Minchainan ជាអ្នកស្នងមរតកម្នាក់នៃគ្រួសារ Ten Billion Minchainan និងជាប្អូនប្រុសរបស់អ្នកនយោបាយជំនាន់ថ្មីនៃគណបក្សចលនាឆ្ពោះទៅមុខព្រមទាំងជាសមាជិកសភាធនាគារ Suphanat Minchainan ផងដែរ។

សូមជម្រាបបន្ថែមទៀតថា ព្រះរាជពិធីរៀបអភិសេករបស់ព្រះអង្គម្ចាស់ Abdul Mateen និងព្រះនាង Anisha Isa Kalebik បានធ្វើឡើងនៅវិមាន Istana Nurul Iman ។ ពិធីយ៉ាងឧឡារិកនេះប្រារព្ធចាប់តាំងពីថ្ងៃទី០៧ ខែមករា ឆ្នាំ២០២៤មកម៉្លេះ។ បន្ទាប់ពិធីទទួលព្រះរាជពិធីអភិសេករួចរាល់ នៅថ្ងៃទី ១៤ ខែមករានឹងមានក្បួនដង្ហែជុំវិញរាជធានី Bandar Seri Begawan ហើយនៅល្ងាចថ្ងៃទី ១៥ ខែមករា នឹងជាពិធីបិទការប្រារព្ធអភិសេក ស្របពេលដែលថ្ងៃទី ១៦ ខែមករា ឆ្នាំ ២០២៤ គឺជាត្រូវបញ្ចប់ជាស្ថាពរ៕

អ្នកជំនួញវ័យក្មេងលោក Boss Minchainan និងព្រះរាជបុត្រ Abdul Mateen

អត្ថបទ៖ សាង ស្រីល័ក្ខ

ចុចអាន៖ទស្សនាទិដ្ឋភាពនៃពិធីគ្រងឈុតប្រពៃណីព្រុយណេ របស់ព្រះបុត្រា Abdul Mateen និងព្រះនាង Anisha

The post ម្ចាស់ជំនួញធំនៅថៃ ២ រូប លេចមុខក្នុងព្រះរាជពិធីអភិសេក បុត្រាស្ដេចព្រុយណេយ៉ាងស្និទ្ធស្នាលបំផុត appeared first on Kampuchea Thmey Daily.

ទស្សនាទិដ្ឋភាពនៃពិធីគ្រងឈុតប្រពៃណីព្រុយណេ របស់ព្រះបុត្រា Abdul Mateen និងព្រះនាង Anisha

សាង ស្រីល័ក្ខ — Thu, 11 Jan 2024 04:02:31 +0000

ព្រះរាជពិធីរៀបអភិសេករបស់ព្រះអង្គម្ចាស់ Abdul Mateen និង Anisha Isa Kalebic បានបន្តកាលពីយប់មិញជាមួយនឹងពិធី Majlis Istiadat Berbedak Pengant Diraja ជាការបង្ហាញចម្រុះពណ៌នៃទំនៀមទម្លាប់របស់ស្តេចព្រុយណេ ដែលមានអាយុកាលរាប់សតវត្ស នៅ Balai Singgahsana Indera Buana នៃវិមានប្រណិត Nurul Iman។

ក្រោមពិធីប្រពៃណីដ៏យូរលង់មួយនេះមាន ក្រោមព្រះវត្តមានព្រះចៅ ស៊ុលតង់ Hassanal Bolkiah និងព្រះមហាក្សត្រីយានី Raja Isteri Pengiran ព្រមទាំងព្រះញាតិវង្សានុវង្ស ព្រមទាំងឥស្សរជនជាន់ខ្ពស់ក្នុងប្រទេសយ៉ាងច្រើនកុះករ។

