ថ្លែងក្នុងពិធីជួបជុំមួយ នៅទីក្រុង Hyderabad កាលពីថ្ងៃ អាទិត្យ ទី ១០ ខែ ឧសភា ឆ្នាំ ២០២៦ លោក Narendra Modi និយាយថា ដោយសារវិបត្តិកាន់តែអាក្រក់ទៅ មនុស្សវណ្ណៈកណ្តាល ដែលចូលចិត្តទៅរៀបអាពាហ៍ពិពាហ៍ក្រៅប្រទេស និងការដើរកម្សាន្តនៅបរទេសនោះ គួរតែពន្យារពេលសិនទៅ យ៉ាងហោចណាស់ក៏មួយឆ្នាំដែរ។

ការទៅរៀបអាពាហ៍ពិពាហ៍នៅបរទេស ដែលគេហៅថា «Destination Wedding» កំពុងមានប្រជាប្រិយភាពខ្លាំងមែនទែន ក្នុងចំណោមគ្រួសារអ្នកមាន និងវណ្ណៈកណ្តាល របស់ប្រទេសឥណ្ឌា។

ហេតុផលនៅពីក្រោយរឿងនេះ គឺព្រោះតែ បើរៀបការក្នុងស្រុក គ្រួសារឥណ្ឌា អាចនឹងត្រូវហៅភ្ញៀវ រាប់ពាន់នាក់ ប៉ុន្តែបើរៀបការនៅបរទេស ពួកគេអាចសម្រិតសម្រាំង ហៅតែសាច់ញាតិ និងមិត្តភក្តិជិតស្និទ្ធ ប្រហែល ១០០ ទៅ ២០០ នាក់ប៉ុណ្ណោះ ដែលធ្វើឲ្យពិធី កាន់តែមានភាពស្និទ្ធស្នាល។

ងាកទៅមើលសេចក្តីប្រកាស របស់លោក Modi វិញ នាយករដ្ឋមន្ត្រីឥណ្ឌា ក៏អំពាវនាវឲ្យពលរដ្ឋ នាំគ្នាជិះរថភ្លើងវិញ ហើយបើចាំបាច់ត្រូវជិះរថយន្ត ក៏គួរតែព្យាយាមជិះរថយន្តរួមគ្នាទៅ ដើម្បីធូរថ្លៃសាំង។

ស្របពេលជាមួយគ្នានោះ លោកថែមទាំងជំរុញឲ្យប្រជាជនឥណ្ឌា កុំទិញគ្រឿងអលង្ការ ផងដែរ។

ឥណ្ឌា ជាប្រទេស ប្រើប្រាស់ថាមពល ធំជាងគេលំដាប់ទី ៣ របស់ពិភពលោក ដូច្នេះ វិបត្តិសង្គ្រាមនៅមជ្ឈិមបូព៌ា ពិតជាជះឥទ្ធិពល ដ៏អាក្រក់ដល់ប្រទេសនេះ។ 

ឥណ្ឌា នាំចូលប្រេងឆៅប្រហែល ៨៥% និងហ្គាសធម្មជាតិ (LNG) ប្រហែល ៥០% នៃតម្រូវការសរុប។ ក្នុងនោះ ប្រហែលពាក់កណ្តាលនៃប្រេងឆៅ និង ២ ភាគ ៣ នៃហ្គាស ត្រូវដឹកជញ្ជូនឆ្លងកាត់ តាមច្រកសមុទ្រ Hormuz ដែលកំពុងត្រូវបានបិទខ្ទប់៕

អត្ថបទ៖ សុខ សុវណ្ណ

The post វិបត្តិថាមពល ធ្ងន់ធ្ងរ ដល់ថ្នាក់លោក Modi សុំឲ្យពលរដ្ឋឥណ្ឌា ផ្អាកទៅរៀបការ នៅក្រៅប្រទេសសិន  appeared first on Kampuchea Thmey Daily.

