ឱសថរុក្ខជាតិ Archives - Kampuchea Thmey Daily

ផ្លែព្នៅមានសារៈសំខាន់ ៥យ៉ាង ចំពោះសុខភាព

អុន ស្រីមាន — Thu, 29 Sep 2022 07:55:29 +0000

ផ្លែព្នៅ ជាផ្លែម្យ៉ាងដែលមានជ័រច្រើន អាចយកធ្វើកាវបិទក្រដាស ឬសៀវភៅបាន ហើយមិនតែប៉ុណ្ណោះ ផ្លែព្នៅ ក៏អាចហូបបានផងដែរ។ ក្រៅពីព្នៅអាចហូបបាន ផ្លែមួយនេះ ក៏អាចយកទៅហាលឲ្យក្រៀម រួចធ្វើជាឱសថសម្រាប់ព្យាបាលរោគបានផងដែរ។ តើផ្លែព្នៅ ជួយជាប្រយោជន៍ផ្នែកសុខភាពបែបណាខ្លះដល់មនុស្ស?

១.ជាឱសថព្យាបាលរាគរូស និងពូវកម្លាំង៖ ផ្លែព្នៅ អាចព្យាបាលជំងឺរាគរូសយ៉ាងមានប្រសិទ្ធភាព។ មិនតែប៉ុណ្ណោះ ផ្លែព្នៅដែលគេបានហាលថ្ងៃក្រៀមហើយនោះ យកមកដាំទឹកលាយជាមួយនឹងទឹកឃ្មុំ អាចជួយប៉ូវកម្លាំងមនុស្សចាស់បានថែមទៀតផង។

២.បណ្តេញមេរោគ និងសម្រួលដល់ការរំលាយអាហារបានយ៉ាងល្អ៖ ក្រៅពីផ្លែព្នៅជួយផ្នែកកម្លាំង ផ្លែមួយនេះ ក៏អាចជួយលាងជាតិពុលក្នុងឈាម ក្នុងថ្លើម និងក្រពះបានយ៉ាងល្អប្រសើរ។ ព្នៅ ក៏ជូយដល់បញ្ហាក្រពះ ជៀសវាងមានរោគក្រពះនានាមកយាយី ប្រសិនបើលោកអ្នកទទួលទានទឹកដាំជាមួយព្នៅក្រៀមជារៀងរាល់ថ្ងៃ។

៣.ជួយព្យាបាលជំងឺផ្តាសាយ និងកាត់បន្ថយការក្តៅក្នុង៖ នៅពេលដែលអ្នកមានជំងឺផ្តាសាយ ឬអាការៈក្តៅក្នុង អាចដាំទឹកព្នៅក្តៅអ៊ុនៗទទួលទាន នឹងជួយឲ្យខ្យល់ដង្ហើមដំណើរការបានល្អ។

៤.ទប់ស្កាត់ជំងឺទឹកនោមផ្អែម៖ អ្នកដែលមានជំងឺទឹកនោមផ្អែម ពិសាទឹកព្នៅ អាចជួយមិនឲ្យជំងឺទឹកនោមផ្អែមវិវត្តទៅមុខទៀត ប៉ុន្តែ អ្នកវិទ្យាសាស្រ្តនៅមិនទាន់ដឹងថា អាចទប់ស្កាត់បានប៉ុន្មានភាគរយឡើយ។

៥.ការពារជំងឺមហារីក៖ នៅពេលដែលអ្នកឧស្សាហរណ៍ទទួលទានទឹកព្នៅ នឹងជួយការពារពីជំងឺមហារីកផ្សេងៗ ដូចជាមហារីកថ្លើម មហារីកប្រព័ន្ធសរសៃប្រសាទជាដើម។ មិនត្រឹមតែជួយការពារមនុស្សពីមហារីកប៉ុណ្ណោះទេ ទឹកព្នៅ ក៏ជួយជំងឺរបេង ជំងឺរោគស្រ្តី និងជំងឺឫសដូងបាតជាដើម។

គួររំលឹកថា ផ្លែព្នៅ សម្បូរដោយសារធាតុជាច្រើនដូចជា កាល់ស្យូម ប្រូតេអ៉ីន សារធាតុប្រឆាំងអុកស៊ីតកម្ម សារធាតុតានីន ។ល។ មិនតែប៉ុណ្ណោះ ក៏មានរសជាតិចត់តិចៗ អាចជួយដល់សុខភាពរបស់មនុស្សបានយ៉ាងល្អ។

ចំពោះវិធីក្នុងការធ្វើផ្លែព្នៅវិញ គឺត្រូវចិតផ្លែព្នៅខ្ចីជាចំណិតតូចៗល្មម រួចហើយយកទីហាលថ្ងៃឲ្យស្ងួតល្អ បន្ទាប់មកយកទៅរក្សាទុកក្នុងប្រអប់ស្ងួត ឬ កន្លែងមានសុវត្ថិភាពមួយ។ ក្រោយមក អ្នកអាចយកព្នៅក្រៀមនោះ ទៅដាំជាមួយនឹងទឹក រួចទទួលទានបានធម្មតា៕

ដោយ៖ អុន ស្រីមាន

The post ផ្លែព្នៅមានសារៈសំខាន់ ៥យ៉ាង ចំពោះសុខភាព appeared first on Kampuchea Thmey Daily.

