នាយករដ្ឋមន្ត្រីឥណ្ឌាអាចនឹងជួប ត្រាំ នៅខែក្រោយ ចំពេលមានភាពតានតឹងពាណិជ្ជកម្មរវាងប្រទេសទាំងពីរ

សារព័ត៌មាន Indian Express បានរាយការណ៍ថា នាយករដ្ឋមន្ត្រីឥណ្ឌា Narendra Modi អាចនឹងទៅបំពេញទស្សនកិច្ចនៅសហរដ្ឋអាមេរិកនៅខែក្រោយ ដើម្បីចូលរួមមហាសន្និបាតអង្គការសហប្រជាជាតិ និងអាចជួបជាមួយប្រធានាធិបតីលោក ដូណាល់ ត្រាំ ។

​ទោះបីក្រសួង​ការ​បរទេស​ឥណ្ឌា​មិន​បាន​បញ្ជាក់​ពី​ដំណើរ​ទស្សនកិច្ច​នេះក៏ដោយ ក៏លោក Modi ត្រូវ​បាន​គេ​ដាក់​ឈ្មោះ​ជា​វាគ្មិន​បណ្ដោះអាសន្ន​សម្រាប់​កិច្ច​ពិភាក្សា​ទូទៅ​នៅ​ថ្ងៃ​ទី ២៦ ខែ​កញ្ញានៅសហរដ្ឋអាមេរិក។

គោលបំណងសំខាន់នៃដំណើរទស្សនកិច្ចនេះ គឺដើម្បីដោះស្រាយទំនាក់ទំនងពាណិជ្ជកម្មដ៏តានតឹង បន្ទាប់ពីលោក ត្រាំបានដាក់ពន្ធបន្ថែម ២៥% លើទំនិញឥណ្ឌា ដោយដំឡើងពន្ធសរុបរបស់សហរដ្ឋអាមេរិកដល់ ៥០% ដើម្បីឆ្លើយតបទៅនឹងការបន្តទិញប្រេងពីរុស្ស៊ីរបស់ឥណ្ឌា។ កត្តានេះកិច្ចពិភាក្សាពាណិជ្ជកម្មបានជាប់គាំងជុំវិញជម្លោះលើការចូលទីផ្សារ និងការនាំចូលប្រេង។

លើសពីនេះប្រទេសឥណ្ឌាក៏បានផ្អាកគម្រោងទិញសព្វាវុធពីសហរដ្ឋអាមេរិកតម្លៃរាប់លានដុល្លារបន្ទាប់ពីត្រាំ ដាក់ពន្ធថ្មីនេះផងដែរ។

បើតាមរដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent ការចរចាជាមួយប្រទេសឥណ្ឌាមានភាពយឺតយ៉ាវ ប៉ុន្តែបានសម្តែងក្តីសង្ឃឹមថា កិច្ចព្រមព្រៀងពាណិជ្ជកម្មសំខាន់ៗអាចត្រូវបានបញ្ចប់នៅក្នុងខែតុលាខាងមុខ៕

អត្ថបទ៖ ប៊ុន សុភាព