លោក Sergey Lavrov Archives - Kampuchea Thmey Daily

រដ្ឋមន្ត្រីការបរទេសរុស្ស៊ី ប្រាប់សមភាគីអាមេរិក អំពីការមិនអាចទទួលយកបានដែលអាមេរិកបំពាក់អាវុធដល់អ៊ុយក្រែនជាថ្មី

Rann Reuy — Thu, 23 Jul 2026 11:35:34 +0000

រដ្ឋមន្ត្រីការបរទេសរុស្ស៊ី លោក Sergey Lavrov និងរដ្ឋមន្ត្រីការបរទេសសហរដ្ឋអាមេរិក លោក Marco Rubio បានរៀបចំជំនួបជាន់ខ្ពស់ដ៏កម្ររវាងមហាអំណាចនុយក្លេអ៊ែរទាំងពីរ នៅថ្ងៃទី ២៣ខែកក្កដា នៅខាងក្រៅព្រឹត្តិការណ៍រដ្ឋមន្ត្រីអាស៊ាននៅទីក្រុងម៉ានីល ប្រទេសហ្វីលីពីន។

តាមរយៈការផ្សព្វផ្សាយរបស់បណ្តាញទំនាក់ទំនងសង្គមហ្វេសប៊ុករបស់ក្រសួងការបរទេសរុស្ស៊ី ការពិភាក្សារបស់ប្រមុខការទូតទាំងពីរ បានផ្តោតលើការផ្លាស់ប្តូរទស្សនៈយ៉ាងហ្មត់ចត់លើបញ្ហាទ្វេភាគី និងអន្តរជាតិជាច្រើន ដោយកសាងឡើងលើទំនាក់ទំនងកម្រិតខ្ពស់ថ្មីៗនេះ។

ជុំវិញជម្លោះជាមួយអ៊ុយក្រែន រដ្ឋមន្ត្រីការបរទេសរុស្ស៊ី លោក Sergey Lavrov បានប្រាប់សមភាគីអាមេរិកអំពីភាពមិនអាចទទួលយកបាននៃការបំពាក់អាវុធបន្ថែមទៀតដល់អ៊ុយក្រែនពីសំណាក់ភាគីអាមេរិក និងគោលនយោបាយបង្កអស្ថិរភាពជាទូទៅរបស់បណ្តាប្រទេសអឺរ៉ុប ដែលបន្តស្វែងរកការបរាជ័យជាយុទ្ធសាស្ត្រលើប្រទេសរុស្ស៊ី។

ចំពោះការចរចារកដំណោះស្រាយសន្តិភាពវិញ លោករដ្ឋមន្ត្រី Lavrov បានបញ្ជាក់ជាថ្មីអំពីការត្រៀមខ្លួនរបស់រុស្ស៊ីសម្រាប់ការដោះស្រាយជម្លោះនយោបាយ និងការទូត និងការប្តេជ្ញាចិត្តរបស់ខ្លួនចំពោះសំណើដែលដាក់ចេញដោយភាគីអាមេរិកនៅក្នុងកិច្ចប្រជុំរវាងប្រធានាធិបតី Vladimir Putin និងលោក Donald Trump នៅទីក្រុង Anchorage រដ្ឋអាឡាស្ការកាលពីខែសីហាឆ្នាំមុន ដែលមេដឹកនាំរុស្ស៊ីបានយល់ព្រម។

លើសពីនេះទៀត ភាគីអាមេរិកនិងរុស្ស៊ី បានពិភាក្សាផ្តោតលើបញ្ហាតំបន់ និងអន្តរជាតិ រួមទាំងស្ថានភាពនៅឈូងសមុទ្រពែរ្ស ដែលកំពុងឆាបឆេះសង្គ្រាមបន្ទាប់ពីសហរដ្ឋអាមេរិកបើកការវាយប្រហារលើអ៊ីរ៉ង់ជាថ្មីឈានដល់ថ្ងៃទី១២ជាប់ៗគ្នា និង គ្មានសញ្ញាណាមួយដែលភាគីជម្លោះវិលទៅរកការចរចាក្នុងពេលឆាប់ៗនេះទេ។

ចំពោះកិច្ចសហប្រតិបត្តិលើវិស័យវិទ្យាសាស្រ្តនៃមហាអំណាចទាំងពីរ លោក Sergey Lavrov និងលោក Marco Rubio បានស្វាគមន៍ចំពោះការបន្តទំនាក់ទំនងពេញលេញរវាងភ្នាក់ងារអវកាសរុស្ស៊ី Roscosmos និង NASA របស់សហរដ្ឋអាមេរិក ហើយក៏បានសម្តែងការគាំទ្រចំពោះការអភិវឌ្ឍនៃការផ្លាស់ប្តូរអន្តរសភា និងទំនាក់ទំនងវប្បធម៌ផងដែរ។

ក្រសួងការបរទេសរុស្ស៊ី ក៏បានលើកឡើងដែរថា កិច្ចពិភាក្សារបស់ប្រមុខទូតទាំងពីរ ក៏បានផ្តោតការយកចិត្តទុកដាក់ចំពោះការធ្វើឱ្យមុខងារនៃបេសកកម្មការទូតរវាងរុស្ស៊ី និងសហរដ្ឋអាមេរិកមានលក្ខណៈធម្មតា។ កិច្ចព្រមព្រៀងមួយត្រូវបានព្រមព្រៀងគ្នា ដើម្បីបន្តទំនាក់ទំនងរវាងក្រសួងការបរទេស រួមទាំងតាមរយៈការចូលរួមរបស់ប្រទេសទាំងពីរនៅក្នុងអង្គការអន្តរជាតិ៕

រ៉ាន់ រើយ

The post រដ្ឋមន្ត្រីការបរទេសរុស្ស៊ី ប្រាប់សមភាគីអាមេរិក អំពីការមិនអាចទទួលយកបានដែលអាមេរិកបំពាក់អាវុធដល់អ៊ុយក្រែនជាថ្មី appeared first on Kampuchea Thmey Daily.

