New York Post៖ រក​ឃើញ​មេដឹកនាំ​កំពូល​ថ្មី​របស់​អ៊ីរ៉ង់ហើយ!

ក្រុមប្រឹក្សាអ្នកជំនាញរបស់អ៊ីរ៉ង់បានសម្រេចលើក​បន្តុប​លោក Mojtaba Khamenei វ័យ៥៦ឆ្នាំ ឲ្យ​ឡើងកាន់អំណាចបន្តពីឪពុក​ក្នុងនាមជាមេដឹកនាំកំពូល។ នេះ​បើ​យោង​តាម​ការចុះ​ផ្សាយ​របស់​ New York Post កាល​ពីថ្ងៃ​ទី​៣​ខែ​មីនា​ឆ្នាំ​២០២៦។

ទោះបីជាមានការចុះផ្សាយយ៉ាងព្រោងព្រាតពីសំណាក់ប្រព័ន្ធផ្សព្វផ្សាយអ៊ីស្រាអែល និង​ក្រុ​ម​ប្រឆាំង​អ៊ីរ៉ង់​ក៏ដោយ ក៏​ស្ថាប័នរដ្ឋក្រុង​តេហេរ៉ង់​នៅតែរក្សាភាពស្ងៀមស្ងាត់មិនទាន់ចេញមុខបញ្ជាក់ជាផ្លូវការនៅឡើយទេ។ លោក Mojtaba ដែលជាកូនប្រុសច្បងទីពីររបស់លោក Ayatollah Ali Khamenei ធ្លាប់ត្រូវបានគេជឿថាបានស្លាប់នៅក្នុងការវាយប្រហារកាលពីថ្ងៃសៅរ៍ជាមួយ​ឪពុករបស់លោក។

លោក Mojtaba ជាអ្នកប្រកាន់ខ្ជាប់នូវគោលនយោបាយអភិរក្សនិយមតឹងរ៉ឹង និងមានទំនាក់ទំនងជិតស្និទ្ធជាមួយកងឆ្មាំបដិវត្តន៍អ៊ីស្លាម ដ្បិត​លោកមិនមានតួនាទីផ្លូវការនៅក្នុងជួររដ្ឋាភិបាល ហើយថែមទាំងត្រូវបានសហរដ្ឋអាមេរិកដាក់ទណ្ឌកម្មកាលពីឆ្នាំ២០១៩​ក៏ដោយ។ ការតែងតាំងនេះត្រូវបានចាត់ទុកថាជារឿងមិននឹកស្មានដល់ ដោយសាររបបបច្ចុប្បន្នរបស់អ៊ីរ៉ង់តែងតែប្រឆាំងនឹងការផ្ទេរអំណាច «តពូជ» ដូចសម័យស្តេច Shah ចាប់តាំងពីបដិវត្តន៍ឆ្នាំ១៩៧៩មក។ ម្យ៉ាងវិញទៀត លោកក៏ខ្វះលក្ខណៈសម្បត្តិផ្នែកសាសនាដែលតម្រូវដោយក្រុមប្រឹក្សាធម្មនុញ្ញផងដែរ។

អ្នកជំនាញបានលើកឡើងថា មេដឹកនាំបន្តវេនទំនងជាមិនអាចក្តោបក្តាប់អំណាចផ្តាច់មុខដូចលោក Ali Khamenei ដែលបានដឹកនាំអស់រយៈពេល៣៧ឆ្នាំនោះទេ។ លោក Mehdi Khalaji ដែលជាអ្នកសរសេរជីវប្រវត្តិរបស់លោក Ali Khamenei បានប្រាប់សារព័ត៌មាន Wall Street Journal ថា មេដឹកនាំកំពូលបន្ទាប់នឹងគ្រាន់តែជា «និមិត្តរូប» ប៉ុណ្ណោះ ហើយអំណាចនឹងមិនស្ថិតនៅលើបុគ្គលតែម្នាក់ទៀតឡើយ។ បច្ចុប្បន្ន ប្រទេសអ៊ីរ៉ង់កំពុងស្ថិតក្នុងភាពច្របូកច្របល់ និងស្ថិតក្រោមការគ្រប់គ្រងបណ្តោះអាសន្នដោយក្រុមប្រឹក្សាដែលមានសមាជិក៣រូប។

សូម​ជម្រាប​ថា សង្គ្រាម​បានផ្ទុះឡើង​នៅព្រឹកព្រលឹមថ្ងៃទី២៨ខែកុម្ភៈឆ្នាំ២០២៦ តាមរយៈការបើកប្រតិបត្តិការវាយប្រហារតាមអាកាសយ៉ាងខ្លាំងក្លា និងព្រមៗគ្នារបស់កងទ័ពសហរដ្ឋអាមេរិក និងអ៊ីស្រាអែល ទៅលើគោលដៅយុទ្ធសាស្ត្រសំខាន់ៗ​នៅក្នុងប្រទេសអ៊ីរ៉ង់។ ការវាយប្រហារដ៏សាហាវនេះបានបណ្តាល​ឲ្យ​មេដឹកនាំកំពូលរបស់អ៊ីរ៉ង់គឺលោក Ali Khamenei រួមជាមួយមន្ត្រីជាន់ខ្ពស់រដ្ឋាភិបាល និងយោធាជាង ៤០រូបទៀតត្រូវបាត់បង់ជីវិតភ្លាមៗនៅក្នុងទីក្រុងតេហេរ៉ង់។ បន្ថែមពីលើការបាត់បង់ជីវិតថ្នាក់ដឹកនាំកំពូល ជម្លោះនេះក៏បានរីករាលដាលដល់ប្រទេសជិតខាងដូចជា លីបង់ គុយវ៉ែត និងអារ៉ាប់រួម ដោយសារការវាយបកសងសឹកគ្នាទៅវិញទៅមក ដែលធ្វើ​ឲ្យស្ថិរភាពសន្តិសុខនៅក្នុងតំបន់មជ្ឈិមបូព៌ាទាំងមូលធ្លាក់ក្នុងស្ថានភាពអាសន្នបំផុត៕

ប្រែសម្រួល៖ ឈាង