មិនត្រឹមអាចសម្រួលចលនាដង្ហើម ក្រវាញក៏អាចប្រើប្រាស់ផ្លែវា សម្រាប់សម្រកទម្ងន់បានដូចគ្នា

Sorn Phanith — Fri, 05 Nov 2021 06:42:54 +0000

ការបរិភោគអាហារ ដែលច្នៃចេញពីរុក្ខជាតិក្រវាញ នឹងអាចជួយសម្រួលដល់ចលនាផ្លូវដង្ហើម និងជំងឺផ្តាសាយបានល្អប្រសើរ។ តែរុក្ខជាតិប្រភេទបន្លែនេះ ពិបាកដើរប្រមូលផល គ្រាវាដុះក្នុងព្រៃជ្រៅដ៏សែនឆ្ងាយ។

ប្រជាពលរដ្ឋរស់នៅតាមតំបន់ជួរភ្នំក្រវាញ ក្នុងស្រុកថ្មបាំង ខេត្តកោះកុង អះអាងនាពេលថ្មីនេះថា ការពិសាអាហារដែលច្នៃចេញពីគុម្ព ឬក្តៀងក្រវាញ ដូចជាមាន់ដុតក្រវាញ មាន់ស្ងោរក្រវាញ ឆាគ្រឿង ឆាសាច់គោ ក្រវាញឆាប្រេងខ្យង ធ្វើជាអន្លក់ចុចកាពិ ប្រហើរក្លិនក្រវាញ …នឹងអាចជួយសម្រួលចលនាដង្ហើម ពេលមានផ្តាសាយតឹងច្រមុះសម្រួលដល់ភាពដើរខ្យល់ស្រួលក្រោយពេលគេទទួលទានរួច។

ប្រជាពលរដ្ឋនៅតំបន់ឆ្ងាយដាច់ស្រយោល បន្ថែមថា ក្រវាញ គឺជាប្រទាលធម្មជាតិមួយប្រភេទ ដែលប្រកាន់ទឹកដី ហើយវាដុះលូតលាស់បានដោយមិនត្រូវការពន្លឺព្រះអាទិត្យក្ដៅខ្លាំងនោះទេ វាចូលចិត្តដុះនៅក្នុងតំបន់ព្រៃតាមជួរភ្នំក្រវាញនៃប្រទេសកម្ពុជា។ តែនៅកន្លែងទីតាំងណាដែលដីមានសំណើម ក្បែរជ្រោះ ក្រោមម្លប់ដើមឈើធំៗ និងកន្លែងមានដើមចេកព្រៃដុះច្រើន។

អ្នកស្រី ឈុំ ពៅធីតា រស់នៅក្នុងក្រុងខេមរភូមិន្ទ ជាអាជីវក និងចែកចាយមុខម្ហូប ដែលលោកស្រីខិតខំខ្នះខ្នែង ដើម្បីទៅដល់អតិថិជនបានស្គាល់ភ្លក់រសជាតិដែលកែច្នៃចេញពីបន្លែគុម្ពក្រវាញ។ អ្នកស្រីលើកឡើងនៅថ្ងៃទី៣ វិច្ឆិកា ២០២១ថា អ្នកស្រីការបញ្ជាទិញបន្លែប្រភេទនេះ ពិតជាពិបាកខ្លាំងណាស់ រាល់ពេលដែលមានអតិថិជនបញ្ជាទិញមុខម្ហូបម្ដងៗ។ កសិករជួបផលលំបាក ក្នុងការដើររកក្រវាញ ព្រោះវាដុះក្នុងព្រៃជ្រៅដ៏សែនឆ្ងាយ ហើយប្រសិនបើកសិកររកបាន នោះតម្លៃក៏ប្រែប្រួល និងហក់ខ្ពស់ ពី១៥,០០០រៀល ដល់២៥,០០០ រៀល ក្នុង០១គីឡូក្រាម បណ្តាលឱ្យការដាក់គុម្ពឬក្តៀងក្រវាញក្នុងមុខម្ហូប បានចំនួនតិចតួច។

