ពលករ Archives - Kampuchea Thmey Daily

ក្រសួងការងារ នាំឱកាសការងារជាង ២ ពាន់កន្លែង ជូនអតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ

អ៊ិន ពិសី — Mon, 26 Jan 2026 02:08:22 +0000

ក្រសួងការងារ និងបណ្ដុះបណ្ដាលវិជ្ជាជីវៈ បាននាំយកឱកាសការងារជាង ២ ពាន់កន្លែង ជូនដល់អតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ។

កាលពីព្រឹកថ្ងៃទី ២៥ ខែមករា ឆ្នាំ ២០២៦ ម្សិលមិញ ក្រោមប្រធានបទ “ខ្មែរជួយរកការងារ និងផ្ដល់ការងារឲ្យខ្មែរ” ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នៅស្រុកមង្គលបូរី ខេត្តបន្ទាយមានជ័យ ដើម្បីនាំយកឱកាសការងារដោយផ្ទាល់ជូនដល់អតីតពលករ និងយុវជនក្នុងមូលដ្ឋាន។

ក្នុងឱកាសអញ្ជើញជាអធិបតីក្នុងពិធីនោះ លោក សាន គឹមហុង អនុរដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាននាំមកនូវដំណឹងដ៏រីករាយ ដោយបញ្ជាក់ថា បច្ចុប្បន្ន មានក្រុមហ៊ុន សហគ្រាស និងរោងចក្រ ចំនួន ៥ កំពុងផ្ដល់ឱកាសការងារសរុបចំនួន ២ ៦៥០ កន្លែង លើមុខជំនាញផ្សេងៗ គ្នា។ វេទិកានេះបានទាក់ទាញប្រជាពលរដ្ឋ និងយុវជន ចូលរួមប្រមាណ ៥០០ នាក់ ដើម្បីស្វែងរកការងារធ្វើភ្លាមៗ និងចុះឈ្មោះចូលរៀនជំនាញ TVET។

ទន្ទឹមនឹងការផ្ដល់ការងារ លោកអនុរដ្ឋលេខាធិការ បានសង្កត់ធ្ងន់ពីសារៈសំខាន់ នៃការធ្វើការងារក្នុងស្រុកដែលផ្តល់អត្ថប្រយោជន៍យ៉ាងច្រើនតាមរយៈរបបសន្តិសុខសង្គម (ប.ស.ស) រួមមាន ៖ ការថែទាំសុខភាពផ្នែកសោធននិវត្តន៍ និងផ្នែកហានិភ័យការងារជាដើម។ ការងារក្នុងស្រុក មិនត្រឹមតែជួយឲ្យពលរដ្ឋបានរស់នៅជួបជុំក្រុមគ្រួសារ មើលថែទាំកូន និងឪពុកម្ដាយ ប៉ុណ្ណោះទេ ប៉ុន្តែថែមទាំងជួយការពារពួកគាត់ចៀសផុតពីការកេងប្រវ័ញ្ចកម្លាំងពលកម្មខុសច្បាប់នៅក្រៅប្រទេស និងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចជាតិទៀតផង។

ជាមួយគ្នានេះ លោកក៏បានលើកទឹកចិត្តយ៉ាងមុតមាំដល់យុវជន និងពលករ ឲ្យចាប់យកឱកាសការបណ្ដុះបណ្ដាលជំនាញបច្ចេកទេសតាមរយៈកម្មវិធីបណ្ដុះបណ្ដាលជំនាញ ១,៥ លាននាក់ (TVET 1.5M) ដើម្បីបង្កើនសមត្ថភាព និងទទួលបានប្រាក់ចំណូលខ្ពស់នាពេលអនាគត។ នេះគឺជាគោលនយោបាយចម្បងរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ក្នុងគោលបំណងផ្តល់ជំនាញ TVET យ៉ាងតិចមួយដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។

សម្រាប់ប្រជាពលរដ្ឋដែលមានបំណងសាកសួរព័ត៌មានបន្ថែមអំពីឱកាសការងារ និងអត្ថប្រយោជន៍ផ្សេងៗ សូមទាក់ទងមកកាន់លេខទូរស័ព្ទ Hotline ១២៩៧ សម្រាប់ផ្នែកការងារ និងលេខ ១២៨៦ ដើម្បីទទួលបានព័ត៌មានលម្អិតអំពីអត្ថប្រយោជន៍ ប.ស.ស៕

The post ក្រសួងការងារ នាំឱកាសការងារជាង ២ ពាន់កន្លែង ជូនអតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ appeared first on Kampuchea Thmey Daily.