ប្រមុខការទូតអាមេរិក-រុស្ស៊ី ជួបពិភាក្សាគ្នានៅ ម៉ានីល ផ្តោតសំខាន់លើបញ្ហា សង្គ្រាមអ៊ុយក្រែន

Sok Sovann — Thu, 23 Jul 2026 08:29:04 +0000

រដ្ឋមន្ត្រីការបរទេសអាមេរិក Marco Rubio និងសមភាគីរុស្ស៊ី Sergey Lavrov បានជួបពិភាក្សាគ្នា នៅប្រទេសហ្វីលីពីន ខណៈប្រធានបទសំខាន់ ត្រូវបានគេទម្លាយឲ្យដឹងថា គឺ «សង្គ្រាមនៅអ៊ុយក្រែន»។

ប្រមុខការទូតអាមេរិក-រុស្ស៊ី ជួបពិភាក្សាគ្នានៅទីក្រុង ម៉ានីល (រូប៖ Reuters)

តាមការផ្សាយរបស់ RT, ជំនួបនេះធ្វើឡើង ខាងក្រៅកិច្ចប្រជុំកំពូលនៃរដ្ឋមន្ត្រីការបរទេសអាស៊ាន ក្នុងទីក្រុងម៉ានីល នៅថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦ ហើយនេះ គឺជាជំនួបទល់មុខគ្នាលើកដំបូង រវាងអ្នកការទូតកំពូលទាំងពីរ បើគិតចាប់តាំងពីខែកញ្ញា ឆ្នាំ២០២៥មក។

ទន្ទឹមនោះ គេហទំព័រ Union-Bulletin បានចេញផ្សាយ ដោយដកស្រង់សម្តី Rubio ដែលនិយាយថា លោកទទួលស្គាល់! កិច្ចខិតខំប្រឹងប្រែងទាំងឡាយ ក្នុងការនាំយកសន្តិភាពមកឲ្យជម្លោះនេះ ពិតជាពិបាក និងមានឧបសគ្គបន្តិច។ យ៉ាងណា លោកអះអាងថា សហរដ្ឋអាមេរិក នៅតែបើកចិត្ត ស្ម័គ្រខ្លួនធ្វើជាអ្នកសម្របសម្រួល ពន្លត់ភ្លើងសង្គ្រាមនេះជានិច្ច។

ប្រមុខការទូតអាមេរិក-រុស្ស៊ី ជួបពិភាក្សាគ្នានៅទីក្រុង ម៉ានីល (រូប៖ Reuters)

ដ្បិតសង្គ្រាមរុស្ស៊ី-អ៊ុយក្រែន គឺជាប្រធានគោលក៏ពិតមែន ប៉ុន្តែលោក Rubio និង Lavrov ក៏ឆ្លៀតជជែកគ្នាផងដែរ អំពីបញ្ហាសង្គ្រាមនៅមជ្ឈិមបូព៌ា ដែលអាមេរិក ចាប់ដៃអ៊ីស្រាអែល ច្បាំងជាមួយអ៊ីរ៉ង់ និងទំនាក់ទំនងទ្វេភាគី ទីក្រុងវ៉ាស៊ីនតោន-មូស្គូ។

សូមជម្រាបថា សង្គ្រាមរុស្ស៊ី-អ៊ុយក្រែន បានឈានចូលដល់ឆ្នាំទី ៥ហើយ ខណៈអាមេរិក បានព្យាយាមសុំចូលខ្លួន ដោះស្រាយម្តងជាពីរដង។

ប្រមុខការទូតអាមេរិក-រុស្ស៊ី ជួបពិភាក្សាគ្នានៅទីក្រុង ម៉ានីល (រូប៖ Reuters)

ទោះបែបនេះ ការខិតខំរបស់អាមេរិក មិនបានផលឡើយ ព្រោះតែទាំងទីក្រុងមូស្គូ និងកៀវ សុទ្ធតែបង្ហាញគោលជំហរផ្ទុយគ្នា ជុំវិញការដោះស្រាយជម្លោះនេះ។

យ៉ាងណា អតីតសមាជិកព្រឹទ្ធសភាអាមេរិក មួយរូបធ្លាប់លើកឡើងថា ប្រទេសតែមួយគត់ អាចមានលទ្ធភាពពន្លត់ភ្លើងសង្គ្រាមនេះបាន នោះគឺ «ចិន»។

លោក Lindsey Graham លើកឡើងថា ទីក្រុងប៉េកាំង អាចដើរតួនាទីយ៉ាងសំខាន់ ក្នុងការដាក់សម្ពាធលើប្រទេសរុស្ស៊ី ដើម្បីឲ្យឈានទៅរកការចរចាសន្តិភាព និងបញ្ចប់សង្គ្រាមនៅអ៊ុយក្រែន៕

អត្ថបទ៖ សុវណ្ណ

មេដឹកនាំអ៊ុយក្រែន ពិភាក្សាជាមួយបេសកជនអាមេរិក ពីរឿងសង្គ្រាម និងពន្លឿនការផលិតអាវុធ

The post ប្រមុខការទូតអាមេរិក-រុស្ស៊ី ជួបពិភាក្សាគ្នានៅ ម៉ានីល ផ្តោតសំខាន់លើបញ្ហា សង្គ្រាមអ៊ុយក្រែន appeared first on Kampuchea Thmey Daily.