តាមការផ្សាយរបស់ NDTV នៅថ្ងៃអង្គារទី៣០ខែធ្នូឆ្នាំ២០២៥ លោក ម៉ូឌី បានបង្ហោះលើបណ្តាញសង្គម X ថា៖ «ខ្ញុំព្រួយបារម្ភខ្លាំងណាស់ចំពោះសេចក្តីរាយការណ៍ស្តីពីការកំណត់គោលដៅវាយប្រហារលើគេហដ្ឋានរបស់ប្រធានាធិបតីនៃសហព័ន្ធរុស្ស៊ី។ កិច្ចខិតខំប្រឹងប្រែងផ្នែកការទូតដែលកំពុងបន្ត គឺជាផ្លូវដ៏មានប្រសិទ្ធភាពបំផុតឆ្ពោះទៅរកការបញ្ចប់អរិភាព និងការទទួលបាននូវសុខសន្តិភាព។ យើងសូមជំរុញឲ្យភាគីពាក់ព័ន្ធទាំងអស់រក្សាការផ្តោតអារម្មណ៍លើកិច្ចខិតខំប្រឹងប្រែងទាំងនេះ និងចៀសវាងរាល់សកម្មភាពទាំងឡាយណាដែលនាំឲ្យប៉ះពាល់ដល់កិច្ចការទាំងឡាយ»។

យោង​តាម​ Reuters, រដ្ឋមន្ត្រីការបរទេសរុស្ស៊ី Sergei Lavrov អះអាងថា អ៊ុយក្រែនបានប្រើប្រាស់ដ្រូនចម្ងាយឆ្ងាយចំនួន៩១​គ្រឿង ដើម្បីវាយប្រហារលើភូមិគ្រឹះ Valdai ក្នុងតំបន់ Novgorod ចន្លោះថ្ងៃទី​២៨ដល់​ថ្ងៃ​ទី​២៩​ខែធ្នូ។ លោកហៅសកម្មភាពនេះថាជា «អំពើភេរវកម្មរដ្ឋ» ទោះមិនបង្ហាញព័ស្តុតាងជាក់ស្តែងក៏ដោយ។

ពេលឮដំណឹងអំពីការវាយប្រហារនេះភ្លាម ស្រាប់តែប្រធានាធិបតី ដូណាល់ ត្រាំ ក្តៅចិត្ត ហើយបន្ទោសខ្លាំងៗទៅលើលោក ហ្សេលេនស្គី។ លោក ត្រាំ បានថ្កោលទោស និងខឹងសម្បាព្រោះវាកើតឡើងចំពេលវេលាដ៏រសើបបំផុត ព្រមទាំងអាចជះឥទ្ធិពលដល់ជំហររបស់ទីក្រុងមូស្គូ នៅក្នុងការចរចាដែលកំពុងបន្តដើម្បីដោះស្រាយជម្លោះអ៊ុយក្រែនផងដែរ។

ថ្លែងនៅខាងក្រៅសេតវិមាន ប្រមុខរដ្ឋាភិបាលទីក្រុងវ៉ាស៊ីនតោនបញ្ជាក់ថា លោកដឹងអំពីការវាយប្រហារនេះពីលោក ពូទីន តាមរយៈកិច្ចសន្ទនាតាមទូរស័ព្ទកាលពីព្រឹកមិញ។

ទោះបែបនេះ ប្រធានាធិបតិអ៊ុយក្រែន វ៉ូឡូឌីមៀរ ហ្សេលេនស្គី បានចេញមុខបដិសេធរួចហើយ ចំពោះការចោទប្រកាន់របស់រុស្ស៊ី ហើយតបទៅវិញថា ទីក្រុងមូស្គូ កំពុងព្យាយាមបំផ្លាញកិច្ចចរចាសន្តិភាព។