លោក អ៊ី ម៉េងលាង ប្រធានមន្ទីរកសិកម្ម គូសបញ្ជាក់ថា ក្រវាញស្ថិតនៅក្នុងអម្បូរប្រទាល ដែលគេប្រើប្រាស់ផ្លែវា សម្រាប់សម្រកទម្ងន់ បញ្ចុះសម្ពាធឈាម បន្ថយជាតិស្ករក្នុងឈាម និងខ្លាញ់ ជាដើម។ ក្រវាញដុះជាលក្ខណៈធម្មជាតិច្រើន នៅក្នុងស្រុកថ្មបាំង ខេត្តកោះកុង តភ្ជាប់រហូតដល់ខេត្តពោធិ៍សាត់ និងបាត់ដំបង ក្នុងដែនជម្រកសត្វព្រៃភ្នំក្រវាញ និងភ្នំសំកុស។ ស្រុកថ្មបាំងក៏ជាភូមិសាស្ត្រមួយមានអំណោយផលល្អលើដំណាំធម្មជាតិក្រវាញ តែបច្ចុប្បន្នមានប្រជាពលរដ្ឋមួយចំនួនធំហាក់មិនសូវនិយមគាំទ្រផលិតផលរបស់ខ្លួនឡើយ ជាពិសេសក្មេងៗយុវវ័យជំនាន់នេះ ហាក់បីដូចជាភ្លេច និងស្ទើរតែលែងស្គាល់ដើមក្រវាញបាត់ទៅហើយ ព្រោះតែកសិករពុំទាន់ផុសផុលក្នុងការថែទាំ និងដាំដុះបន្ថែមនៅតាមមូលដ្ឋាន ខណៈបន្លែព្រៃប្រភេទនេះមានតម្លៃខ្ពស់នៅលើទីផ្សារមុខម្ហូប។

សព្វថ្ងៃនេះ ក្រវាញ ត្រូវបាននាំចូលមកពីខាងក្រៅ ដូចជាពីស្រុកវាលវែង ស្រុកភ្នំក្រវាញ ព្រោះតែពលរដ្ឋនៅទីនោះ ដាំដុះច្រើនបែបលក្ខណៈជាសហគមន៍។ ជាទូទៅ ប្រជាសហគមន៍ក្នុងស្រុកថ្មបាំង នៅពុំទាន់បានបង្កើនស្នាដៃការផលិត ឬប្រមូលក្រវាញ នៅតាមរដូវកាលរបស់វាដើម្បីហាលទុកប្រើប្រាស់ជាថ្នាំនៅក្នុងគ្រួសារ និងដាក់លក់ទៅកាន់ទីផ្សារនៅឡើយ។

ដោយឡែកប្រជាពលរដ្ឋនៅឯខេត្តពោធិ៍សាត់ កំពុងប្រើប្រាស់ផ្លែក្រវាញ តាមរយៈការឆុងជាតែសម្រាប់ទទួលទានក្ដៅៗ និងប្រើប្រាស់ជាគ្រឿងផ្សំក្នុងអាហារផងដែរ។ ពលរដ្ឋរស់នៅតាមតំបន់ជួរភ្នំក្រវាញ និយាយថា ក្រវាញអាចផ្ដល់ផ្លែបានល្អ ចន្លោះអាយុចាប់ពីអាយុ៤ ទៅ៥ឆ្នាំ នឹងបន្ដផ្លែរាល់ឆ្នាំរហូតដល់អាយុ៥០ឆ្នាំ៕

អត្តបទ៖ សិរីវឌ្ឍនៈ

The post មិនត្រឹមអាចសម្រួលចលនាដង្ហើម ក្រវាញក៏អាចប្រើប្រាស់ផ្លែវា សម្រាប់សម្រកទម្ងន់បានដូចគ្នា appeared first on Kampuchea Thmey Daily.

មើមខ្ជាយ ជាឱសថជួយពង្រឹងប្រព័ន្ធភាពស៊ាំ និងជួយកាត់បន្ថយភាពធ្ងន់ធ្ងរនៃវីរុសកូវីដ ១៩

សាង ស្រីល័ក្ខ — Fri, 08 Oct 2021 04:17:12 +0000

ការផ្ទុះឡើងនៃកូវីដ ១៩ គឺជាផលវិបាកនៃមេរោគ ចំពោះមនុស្សគ្រប់គ្នា ជាពិសេសគឺវីរុសបំប្លែងខ្លួន Delta។ ដូច្នេះដើម្បីពង្រឹងប្រព័ន្ធភាពស៊ាំ និងជួយកាត់បន្ថយភាពធ្ងន់ធ្ងរ នៃការឆ្លងរោគក្នុងពេលបច្ចុប្បន្ននេះ យើងមិនគួរមើលរំលងឱសថដ៏ពេញនិយមមួយ ដែលមាននៅផ្ទះ នោះគឺមើមខ្ជាយ ដែលគេល្បីថា អាចជួយទប់ស្កាត់កូវីដបានយ៉ាងប្រសើរ ។

លក្ខណៈសម្បត្តិរបស់មើមខ្ជាយ

មើមខ្ជាយជាឱសថដែលពេញនិយម ប្រើបន្ថែមក្នុងការចម្អិនអាហារ។ វាក៏ត្រូវបានចាត់ថ្នាក់នៅក្នុងរូបមន្តឱសថបុរាណថៃផងដែរ។ ជាមួយនឹងលក្ខណៈសម្បត្តិអាចប្រើបាន ចាប់ពីរឹសរហូតដល់ស្លឹកដូចជា៖

-ជួយដល់ការរំលាយអាហារ
-បំបាត់ការហើមពោះ, ការរំលាយអាហារ
-វាត្រូវបានគេប្រើជាប៉ូវកំលាំងនិងផ្ដល់ថាមពលបានយូរ
-បំបាត់ការឈឺចាប់រាងកាយ
-បំបាត់ការវិលមុខ
-ការឈឺទ្រូង។