រុស្ស៊ី ចោទអាមេរិកថា អន្តរាគមន៍យោធានានារបស់អាមេរិក ធ្វើឡើង ព្រោះតែ«ប្រេង»

Rann Reuy — Sat, 25 Apr 2026 03:09:09 +0000

រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា សហរដ្ឋអាមេរិកបានបញ្ជាក់យ៉ាងច្បាស់ថា អន្តរាគមន៍យោធារបស់ខ្លួនក្នុងពេលកន្លងមកនៅក្នុងប្រទេសនានា រួមទាំងអ៊ីរ៉ង់ និងវ៉េណេស៊ុយអេឡា គឺនិយាយអំពី«ប្រេង»។

តាមការដកស្រង់របស់ Al Jazeera English រដ្ឋមន្ត្រីការបរទេសរុស្ស៊ី លោក Lavrov បានប្រាប់ទូរទស្សន៍រដ្ឋរបស់រុស្ស៊ីនៅក្នុងបទសម្ភាសន៍មួយថា «សហរដ្ឋអាមេរិកបានបញ្ជាក់ជាផ្លូវការថា គ្មាននរណាម្នាក់អាចបញ្ជាខ្លួនបានឡើយ។ ពួកគេគ្រាន់តែខ្វល់ពីសុខុមាលភាពផ្ទាល់ខ្លួនរបស់ពួកគេប៉ុណ្ណោះ»។

រដ្ឋមន្ត្រីការបរទេសរុស្ស៊ីចាស់វស្សារូបនេះ បានបន្ថែមនៅក្នុងបទសម្ភាសន៍ ដែលក៏ត្រូវបានចុះផ្សាយនៅលើគេហទំព័ររបស់ក្រសួងការបរទេសរុស្ស៊ីផងដែរថា «ពួកគេត្រៀមខ្លួនរួចជាស្រេចដើម្បីការពារសុខុមាលភាពនេះដោយមធ្យោបាយណាមួយក៏ដោយ តាមរយៈរដ្ឋប្រហារ ការចាប់ជំរិត ឬឃាតកម្មមេដឹកនាំនៃប្រទេសទាំងនោះដែលមានធនធានធម្មជាតិចាំបាច់សម្រាប់ជនជាតិអាមេរិក»។

ប្រមុខការទូតរុស្ស៊ី លោក Lavrov បានបន្ថែមថា ក្នុងស្ថានភាពនៅប្រទេសវេណេស៊ុយអេឡា និងប្រទេសអ៊ីរ៉ង់ សហការីអាមេរិកមិនលាក់បាំងថា «វាជាប្រេងទេ» ដោយពួកគេមានគោលលទ្ធិនៃការត្រួតត្រានៅក្នុងទីផ្សារថាមពលរបស់ពិភពលោក»។

លោក Lavrov ក៏បាននិយាយផងដែរថា នេះមានន័យថា គ្មានអ្វីនៅសល់នៃច្បាប់អន្តរជាតិទេ ហើយផ្ទុយទៅវិញ ការសម្រេចចិត្តត្រូវបានដឹកនាំដោយគោលគំនិតដែលថា «អំណាចគឺត្រឹមត្រូវ»។

សហគមន៍អន្តរជាតិបានទទួលស្គាល់ជាស្រេចទៅហើយថា ច្បាប់អន្តរជាតិលែងមានតម្លៃទៀតហើយ សណ្តាប់ធ្នាប់ពិភពលោកត្រូវបានបំផ្លាញដោយប្រទេសមហាអំណាច ដោយចាប់ផ្តើមតាំងពីរុស្ស៊ីលើកទ័ពចូលលុកលុយប្រទេសអ៊ុយក្រែនតាំងពីដើមឆ្នាំ២០២២ និង ច្រានចោលការអនុវត្តតាមនូវសេចក្តីសម្រេចដាក់ចេញដោយអង្គសន្និបាតរបស់អង្គការសហប្រជាជាតិ។

ចាប់តាំងពីលោក ត្រាំ ឡើងកាន់អំណាចកាលពីខែមករាឆ្នាំ២០២៥ លោក បានគំរាមកំហែងយកកោះ ហ្គ្រីនលែនរបស់ប្រទេសដាណឺម៉ាក ការភ្ជាប់ប្រទេសកាណាដាជារដ្ឋទី៥១របស់សហរដ្ឋអាមេរិក និង គំរាមយកព្រែកជីកប៉ាណាម៉ាមកកាន់កាប់វិញ ហើយ ចាប់ពីដើមឆ្នាំ២០២៦ លោក ដូណាល់ ត្រាំ បានបញ្ជាលើកទ័ពចូលចាប់ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ និង ការវាយប្រហារលើប្រទេសអ៊ីរ៉ង់ ដោយសម្លាប់មេដឹកនាំអ៊ីរ៉ង់ ដោយលោក ត្រាំ ចោទមេដឹកនាំទាំងនោះថា ផ្តាច់ការ សម្លាប់ប្រជាជនឯងជាដើម។

ប៉ុន្តែរាល់សកម្មភាពយោធារបស់លោក ត្រាំ គឺផ្តោតតែលើប្រទេសដែលមានប្រេងប៉ុណ្ណោះ ដែលធ្វើឲ្យរុស្ស៊ីមើលឃើញថា រដ្ឋបាលអាមេរិក គឺធ្វើសកមក្មភាពយោធា ដើម្បីតែផលប្រយោជន៍សេដ្ឋកិច្ចតាមរយៈការគ្រប់គ្រងថាមពល៕

រ៉ាន់ រើយ

The post រុស្ស៊ី ចោទអាមេរិកថា អន្តរាគមន៍យោធានានារបស់អាមេរិក ធ្វើឡើង ព្រោះតែ«ប្រេង» appeared first on Kampuchea Thmey Daily.