តាមការផ្សាយរបស់ BBC, លោកហ្សេលេនស្គី ចោទថា រុស្ស៊ីកុហក ហើយថា៖ «វាមានសារៈសំខាន់ណាស់ដែលពិភពលោកមិនត្រូវនៅស្ងៀមទេ នាពេលនេះ។ យើងមិនអាចអនុញ្ញាតឲ្យរុស្ស៊ីធ្វើឲ្យខូចដល់ការងារលើការសម្រេចបាននូវសន្តិភាពយូរអង្វែងបានឡើយ»៕

អត្ថបទ៖ សុខ សុវណ្ណ

The post លោក ម៉ូឌី បារម្ភខ្លាំង រឿងដ្រូនអ៊ុយក្រែនប៉ុនប៉ងវាយប្រហារលើភូមិគ្រឹះ ពូទីន  appeared first on Kampuchea Thmey Daily.

លោកត្រាំ បានប្រាប់អ្នកយកព័ត៌មាននៅលើយន្តហោះ Air Force One ថា «ខ្ញុំបាននិយាយជាមួយនាយករដ្ឋមន្រ្តី ម៉ូឌី នៃប្រទេសឥណ្ឌា ហើយគាត់បាននិយាយថា គាត់នឹងមិន​រកស៊ី​ប្រេងជាមួយ​រុស្ស៊ី​ទៀត​ទេ»។

នៅពេលសួរអំពីការអះអាងរបស់ឥណ្ឌាដែលថាគ្មានការសន្ទនាបែបនេះកើតឡើង​ឡើយ លោកត្រាំ បានឆ្លើយតបថា «ប៉ុន្តែប្រសិនបើពួកគេចង់និយាយនោះ ពួកគេនឹងបន្តបង់ពន្ធដ៏ធំ ហើយពួកគេមិនចង់ធ្វើដូច្នេះទេ»។

ប្រេង​រុស្ស៊ី​បាន​ក្លាយ​ជា​ចំណុច​ស្អិត​មួយ​ក្នុង​ភាព​តានតឹង​ពាណិជ្ជកម្ម​ដែល​កំពុង​កើត​ឡើង​រវាង​ក្រុង​វ៉ាស៊ីនតោន និង​ក្រុង​ញូវដេលី។ ពាក់កណ្តាលនៃពន្ធ៥០%របស់​លោក​ត្រាំ​លើទំនិញឥណ្ឌា តាមសេចក្តីរាយការណ៍​បាន​កើត​ឡើង​ដោយសារ​តែ​​​ឥណ្ឌា​បន្តទិញប្រេងឆៅដែល​បញ្ចុះតម្លៃ​របស់​រុស្ស៊ី ដែលក្រុងវ៉ាស៊ីនតោនអះអាងថា វា​ជួយផ្តល់ហិរញ្ញប្បទានដល់សង្គ្រាម​របស់​ក្រុងមូស្គូនៅអ៊ុយក្រែន។

ឥណ្ឌាបានក្លាយជាប្រទេសទិញប្រេង​​​ពី​សមុទ្រ​ដ៏ធំបំផុ​ត​របស់​រុស្ស៊ី ចាប់តាំងពីប្រទេសលោកខាងលិចកាត់បន្ថយការនាំចូល និងដាក់ទណ្ឌកម្មបន្ទាប់ពីការលុកលុយរបស់រុស្ស៊ីនៅឆ្នាំ​២០២២លើអ៊ុយក្រែន។

លោកត្រាំ ធ្លាប់​និយាយកាលពីថ្ងៃពុធ​សប្ដាហ៍​មុន​ថា លោក​ម៉ូឌី​បានប្រាប់គាត់ដោយផ្ទាល់ថា ឥណ្ឌានឹងបញ្ឈប់ការទិញបែបនេះ។ ទោះជាយ៉ាងណាក៏ដោយ ក្រសួងការបរទេសឥណ្ឌាបានបដិសេធ​ថា ខ្លួន​មិន​ដឹងពីការអំពាវនាវណាមួយរវាងមេដឹកនាំទាំងពីរ​ទេ ដោយគ្រាន់តែនិយាយថា ការផ្តោតសំខាន់របស់ទីក្រុងញូវដេលីគឺ«ការពារផលប្រយោជន៍របស់អតិថិជនឥណ្ឌា»។