យ៉ាងក៏ដោយ នៅពេលពិធីបានចាប់ផ្ដើមដំបូង រាជបុត្រ Abdul Mateen នឹងត្រូវទូលថ្វាយព្រះបិតា មុននឹងព្រះមហាក្សត្រយល់ព្រមក្នុងការចាប់ផ្ដើមពិធីថ្វាយព្រះភ្លើង។ បន្ទាប់ពីទទួលបានការយល់ព្រមពីស្ដេចស៊ុលតង់ ព្រះអង្គម្ចាស់ Mateen ទ្រង់យាងទៅកាន់ into Balai Singgahsana Indera Buana ដោយគ្រងនូវអភិសេកបែបប្រពៃណីហៅ sepangadak merah និង regalia អមដោយព្រះអង្គម្ចាស់ Haji Sufri Bolkiah ព្រមទាំងព្រះញាតិវង្សានុវង្សដទៃទៀត មានទាំងកាន់នូវដាវ, លំពែង, ឆ័ត្រ និងគ្រឿងឥស្សរិយជាច្រើនរាប់មិនអស់។

ក្រោយមកទើបលេចព្រះវត្តមានព្រះនាង Anisha Isa Kalebic គ្រងនូវឈុតប្រពៃណីមិនខុសពីព្រះស្វាមីទ្រង់អមដំណើរជាមួយនឹងព្រះរៀមៗដោយមានកាន់នូវគ្រឿងឥស្សរិយមិនខុសគ្នាប៉ុន្មាននោះទេ។

ដោយឡែក កាលពីថ្ងៃទី០២ នៃព្រះរាជពិធិអភិសេករបស់បុត្រា Abdul Mateen និងព្រះនាង Anisha ដោយយោងតាមការចុះផ្សាយរបស់បណ្ដាញព័ត៌មានព្រុយណេបានបង្ហោះនូវទិដ្ធភាពជារួម ក្នុងពិធីសាសនាឥស្លាមក្រោមព្រះវត្តមានដ៏ខ្ពង់ខ្ពស់របស់ស្ដេចស៊ុលតង់ Hassanal Bolkiah អមនឹងព្រះញាតិវង្សានុវង្ស ព្រមទាំងឥស្សរជនជាន់ខ្ពស់ក្នុងប្រទេស។

លើសពីនេះទៀតនៅថ្ងៃ១៤ជាថ្ងៃពិធីអភិសេកចុងក្រោយ ប្រព័ន្ធផ្សព្វផ្សាយពិភពលោកបានប៉ាន់ស្មានថា ព្រះអង្គម្ចាស់ William និងព្រះនាង Kate Middleton អាចនឹងយាងចូលរួមក្នុងពិធីអភិសេករបស់បុត្រាព្រុយណេ បន្ទាប់ពីស្តេចស៊ុលតង់បានក្លាយជាភ្ញៀវដ៏សំខាន់ក្នុងពិធីអភិសេករបស់គូស្នេហ៍រាជវង្សអង់គ្លេសកាលឆ្នាំ ២០១១។

សូមបញ្ចាក់ដែរថា ព្រះនាង Anisha និងព្រះអង្គម្ចាស់ Mateen បានទាក់ទងគ្នាអស់រយៈពេល៥ ឆ្នាំមកហើយ។ ទ្រង់ស្គាល់គ្នាតាំងពីកុមារភាព ស្របពេលដែលបងប្រុសរបស់នាង Danial Deen Isa-Kalebic ត្រូវបានគេនិយាយថា ជាមិត្តជិតស្និទ្ធនឹងព្រះអង្គម្ចាស់ Mateen យ៉ាងស្អិតរមួតថែមទៀត។ ចំណែកជីតានាងក៏ជាដៃស្ដាំស្ដេចស៊ុលតង់ទុកចិត្តបំផុត ដូច្នេះមិនមែនជារឿងចម្លែកទេ ដែលទ្រង់ទាំងពីរឈានដល់ថ្ងៃអភិសេកឡើងមក៕

សូមទស្សនារូបភាពខាងក្រោម

អត្ថបទ៖ សាង ស្រីល័ក្ខ

ចុចអាន៖ព្រះសុណិសាស្ដេចស៊ុលតង់ គ្រងឈុតដំបូងក្នុងថ្ងៃអភិសេកជាមួយព្រះរាជបុត្រ Mateen

The post ទស្សនាទិដ្ឋភាពនៃពិធីគ្រងឈុតប្រពៃណីព្រុយណេ របស់ព្រះបុត្រា Abdul Mateen និងព្រះនាង Anisha appeared first on Kampuchea Thmey Daily.