រុស្ស៊ី ផ្តាំទៅលោក ត្រាំ ថា គួរឈប់ប្រើភាសា «ឱសានវាទ» ដាក់អ៊ីរ៉ង់ទៅ

Sok Sovann — Mon, 06 Apr 2026 01:06:23 +0000

ដោយសារតែមើលឃើញថា លោក ដូណាល់ ត្រាំ ចូលចិត្តប្រើពាក្យគំរាមដាក់អ៊ីរ៉ង់ ធ្វើឲ្យសង្គ្រាមកាន់តែរីកធំទៅៗនោះ ស្រាប់តែពេលនេះ រុស្ស៊ីផ្តាំផ្ញើទៅប្រធានាធិបតីអាមេរិកថា គួរឈប់ប្រើភាសាឱសានវាទទៅ ហើយងាកមកចរចាគ្នាវិញ។

ប្រធានាធិបតីអាមេរិក លោក ដូណាល់ ត្រាំ (រូប៖ Reuters)

តាមការផ្សាយរបស់ TRT World នៅថ្ងៃចន្ទទី៦ខែមេសាឆ្នាំ២០២៦ រដ្ឋមន្ត្រីការបរទេសរុស្ស៊ី Sergey Lavrov បានសន្ទនាតាមទូរស័ព្ទជាមួយសមភាគីអ៊ីរ៉ង់ Abbas Araghchi ដើម្បីពិភាក្សាគ្នាអំពីស្ថានការណ៍វិវឌ្ឍនៃសង្គ្រាមមជ្ឈិមបូព៌ា ដោយក្នុងនោះអ្នកការទូតកំពូលរុស្ស៊ីលើកឡើងថា ទីក្រុងវ៉ាស៊ីនតោន គួរតែងាកមកកាន់តុចរចា ហើយឈប់ប្រើពាក្យ «ឱសានវាទ» ទៅ។

ទន្ទឹមនោះដែរ បើតាមសម្តីលោក Lavrov, ភាគីរុស្ស៊ីសង្ឃឹមថា កិច្ចខិតខំប្រឹងប្រែងដែលកំពុងអនុវត្តដោយរដ្ឋមួយចំនួន ដើម្បីកាត់បន្ថយភាពតានតឹងជុំវិញបញ្ហាប្រទេសអ៊ីរ៉ង់ នឹងទទួលបានជោគជ័យ។

រដ្ឋមន្ត្រីការបរទេសរុស្ស៊ី Sergey Lavrov (រូប៖ Reuters)

ប្រតិកម្មរបស់ទីក្រុងមូស្គូកើតឡើង ក្រោយលោកត្រាំចេញឱសានវាទថ្មីទៀតហើយ ដល់ភាគីអ៊ីរ៉ង់ឲ្យទទួលយកកិច្ចព្រមព្រៀងជាបន្ទាន់ មុនផុតឱសានវាទដែលលោកផ្តល់ជូន១០ថ្ងៃ។

លោកត្រាំបង្ហោះលើ Truth Social កាលពីថ្ងៃសៅរ៍ថា អ៊ីរ៉ង់មានពេលតែ៤៨ម៉ោងទៀតប៉ុណ្ណោះដើម្បីយល់ព្រមលើកិច្ចព្រមព្រៀង ឬក៏ត្រូវបើកច្រក Hormuz។

ក្នុងសំណេរដើម លោក ត្រាំ សរសេរថា៖ «សូមចងចាំថា នៅពេលខ្ញុំផ្តល់អ៊ីរ៉ង់រយៈពេល១០ថ្ងៃដើម្បីយល់ព្រមលើកិច្ចព្រមព្រៀង ឬក៏ត្រូវបើកច្រកហ័រមូស? ពេលវេលាជិតអស់ហើយ នៅសល់តែ៤៨ម៉ោងទៀតទេ មុនអ្វីៗទម្លាក់ពួកគេចុះទៅឋាននរក»។

ក្រោយមកនៅថ្ងៃអាទិត្យ លោកត្រាំ គំរាមទៀតថា៖ «ថ្ងៃអង្គារនឹងក្លាយជាថ្ងៃរោងចក្រថាមពលនិងជាថ្ងៃស្ពាន ដែលរួមបញ្ចូលគ្នាតែមួយនៅក្នុងប្រទេសអ៊ីរ៉ង់។ ជារឿងដែលមិនធ្លាប់មានពីមុនមកសោះ!!! បើកច្រកសមុទ្រហ្នឹងភ្លាម បើមិនអ៊ីចឹងទេ ពួកឯងនឹងរស់នៅក្នុងឋាននរកមិនខាន — ចាំតែមើលទៅ!»៕

អត្ថបទ៖ សុខ សុវណ្ណ

ខុសពីរាល់ដង! លើកនេះ ត្រាំ គំរាមអ៊ីរ៉ង់ ដោយប្រើពាក្យខ្លាំងៗបំផុត

The post រុស្ស៊ី ផ្តាំទៅលោក ត្រាំ ថា គួរឈប់ប្រើភាសា «ឱសានវាទ» ដាក់អ៊ីរ៉ង់ទៅ appeared first on Kampuchea Thmey Daily.