មន្ត្រីសេតវិមានបាននិយាយកាលពីថ្ងៃព្រហស្បតិ៍ថា ឥណ្ឌាបានកាត់បន្ថយការនាំចូលប្រេងពីរុស្ស៊ីពាក់កណ្តាល ប៉ុន្តែប្រភពឧស្សាហកម្មឥណ្ឌាបានរាយការណ៍ថាមិនមានការធ្លាក់ចុះគួរ​ឲ្យ​កត់សម្គាល់នោះទេ។ ក្រុមហ៊ុនចម្រាញ់ប្រេងនៅក្នុងប្រទេសឥណ្ឌា បានដាក់ការបញ្ជាទិញរួចហើយសម្រាប់ការនាំចេញខែវិច្ឆិកា និងខែធ្នូ ដែលមានន័យថា ការកាត់បន្ថយណាមួយទំនងជាត្រូវបានឆ្លុះបញ្ចាំងនៅក្នុងទិន្នន័យនាំចូលចាប់ពីចុងខែធ្នូ ឬខែមករា​ខាង​មុខ​ឯណោះ៕

ដោយ៖ ឈាង

The post ត្រាំព្រមានដាក់«ពន្ធដ៏ធំ» បើ​ឥណ្ឌា​មិន​គោរព​សន្យា​ឈប់​ទិញ​ប្រេង​ពី​រុស្ស៊ី​ appeared first on Kampuchea Thmey Daily.

​ទោះបីក្រសួង​ការ​បរទេស​ឥណ្ឌា​មិន​បាន​បញ្ជាក់​ពី​ដំណើរ​ទស្សនកិច្ច​នេះក៏ដោយ ក៏លោក Modi ត្រូវ​បាន​គេ​ដាក់​ឈ្មោះ​ជា​វាគ្មិន​បណ្ដោះអាសន្ន​សម្រាប់​កិច្ច​ពិភាក្សា​ទូទៅ​នៅ​ថ្ងៃ​ទី ២៦ ខែ​កញ្ញានៅសហរដ្ឋអាមេរិក។

គោលបំណងសំខាន់នៃដំណើរទស្សនកិច្ចនេះ គឺដើម្បីដោះស្រាយទំនាក់ទំនងពាណិជ្ជកម្មដ៏តានតឹង បន្ទាប់ពីលោក ត្រាំបានដាក់ពន្ធបន្ថែម ២៥% លើទំនិញឥណ្ឌា ដោយដំឡើងពន្ធសរុបរបស់សហរដ្ឋអាមេរិកដល់ ៥០% ដើម្បីឆ្លើយតបទៅនឹងការបន្តទិញប្រេងពីរុស្ស៊ីរបស់ឥណ្ឌា។ កត្តានេះកិច្ចពិភាក្សាពាណិជ្ជកម្មបានជាប់គាំងជុំវិញជម្លោះលើការចូលទីផ្សារ និងការនាំចូលប្រេង។

លើសពីនេះប្រទេសឥណ្ឌាក៏បានផ្អាកគម្រោងទិញសព្វាវុធពីសហរដ្ឋអាមេរិកតម្លៃរាប់លានដុល្លារបន្ទាប់ពីត្រាំ ដាក់ពន្ធថ្មីនេះផងដែរ។

បើតាមរដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent ការចរចាជាមួយប្រទេសឥណ្ឌាមានភាពយឺតយ៉ាវ ប៉ុន្តែបានសម្តែងក្តីសង្ឃឹមថា កិច្ចព្រមព្រៀងពាណិជ្ជកម្មសំខាន់ៗអាចត្រូវបានបញ្ចប់នៅក្នុងខែតុលាខាងមុខ៕

អត្ថបទ៖ ប៊ុន សុភាព

The post នាយករដ្ឋមន្ត្រីឥណ្ឌាអាចនឹងជួប ត្រាំ នៅខែក្រោយ ចំពេលមានភាពតានតឹងពាណិជ្ជកម្មរវាងប្រទេសទាំងពីរ appeared first on Kampuchea Thmey Daily.