បច្ចុប្បន្ននេះ ខ្ជាយនៅតែមានប្រជាប្រិយភាពខ្លាំង ជាមួយនឹងរសជាតិហឹរចេញពីមើម។ ប្រសិនបើឱសថណាមានរសជាតិហឹរ នោះនឹងជំរុញធាតុភ្លើង។ ធាតុភ្លើងគឺជាផ្នែកដែលត្រូវកែច្នៃជាថ្នាំគ្រាប់ ជួយបង្កើតភាពស៊ាំដល់រាងកាយ ជួយរារាំងការលូតលាស់របស់មេរោគ។ តួយ៉ាងមើមខ្ជាយមានធាតុភ្លើង និងជាឱសថដែលលក់ដាច់បំផុត រហូតដល់តម្លៃបានហក់ឡើង ហើយចាប់ផ្ដើមអស់ពីទីផ្សារនៅស្រុកថៃ សូម្បីតែនៅប្រទេសកម្ពុជាក៏ខ្ជាយឡើងថ្លៃដែរ។

សម្រាប់មនុស្សធម្មតា គួរតែត្រូវបានគេបរិភោគឲ្យបានត្រឹមត្រូវ រួមជាមួយសារធាតុចិញ្ចឹមផ្សេងទៀត ដើម្បីជួយពង្រឹងប្រព័ន្ធការពាររាងកាយ ឲ្យកាន់តែមានប្រសិទ្ធភាព។ ដោយឡែកចំពោះអ្នកដែលមានជំងឺពីកំណើត កុមារ ស្ត្រីមានផ្ទៃពោះ និងស្ត្រីបំបៅដោះកូន គួរតែត្រូវបានណែនាំដោយវេជ្ជបណ្ឌិត៕

ប្រែសម្រួល៖ សាង ស្រីល័ក្ខ

ចុចអាន៖ក្រុមអ្នកស្រាវជ្រាវបញ្ជាក់ថា មើមខ្ជាយពិតជាអាចប្រឆាំងកូវីដបាន ១០០ ភាគរយ

ចុចអាន៖ដុកទ័របកស្រាយលម្អិត ពិតឬចចាមអារ៉ាម ក្រោយមើមខ្ជាយល្បីល្បាញថា អាចប្រឆាំងកូវីដបាន ១០០ ភាគរយ

ចុចអាន៖បន្លែជាឱសថ ៥ មុខ ងាយស្រួលរក និងអាចព្យាបាលជំងឺជាច្រើនប្រភេទ

The post មើមខ្ជាយ ជាឱសថជួយពង្រឹងប្រព័ន្ធភាពស៊ាំ និងជួយកាត់បន្ថយភាពធ្ងន់ធ្ងរនៃវីរុសកូវីដ ១៩ appeared first on Kampuchea Thmey Daily.

បន្លែជាឱសថ ៥ មុខ ងាយស្រួលរក និងអាចព្យាបាលជំងឺជាច្រើនប្រភេទ

សាង ស្រីល័ក្ខ — Fri, 24 Sep 2021 06:05:00 +0000

ជឿឬមិនជឿ បន្លែនៅជិតខ្លួនយើងគឺជាឱសថទិព្វ អាចព្យាបាលជំងឺបានយ៉ាងទូលំទូលាយ។ ប្រភេទបន្លែខ្លះកម្រ ដូច្នេះយើងត្រូវចំណាយលុយដើម្បីទិញវា ប៉ុន្តែបន្លែខ្លះទៀត ងាយរកសឹងថានៅកៀកខ្លួន ឬនៅជុំវិញរបងផ្ទះក៏មាន។

កម្ពុជាថ្មី សូមណែនាំឱសថរុក្ខជាតិទាំង ៥ មុខ ងាយស្រួលរក ហើយមានលក្ខណៈសម្បត្តិព្យាបាលជំងឺបានច្រើន ថែមទៀតផង។

១ ជីនាងវង

ប្រសិនបើនិយាយពីឈ្មោះឱសថរុក្ខជាតិក្រអូបនេះ យើងប្រាកដជាស្គាល់ច្បាស់ពីជីនាងវង សម្រាប់ប្រើក្នុងអាហារមួយចំនួននៃសព្វថ្ងៃនេះ។ លក្ខណៈសម្បត្តិរបស់បន្លែនេះ គឺជាឱសថល្អឥតខ្ចោះ ជួយបញ្ចេញខ្យល់ បំបាត់ការឈឺក្បាល កាត់បន្ថយជំងឺផ្ដាសាយ ព្យាបាលឈឺពោះ រាគរូស និងទល់លាមកជាដើម។ វាក៏ជាជំនួយក្នុងការព្យាបាលស្នាមជាំ ជួយកាត់បន្ថយកន្ទួល ឬហើមកូនកណ្ដុរ និងជួយឲ្យមានចំណង់អាហារថែមទៀត។

