ឥណ្ឌារំពឹងចំណេញ ៣​ពាន់លានដុល្លារ ក្រោយ​ប្តូរទិញ​ប្រេងវ៉េណេស៊ុយអេឡាវិញ

យោងតាមរបាយការណ៍ស្រាវជ្រាវថ្មីមួយរបស់ធនាគាររដ្ឋ SBI ប្រទេសឥណ្ឌាអាចកាត់បន្ថយការចំណាយលើការនាំចូលប្រេងឆៅប្រចាំឆ្នាំរហូតដល់ ៣​ពាន់លានដុល្លារ ដោយគ្រាន់តែ​ប្តូរផ្នែកខ្លះនៃការបញ្ជាទិញពីប្រទេសរុស្ស៊ី មកទិញប្រេងឆៅធុនធ្ងន់ពីវ៉េណេស៊ុយអេឡាវិញ។

យោង​តាម Ecocomic Times ចុះ​ផ្សាយ​ថ្ងៃទី​៤​កុម្ភៈ​២០២៦ ការកែសម្រួលតុល្យភាពសេដ្ឋកិច្ចនេះ កើតឡើងស្របពេលដែលមានកិច្ចព្រមព្រៀងពាណិជ្ជកម្មដ៏សំខាន់រវាងទីក្រុងញូវដេលី និងទីក្រុងវ៉ាស៊ីនតោន ដែលក្នុងនោះសហរដ្ឋអាមេរិកបានយល់ព្រមបន្ថយពន្ធលើទំនិញឥណ្ឌា ជាថ្នូរនឹងការដែលឥណ្ឌាត្រូវធ្វើពិពិធកម្មប្រភពថាមពលរបស់ខ្លួន។ ក្រុមអ្នកវិភាគលើកឡើងថា ការបញ្ចុះតម្លៃពី ១០ ទៅ ១២ដុល្លារក្នុងមួយបារ៉ែលលើប្រេងវ៉េណេស៊ុយអេឡា នឹងគ្រប់គ្រាន់ដើម្បីទូទាត់លើការកើនឡើងនៃថ្លៃដឹកជញ្ជូន ធានារ៉ាប់រង និងភស្តុភារផ្សេងៗ ដោយសារវ៉េណេស៊ុយអេឡាមានចម្ងាយឆ្ងាយពីឥណ្ឌាជាងរុស្ស៊ីប្រហែលពីរដង និងឆ្ងាយជាងមជ្ឈិមបូព៌ាប្រហែលប្រាំដង។

ទោះបីជាមានសក្តានុពលក្នុងការសន្សំថវិកាយ៉ាងច្រើនក៏ដោយ ក៏ការផ្លាស់ប្តូរនេះបានបង្កជាបញ្ហាប្រឈមផ្នែកបច្ចេកទេសសម្រាប់ហេដ្ឋារចនាសម្ព័ន្ធចម្រាញ់ប្រេងរបស់ឥណ្ឌា។ រោងចក្រចម្រាញ់ប្រេងឯកជនដូចជា Reliance និង Nayara Energy មានសមត្ថភាពគ្រប់គ្រាន់ក្នុងការចម្រាញ់ប្រេងធុនធ្ងន់របស់វ៉េណេស៊ុយអេឡា ប៉ុន្តែរោងចក្រចម្រាញ់ប្រេងរបស់រដ្ឋអាចនឹងត្រូវការការធ្វើទំនើបកម្មបច្ចេកវិទ្យា ឬការលាយបញ្ជូលគ្នាជាពិសេស ដើម្បីចម្រាញ់ប្រភេទប្រេងដ៏ស្មុគស្មាញនេះ​ឲ្យ​មានប្រសិទ្ធភាព៕

ប្រែសម្រួល៖ ឈាង