ព័ត៌មានអន្ដរជាតិ

មេទ័ពឥណ្ឌា ព្រមានថា ប៉ាគីស្ថាន នឹងជួបទុក្ខធំ បើហ៊ានបំពានបទឈប់បាញ់

បានផុស

១ year មុន

នៅ

ថ្ងៃចន្ទ ១២ ឧសភា ២០២៥

ដោយ

ដ្បិតតែរងើកភ្លើងសង្គ្រាមរវាងទីក្រុងញូវដែលីនិងអ៊ីស្លាម៉ាបាដ បានថយចុះបន្តិចមែនក៏ដោយ ប៉ុន្តែមេទ័ពឥណ្ឌាបានព្រមានថា ប៉ាគីស្ថាននឹងជួបទុក្ខធំបើហ៊ានបំពានបទឈប់បាញ់ហើយវាយប្រហារខ្លួនជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះគឺចេញពីមាត់អគ្គនាយកប្រតិបត្តិការយោធា (DGMO) នៃកងទ័ពឥណ្ឌា ឧត្តមសេនីយ៍ឯក Rajiv Ghai ឆ្លើងតបទៅសំណួរអ្នកសារព័ត៌មាន ក្នុងអំឡុងសន្និសីទកាសែតរួមរបស់កងកម្លាំងប្រដាប់អាវុធឥណ្ឌា កាលពីថ្ងៃអាទិត្យទី១១ខែឧសភាឆ្នាំ២០២៥។

លោក Ghai ត្រូវអ្នកកាសែតសួរថា សត្រូវបានដកខ្លួនហើយ ប៉ុន្តែតើនឹងមានអ្វីកើតឡើង ប្រសិនបើប៉ាគីស្ថានបាញ់ផ្លោងនិងឈ្លានពានពីលើអាកាសតាមរយៈយន្តហោះគ្មានមនុស្សបើក សាជាថ្មីនោះ? មេទ័ពរូបនេះឆ្លើយថា «ខ្ញុំសូមបញ្ជាក់ឲ្យច្បាស់ថា នឹងមានការឆ្លើយតបវិញ ហើយវានឹងជាការឆ្លើយតបកាចសាហាវ នោះគឺជាការដាក់ទណ្ឌកម្ម ពួកគេនឹងជួបទុក្ខធំ»។

លោកបន្តថា «បទឈប់បាញ់ មិនមែនមានន័យថា កងកម្លាំងប្រដាប់អាវុធលែងប្រុងប្រៀបខ្លួននោះទេ។ ខ្ញុំសូមប្រាប់អ្នកថា កងកម្លាំងប្រដាប់អាវុធមានការប្រុងប្រយ័ត្នខ្ពស់ណាស់ ហើយពួកគេនៅតែបន្តស្ថិតក្នុងស្ថានភាពដូចយើងនិយាយអ៊ីចឹង»។

ការព្រមានរបស់លោក Ghai កើតឡើងបន្ទាប់ពីឥណ្ឌាចោទប៉ាគីស្ថានថា បានរំលោភបទឈប់បាញ់ដែលសម្របសម្រួលដោយសហរដ្ឋអាមេរិក ខណៈការបំផ្ទុះត្រូវបានគេរាយការណ៍នៅក្នុងទីក្រុង Srinagar និងផ្នែកផ្សេងទៀតនៃតំបន់កាស្មៀរដែលគ្រប់គ្រងដោយឥណ្ឌា។

រដ្ឋមន្ត្រីការបរទេសឥណ្ឌា Vikram Misri បាននិយាយក្នុងសន្និសីទទូរទស្សន៍មួយថា រយៈពេលប៉ុន្មានម៉ោងចុងក្រោយ មានការរំលោភបំពានម្តងហើយម្តងទៀតពីភាគីប៉ាគីស្ថាន ហើយកងកម្លាំងប្រដាប់អាវុធឥណ្ឌាកំពុងបើកការវាយប្រហារឆ្លើយតបវិញភ្លាមៗ ចំពោះការរំលោភបំពានទាំងនេះ។

សូមជម្រាបជាថ្មី ភាពតានតឹងរវាងគូជម្លោះទាំងពីរបានកើនឡើងខ្ពស់ ចាប់តាំងពីថ្ងៃទី៧ខែឧសភាមក នៅពេលឥណ្ឌាបើកប្រតិបត្តិការ «Sindoor» ដោយផ្តោតលើអ្វីដែលខ្លួនបានពិពណ៌នាថាជាហេដ្ឋារចនាសម្ព័ន្ធភេរវករនៅក្នុងប្រទេសប៉ាគីស្ថាន ឆ្លើយតបទៅការវាយប្រហារភេរវកម្មនៅតំបន់កាស្មៀរគ្រប់គ្រងដោយឥណ្ឌាកាលពីថ្ងៃទី២២ខែមេសា ដែលសម្លាប់មនុស្ស ២៦នាក់។

ឥណ្ឌាអះអាងថា ការវាយប្រហារនោះបានសម្លាប់ពួកសកម្មប្រយុទ្ធយ៉ាងតិច១០០នាក់ ខណៈប៉ាគីស្ថានបានបញ្ជាក់តែពីរបាយការណ៍ស្លាប់របស់ជនស៊ីវិលប៉ុណ្ណោះ និងបានប្រកាសសងសឹកវិញ៕

អត្ថបទ៖ សុខ សុវណ្ណ

ចុចអាន៖ ឥណ្ឌាចោទប៉ាគីស្ថានពីការបំពានបទឈប់បាញ់ ហើយប្រកាសវាយប្រហារសងសឹកវិញភ្លាមៗ