លោក សួន ចំរើន ពីអតីតពលករដែលគ្មានជំនាញ ក្លាយទៅជាអ្នកមានជំនាញ និងមានការងារច្បាស់លាស់ តាមរយៈយន្តការរបស់ក្រសួងការងារ

អ៊ិន ពិសី — Wed, 21 Jan 2026 07:09:03 +0000

អតីតពលករខ្មែរត្រឡប់មកពីថៃ គឺ លោក សួន ចំរើន ដែលពីមុនគ្មានជំនាញ បានក្លាយទៅជាអ្នកមានជំនាញ និងមានការងារច្បាស់លាស់ តាមរយៈយន្តការរបស់ក្រសួងការងារ និងបណ្ដុះបណ្ដាលវិជ្ជាជីវៈ។

លោក សួន ចំរើន បានប្រាប់ថា លោកមានស្រុកកំណើតនៅខេត្តសៀមរាប ហើយបានទៅធ្វើការងារនៅប្រទេសថៃរយៈពេល ៧ ឆ្នាំ ផ្នែកកសិកម្ម និងវិលត្រឡប់មកដល់កម្ពុជាវិញ នៅអំឡុងខែមិថុនា ឆ្នាំ ២០២៥។

បន្ទាប់ពីទទួលបានការពន្យល់ណែនាំពីមន្ត្រីក្រសួងការងារមក លោកក៏បានសម្រេចចិត្តចុះឈ្មោះចូលរៀនជំនាញដេរ កាលពីអំឡុងខែធ្នូ ឆ្នាំ ២០២៥ នៅរោងចក្រ ធី. អេស ស្ព័ត (ខេមបូឌា) ឯ.ក ដែលមានទីតាំងស្ថិតនៅស្រុកសំរោងទង ខេត្តកំពង់ស្ពឺ ដោយលោករៀនតែ ២ ថ្ងៃប៉ុណ្ណោះ ក៏អាចបានចូលរួមធ្វើការងារតែម្ដង។

លោក សួន ចំរើន ប្រាប់ថា «ខ្ញុំមករៀនក្នុងរោងចក្រនេះ ខ្ញុំរៀនតែ ២ ថ្ងៃទេ ខ្ញុំបានការងារធ្វើពេញសិទ្ធិ…គេថា រៀនក៏បានលុយដែរ ខ្ញុំក៏ខំរៀនបាន ២ ថ្ងៃ ខ្ញុំក៏ចូលដេរបណ្ដោយ»។

ក្រោយពីទទួលបានការងារធ្វើ លោក ចំរើន បានលើកឡើងថា ក្រសួងការងារ ពិតជាបានជួយលោកយ៉ាងស្វាហាប់ និងពិតប្រាកដ ដោយបានដឹកលោកពីក្រសួងមករៀននៅរោងចក្រ ធី. អេស ស្ព័ត នេះ ហើយបានជួយរកផ្ទះជួលឱ្យស្នាក់នៅរយៈពេល ៧ ថ្ងៃ ដោយឥតគិតថ្លៃថែមទៀត។

លោក សួន ចំរើន បានបន្ថែមថា «ខ្ញុំចង់អំពាវនាវឱ្យអ្នកដែលនៅក្នុងស្រុកខ្មែរក៏ដោយ អ្នកដែលទើបមកពីថៃក៏ដោយ អ្នកនៅក្នុងប្រទេសថៃក៏ដោយ ការងារនៅប្រទេសខ្មែរយើងច្រើនណាស់ ក្រសួងគាត់នៅតែជួយគ្រប់ភេទ ភេទប្រុស ភេទស្រីក៏ដោយ ត្រូវការទាំងអស់ ការងារនៅប្រទេសខ្មែរយើងច្រើន នៅត្រូវការ»។

ជាមួយគ្នានេះ លោក ចំរើន បានអរគុណដល់ក្រសួងការងារ ដែលបានរៀបចំវគ្គបណ្ដុះបណ្ដាលជំនាញដេរនេះ ដោយធ្វើឱ្យលោកទទួលបានឱកាសការងារ ទាំងដែលពីមុនមកលោកមិនមានជំនាញនេះសោះឡើយ ហើយប្ដេជ្ញាចិត្តថា នឹងខិតខំធ្វើការងារដែលខ្លួនមានសព្វថ្ងៃនេះឱ្យបានល្អ និងយូរអង្វែង៕

The post លោក សួន ចំរើន ពីអតីតពលករដែលគ្មានជំនាញ ក្លាយទៅជាអ្នកមានជំនាញ និងមានការងារច្បាស់លាស់ តាមរយៈយន្តការរបស់ក្រសួងការងារ appeared first on Kampuchea Thmey Daily.

អតីតពលករ និងពលករខ្មែរកំពុងធ្វើការនៅកូរ៉េ បានលើកឡើងពីការគាំពារ និងយកចិត្តទុកដាក់ពីសំណាក់មន្ត្រីក្រសួងការងារ

Sokhom Khon — Fri, 19 Dec 2025 02:38:40 +0000

អតីតពលករ និងពលករខ្មែរកំពុងធ្វើការងារនៅប្រទេសកូរ៉េខាងត្បូង បានលើកឡើងពីការគាំពារ និងយកចិត្តទុកដាក់ពីសំណាក់មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលធ្វើឱ្យពួកគាត់មានភាពកក់ក្ដៅ។

បន្ទាប់ពីបញ្ចប់ការចូលរួមក្នុងទិវាអន្តរជាតិសម្រាប់ពលករទេសន្តរប្រវេសន៍ ឆ្នាំ២០២៥ នៅថ្ងៃទី១៨ ខែធ្នូនេះ លោក ភាព ផា ដែលមានស្រុកកំណើតនៅរាជធានីភ្នំពេញ បានប្រាប់ថា លោកបានចេញទៅធ្វើជាពលករនៅប្រទេសកូរ៉េខាងត្បូង រយៈពេលជិត៤ឆ្នាំកន្លះ ខាងផ្នែកសំណង់ ដោយសល់ថវិកាគួរសម ពេលត្រឡប់មកដល់ប្រទេសកម្ពុជា លោកក៏បានបើកអាជីវកម្មដំឡើងស៊ីទែនប្រេងផ្គត់ផ្គង់នៅតាមការដ្ឋានសំណង់ និងការដ្ឋានរណ្ដៅដី។