រដ្ឋមន្ត្រីការបរទេសរុស្ស៊ីជួបសមភាគីអ៊ីរ៉ង់ ខណៈមានក្តីរំពឹងថា អ៊ីរ៉ង់ត្រៀមចរចាជាមួយអាមេរិក

Rann Reuy — Sat, 28 Mar 2026 02:49:21 +0000

រដ្ឋមន្ត្រីការបរទេសរុស្ស៊ី លោក Sergei Lavrov និងសមភាគីអ៊ីរ៉ង់ លោក Abbas Araqchi បានពិភាក្សាគ្នាតាមទ័ពស័ព្ទនៅថ្ងៃសុក្រអំពីលទ្ធភាពនៃការដោះស្រាយការទូតក្នុងសង្គ្រាមអ៊ីរ៉ង់ ខណៈមានក្តីរំពឹងជាច្រើនថា មន្ត្រីអ៊ីរ៉ង់និងអាមេរិកទំនងចូលតុចរចាក្នុងពេលឆាប់ៗ ស្របពេលលោកត្រាំលើកពេលឱសានវាទម្តងហើយម្តងទៀត។ នេះបើយោងតាមការផ្សាយរបស់ទីភ្នាក់ងារព័ត៌មានរ៉យទ័រដែលដកស្រង់ប្រភពពីក្រសួងការបរទេសរុស្ស៊ី។

រដ្ឋមន្ត្រីការបរទេសអ៊ីរ៉ង់ លោក Abbas Araqchi (ឆ្វេង) និង រដ្ឋមន្ត្រីការបរទេសរុស្ស៊ី លោក Sergei Lavrov។ Reuters

សេចក្តីថ្លែងការណ៍នៅលើគេហទំព័ររបស់ក្រសួងការបរទេសរុស្ស៊ី បានរៀបរាប់ថា៖«រដ្ឋមន្ត្រីទាំងពីរបានពិភាក្សាលម្អិតអំពីវិបត្តិយោធា-នយោបាយដ៏លំបាកស្មុគស្មាញបំផុតនៅមជ្ឈិមបូព៌ា» ដែលភាគីរុស្ស៊ី បានហៅសង្គ្រាមផ្ទុះឡើងនោះជាលទ្ធផលនៃការឈ្លានពានរបស់អាមេរិក-អ៊ីស្រាអែលប្រឆាំងនឹងអ៊ីរ៉ង់។

សេចក្តីថ្លែងការណ៍នោះបន្តថា៖«មានការផ្លាស់ប្តូរទស្សនៈលើទស្សនវិស័យនៃការផ្លាស់ប្តូរជម្លោះទៅជាបណ្តាញសម្រាប់ការដោះស្រាយនយោបាយ-ការទូតដោយផ្អែកលើច្បាប់អន្តរជាតិ និងគិតគូរពីផលប្រយោជន៍ស្របច្បាប់របស់ប្រទេសទាំងអស់នៅក្នុងតំបន់»។

សេចក្តីថ្លែងការណ៍នេះក៏បាននិយាយផងដែរថា លោក Lavrov បានគូសបញ្ជាក់ពីព័ត៌មានលម្អិតនៃការដឹកជញ្ជូនជំនួយមនុស្សធម៌ថ្មីៗបំផុតរបស់រុស្ស៊ីទៅកាន់អ៊ីរ៉ង់។

រុស្ស៊ី និងអ៊ីរ៉ង់បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រដែលគ្របដណ្តប់លើកិច្ចសហប្រតិបត្តិការនយោបាយ សេដ្ឋកិច្ច យោធា និងថាមពល ប៉ុន្តែវាមិនរាប់បញ្ចូលកិច្ចព្រមព្រៀងការពារជាតិទៅវិញទៅមកទេ។

រុស្ស៊ីបានប្រើប្រាស់យន្តហោះគ្មានមនុស្សបើកដែលរចនាដោយអ៊ីរ៉ង់នៅក្នុងជម្លោះរយៈពេលបួនឆ្នាំជាមួយអ៊ុយក្រែន។

កាលពីថ្ងៃសុក្រ រដ្ឋមន្ត្រីការបរទេសអឺរ៉ុបបានប្រើប្រាស់កិច្ចប្រជុំ G7 ជាមួយរដ្ឋមន្ត្រីការបរទេសអាមេរិក លោក Marco Rubio ដើម្បីលើកឡើងពីករណីដែលរុស្ស៊ីកំពុងជួយអ៊ីរ៉ង់កំណត់គោលដៅកងកម្លាំងអាមេរិកនៅក្នុងសង្គ្រាមមជ្ឈិមបូព៌ា។

ប្រភពសន្តិសុខលោកខាងលិចពីររូប និងមន្ត្រីតំបន់ម្នាក់ដែលនៅជិតទីក្រុងតេអេរ៉ង់ បានប្រាប់រ៉យទ័រថា ទីក្រុងមូស្គូបានផ្តល់រូបភាពផ្កាយរណបដល់ទីក្រុងតេហេរ៉ង់ ហើយក៏ជួយអ៊ីរ៉ង់ធ្វើឱ្យប្រសើរឡើងនូវយន្តហោះគ្មានមនុស្សបើករបស់ខ្លួន ដើម្បីធ្វើត្រាប់តាមកំណែសមមូលដែលរុស្ស៊ីប្រើប្រឆាំងនឹងអ៊ុយក្រែន៕

ប្រែសម្រួល៖ រ៉ាន់ រើយ

The post រដ្ឋមន្ត្រីការបរទេសរុស្ស៊ីជួបសមភាគីអ៊ីរ៉ង់ ខណៈមានក្តីរំពឹងថា អ៊ីរ៉ង់ត្រៀមចរចាជាមួយអាមេរិក appeared first on Kampuchea Thmey Daily.