តាមសេចក្តីរាយការណ៍​នានា​ បង្ហាញ​ថា ប្រទេស​ចំនួន​៤ ដែល​មាន​ប្រជាជន​​​ធ្វើដំណើរ​តាមជើង​យន្តហោះ​​ដែលធ្លាក់​​​ បង្កជាសោកនាដកម្ម​​ដ៏សោក​សង្រេង​​​​នៅ​ប្រទេសឥណ្ឌា​​ក្នុងថ្ងៃព្រហស្បតិ៍​ទី​១២​ខែមិថុនា​នេះ​។ ​ប្រទេសទាំង៤នោះរួម​មាន​ ឥណ្ឌា​មានប្រជាជន​ច្រើន​ជាងគេ​ បន្ទាប់មក​អង់គ្លេស ​ព័រទុយហ្កាល់ និង​ចុង​ក្រោយ​គឺកាណាដា។

យន្តហោះ Air India ជើងហោះហើរ 171 ដែលជា​ប្រភេទ​​យន្តហោះ Boeing 787-8 Dreamliner ឆ្ពោះទៅអាកាសយានដ្ឋាន Gatwick របស់ទីក្រុងឡុងដ៍ បានធ្លាក់ប៉ុន្មាននាទី បន្ទាប់ពីការហោះចេញពីអាកាសយានដ្ឋានអន្តរជាតិ Sardar Vallabhbhai Patel ក្នុងទីក្រុង​ Ahmedabad រដ្ឋ​ Gujarat​ ភាគខាង​លិច​ប្រទេស​ឥណ្ឌា​។

យោង​តាមប្រភព​ព័ត៌មាន​របស់​សារព័ត៌មានឥណ្ឌា ក្រុមហ៊ុន Adani របស់ប្រទេសឥណ្ឌា ដែលប្រតិបត្តិការព្រលានយន្តហោះក្រោមការបណ្តាក់ទុន​រួម​គ្នា​ក្រោម​គម្រោង សាធារណៈឯកជន បាននិយាយថា ខ្លួនកំពុងផ្តល់ជំនួយគ្រប់បែប​យ៉ាង​ដល់ក្រុមគ្រួសារនៃអ្នកដែលរងផលប៉ះពាល់ដោយឧបទ្ទវហេតុនេះ។

យន្តហោះ Boeing 787-8 Dreamliner ​ជា​ប្រភេទ​​យន្តហោះ​មាន​​ម៉ាស៊ីន​ភ្លោះ​ដែល​ចុះ​ឈ្មោះ VT‑ANB បាន​ដឹក​មនុស្ស ២៤២ នាក់ ក្នុង​នោះ​មាន​មនុស្ស​ពេញ​វ័យ ២១៧ នាក់ កុមារ ១១ នាក់ និង​ទារក ២នាក់​។ យោងតាមក្រុមហ៊ុនអាកាសចរណ៍ Air India អ្នកដំណើរមានជនជាតិឥណ្ឌាមាន ១៦៩នាក់ អង់គ្លេសមាន ៥៣ នាក់ ព័រទុយហ្គាល់ មាន​៧នាក់ និងកាណាដាមាន​១នាក់។

យោងតាមការត្រួតពិនិត្យចរាចរណ៍ផ្លូវអាកាស និងទិន្នន័យអាកាសចរណ៍ពី Flightradar24 យន្តហោះបានឡើងដល់កម្ពស់ត្រឹមតែ ៦២៥ហ្វីត មុនពេលចេញការប្រកាសអាសន្ន Mayday និងបាត់ពីរ៉ាដា។ ក្នុងរយៈពេលប៉ុន្មានវិនាទី វាបាន​​បុក​​ដល់សាលបរិភោគអាហាររបស់ផ្ទះសំណាក់ បណ្តាលឱ្យមានការឆាបឆេះយ៉ាងសន្ធោសន្ធៅ និងការដួលរលំ​មួយ​ផ្នែក​នៃ​អគារ។