ព្រះសុណិសាស្ដេចស៊ុលតង់ គ្រងឈុតដំបូងក្នុងថ្ងៃអភិសេកជាមួយព្រះរាជបុត្រ Mateen

សាង ស្រីល័ក្ខ — Mon, 08 Jan 2024 09:49:21 +0000

Anisha ព្រះនាងរបស់ព្រះអង្គម្ចាស់ Abdul Mateen នៃប្រទេសព្រុយណេ បានបង្ហាញព្រះភ័ក្រនៅថ្ងៃដំបូងនៃព្រះរាជពិធីរៀបអភិសេកដែលធ្វើឡើងរយៈពេល១០ថ្ងៃ ដោយបានចាប់ផ្ដើមកាលពីថ្ងៃទី០៧ ខែមករាឆ្នាំ ២០២៤។

នៅលើ Instagram ចុងក្រោយបង្អស់របស់ tehfirdaus នៃហាងលក់សំលៀកបំពាក់ Teh Firdaus មកពីរដ្ឋ Selangor ប្រទេសម៉ាឡេស៊ី បានបង្ហោះរូបភាពរបស់ព្រះនាង Anisha ក្នុងឈុត baju kurung ពណ៌ស។ វាជាសំលៀកបំពាក់ជាតិសម្រាប់ស្ត្រីនៅប្រទេសព្រុយណេ និងម៉ាឡេស៊ី ព្រមទាំងបញ្ជាក់សារថា “មានកិត្តិយសដែលបានក្លាយជាផ្នែកមួយក្នុងពិធីរៀបអភិសេករបស់រាជវង្សព្រុយណេ។ កូនក្រមុំនៅក្នុងឈុត baju kurung ដែលសម្រិតសម្រាំងយ៉ាងពិសេស ហើយក្រណាត់ដែលប្រើគឺត្រូវបានត្បាញយ៉ាងប្រណិតអស់រយៈច្រើនថ្ងៃ”។

ក្នុងនាមជាព្រះសុណិសារបស់ស្ដេចស៊ុលតង់ Hassanal Bolkiah ព្រះនាង Anisha Isa Kalebic ថ្វីបើនាងមិនមែនជាសែរាជវង្ស ប៉ុន្តែក៏មិនមែនជារឿងចម្លែកនោះទេដែលទ្រង់បានគ្រង់ឈុតដ៏ប្រណិត និងត្រូវបានរំលេចដោយជាងចំណាននៅប្រទេសម៉ាឡេស៊ី។ សូម្បីតែអភិសេករបស់សែរាជវង្សព្រុយណេដទៃទៀត ក៏ជ្រើសឈុតប្រពៃណី baju kurung ពណ៌ស ជាថ្ងៃដំបូងនៃព្រះរាជពិធីបើកផងដែរ។

យ៉ាងណាក៏ដោយ នៅក្នុងថ្ងៃទី០២ នៃព្រះរាជពិធិអភិសេករបស់បុត្រា Abdul Mateen និងព្រះនាង Anisha ដោយយោងតាមការចុះផ្សាយរបស់បណ្ដាញព័ត៌មានព្រុយណេបានបង្ហោះនូវទិដ្ធភាពជារួម ក្នុងពិធីសាសនាឥស្លាមក្រោមព្រះវត្តមានដ៏ខ្ពង់ខ្ពស់របស់ស្ដេចស៊ុលតង់ Hassanal Bolkiah អមនឹងព្រះញាតិវង្សានុវង្ស ព្រមទាំងឥស្សរជនជាន់ខ្ពស់ក្នុងប្រទេសយ៉ាងច្រើនកុះករ។