លោកបានរំលឹកថា អំឡុងពេលធ្វើការនៅកូរ៉េខាងត្បូងនោះ គឺមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានគិតគូរអំពីសុវត្ថិភាព និងយកចិត្តទុកដាក់ជាខ្លាំងអំពីសុខទុក្ខរបស់លោក ក៏ដូចជាពលករផ្សេងទៀត។

លោក ភាព ផា ប្រាប់បែបនេះថា «ខ្ញុំមានអារម្មណ៍ថា កក់ក្ដៅ ដោយសារតែដំបូងឡើយ ពេលដែលចេញទៅកូរ៉េ មិនថាខ្ញុំ ឬក៏ពលករផ្សេងៗទេ តែងមានអារម្មណ៍ថា ឃ្លានឆ្ងាយពីផ្ទះ ពិបាកក្នុងការរស់នៅ ដល់តែពេលមានខាងក្រសួង គាត់យកចិត្ដទុកដាក់ហ្នឹង មានអារម្មណ៍ថា កក់ក្ដៅ លែងភ័យ លែងខ្លាច មួយថ្ងៃៗ គិតតែពីខំធ្វើការ»។

អតីតពលករនៅកូរ៉េមួយរូបទៀត គឺអ្នកស្រី អ៊ូ សុខលាង មានស្រុកកំណើតនៅខេត្តកំពង់ចាម ដោយធ្លាប់ធ្វើការនៅប្រទេសកូរ៉េរយៈពេល ៩ឆ្នាំ ខាងផ្នែកកសិកម្ម។ បច្ចុប្បន្ន អ្នកស្រី បើកមុខរបរលក់សម្ភារសំណង់ បន្ទាប់ពីបានសន្សំថវិកាមួយចំនួន អំឡុងពេលធ្វើការងារនៅប្រទេសកូរ៉េ។ អ្នកស្រី រំលឹកថា អំឡុងពេលធ្វើការងារនៅប្រទេសកូរ៉េ អ្នកស្រី ទទួលបានការគាំពារ និងយកចិត្តទុកដាក់ពីសំណាក់មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ក៏ដូចជានិយោជក នៅទីនោះ។ អ្នកស្រី បានលើកឡើងថា «កុំតែបានក្រសួងបញ្ជូនទៅ កុំអីជីវិតអត់ដូចឥឡូវទេ…ជីវភាពគ្រាន់បើជាងពីមុនឆ្ងាយណាស់»។

ចំណែកឯលោក គឹម ទឹង មានស្រុកកំណើតនៅរាជធានីភ្នំពេញ ហើយបច្ចុប្បន្នលោកជាពលករកំពុងធ្វើការងារនៅប្រទេសកូរ៉េក្នុងអាណត្តិទី២។ លោកប្រាប់ថា មន្ត្រីក្រសួងការងារ បានយកចិត្តទុកដាក់ចំពោះរូបលោក ក៏ដូចជាបងប្អូនពលករផ្សេងទៀត ទាក់ទងការចែករំលែកនូវព័ត៌មានពាក់ព័ន្ធ ក៏ដូចជាជួយសម្របសម្រួល និងដោះស្រាយបញ្ហានានា ជាដើម។ ពលកររូបនេះ បានបន្ថែមថា «ខ្ញុំបាទ សូមថ្លែងអំណរគុណដល់ក្រសួងការងារ ដែលពួកគាត់តែងតែជួយសម្របសម្រួលគ្រប់ការងារ គ្រប់ស្ថានភាពទាំងអស់ ជួយជំរុញ ជួយដោះស្រាយបញ្ហា ឱ្យបងប្អូនខ្មែរយើងជាច្រើន»។

អតីតពលករ និងពលករខ្មែរកំពុងធ្វើការងារនៅប្រទេសកូរ៉េទាំង ៣រូបនេះ សុទ្ធតែបានថ្លែងអំណរគុណដល់ក្រសួងការងារ និងបណ្ដុះបណ្ដាលវិជ្ជាជីវៈ ដែលតែងតែយកចិត្តទុកដាក់ក្នុងការជួយសម្របសម្រួល ជាមួយបណ្ដាប្រទេសដៃគូ ដើម្បីអាចឱ្យពួកគាត់ ក៏ដូចជាប្រជាពលរដ្ឋផ្សេងទៀត បានធ្វើការងារនៅក្រៅប្រទេស ដែលជាប្រភពចំណូលមួយសម្រាប់ផ្គត់ផ្គង់គ្រួសារ និងសន្សំទុកសម្រាប់បើកអាជីវកម្មណាមួយ៕

The post អតីតពលករ និងពលករខ្មែរកំពុងធ្វើការនៅកូរ៉េ បានលើកឡើងពីការគាំពារ និងយកចិត្តទុកដាក់ពីសំណាក់មន្ត្រីក្រសួងការងារ appeared first on Kampuchea Thmey Daily.