រុស្ស៊ី ថា អាមេរិក ប្រើលេសដដែលៗ ដើម្បីវាយអ៊ីរ៉ង់

Sok Sovann — Wed, 04 Mar 2026 01:22:22 +0000

ប្រតិកម្មទៅប្រតិបត្តិការយោធាដែលកាន់តែក្តៅគគុកនៅមជ្ឈិមបូព៌ា ប្រទេសរុស្ស៊ី បានទិតៀនសហរដ្ឋអាមេរិក ថា ប្រើលេសដដែល គឺលេសអាវុធនុយក្លេអ៊ែរ ដើម្បីវាយប្រហារអ៊ីរ៉ង់។

តាមការផ្សាយរបស់ RT កាលពីថ្ងៃអង្គារទី៣ខែមីនា រដ្ឋមន្ត្រីការបរទេសរុស្ស៊ី Sergey Lavrov អះអាងថា អាមេរិកនិងអ៊ីស្រាអែល បានប្រើលេសរារាំងអ៊ីរ៉ង់មិនឲ្យផលិតបានអាវុធនុយក្លេអ៊ែរ ដើម្បីបើកការវាយប្រហារយោធា ហើយនេះគឺជាលេសដដែលៗ ដែលអាមេរិកប្រើដើម្បីវាយប្រហាររោងចក្រនុយក្លេអ៊ែររបស់ទីក្រុងតេហេរ៉ង់ កាលពីឆ្នាំមុន។

ទន្ទឹមនោះ បើតាមការព្រមានរបស់លោក Lavrov, ទង្វើរបស់អាមេរិកបែបនេះ នឹងពង្រីកឲ្យមានការរីកសាយភាយអាវុធនុយក្លេអ៊ែរ ហើយក៏ច្បាស់ជានឹងជំរុញឲ្យមានការកកើតកម្លាំងដ៏មានឥទ្ធិពល ក្នុងប្រទេសអ៊ីរ៉ង់ ដើម្បីប្រឆាំងសហរដ្ឋអាមេរិក។

រដ្ឋមន្ត្រីការបរទេសរុស្ស៊ី Sergey Lavrov (រូប៖ Reuters)

មុននេះ ប្រធានាធិបតីអាមេរិក ដូណាល់ ត្រាំ បានអះអាងរួចទៅហើយ ពីគោលដៅ៤ចំណុចដែលទីក្រុងវ៉ាស៊ីនតោន ត្រូវសម្រេចឲ្យបានក្នុងសង្គ្រាមជាមួយអ៊ីរ៉ង់នេះ។

គោលដៅទាំងនោះមានដូចជា៖ ទី១ អាមេរិកត្រូវកម្ទេចសមត្ថភាពមីស៊ីលអ៊ីរ៉ង់ឲ្យហ្មត់, ទី២ កម្ចាត់កងទ័ពជើងទឹកអ៊ីរ៉ង់, ទី៣ ធានាឲ្យបានថាប្រទេសដែលជាអ្នកឧបត្ថម្ភភេរវកម្មលេខមួយលើពិភពលោក នឹងមិនអាចទទួលបានអាវុធនុយក្លេអ៊ែរជាដាច់ខាត និងទី៤ ត្រូវធានាឲ្យបានថា របបដឹកនាំអ៊ីរ៉ង់មិនអាចបន្តបំពាក់អាវុធ ផ្ដល់មូលនិធិ និងបញ្ជាកងទ័ពភេរវករនៅក្រៅព្រំដែនរបស់ពួកគេបានទៀតឡើយ។

ប្រធានាធិបតីអាមេរិក ដូណាល់ ត្រាំ (រូប៖ Reuters)

សហរដ្ឋអាមេរិកនិងអ៊ីស្រាអែល បានបើកការវាយប្រហាររួមគ្នាទ្រង់ទ្រាយធំលើប្រទេសអ៊ីរ៉ង់កាលពីថ្ងៃទី ២៨ ខែកុម្ភៈ។ ការវាយប្រហារនោះគឺផ្ដោតសំខាន់លើទីតាំងនុយក្លេអ៊ែរ ឃ្លាំងមីស៊ីល-ដ្រូន និងទីបញ្ជាការដ្ឋានរបស់កងឆ្មាំបដិវត្តន៍អ៊ីរ៉ង់ (IRGC) ហើយឈានដល់ការសម្លាប់មេដឹកនាំកំពូលអ៊ីរ៉ង់ Ayatollah Ali Khamenei និងមន្ត្រីកំពូលៗច្រើននាក់ថែមទៀតផង។

ជាការសងសឹក អ៊ីរ៉ង់បានបាញ់មីស៊ីលរាប់រយគ្រាប់ទៅលើប្រទេសអ៊ីស្រាអែល និងមូលដ្ឋានទ័ពអាមេរិកនៅក្នុងតំបន់ឈូងសមុទ្រធ្វើឲ្យសង្គ្រាមកាន់តែរីករាលដាល៕

អត្ថបទ៖ សុខ សុវណ្ណ

New York Post៖ រកឃើញមេដឹកនាំកំពូលថ្មីរបស់អ៊ីរ៉ង់ហើយ!

The post រុស្ស៊ី ថា អាមេរិក ប្រើលេសដដែលៗ ដើម្បីវាយអ៊ីរ៉ង់ appeared first on Kampuchea Thmey Daily.