២ ស្លឹកគ្រៃ

គឺជាបន្លែដែលមិនអាចបំភ្លេចបាន នៃក្លិនដ៏ក្រអូបឈ្ងុយឈ្ងប់និងពិសេសខ្លាំង។ វាក៏ជាឱសថដែលជួយព្យាបាលការឈឺពោះ រាគរូស បែកញើស ដេញខ្យល់ និងជំងឺប្រព័ន្ធទឹកនោម។ ជាពិសេសអាចព្យាបាលគ្រួសក្នុងថង់ទឹកប្រមាត់ ដោះស្រាយបញ្ហាហើមពោះ រលាកក្រពះ និងបន្ថយសំពាធឈាម។

៣ ខ្ញី

ជាឱសថមានក្លិនក្រអូបដូចគ្នា ហើយមានគុណប្រយោជន៍ជួយសម្រួលដល់ការទល់លាមក រលាកក្រពះ ឈឺពោះ ចង្អោរនិងក្អួត ជួយក្នុងការបន្ទោបង់ និងកាត់បន្ថយសម្ពាធនៃអារម្មណ៍។

៤ ស្លឹកបាស់

ថ្វីត្បិតតែវាជាបន្លែដែលងាយស្រួលរក នៅជុំវិញរបងក៏ដោយ ប៉ុន្តែបើសង្កេតមើលឥឡូវនេះ វាក៏ជាបន្លែឱសថដ៏កម្រផងដែរ។ ស្លឹកបាសត្រូវបានគេណែនាំឲ្យធ្វើម្ហូប ព្រោះវាជួយកាត់បន្ថយគ្រុនក្ដៅ ក្អួត ប្រឆាំងនឹងការរលាក ជំរុញទឹកមាត់ ឈឺចាប់ រមាស់ និងរលាកតាមដងខ្លួន។

៥ ខ្ទឹមស

ជាឱសថមួយក្នុងចំណោមឱសថដែលមានប្រជាប្រិយ និងមិនអាចខ្វះបានគឺខ្ទឹមស។ ចំពោះលក្ខណៈសម្បត្តិនៃការទទួលទានខ្ទឹមសវិញ វាជួយបំបាត់អាការហើមពោះ រលាកក្រពះ ឈឺពោះ ក៏ដូចជាជួយព្យាបាលជំងឺរលាកស្បែក ដែលមានជំងឺ៕

ប្រែសម្រួល ៖ សាងស្រីល័ក្ខ

ចុចអាន៖ឱសថរុក្ខជាតិ ពិតជាអាចការពារកូវីដបាន ឬគ្រាន់តែជាពាក្យចចាមអារ៉ាម

ចុចអាន៖ថៃ ណែនាំប្រជាជនឲ្យប្រើប្រាស់ឱសថរុក្ខជាតិត្រូវតាមក្បួនខ្នាត ដើម្បីឆាប់បង្កើនភាពស៊ាំទប់ទល់កូវីដ

The post បន្លែជាឱសថ ៥ មុខ ងាយស្រួលរក និងអាចព្យាបាលជំងឺជាច្រើនប្រភេទ appeared first on Kampuchea Thmey Daily.

ថៃ ណែនាំប្រជាជនឲ្យប្រើប្រាស់ឱសថរុក្ខជាតិត្រូវតាមក្បួនខ្នាត ដើម្បីឆាប់បង្កើនភាពស៊ាំទប់ទល់កូវីដ

សាង ស្រីល័ក្ខ — Wed, 01 Sep 2021 04:24:29 +0000

នាយកដ្ឋានឱសថបុរាណថៃ បានចេញសេចក្ដីណែនាំពីរុក្ខជាតិ ដែលប្រជាជននិយមយកមកធ្វើជាភេសជ្ជៈ ដែលគួរទទួលទានឲ្យបានត្រឹមត្រូវ ដើម្បីបង្កើនភាពស៊ាំដល់រាងកាយ ក្នុងស្ថានភាពនៃវិបត្តិកូវីដ ១៩ នេះ។

តើធ្វើដូចម្ដេចដើម្បីហូបឱសថរុក្ខជាតិនេះបានត្រឹមត្រូវនៅអំឡុងពេលជំងឺរាតត្បាតកូវីដនេះ?

វេជ្ជបណ្ឌិត Kwanchai Wisitanont អគ្គនាយករងនៃនាយកដ្ឋានឱសថបុរាណ បានមានប្រសាសន៍ថា នៅក្នុងកាលៈទេសៈការរីករាលដាលនៃជំងឺកូវីដ -១៩ ការបង្កើតប្រព័ន្ធការពាររាងកាយ គឺមានសារៈសំខាន់ជាខ្លាំង។ ប្រសិនបើរាងកាយទទួលវីរុសឬមេរោគចូលទៅក្នុងខ្លួន នោះយើងអាចប្រឈមនឹងជំងឺមិនខាន។ ប៉ុន្តែនៅពេលដែលរាងកាយមានភាពស៊ាំបានល្អ Leukocytes ក៏នឹងប្រយុទ្ធប្រឆាំងនឹងភ្នាក់ងារបង្ករោគបានយ៉ាងល្អផងដែរ។