ពលករ និងនិស្សិតខ្មែរនៅកូរ៉េជាង៤០០នាក់ ប្រកួតបាល់ទាត់មិត្តភាព ដើម្បីអបអរកិច្ចព្រមព្រៀងសន្តិភាពកម្ពុជា-ថៃ

អុន ស្រីមាន — Sun, 26 Oct 2025 07:45:32 +0000

ពលករ និងនិស្សិតខ្មែរ ដែលកំពុងសិក្សា និងបម្រើការងារនៅសាធារណរដ្ឋកូរ៉េប្រមាណជាង ៤០០នាក់ បានចូលរួមការប្រកួតបាល់ទាត់មិត្តភាព ក្រោមប្រធានបទ «យើងទាំងអស់គ្នាដើម្បីកម្ពុជា» នៅថ្ងៃទី២៦ ខែតុលា ឆ្នាំ២០២៥ នេះ នៅតំបន់អ៊ឹមសង់ ដើម្បីរឹតចំណងមិត្តភាព សាមគ្គីភាព និងទំនាក់ទំនងល្អរវាងប្រជាពលរដ្ឋខ្មែរនៅក្រៅប្រទេស។

លោក អ៊ូ រតនា អគ្គនាយករង នៃអគ្គនាយកដ្ឋានការងារ តំណាងលោក ហេង សួរ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា ការប្រកួតបាល់ទាត់មិត្តភាពនេះ រៀបចំដោយក្រសួងការងារ និងបណ្ដុះបណ្ដាលវិជ្ជាជីវៈ ក្រោមការឧបត្ថម្ភគាំទ្ររបស់លោករដ្ឋមន្ដ្រី ហេង សួរ រួមជាមួយលោក ឃួន ផុនរតនៈ ឯកអគ្គរាជទូតតែងតាំងនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ និងលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ ។

ឆ្លៀតឱកាសនោះ លោកបានសម្ដែងក្ដីរីករាយ ដែលមានពលករ និងនិស្សិតជាច្រើន បានចូលរួមការប្រកួតនេះ ហើយលោកចាត់ទុកការជួបជុំនេះ ជាវេទិកាមួយ ដើម្បីបង្ហាញនូវការអបអរសាទរ ចំពោះកិច្ចព្រមព្រៀងសន្ដិភាពកម្ពុជា-ថៃ ដែលទើបចុះហត្ថលេខានៅទីក្រុងគូឡាឡាំពួ ប្រទេសម៉ាឡេស៊ី ដោយសម្ដេចបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោក Anutin Charnvirakul នាយករដ្ឋមន្ត្រីថៃ ដោយមានការចូលរួមធ្វើជាសាក្សីពីលោក ដូណាល់ ត្រាំ ប្រធានាធិបតីអាមេរិក និងនាយករដ្ឋមន្រ្តីម៉ាឡេស៊ី នៅថ្ងៃអាទិត្យនេះផងដែរ។

សូមបញ្ជាក់ថា ការប្រកួតបាល់ទាត់លក្ខណៈមិត្តភាពនេះ ក្នុងចំណោមពលករ និងនិស្សិតចូលរួមទាំងជាង ៤០០នាក់ គឺបែងចែកជា ១៦ក្រុម និងចែកចេញជា ៤ពូល ដើម្បីធ្វើការប្រកួតតាមរូបមន្ដម៉ារ៉ាតុង រហូតរកក្រុមជើងឯក ដោយប្រើប្រាស់រយៈពេលតែ ១ថ្ងៃប៉ុណ្ណោះ៕

The post ពលករ និងនិស្សិតខ្មែរនៅកូរ៉េជាង៤០០នាក់ ប្រកួតបាល់ទាត់មិត្តភាព ដើម្បីអបអរកិច្ចព្រមព្រៀងសន្តិភាពកម្ពុជា-ថៃ appeared first on Kampuchea Thmey Daily.

ថៃ គ្រោងយកទាហាននិងអ្នកទោសទៅធ្វើការ ដើម្បីបំពេញកម្លាំងពលកម្មបន្ទាន់ ក្រោយពលករខ្មែរ ចាកចេញ

Sok Sovann — Mon, 18 Aug 2025 09:22:51 +0000

ក្រោយពលករខ្មែរយ៉ាងច្រើនចាកចេញពីប្រទេសថៃ វិលមកប្រទេសកំណើតវិញ ធ្វើឲ្យថៃ ជួបវិបត្តិខ្វះកម្លាំងពលកម្មយ៉ាងធ្ងន់ធ្ងរ ហើយឥឡូវនាយកដ្ឋានការងារ បានដាក់ចេញវិធានការ៥ចំណុចដើម្បីដោះស្រាយបញ្ហានេះ ដោយក្នុងនោះមានទាំងការយកទាហានចូលបម្រើកាតព្វកិច្ច, ទណ្ឌិតថ្នាក់ទី១ដែលជិតដល់ថ្ងៃដោះលែង និងយុវជននៅក្នុងមណ្ឌលឃុំឃាំង ឲ្យចូលធ្វើការក្នុងវិស័យផលិតកម្ម និងកសិកម្មផងដែរ។ នេះបើតាមការចុះផ្សាយរបស់ The Nation នៅថ្ងៃចន្ទទី១៨ខែសីហាឆ្នាំ២០២៥។