ជាមួយគ្នានោះដែរ នៅថ្ងៃបើកបង្ហាញព្រះភ័ក្រទ្រង់ទាំងពីរ ប្រព័ន្ធផ្សព្វផ្សាយពិភពលោកកំពុងប៉ាន់ស្មានថា ព្រះអង្គម្ចាស់ William និងព្រះនាង Kate Middleton អាចនឹងយាងចូលរួមក្នុងពិធីអភិសេករបស់ព្រះរាជបុត្រា Mateen នៅថ្ងៃ១៤ បន្ទាប់ពីស្តេចស៊ុលតង់បានក្លាយជាភ្ញៀវដ៏សំខាន់ក្នុងពិធីអភិសេករបស់គូស្នេហ៍រាជវង្សអង់គ្លេសក្នុងឆ្នាំ ២០១១។ លើសពីនេះ ព្រះអង្គម្ចាស់ Mateen ទ្រង់គង់នៅឯការលាចុងក្រោយរបស់ម្ចាស់ក្សត្រី Elizabeth II។ កាលពីឆ្នាំមុនក្នុងខែកញ្ញាថែមទៀត៕

សូមទស្សនារូបភាពខាងក្រោម៖

អត្ថបទ៖ សាង ស្រីល័ក្ខ

ចុចអាន៖ថ្ងៃស្អែកនឹងអភិសេក មកស្គាល់ប្រវត្តិនារីដែលឆក់យកបេះដូងព្រះរាជបុត្រព្រុយណេ Abdul Mateen

The post ព្រះសុណិសាស្ដេចស៊ុលតង់ គ្រងឈុតដំបូងក្នុងថ្ងៃអភិសេកជាមួយព្រះរាជបុត្រ Mateen appeared first on Kampuchea Thmey Daily.

ប្រទេសព្រុយណេ Archives - Kampuchea Thmey Daily

ស្ដេច ​ព្រុយណេ រុះរើគណៈរដ្ឋមន្ត្រី ដោយ​តែងតាំង បុត្រា Mateen ជារដ្ឋមន្រ្តីការបរទេស​ទាំង​វ័យក្មេង​​

ចៅ​ស្តេច​ព្រុយណេ Muntaqim កំពុង​​អភិវឌ្ឍ​ខ្លួន​យ៉ាង​ល្អនៅលីគ​ព្រុយណេ

ស្ងប់ស្ងាត់មួយរយៈ ព្រះអង្គម្ចាស់ Mateen ដឹកដៃមហេសី យាងទៅក្រេបទឹកឃ្មុំនៅ អ៊ីតាលី

សែរាជវង្ស, ឥស្សរជន និងមេដឹកនាំនយោបាយជុំវិញពិភពលោក បង្ហាញវត្តមានក្នុងពិធីអភិសេកបុត្រាស្ដេចស៊ុលតង់

មនុស្សរាប់ម៉ឺននាក់តម្រង់ជួរតាមដងផ្លូវ ស្វាគមន៍រាជបុត្រ​ Mateen និងព្រះនាង ​ Anisha យ៉ាងគគ្រឹកគគ្រេង

ម្ចាស់ជំនួញធំនៅថៃ ២ រូប លេចមុខក្នុងព្រះរាជពិធីអភិសេក បុត្រាស្ដេចព្រុយណេយ៉ាងស្និទ្ធស្នាលបំផុត

ទស្សនាទិដ្ឋភាពនៃពិធីគ្រងឈុតប្រពៃណីព្រុយណេ របស់ព្រះបុត្រា Abdul Mateen និងព្រះនាង Anisha

ព្រះសុណិសាស្ដេចស៊ុលតង់ គ្រងឈុតដំបូងក្នុងថ្ងៃអភិសេកជាមួយព្រះរាជបុត្រ Mateen

ស្ដេច ព្រុយណេ រុះរើគណៈរដ្ឋមន្ត្រី ដោយតែងតាំង បុត្រា Mateen ជារដ្ឋមន្រ្តីការបរទេសទាំងវ័យក្មេង

ចៅស្តេចព្រុយណេ Muntaqim កំពុងអភិវឌ្ឍខ្លួនយ៉ាងល្អនៅលីគព្រុយណេ

មនុស្សរាប់ម៉ឺននាក់តម្រង់ជួរតាមដងផ្លូវ ស្វាគមន៍រាជបុត្រ Mateen និងព្រះនាង Anisha យ៉ាងគគ្រឹកគគ្រេង