ថៃ កំពុងពិបាកចិត្ត ព្រោះខ្វះកម្លាំងពលកម្ម ខណៈសេដ្ឋកិច្ចដាំក្បាលចុះ ក្រោយពលករខ្មែរ ចាកចេញ

ក្រោយការលើកទ័ពចូលឈ្លានពានកម្ពុជា ធ្វើឲ្យសភាពការណ៍នៅក្នុងប្រទេសថៃ កាន់តែវឹកវរ ហើយឥឡូវនេះ រដ្ឋាភិបាលទីក្រុងបាងកក កាន់តែក្រពុលមុខនិងពិបាកចិត្តខ្លាំង ព្រោះតែខ្វះកម្លាំងពលកម្ម បន្ទាប់ពីការចាកចេញរបស់ពលករខ្មែរ រាប់សែននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយផ្នែកនៃសេដ្ឋកិច្ចថៃ គឺពឹងផ្អែកខ្លាំងលើកម្លាំងពលកម្មរបស់ពលករបរទេស ខណៈបច្ចុប្បន្ន ថៃបានចុះអនុស្សរណៈយោគយល់ (MoU) ជាមួយប្រទេសតែ៤ប៉ុណ្ណោះ ដូចជាកម្ពុជា ឡាវ មីយ៉ាន់ម៉ា និងវៀតណាម។

ដូច្នេះហើយ ក្រោយការចាកចេញរបស់ពលករខ្មែរ ធ្វើឲ្យបណ្តាម្ចាស់កសិដ្ឋាននិងសហគ្រាសនៅក្នុងប្រទេសថៃ មិនសប្បាយចិត្តនិងតវ៉ាទៅរដ្ឋាភិបាលខ្លួន ដោយវាធ្វើឲ្យសេដ្ឋកិច្ចរបស់ពួកគេ ដាំក្បាលចុះ។

ជាការដោះស្រាយស្ថានការណ៍យ៉ាងបន្ទាន់នេះ រដ្ឋមន្ត្រីការងារថៃ Pongkawin Jungrungruangkit ​បាននិយាយកាលពីថ្ងៃពុធទី១៣ខែសីហាឆ្នាំ២០២៥ថា ក្រសួងបានស្នើឲ្យមានការអនុញ្ញាតបន្ថែមពលករមកពីប្រទេស៤ទៀតដូចជា ស្រីលង្កា នេប៉ាល់ ហ្វីលីពីន និងឥណ្ឌូណេស៊ី ដើម្បីដោះស្រាយបញ្ហាដ៏ឈឺក្បាលនេះ។

លោក Pongkawin និយាយថា «ការពង្រីកដល់៨ប្រទេស នឹងអនុញ្ញាតឲ្យយើងនាំយកពលករ មកដោះស្រាយអំឡុងពេលបន្ទាន់ ដោយចៀសវាងការពន្យារពេលពីដំណើរការ MoU ដែលអាចចំណាយ២-៣ខែ។ ការពង្រីកនេះនឹងធានាថា អាជីវកម្មនានាអាចបន្តប្រតិបត្តិការរបស់ពួកគេដោយរលូន សូម្បីតែក្នុងអំឡុងពេលមានការរំខានដែលមិននឹកស្មានដល់ក៏ដោយ»។

សូមជម្រាបជាថ្មី របាយការណ៍ពីរដ្ឋាភិបាលក្រុងបាងកកបង្ហាញថា ពលករខ្មែរសរុបដែលធ្វើការនៅប្រទេសថៃ មានចន្លោះពី ១ទៅ១.៥លាននាក់។

ទោះបីជាយ៉ាងណាក៏ដោយ យោងតាមក្រសួងការងារកម្ពុជា, តាំងពីផ្ទុះជម្លោះព្រំដែនមក ពលករខ្មែរប្រមាណ ៨៧ម៉ឺននាក់បានត្រឡប់ចូលប្រទេសវិញកម្ពុជាវិញ ប៉ុន្តែតួលេខនេះគិតត្រឹមថ្ងៃទី៨ ខែសីហាប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ប៉ូលិសរកឃើញរោងចក្រនៅថៃ ផលិតទឹកស៊ីអ៊ីវក្លែងក្លាយនាំចេញទៅឡាវ