ដោយសារតែតម្រូវការជាបន្ទាន់ រដ្ឋមន្ត្រីក្រសួងការងារថៃ Pongkawin Jungrungruangkit បានបញ្ជាឲ្យនាយកដ្ឋានការងារ រិះរកមធ្យោបាយឲ្យបានលឿនបំផុត ដើម្បីបំពេញចន្លោះកម្លាំងពលកម្ម បន្ទាប់ពីការចាកចេញរបស់ពលករខ្មែរ។

ជាការឆ្លើយតបលោក Somchai Morakotsriwan ដែលជាអគ្គនាយកនៃនាយកដ្ឋាននេះ បានដាក់ចេញនូវវិធានការចំនួន៥ចំណុចដូចជា៖

ការប្រើប្រាស់កម្លាំងពលកម្មថ្មី៖ យកទាហានដែលចូលបម្រើកាតព្វកិច្ច, ទណ្ឌិតថ្នាក់ទី១ដែលជិតដល់ថ្ងៃដោះលែង និងយុវជននៅក្នុងមណ្ឌលឃុំឃាំង ឲ្យធ្វើការក្នុងវិស័យផលិតកម្ម និងកសិកម្ម។
ការចុះបញ្ជីកម្មករខុសច្បាប់៖ ចុះបញ្ជីកម្មករចំណាកស្រុកដែលកំពុងធ្វើការដោយខុសច្បាប់នៅក្នុងប្រទេស។
ការនាំចូលពលករពីប្រទេសថ្មី៖ ពិចារណានាំយកពលករពីប្រទេសស្រីលង្កានិងនេប៉ាល់។
ការជ្រើសរើសជនភៀសខ្លួន៖ ជ្រើសរើសពលករពីចំណោមជនភៀសខ្លួនមីយ៉ាន់ម៉ាប្រមាណ ៤០ ០០០ នាក់ ដែលកំពុងរស់នៅក្នុងប្រទេសថៃ។
ការជំរុញបច្ចេកវិទ្យា៖ ជំរុញការប្រើប្រាស់ប្រព័ន្ធស្វ័យប្រវត្តិកម្ម និងការធ្វើឲ្យប្រសើរឡើងនូវបច្ចេកវិទ្យានៅក្នុងវិស័យផលិតកម្ម ដើម្បីកាត់បន្ថយការពឹងផ្អែកលើកម្លាំងពលកម្មដោយដៃ។

សូមជម្រាបជាថ្មី របាយការណ៍ពីរដ្ឋាភិបាលក្រុងបាងកកបង្ហាញថា ពលករខ្មែរសរុបដែលធ្វើការនៅប្រទេសថៃ មានចន្លោះពី ១ទៅ១.៥លាននាក់។ យ៉ាងណា បើយោងតាមក្រសួងការងារកម្ពុជា, តាំងពីផ្ទុះជម្លោះព្រំដែនមក ពលករខ្មែរប្រមាណ ៨៧ម៉ឺននាក់បានត្រឡប់ចូលប្រទេសវិញកម្ពុជាវិញ ប៉ុន្តែតួលេខនេះគិតត្រឹមថ្ងៃទី៨ ខែសីហាប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ថៃ កំពុងពិបាកចិត្ត ព្រោះខ្វះកម្លាំងពលកម្ម ខណៈសេដ្ឋកិច្ចដាំក្បាលចុះ ក្រោយពលករខ្មែរ ចាកចេញ

The post ថៃ គ្រោងយកទាហាននិងអ្នកទោសទៅធ្វើការ ដើម្បីបំពេញកម្លាំងពលកម្មបន្ទាន់ ក្រោយពលករខ្មែរ ចាកចេញ appeared first on Kampuchea Thmey Daily.

មន្ត្រីជាន់ខ្ពស់ ប.ស.ស ជំរុញមន្ត្រីយកចិត្តទុកដាក់ចុះបញ្ជិកាចំពោះ ពលករដែលទើបវិលត្រលប់មកពីប្រទេសថៃ

អ៊ិន ពិសី — Thu, 10 Jul 2025 07:24:26 +0000

មន្ត្រីជាន់ខ្ពស់ នៃបេឡាជាតិសន្តិសុខសង្គម (ប.ស.ស) បានជំរុញឱ្យនាយកដ្ឋានបញ្ជិកា និងភាគទាន ខិតខំយកចិត្តទុកដាក់ចុះបញ្ជិកាចំពោះពលករដែលទើបវិលត្រលប់មកពីប្រទេសថៃ។

ការជំរុញនេះបានធ្វើឡើងបន្ទាប់ពីមានពលករខ្មែរប្រមាណជាង ៤ ម៉ឺននាក់ បានវិលត្រឡប់មកពីប្រទេសថៃដោយសារកម្ពុជា និងថៃ មានភាពតានតឹងបញ្ហាព្រំដែនជាមួយគ្នា។ ក្នុងចំណោមពលករខ្មែរជាង ៤ ម៉ឺននាក់ ក្នុងនោះមានប្រមាណជាង ១ ម៉ឺននាក់ បានចុះឈ្មោះស្វែងរកការងារធ្វើភ្លាមៗ នៅនឹងច្រកព្រំដែនកម្ពុជា-ថៃ ខណៈថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ រួមជាមួយតំណាងក្រុមហ៊ុន រោងចក្រ នានា បានចុះតាមបណ្តាខេត្តមួយចំនួន ដើម្បីផ្តល់ឱកាសការងាររាប់ម៉ឺនកន្លែងដល់មូលដ្ឋានដែលពលករខ្មែរទើបវិលត្រឡប់មកពីប្រទេសថៃរស់នៅផងដែរ។