ក្រសួងអាកាសចរណ៍ស៊ីវិលឥណ្ឌា បានបញ្ជូនក្រុមស៊ើបអង្កេតពិសេសមួយចូលរួមដោយអ្នកជំនាញបច្ចេកទេសរបស់ក្រុមហ៊ុន Boeing និងការិយាល័យស៊ើបអង្កេតគ្រោះថ្នាក់យន្តហោះ (AAIB) ។ ជើងហោះហើរ VT‑ANB បានដំណើរការតាំងពីឆ្នាំ២០១៤​ ហើយមុននេះ បានហោះហើរពីទីក្រុង Delhi ទៅកាន់​ទីក្រុង​ Ahmedabad ដោយគ្មានឧបទ្ទវហេតុ​​អ្វីសោះ​​៕​

រ៉ាន់ រើយ

The post ​៤ប្រទេស ​មាន​​​ប្រជាជន​ជិះយន្តហោះ​ដែលធ្លាក់​នៅ​ឥណ្ឌាថ្ងៃ​នេះ​​ appeared first on Kampuchea Thmey Daily.

​​តាមសេចក្តីរាយការណ៍​របស់ BBC នេះជាលើកទីមួយហើយ ដែលយន្តហោះ Boeing 787 ធ្លាក់បែបនេះ បន្ទាប់​ពី​​​យន្តហោះ​​របស់​ក្រុមហ៊ុន​​​​ខ្នាតយក្ស​របស់​អាមេរិក​មាន​រឿង​អាស្រូវ​​​នូវ​ប្រភេទ​​យន្តហោះ​​ម៉ូដែល​ផ្សេង​ដែល​ធ្លាប់​ធ្លាក់​។​

​មក​ដឹង​ពីលក្ខណៈរបស់យន្តហោះប្រភេទ​ Boeing 787

យោង​តាម BBC ម៉ូដែលនេះត្រូវបានដាក់ឱ្យដំណើរការកាលពី១៤ឆ្នាំមុន ហើយទើបតែ ៦​សប្តាហ៍មុន ក្រុមហ៊ុនផលិតយន្តហោះអាមេរិកបានសរសើរពីការពិតដែលម៉ូដែលនេះត្រូវបានគេស្គាល់ថា ជា Dreamliner បានឈានដល់ចំណុចសំខាន់នៃការដឹកអ្នកដំណើរ១​ពាន់លាននាក់។

រហូត​មក​ដល់​បច្ចុប្បន្ន​នេះ ​​ក្រុមហ៊ុន​ផលិត​យន្តហោះ​របស់​សហរដ្ឋអាមេរិក​ Boeing ​បាន​លើក​ឡើង​ថា ​ក្រុម​ហ៊ុន​បាន​បញ្ចេញ​​យន្តហោះ​​ប្រភេទ​ Boeing 787 ​មានជាង​​ ១១៧៥គ្រឿង បានហោះហើរជិត ៥​លានជើងហោះហើរ គ្របដណ្តប់ជាង ៣០​លានម៉ោង​​ទូទាំងសកល​​​លោក​។

ការធ្លាក់នេះគឺជាការវាយប្រហារមួយសម្រាប់ក្រុមហ៊ុនដែលបាននិងកំពុងតស៊ូដើម្បីជម្នះបញ្ហាជាច្រើន រួមទាំងការធ្លាក់យ៉ាងធ្ងន់ធ្ងរ ជាមួយនឹងកម្មវិធី 737 របស់ក្រុមហ៊ុន Boeing ​ដែលបាន​ធ្លាក់​ជាបន្តបន្ទាប់​ក្នុង​សេវាកម្ម​ហោះហើរ​​​នៅក្នុងសកល​លោក​៕​

រ៉ាន់ រើយ​

The post ​មក​ដឹង​ពី​លក្ខណៈ​របស់​​​ប្រភេទ​យន្តហោះ​ Boeing 787 ដែល​ទើប​ធ្លាក់​នៅឥណ្ឌា​ appeared first on Kampuchea Thmey Daily.