លោក Lavrov ប្រកាសថា បើអឺរ៉ុបមិនវាយរុស្ស៊ីមុន រុស្ស៊ីក៏មិនវាយអឺរ៉ុបមុនដូចគ្នា

Sok Sovann — Mon, 09 Feb 2026 01:59:21 +0000

មួយលើកជាពីរលើក បណ្តាប្រទេសលោកខាងតែងចាត់ទុករុស្ស៊ីជាការគំរាមកំហែងដល់ពួកគេ ហើយថែមទាំងព្រមានអំពីការវាយប្រហាររបស់លោក វ្ល៉ាឌីមៀរ ពូទីន លើទ្វីបអឺរ៉ុប នៅប៉ុន្មានឆ្នាំខាងមុខទៀតផង។

ការបាញ់មីស៊ីលរបស់រុស្ស៊ី (រូបថត៖ Reuters)

យ៉ាងណា ជុំវិញរឿងនេះ ទីក្រុងមូស្គូបានច្រានចោលម្តងហើយម្តងទៀតថា ការចោទប្រកាន់ទាំងនេះគឺគ្មានមូលដ្ឋានទាល់តែសោះ ហើយគ្រាន់ជាការព្រមានដើម្បីយកលេសបង្កើនការចំណាយសម្រាប់កញ្ចប់ថវិការបស់ពួកគេប៉ុណ្ណោះ ហើយឥឡូវ រដ្ឋមន្ត្រីការបរទេសរុស្ស៊ី Sergey Lavrov បានប្រកាសឲ្យអស់សង្ស័យថា បើអឺរ៉ុបមិនវាយរុស្ស៊ីមុនទេ រុស្ស៊ីក៏មិនវាយអឺរ៉ុបមុនដូចគ្នា។

ក្នុងបទសម្ភាសន៍ជាមួយ NTV និងត្រូវបានយកមកផ្សាយដោយ RT កាលពីថ្ងៃអាទិត្យទី៨ខែកុម្ភៈឆ្នាំ២០២៦ លោក Lavrov និយាយថា៖ «រុស្ស៊ីនឹងមិនវាយប្រហារលើបណ្តាប្រទេសសមាជិកសហភាពអឺរ៉ុប (EU) ឬអង្គការណាតូ (NATO) ឡើយ លើកលែងតែរុស្ស៊ីត្រូវបានគេវាយប្រហារមុនតែប៉ុណ្ណោះ។យើងគ្មានបំណងវាយអឺរ៉ុបទេ! គ្មានហេតុផលណាមួយដែលយើងត្រូវធ្វើបែបនោះទាល់តែសោះ»។

រដ្ឋមន្ត្រីការបរទេសរុស្ស៊ី Sergey Lavrov (រូបថត៖ Reuters)

ទោះយ៉ាងណា លោកព្រមានថា៖ «ប្រសិនបើអឺរ៉ុបបន្តគំរាមកំហែង ដូចជាការត្រៀមខ្លួនធ្វើសង្គ្រាមប្រឆាំងនឹងយើង ហើយចាប់ផ្តើមការវាយប្រហារមកលើសហព័ន្ធរុស្ស៊ី នោះពួកគេនឹងត្រូវប្រឈមមុខជាមួយការឆ្លើយតបយោធាយ៉ាងពេញទំហឹងពីខាងយើង ជាមួយនឹងអាវុធគ្រប់យ៉ាងដែលយើងមាន»។

EU តែងយកការគំរាមពីរុស្ស៊ី ធ្វើជាលេសដើម្បីបង្ហាញថា ការបង្កើនថ្លៃចំណាយយោធាយ៉ាងច្រើនសន្ធឹកសន្ធាប់ គឺជារឿងសមហេតុផល។ យ៉ាងណា លោក ពូទីន បញ្ជាក់ថា ទីក្រុងមូស្គូ គ្មានផែនការប្រយុទ្ធ ជាមួយ EU ឬ NATO នោះទេ ប៉ុន្តែគំរាមឆ្លើយតប ប្រសិនបើបណ្តាប្រទេសលោកខាងលិចចាប់ផ្តើមសង្រ្គាមប្រឆាំងរុស្ស៊ី។

ការវាយប្រហារមីស៊ីលរបស់រុស្ស៊ីនៅអ៊ុយក្រែន (រូបថត៖ Reuters)

ជុំវិញរឿងនេះដែរ នាយករដ្ឋមន្ត្រីហុងគ្រី Viktor Orban ក៏ចេញមុខព្រមានដែរថា EU កំពុងត្រៀមខ្លួនធ្វើសង្គ្រាមជាមួយ រុស្ស៊ី នៅត្រឹមឆ្នាំ២០៣០។

កាលពីចុងឆ្នាំមុន លោក Orban និយាយថា EU បានរៀបចំវិធានការ៤ដំណាក់កាលជាប់គ្នាដូចជាដំបូងត្រូវផ្តាច់ទំនាក់ទំនងការទូតជាមួយរុស្ស៊ីសិន រួចដាក់ទណ្ឌកម្ម ហើយបញ្ចប់កិច្ចសហប្រតិបត្តិការសេដ្ឋកិច្ច និងចុងក្រោយទើបចាប់ផ្តើមផ្ទុះជម្លោះប្រដាប់អាវុធតែម្តង។ លោកបន្តថា វិធានការទាំងនេះមានគោលបំណងធ្វើឲ្យរុស្ស៊ីចុះខ្សោយ និងពង្រឹងកម្លាំង EU ឲ្យត្រៀមខ្លួនបានកាន់តែល្អ ទើបធ្វើសង្គ្រាមនៅក្នុងឆ្នាំ២០៣០៕

អត្ថបទ៖ សុខ សុវណ្ណ

ហុងគ្រី ព្រមានពីការផ្ទុះសង្គ្រាមអឺរ៉ុប-រុស្ស៊ី នៅឆ្នាំ២០៣០

The post លោក Lavrov ប្រកាសថា បើអឺរ៉ុបមិនវាយរុស្ស៊ីមុន រុស្ស៊ីក៏មិនវាយអឺរ៉ុបមុនដូចគ្នា appeared first on Kampuchea Thmey Daily.