ក្នុងឱកាសដឹកនាំកិច្ចប្រជុំបូកសរុបលទ្ធផលការងារប្រចាំខែមិថុនា និងទិសដៅអនុវត្តការងារបន្តខែកក្កដា ឆ្នាំ ២០២៥ របស់នាយកដ្ឋានបញ្ជិកា និងភាគទាន នៃ ប.ស.ស កាលពីថ្ងៃទី ៩ ខែកក្កដា ឆ្នាំ ២០២៥ លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស បានណែនាំដល់នាយកដ្ឋានបញ្ជិកា និងភាគទាន ត្រូវបង្កើនការយកចិត្តទុកដាក់ និងត្រូវខិតខំពង្រឹងការងារឱ្យកាន់តែហ្មត់ចត់ក្នុងការចុះបញ្ជិកា សហគ្រាស គ្រឹះស្ថាន ការកំណត់អត្តសញ្ញាណកម្មករ-និយោជិត ឬបុគ្គលស្វ័យនិយោជន៍ ជាពិសេសត្រូវយកចិត្តទុកដាក់ចំពោះពលករដែលទើបវិលត្រលប់មកពីប្រទេសថៃ។

ទន្ទឹមនឹងនេះ លោកបណ្ឌិតអគ្គនាយករង ប.ស.ស បានឱ្យនាយកដ្ឋានបញ្ជិកា និងភាគទាន ប្រមូល និងត្រួតពិនិត្យលើភាគទានដែលសហគ្រាស គ្រឹះស្ថាន បង់ជាប្រចាំខែ នៅទូទាំងប្រទេស ត្រូវពិនិត្យឱ្យបានច្បាស់លាស់ និងត្រូវមានយន្តការរំលឹកជាប្រចាំចំពោះសហគ្រាស គ្រឹះស្ថានណាដែលភ្លេច ឬយឺតយ៉ាវក្នុងការបង់ភាគទាន មុននឹងឈានដល់ការអនុវត្តនីតិវិធីបន្ទាប់ ដើម្បីធានានូវភាពត្រឹមត្រូវ ច្បាស់លាស់ និងរក្សានូវអត្ថប្រយោជន៍របបសន្តិសុខសង្គមរបស់កម្មករ-និយោជិត។

លោកបណ្ឌិតអគ្គនាយករង ប.ស.ស បានកោតសរសើរចំពោះថ្នាក់ដឹកនាំ និងបុគ្គលិកទាំងអស់ នៃនាយកដ្ឋានបញ្ជិកា និងភាគទាន ដែលកន្លងមកបានអនុវត្តការងារទៅដោយរលូន និងសូមរក្សាជំហរនេះ ដើម្បីបន្ដចូលរួមសកម្មភាពការងារជាមួយអង្គភាពឱ្យកាន់តែរីកចម្រើនទទួលបានលទ្ធផលល្អបន្ថែមទៀត៕

អត្ថបទ ៖ សំអឿន

The post មន្ត្រីជាន់ខ្ពស់ ប.ស.ស ជំរុញមន្ត្រីយកចិត្តទុកដាក់ចុះបញ្ជិកាចំពោះ ពលករដែលទើបវិលត្រលប់មកពីប្រទេសថៃ appeared first on Kampuchea Thmey Daily.

លោក ឈាង រ៉ា ណែនាំមន្ទីរពេទ្យទូទាំងប្រទេសឱ្យត្រៀមខ្លួន បម្រើសេវាដល់ពលករដែលត្រឡប់មកកម្ពុជាវិញ

Ken Malis — Wed, 18 Jun 2025 02:38:58 +0000

រដ្ឋមន្ត្រីសុខាភិបាល លោក ឈាង រ៉ា បានណែនាំដល់មណ្ឌលសុខភាព និងមន្ទីរពេទ្យទូទាំងប្រទេសឱ្យត្រៀមខ្លួន ក្នុងការបម្រើសេវាដល់ពលករដែលវិលត្រឡប់មកប្រទេសកម្ពុជាវិញ។ លោកបានណែនាំបែបនេះ នាឱកាសធ្វើបទបាឋកថា ក្នុងវគ្គភាពជាអ្នកដឹកនាំ និងនវានុវត្តន៍ ជូនថ្នាក់ដឹកនាំ និងមន្រ្តីសុខាភិបាល គ្រប់ឋានានុក្រម ក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ (Zoom) ដែលមានសមាសភាពចូលរួមសរុបចំនួន ៣ ៥៣៦នាក់ កាលពីថ្ងៃទី១៧ ខែមិថុនា ឆ្នាំ២០២៥។