ការបង្កើនភាពស៊ាំដល់រាងកាយដែលមានសុខភាពល្អ គឺជាឱកាសដើម្បីរួចផុតពីស្ថានភាពដ៏អាក្រក់នេះយោងតាមឱសថបុរាណថៃបានណែនាំឱសថដែលស័ក្តិសម សម្រាប់ទទួលទានក្នុងអំឡុងពេលមានជំងឺរាតត្បាតកូវីដ។ រុក្ខជាតិត្រូវបានបែងចែកដូចជា ៖

មើមខ្ចាយ វាមានរសជាតិហឹរជូរនិងចត់ ជួយសម្រួលដល់ការទល់លាមក ពិបាកដល់ការបត់ជើង ជាពិសេសគឺការបញ្ចេញខ្យល់ក្នុងរាងកាយ។ ជួយផ្ដល់ថាមពលដល់រាងកាយ និងបង្កើនចំណង់អាហារដែលមិនសូវឃ្លាន និងចិញ្ចឹមស្បែក វាក៏មានលក្ខណៈប្រហាក់ប្រហែលនឹងយិនស៊ិនដែរ។ ពេលខ្លះគ្រូបុរាណតែងតែហៅ ថា ជាយិនស៊ិនថៃ សម្រាប់និយមបរិភោគជាអាហារ ហើយបង្កើតជាភេសជ្ជៈ។

ខ្ញី រសជាតិហឹរ ជួយសម្រួលដល់ការរំលាយអាហារ ក្រហាយទ្រូង បំបាត់ការក្អក រលាកបំពង់ក ជាថ្នាំបញ្ចុះទឹកនោម។

រមៀត រសជាតិហឹរនិងហាងបន្តិច វាមានធាតុចិញ្ចឹមដល់រាងកាយនិងជួយបន្សុទ្ធជាតិពុលក្នុងឈាម បំបាត់ស្លេស្ម រោគផ្ដាសាយ គ្រុនក្ដៅ ព្យាបាលរាល់កន្ទួលរមាស់ ដោះស្រាយជំងឺស្បែក។

ជីថ្ពាល់ត្រី មានរសជាតិហឹរបន្តិច តែដើរតួជាថ្នាំផ្តាសាយ បំបាត់ជាតិពុល ក្តៅ ជួយបន្សាបគ្រុន និងនោមទាស់ជាដើម។

Mulberry ស្លឹកមានរសជាតិជូរអែម ប្រើជាថ្នាំសម្រាប់បំបាត់គ្រុនក្ដៅ បែកញើសខ្លួន ស្រេកទឹក ហើយជាថ្នាំជួយជំរុញខ្យល់ក្ដៅ។ ជាលទ្ធផលរសជាតិជូរផ្អែមនិងត្រជាក់ គឺជាថ្នាំបញ្ចុះលាមក ដែលបន្សាបធាតុមួយចំនួនជួយបំបាត់ការស្រេកទឹក។ ប្រើដើម្បីកែសម្រួលឬជួយផ្ដល់សំណើមដល់បំពង់ក ចិញ្ចឹមតម្រងនោមបំបាត់អាការក្ដៅ ជួយរំលាយអាហារ និងធ្វើឲ្យស្រស់ស្រាយ។

ខ្ទឹមបារាំង មានរសជាតិក្រអូបបន្តិចនិងរាងឆួល។ចំណែកការទទួលទានប្រើជាថ្នាំបញ្ចុះកម្ដៅក្នុងពោះវៀនបំបាត់ឈឺពោះ បំប៉នធាតុក្នុងរាងកាយ ព្យាបាលអាការតឹងច្រមុះ។ ជាពិសេសប្រើលើកុមារ ដើម្បីព្យាបាលជំងឺផ្ដាសាយ បំបាត់គ្រុនក្ដៅបន្ថយកម្ដៅព្យាបាលក្អក។

ខ្ទឹមស មានរសជាតិហឹរនិងឆួល ការព្យាបាលគឺជួយទប់អាការៈទល់លាមក ព្យាបាលពិការភាព រំលាយអាហារ បណ្ដេញជាតិស្លេស្ម ញើស កាត់បន្ថយជាតិខ្លាញ់ ព្យាបាលជំងឺសួត ព្យាបាលពិការភាពសួត បំប៉នធាតុក្នុងរាងកាយ ព្យាបាលការក្អក ផ្សាយ ក្អក តឹងច្រមុះ គ្រុនក្ដៅ។

ស្លឹកគ្រៃ រសជាតិក្រអូបបន្តិច មានឥទ្ធិពលជួយបណ្ដេញខ្យល់ក្នុងពោះវៀន បំបាត់ការហើមពោះ ឆ្អល់ពោះ។ បំបាត់ការតឹងណែនក្នុងទ្រូង ព្យាបាលជំងឺប្រព័ន្ធទឹកនោម ធ្វើឲ្យមានចំណង់អាហារ សំពាធឈាមទាប ព្យាបាលអាការចុកពោះ។

ម្រះព្រៅ រសជាតិហឹរ បំបាត់ការឈឺក្រពះ បណ្ដេញខ្យល់ចេញញើស ព្យាបាលគ្រុនក្តៅ បណ្ដេញខ្យល់ ព្យាបាលរាគមួល បំប៉នធាតុដើមឲ្យមានលក្ខណៈធម្មតា៕

ប្រែសម្រួល៖ សាង ស្រីល័ក្ខ

ប្រភព៖sanook

The post ថៃ ណែនាំប្រជាជនឲ្យប្រើប្រាស់ឱសថរុក្ខជាតិត្រូវតាមក្បួនខ្នាត ដើម្បីឆាប់បង្កើនភាពស៊ាំទប់ទល់កូវីដ appeared first on Kampuchea Thmey Daily.