ដោយប្រើពាក្យខ្លាំងៗ លោក Modi ព្រមានថា ឥណ្ឌានឹងឆ្លើយតបចាស់ដៃទៅវិញចំពោះអំពើភេរវកម្ម។ រាល់ការគំរាមបាញ់នុយក្លេអ៊ែរ មិនធ្វើឲ្យឥណ្ឌាព្រឺឡើយ ហើយការសម្លុតគំរាមនុយក្លេអ៊ែរទាំងនោះ នឹងបកក្លាយទៅជាគោលដៅរបស់ឥណ្ឌាវិញ។

ម្យ៉ាងវិញទៀត លោកបញ្ជាក់យ៉ាងច្បាស់ថា ឥណ្ឌាគ្រាន់តែផ្អាកធ្វើប្រតិបត្តិការលើទីតាំងយោធានិងជំរំភេរវករប៉ាគីស្ថានសិនប៉ុណ្ណោះមិនមែនបញ្ឈប់ទាំងស្រុងទេ ព្រោះទីក្រុងញូវដែលី មិនអត់ឱនដាច់ខាត ចំពោះអំពើភេរវកម្មគ្រប់ទម្រង់ ហើយនឹងសងសឹកទៅវិញដោយមិនប្រណីដៃឡើយ។

សូមជម្រាបថា ឥណ្ឌានិងប៉ាគីស្ថាន ដែលសុទ្ធជាប្រទេសប្រដាប់អាវុធនុយក្លេអ៊ែរ បានបាញ់សងសឹកគ្នាក្នុងរយៈពេលប្រាំថ្ងៃចុងក្រោយនេះ បន្ទាប់ពីការវាយប្រហារភេរវកម្មនៅទីក្រុង Pahalgam ក្នុងទឹកដីកាស្មៀរខាងឥណ្ឌា បណ្តាលឲ្យមនុស្សចំនួន២៦នាក់បាត់បង់ជីវិត។

បន្ទាប់​ពី​ការ​វាយ​ប្រហារនោះ លោក Modi បានចេញបញ្ជាឲ្យកងទ័ពឥណ្ឌា ប្រុងជើងការនិង​ឆ្លើយ​តប​ទៅ​នឹង​ការ​បង្កហេតុ​ណាមួយ​ពីសំណាក់ភាគី​ប៉ាគីស្ថាន។

ប៉ុន្មានសប្តាហ៍ក្រោយមក ពោលគឺនៅថ្ងៃទី៧ខែឧសភា ឥណ្ឌាក៏បើកប្រតិបត្តិការ Sindoor ដោយវាយលុកទីតាំងចំនួនប្រាំបួនកន្លែងនៅក្នុងប្រទេសប៉ាគីស្ថាន រួមទាំងនៅតំបន់ Bahawalpur, Muridke និង Muzaffarabad ផងដែរ ដែលគេជឿថា ជាជំរំភេរវករ។

សកម្មភាពទាំងនេះហើយ ​បានបង្ខំចិត្តឲ្យទី​ក្រុង​អ៊ីស្លាម៉ាបាដឆ្លើយតបទៅវិញ ដោយ​បញ្ជូន​យន្តហោះ​ដ្រូននិងបាញ់​មីស៊ីល វាយប្រហារ​លើ​ទីតាំង​យោធា​ឥណ្ឌា៕

អត្ថបទ៖ សុខ សុវណ្ណ

ចុចអាន៖ មេទ័ពឥណ្ឌា ព្រមានថា ប៉ាគីស្ថាន នឹងជួបទុក្ខធំ បើហ៊ានបំពានបទឈប់បាញ់

The post Modi ប្រកាសក្តែងៗថា ឥណ្ឌា អត់ញញើតការគំរាមបាញ់នុយក្លេអ៊ែររបស់ ប៉ាគីស្ថាន ទេ appeared first on Kampuchea Thmey Daily.