ជាមួយគ្នានេះ លោករដ្ឋមន្ត្រី បានលើកទឹកចិត្តដល់មន្រ្តីសុខាភិបាល តាមតំបន់ព្រំដែនឱ្យបន្តបម្រើសេវាថែទាំសុខភាព ជូនដល់ប្រជាជន ជាពិសេសប្រជាជនដែលអាចត្រូវជម្លៀសមកកាន់តំបន់សុវត្ថិភាព និងប្រជាពលរដ្ឋខ្មែរដែលមកស្វែងរកការថែទាំ និងព្យាបាលជំងឺបន្តរពីមន្ទីរពេទ្យនៅក្រៅប្រទេស។

ក្នុងឱកាសនោះដែរ លោក ឈាង រ៉ា បានអំពាវនាវឱ្យមន្រ្តីសុខាភិបាលទាំងអស់ ចូលរួមជាធ្លុងមួយបង្ហាញពីសាមគ្គីភាពជាតិ ដោយពេលនេះជាពេលចាំបាច់បំផុតដែលប្រជាជនកម្ពុជាទាំងអស់បង្ហាញជំហរគាំទ្រយ៉ាងមុតមាំការដឹកនាំរបស់រាជរដ្ឋាភិបាលកម្ពុជា ក្នុងការដោះស្រាយបញ្ហារបស់ប្រទេសជាតិ។

ជាកិច្ចបន្ត លោករដ្ឋមន្រ្តី បានលើកយកអត្ថន័យសំខាន់ៗ នៃភាពជាអ្នកដឹកនាំដោយបានបកស្រាយពន្យល់ពី ទម្រង់របស់ឥទ្ធិពលដែលកើតចេញពីការដឹកនាំ និងអត្ថន័យជាក្រុម នៃភាពជាអ្នកដឹកនាំ ជាពិសេសសម្រាប់អ្នកវិជ្ជាជីវៈវេជ្ជសាស្រ្ត។

បន្ថែមពីលើនេះ លោកក៍បានលើយកប្រធានបទ “លទ្ធភាព និង តថភាព” ជាផ្នែកមួយនៃទស្សនៈវិជ្ជាសម្ភារៈនិយម វិចារវិទ្យាមកធ្វើការពន្យល់ និងផ្តល់ការការណែនាំឱ្យថ្នាក់ដឹកនាំគ្រប់ឋានានុក្រមព្យាយាមប្រើប្រាស់ ទស្សនៈជាក់ស្តែង ទស្សនៈគ្រប់ជ្រុងជ្រោយ និង ទស្សនៈអភិវឌ្ឍន៍ ក្នុងការដឹកនាំនៅក្នុងវិស័យសុខាភិបាល៕

The post លោក ឈាង រ៉ា ណែនាំមន្ទីរពេទ្យទូទាំងប្រទេសឱ្យត្រៀមខ្លួន បម្រើសេវាដល់ពលករដែលត្រឡប់មកកម្ពុជាវិញ appeared first on Kampuchea Thmey Daily.

ពលករខ្មែរទើបជាប់ទៅធ្វើការនៅកូរ៉េ ព្រួយថា ការបំផុសធ្វើបាតុកម្មពីអ្នកនយោបាយប្រឆាំង នឹងប៉ះពាល់ការងាររបស់ខ្លួន

Thoeun Vansong — Fri, 21 Feb 2025 03:38:20 +0000

ពលករខ្មែរដែលត្រៀមចេញទៅធ្វើការនៅប្រទេសកូរ៉េ បានសម្ដែងការព្រួយបារម្ភថា អាចនឹងមានការប៉ះពាល់លើការងាររបស់ខ្លួន បើសិនជាមានបាតុកម្មដែលរៀបចំពីសំណាក់ក្រុមអ្នកនយោបាយប្រឆាំងជារឿយៗ នៅក្នុងប្រទេសទទួលយកពលករកម្ពុជាទៅធ្វើការ។ ការណ៍នេះ ពួកគេបានអំពាវនាវឱ្យពលរដ្ឋខ្មែរ និងពលករខ្មែរនៅបរទេសទាំងអស់ជឿជាក់លើរាជរដ្ឋាភិបាលកម្ពុជាក្នុងការដោះស្រាយបញ្ហាព្រំដែនតាមរយៈការចរចារដោយសន្តិវិធី ជាជាងនាំគ្នាធ្វើបាតុកម្មពោរពេញដោយកំហឹង។

លោកស្រី គួន សូលីដា ជាពលករខ្មែរដែលត្រៀមហោះហើរទៅធ្វើការនៅប្រទេសកូរ៉េខាងត្បូងបានសម្ដែងការព្រួយបារម្ភលើការងាររបស់ខ្លួន នៅពេលដែលតែងតែទទួលដំណឹងពីការបង្កឱ្យមានការធ្វើបាតុកម្មនៅលើទឹកដីទី២ ពីសំណាក់ក្រុមអ្នកនយោបាយ ជាក់ស្តែងនៅប្រទេសកូរ៉េខាងត្បូង។ វាអាចនឹងជះឥទ្ធិពលលើការងារ ពីព្រោះថា កាលណាយើងជាជនបរទេសហើយតែងតែបង្កឱ្យមានចលាចលនៅក្នុងសង្គមរបស់គេ នោះចង់ឬមិនចង់ថៅកែក្រុមហ៊ុនដែលជាអ្នកគ្រប់គ្រងពលករខ្មែរនឹងមានការឈឺក្បាល និងទទួលរងផលប៉ះពាល់ដល់ផលិតភាពការងាររបស់គេ។