Lavrov សរសើរអាមេរិក ប៉ុន្តែ ព្រលះក្រុមប្រទេសនៅអឺរ៉ុបក្នុងការចរចាថ្មីថ្មោង

Rann Reuy — Sun, 28 Dec 2025 07:41:03 +0000

រដ្ឋមន្ត្រីការបរទេសរុស្ស៊ី លោក Sergey Lavrov បានសរសើរប្រធានាធិបតីសហរដ្ឋអាមេរិក លោក ដូណាល់ ត្រាំ ចំពោះកិច្ចខិតខំប្រឹងប្រែងដើម្បីសន្តិភាពនៅអ៊ុយក្រែន ប៉ុន្តែលោកបានព្រលះបណ្តាលប្រទេសនៅតំបន់អឺរ៉ុបដែលគាំទ្រអ៊ុយក្រែន។

ក្នុងសារបង្ហោះនៅបណ្តាញសង្គមក្រសួងការបរទេសរុស្ស៊ី លោក Sergey Lavrov បានលើកឡើងថា៖«រុស្ស៊ីសូមថ្លែងអំណរគុណកិច្ចខិតខំដោយប្រធានាធិបតីសហរដ្ឋអាមេរិក ដូណាល់ ត្រាំ និងក្រុមរបស់គាត់ដើម្បីសម្រេចនូវដំណោះស្រាយសន្តិភាព។ យើងប្តេជ្ញាបន្តធ្វើការជាមួយអ្នកចរចាអាមេរិកដើម្បីធ្វើឲ្យមានកិច្ចព្រមព្រៀងយូរអង្វែងសម្រាប់ដោះស្រាយបុព្វហេតុឫសគល់នៃជម្លោះ»។

នៅក្នុងខ្លឹមសារផ្តល់កិច្ចសម្ភាសន៍ដល់ទីភ្នាក់ងារព័ត៌មានរុស្ស៊ី TASS លោក Sergey Lavrov បានចោទប្រកាន់រដ្ឋាភិបាលរបស់ប្រធានាធិបតី អ៊ុយក្រែន វ៉ូឡូឌីមៀរ ហ្សេលេនស្គី និង ក្រុមប្រទេសនៅអឺរ៉ុបថា មិនទាន់ត្រៀមខ្លួនរួចរាល់ក្នុងការចរចាប្រកបដោយស្ថាបនា។

លោក ក៏បានចោទប្រកាន់ប្រទេសអឺរ៉ុបមួយចំនួនបានបញ្ចេញអាវុធ ឲ្យរដ្ឋាភិបាលអ៊ុយក្រែន។

សង្គ្រាមនៅប្រទេសអ៊ុយក្រែនដែលគេដឹងថា បានចាប់ផ្តើមឡើងកាលពីជិត៤ឆ្នាំមុន ដោយសារតែរុស្ស៊ីលើកទ័ពចូលលុកលុយ ដោយហៅវិធានការយោធារបស់ខ្លួនថា ជាប្រតិបត្តិការយោធាដើម្បីបំពាក់សមត្ថភាពយោធារបស់អ៊ុយក្រែន ដោយចោទថា អ៊ុយក្រែនមានបំណងចូលអង្គការណាតូ ដែលជាការគំរាមកំហែងដល់សន្តិសុខរុស្ស៊ី។

ជាការឆ្លើយតបចំពោះតម្រូវការរបស់រដ្ឋាភិបាលលោក ហ្សេលេនស្គី ប្រទេសលោកខាងលិច បានជួយទំនុកបម្រុងសព្វាវុធមួយចំនួន ដើម្បីតតាំងជាមួយរុស្ស៊ី ហើយសង្គ្រាមក៏បានអូសបន្លាយជិត៤ឆ្នាំដល់ពេលនេះ៕

រ៉ាន់ រើយ

The post Lavrov សរសើរអាមេរិក ប៉ុន្តែ ព្រលះក្រុមប្រទេសនៅអឺរ៉ុបក្នុងការចរចាថ្មីថ្មោង appeared first on Kampuchea Thmey Daily.

លោក Sergey Lavrov Archives - Kampuchea Thmey Daily

ប្រមុខការទូតអាមេរិក-រុស្ស៊ី ជួបពិភាក្សាគ្នានៅ ម៉ានីល ផ្តោតសំខាន់លើបញ្ហា សង្គ្រាមអ៊ុយក្រែន

រុស្ស៊ី​ ចោទ​អាមេរិក​​ថា ​អន្តរាគមន៍​យោធា​​នានារបស់​អាមេរិក ធ្វើឡើង​​ ព្រោះតែ«​ប្រេង​»

រុស្ស៊ី ផ្តាំទៅលោក ត្រាំ ថា គួរឈប់ប្រើភាសា «ឱសានវាទ» ដាក់អ៊ីរ៉ង់ទៅ

រុស្ស៊ី ថា អាមេរិក ប្រើលេសដដែលៗ ដើម្បីវាយអ៊ីរ៉ង់

លោក Lavrov ប្រកាសថា បើអឺរ៉ុបមិនវាយរុស្ស៊ីមុន រុស្ស៊ីក៏មិនវាយអឺរ៉ុបមុនដូចគ្នា

Lavrov សរសើរ​អាមេរិក ប៉ុន្តែ​ ព្រលះ​ក្រុមប្រទេសនៅអឺរ៉ុប​ក្នុងការចរចាថ្មីថ្មោង​

រុស្ស៊ី ចោទអាមេរិកថា អន្តរាគមន៍យោធានានារបស់អាមេរិក ធ្វើឡើង ព្រោះតែ«ប្រេង»

Lavrov សរសើរអាមេរិក ប៉ុន្តែ ព្រលះក្រុមប្រទេសនៅអឺរ៉ុបក្នុងការចរចាថ្មីថ្មោង