ល្បីខ្ទឹមខ្មៅ ជាឱសថអាចការពារមហារីក បានពិតមែន?

សាង ស្រីល័ក្ខ — Thu, 12 Aug 2021 02:17:24 +0000

ចាប់តាំងពីសម័យបុរាណ ខ្ទឹមត្រូវបានប្រើសម្រាប់ចម្អិនអាហារនិងជាធាតុផ្សំក្នុងឱសថដើម្បីព្យាបាល។ ប៉ុន្តែជាមួយនឹង ខ្ទឹមខ្មៅ យ៉ាងម៉េចវិញ? យើងគ្រប់គ្នាប្រហែលជាប្លែកជាមួយពាក្យពីរម៉ាត់នេះ ខ្ទឹមខ្មៅ និងមានចម្ងល់ ថាតើវាគឺជាការពិតដែរឫទេ ដែលថា ខ្ទឹមខ្មៅល្អសម្រាប់សុខភាព ដូចដែលមនុស្សជាច្រើនបាននិយាយនោះ?

ខ្ទឹមខ្មៅ គឺជាខ្ទឹមសមួយប្រភេទទៀត ដែលមានលក្ខណៈសម្បត្តិល្អជាច្រើនចំពោះរាងកាយ ហើយមានប្រជាប្រិយភាព ក្នុងចំណោមជនបរទេស និងជាឱសថមានតម្លៃខ្ពស់មិនធម្មតា។ ខ្ទឹមខ្មៅត្រូវបានរកឃើញដោយជនជាតិកូរ៉េខាងត្បូងគឺ លោក Kim Scott នៅដើមឆ្នាំ ២០០៤។ ខ្ទឹមខ្មៅបានក្លាយជារបស់ធម្មជាតិដ៏អស្ចារ្យនិងពេញនិយមនៅ អាមេរិច, កូរ៉េ, ជប៉ុន, ថៃ វៀតណាម .ល. ។

វេជ្ជបណ្ឌិត Somsak Oraksilp អគ្គនាយកនៃនាយកដ្ឋានវេជ្ជសាស្ត្របាននិយាយថា ខ្ទឹមខ្មៅសំដៅលើ allium sativum L. ដែលត្រូវបានគេធ្វើឲ្យមានជាតិ fermented យ៉ាងហោចណាស់មួយខែ ដែលបណ្ដាលឲ្យខ្ទឹមសប្រែទៅជាខ្មៅ ដោយមានការផ្សំវាជាមួយគ្រឿងផ្សំ។ ក្លិនរសជាតិនិងសារធាតុសំខាន់ៗនៅក្នុងខ្ទឹមសផ្លាស់ប្ដូរ ហើយប្រែជាឱសថខ្ទឹមខ្មៅ។

ខ្ទឹមខ្មៅ ពិតជាអាចការពារជំងឺមហារីកបាន?

ការសិក្សាបានបង្ហាញថា ខ្ទឹមខ្មៅមានសារធាតុប្រឆាំងអុកស៊ីតកម្ម សារជាតិ flavonoids និងប៉ូលីហ្វេណុលដែលអាចរួមចំណែកដល់ការការពារកោសិកាមហារីក។ទោះយ៉ាងណាក៏ដោយ ការស្រាវជ្រាវដែលពាក់ព័ន្ធភាគច្រើន ត្រូវបានធ្វើឡើងនៅកម្រិតមន្ទីរពិសោធន៍ ឬមន្ទីរពិសោធន៍ក្នុងសត្វពិសោធន៍ប៉ុណ្ណោះ។ មិនមានរបាយការណ៍គ្លីនិកស្ដីពីការការពារ ឬកម្រិតថ្នាំដែលអាចការពារជំងឺមហារីកបានទេ។

វិធីទទួលទានខ្ទឹមខ្មៅដោយសុវត្ថិភាពនិងមានអត្ថប្រយោជន៍

លោកវេជ្ជបណ្ឌិតបានបន្ថែមថា ផលិតផលខ្ទឹមខ្មៅគួរតែត្រូវបានគេបរិភោគ ដើម្បីការពារការទទួលទានសារធាតុកខ្វក់ផ្សេងៗ ហើយគួរតែទទួលទានក្នុងបរិមាណសមស្រប។ ប្រសិនបើទទួលទានក្នុងបរិមាណច្រើនពេក ផលប៉ះពាល់អាចប៉ះពាល់ដល់សុខភាព។ អ្នកជំងឺមហារីកដែលកំពុងទទួលការព្យាបាល គួរតែស្ថិតក្រោមការត្រួតពិនិត្យរបស់វេជ្ជបណ្ឌិត៕

ប្រែសម្រួល៖ សាង ស្រីល័ក្ខ

ចុចអាន៖ជំងឺ ៣ ប្រភេទគ្រោះថ្នាក់ខ្លាំងដល់ជីវិត ដែលបណ្ដាលមកពីការហូបអាហារកែច្នៃច្រើន

ចុចអាន៖នេះជារោគសញ្ញាឡើងជាតិអាស៊ីតអ៊ុយរិកក្នុងឈាម ដែលគ្រប់គ្នាគួរប្រុងប្រយ័ត្ន

The post ល្បីខ្ទឹមខ្មៅ ជាឱសថអាចការពារមហារីក បានពិតមែន? appeared first on Kampuchea Thmey Daily.