ពលករខ្មែររូបនេះ បន្ថែមថា សម្រាប់ការបំផុសឱ្យមានការធ្វើបាតុកម្មពាក់ព័ន្ធនឹងបញ្ហាកោះគុតនេះផងដែរ គឺជាការព្រួយបារម្ភថ្មីមួយទៀត។ សម្រាប់លោកស្រី ពុំចង់ឃើញការចលាចលណាមួយ ដែលធ្វើឡើងពីសំណាក់បងប្អូនពលករខ្មែរ ក្រោមរូបភាពចាញ់កលល្បិចពីសំណាក់អ្នកនយោបាយនៅក្រៅប្រទេសទេ ព្រោះវាអាចប៉ះពាល់ដល់ការងាររបស់ពលករ និងបង្ហាញរូបភាពមិនល្អទាល់តែសោះលើទឹកដីបរទេស ដែលជាប្រទេសទី២។

ដោយឡែក លោក ហុន សុភាព ជាពលករខ្មែរដែលត្រៀមហោះហើរទៅធ្វើការនៅប្រទេសកូរ៉េម្នាក់ទៀត មើលឃើញថា ការញុះញង់ធ្វើបាតុកម្មជាច្រើនលើកច្រើនសារពិតណាស់បានជះឥទ្ធិពលដល់កេរ្តិ៍ឈ្មោះពលករខ្មែរ។ ពលករខ្មែររូបនេះ ថា វាបានជះឥទ្ធិពលទី១ លើពលករដែលកំពុងធ្វើការនៅប្រទេសកូរ៉េស្រាប់ និងទី២ ប៉ះពាល់ដល់បងប្អូនពលរដ្ឋខ្មែរជំនាន់ក្រោយដែលចង់ទៅធ្វើការនៅបរទេស វាអាចត្រូវបានរដ្ឋាភិបាលបរទេសកាត់ផ្តាច់ការទទួលពលករខ្មែរជាដើម។

ពាក់ព័ន្ធនឹងបញ្ហាកោះគុត ក្នុងនាមជាពលករខ្មែរដែលធ្វើការនៅប្រទេសកូរ៉េ សូមអំពាវនាវឱ្យខ្មែរនៅក្រៅប្រទេសទាំងអស់រក្សាភាពស្ងៀមស្ងាត់ ជឿទុកចិត្តមកលើរាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការដោះស្រាយដោយសន្តិវិធីជាមួយភាគីថៃ។ រាជរដ្ឋាភិបាលកម្ពុជាមានលទ្ធភាពគ្រប់គ្រន់ក្នុងការដោះស្រាយ ដោយឡែកការធ្វើបាតុកម្មក្រោមការបំផុសបំផុលពីសំណាក់ក្រុមប្រឆាំង មិនត្រឹមតែមិនបានការនោះទេ តែថែមទាំងបង្កឱ្យមានជម្លោះការទូតរវាងប្រទេសជាមិត្តផងដែរ។

ទន្ទឹមនឹងនេះ ពលករខ្មែរដែលទើបតែប្រឡងជាប់ ត្រៀមចេញទៅធ្វើការនៅប្រទេសកូរ៉េនៅពេលនេះ អំពាវនាវឱ្យខ្មែរនៅប្រទេសកូរ៉េខិតខំធ្វើការ សន្សំថវិកា ដើម្បីផ្គត់ផ្គង់គ្រួសារ ដែលបានខិតខំពុះពារដើម្បីមានលទ្ធភាពក្នុងការបញ្ជូនទៅធ្វើការនៅបរទេស។ ដូច្នេះហើយទំនួលខុសត្រូវដ៏ធំបំផុតនោះគឺការផ្គត់ផ្គង់គ្រួសារ មិនមែនចូលរួមសកម្មភាពបង្កចលាចលនៅលើប្រទេសទាំង២នោះទេ៕

The post ពលករខ្មែរទើបជាប់ទៅធ្វើការនៅកូរ៉េ ព្រួយថា ការបំផុសធ្វើបាតុកម្មពីអ្នកនយោបាយប្រឆាំង នឹងប៉ះពាល់ការងាររបស់ខ្លួន appeared first on Kampuchea Thmey Daily.

ពលករ ​​ Archives - Kampuchea Thmey Daily

ក្រសួងការងារ នាំឱកាសការងារជាង ២ ពាន់កន្លែង ជូនអតីតពលករ និងយុវជន ក្នុងស្រុកមង្គលបូរី ខេត្តបន្ទាយមានជ័យ

ថៃ គ្រោងយកទាហាននិងអ្នកទោសទៅធ្វើការ ដើម្បីបំពេញកម្លាំងពលកម្មបន្ទាន់ ក្រោយពលករខ្មែរ ចាកចេញ

មន្ត្រីជាន់ខ្ពស់ ប.ស.ស ជំរុញមន្ត្រីយកចិត្តទុកដាក់ចុះបញ្ជិកាចំពោះ ពលករដែលទើបវិលត្រលប់មកពីប្រទេសថៃ

លោក ឈាង រ៉ា ណែនាំមន្ទីរពេទ្យទូទាំងប្រទេសឱ្យត្រៀមខ្លួន បម្រើសេវាដល់ពលករដែលត្រឡប់មកកម្ពុជាវិញ

ពលករ Archives - Kampuchea Thmey Daily