ថ្លែងទៅកាន់ការជួបជុំមួយក្នុងរដ្ឋ Bihar, លោក Modi ប្រកាសមិនឲ្យខ្មាន់កាំភ្លើងរួចខ្លួនឡើយ ទោះទៅដល់ជើងមេឃក៏ត្រូវចាប់ឲ្យបានដែរ។

ការប្រកាសរបស់លោក Modi កើតឡើង ស្របពេលប៉ូលិសឥណ្ឌា អះអាងថា ជនសង្ស័យ២នាក់ក្នុងចំណោម៣នាក់ គឺជាជនជាតិប៉ាគីស្ថាន។ 

ប៉ូលិសឥណ្ឌានិយាយថា ខ្មាន់កាំភ្លើងទាំងនេះគឺជាសមាជិកនៃក្រុមសកម្មប្រយុទ្ធ Lashkar-e-Taiba (LeT) ដែលមានមូលដ្ឋាននៅប្រទេសប៉ាគីស្ថាន។ យ៉ាងណា ទីក្រុងអ៊ីស្លាម៉ាបាដ បានបដិសេធរួចហើយថា ខ្លួនមិនជាប់ពាក់ព័ន្ធអ្វីទេក្នុងរឿងនេះ។

សូមជម្រាបជាថ្មី ខ្មាន់កាំភ្លើងបានសម្រុកចេញពីព្រៃហើយបើកការវាយឆ្មក់ បាញ់ប្រហារយ៉ាងរន្ធត់ទៅលើទេសចរមួយក្រុមដែលនាំគ្នាទៅលេងក្រុង Pahalgam នៃតំបន់កាស្មៀរខាងគ្រប់គ្រងដោយប្រទេសឥណ្ឌា បណ្តាលឲ្យស្លាប់ចំនួន២៦នាក់។

ហេតុការណ៍នេះកើតឡើងនៅតំបន់ភ្នំ Baisaran កាលពីថ្ងៃអង្គារទី២២ខែមេសាឆ្នាំ២០២៥ ហើយបើតាមការបញ្ជាក់ពីមន្ត្រីក្នុងតំបន់, ក្រៅពីមនុស្សស្លាប់ ក៏មានទេសចរច្រើននាក់ទៀតរងរបួសផងដែរ ខណៈមួយចំនួនរងរបួសធ្ងន់។

ការវាយប្រហារដ៏រន្ធត់នេះ ធ្វើឲ្យទំនាក់ទំនងរវាងឥណ្ឌានិងប៉ាគីស្ថាន កាន់តែតានតឹងនិងធ្លាក់ចុះដល់កម្រិតទាបសាជាថ្មី។ ហេតុការណ៍នេះទៀតសោត ធ្វើឲ្យឥណ្ឌាក្តៅស្លឹកត្រចៀក ឈានដល់ការបិទច្រកព្រំដែនសំខាន់របស់ខ្លួនជាមួយប៉ាគីស្ថាន បណ្តេញអ្នកការទូតយោធានិងផ្អាកសន្ធិសញ្ញាចែករំលែកទឹកដ៏សំខាន់ទៀតផង៕

អត្ថបទ៖ សុខ​ សុវណ្ណ

ចុចអាន៖ រន្ធត់! ទេសចរ ២៦នាក់ ត្រូវខ្មាន់កាំភ្លើងបាញ់សម្លាប់នៅតំបន់ កាស្មៀរ

The post លោក Modi ប្តេជ្ញាតាមចាប់ខ្មាន់កាំភ្លើងដែលបាញ់សម្លាប់ទេសចរនៅកាស្មៀរ ដល់ជើងមេឃ appeared first on Kampuchea Thmey Daily.