Modi ប្រកាសក្តែងៗថា ឥណ្ឌា អត់ញញើតការគំរាមបាញ់នុយក្លេអ៊ែររបស់ ប៉ាគីស្ថាន ទេ

ក្នុងសុន្ទរកថាទៅកាន់ជនរួមជាតិជាលើកដំបូងចាប់តាំងពីបើកប្រតិបត្តិការ Sindoor, នាយករដ្ឋមន្ត្រីឥណ្ឌា Narendra Modi បានប្រកាសក្តែងៗថា ប្រទេសរបស់លោកមិនញញើតនឹងការគំរាមបាញ់នុយក្លេអ៊ែររបស់ប៉ាគីស្ថានសូម្បីបន្តិច។ នេះបើតាមការចុះផ្សាយរបស់សារព័ត៌មាន India Today កាលពីថ្ងៃចន្ទទី១២ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយប្រើពាក្យខ្លាំងៗ លោក Modi ព្រមានថា ឥណ្ឌានឹងឆ្លើយតបចាស់ដៃទៅវិញចំពោះអំពើភេរវកម្ម។ រាល់ការគំរាមបាញ់នុយក្លេអ៊ែរ មិនធ្វើឲ្យឥណ្ឌាព្រឺឡើយ ហើយការសម្លុតគំរាមនុយក្លេអ៊ែរទាំងនោះ នឹងបកក្លាយទៅជាគោលដៅរបស់ឥណ្ឌាវិញ។

ម្យ៉ាងវិញទៀត លោកបញ្ជាក់យ៉ាងច្បាស់ថា ឥណ្ឌាគ្រាន់តែផ្អាកធ្វើប្រតិបត្តិការលើទីតាំងយោធានិងជំរំភេរវករប៉ាគីស្ថានសិនប៉ុណ្ណោះមិនមែនបញ្ឈប់ទាំងស្រុងទេ ព្រោះទីក្រុងញូវដែលី មិនអត់ឱនដាច់ខាត ចំពោះអំពើភេរវកម្មគ្រប់ទម្រង់ ហើយនឹងសងសឹកទៅវិញដោយមិនប្រណីដៃឡើយ។

សូមជម្រាបថា ឥណ្ឌានិងប៉ាគីស្ថាន ដែលសុទ្ធជាប្រទេសប្រដាប់អាវុធនុយក្លេអ៊ែរ បានបាញ់សងសឹកគ្នាក្នុងរយៈពេលប្រាំថ្ងៃចុងក្រោយនេះ បន្ទាប់ពីការវាយប្រហារភេរវកម្មនៅទីក្រុង Pahalgam ក្នុងទឹកដីកាស្មៀរខាងឥណ្ឌា បណ្តាលឲ្យមនុស្សចំនួន២៦នាក់បាត់បង់ជីវិត។

បន្ទាប់​ពី​ការ​វាយ​ប្រហារនោះ លោក Modi បានចេញបញ្ជាឲ្យកងទ័ពឥណ្ឌា ប្រុងជើងការនិង​ឆ្លើយ​តប​ទៅ​នឹង​ការ​បង្កហេតុ​ណាមួយ​ពីសំណាក់ភាគី​ប៉ាគីស្ថាន។

ប៉ុន្មានសប្តាហ៍ក្រោយមក ពោលគឺនៅថ្ងៃទី៧ខែឧសភា ឥណ្ឌាក៏បើកប្រតិបត្តិការ Sindoor ដោយវាយលុកទីតាំងចំនួនប្រាំបួនកន្លែងនៅក្នុងប្រទេសប៉ាគីស្ថាន រួមទាំងនៅតំបន់ Bahawalpur, Muridke និង Muzaffarabad ផងដែរ ដែលគេជឿថា ជាជំរំភេរវករ។

សកម្មភាពទាំងនេះហើយ ​បានបង្ខំចិត្តឲ្យទី​ក្រុង​អ៊ីស្លាម៉ាបាដឆ្លើយតបទៅវិញ ដោយ​បញ្ជូន​យន្តហោះ​ដ្រូននិងបាញ់​មីស៊ីល វាយប្រហារ​លើ​ទីតាំង​យោធា​ឥណ្ឌា៕

អត្ថបទ៖ សុខ សុវណ្ណ

ចុចអាន៖ មេទ័ពឥណ្ឌា ព្រមានថា ប៉ាគីស្ថាន នឹងជួបទុក្ខធំ បើហ៊ានបំពានបទឈប់បាញ់