ដុកទ័របកស្រាយលម្អិត ពិតឬចចាមអារ៉ាម ក្រោយមើមខ្ជាយល្បីល្បាញថា អាចប្រឆាំងកូវីដបាន ១០០ ភាគរយ

សាង ស្រីល័ក្ខ — Mon, 09 Aug 2021 06:34:18 +0000

មើមខ្ជាយជារុក្ខជាតិឱសថនៅក្នុងផ្ទះបាយ ដែលមិនត្រឹមតែពេញនិយមយកមកធ្វើម្ហូបទេ។ ក្នុងរយៈពេលប៉ុន្មានខែចុងក្រោយនេះ មើមខ្ជាយទទួលបានការចាប់អារម្មណ៍ ក្លាយជាឱសថជួយពង្រឹងប្រព័ន្ធការពាររាងកាយ ជាពិសេសក្រុមអ្នកស្រាវជ្រាវបញ្ជាក់ថា មើមខ្ជាយពិតជាអាចប្រឆាំងកូវីដបាន ១០០ ភាគរយថែមទៀតផង។

ដើម្បីកុំឲ្យមានចម្ងល់ពីមើមខ្ជាយថា អាចការពារកូវីដដូចពាក្យចចាមអារ៉ាមដែរទេ មកមើលលក្ខណៈសម្បត្តិរបស់ វាតើមានអត្ថប្រយោជន៍អ្វីខ្លះដល់រាងកាយរបស់មនុស្ស។

មើមខ្ជាយគឺជាឱសថដ៏មានប្រជាប្រិយក្នុងសម័យរាតត្បាតនេះ ជាពិសេសឮថា តម្លៃក៏ឡើងថ្លៃគួរសមដែរ។មើមខ្ជាយអាចប្រើបានច្រើនផ្នែក រួមទាំងស្លឹក មើម ឫស ហើយត្រូវបានគេនិយមដាំទឹកឲ្យពុះដើម្បីព្យាបាលជំងឺ។ លើសពីនេះ វាត្រូវបានគេប្រើជាឱសថបុរាណថៃ ដែលមានមុខងារការពាររាងកាយ ក៏ដូចជាបន្ថយរោគសញ្ញាដូចខាងក្រោម៖

ការព្យាបាលដំបៅដែលរ៉ាំរ៉ៃ និងព្យាបាលរោគសញ្ញាច្រមុះមិនមានក្លិន ជួយដល់ការរំលាយអាហារ ដោះស្រាយបញ្ហាហើមពោះ រលាកក្រពះ ប្រើជាថ្នាំប៉ូវកម្លាំងសម្រាប់រាងកាយ និងប៉ូវកម្លាំងផ្សេងៗ បំបាត់ការឈឺចាប់រាងកាយ បំបាត់អាការវិលមុខ តឹងទ្រូង ជួយរក្សាតុល្យភាពអ័រម៉ូនក្នុងរាងកាយ ប្រើជាថ្នាំបញ្ចុះទឹកនោម ជាដើម។

មើមខ្ជាយការពារកូវីដបានពិតមែន?

នៅឆ្នាំ ២០២០ សាស្ត្រាចារ្យ Piyamit Srithara ព្រឹទ្ធបុរសមហាវិទ្យាល័យវេជ្ជសាស្ត្រ និងមន្ទីរពេទ្យ Ramathibodi សាកលវិទ្យាល័យ Mahidol បានបង្ហាញពីការស្រាវជ្រាវលើឱសថដែលមានឥទ្ធិពលប្រឆាំងកូវីដ ១៩ ។ ដោយក្រុមអ្នកស្រាវជ្រាវនៅថៃបានរកឃើញថា មើមខ្ជាយ មានសារធាតុសំខាន់ពីរ ដែលអាចកម្ចាត់មេរោគលើបំពង់តេស្តបានយ៉ាងមានប្រសិទ្ធភាព នោះគឺ Panduratin A និង Pinostrobin ដែលដើរតួជាយន្តការប្រឆាំងកូវីដបានយ៉ាងខ្លាំងក្លា ព្រមទាំងកាត់បន្ថយចំនួនកោសិកាឆ្លង និងរារាំងការផលិតមេរោគពីកោសិកា។

អ្វីដែលអ្នកត្រូវដឹងមុនពេលទទួលទាន មើមខ្ជាយ នេះជាផលប៉ះពាល់ដែលមិនគួរមើលរំលងសោះឡើយ!

ថ្វីត្បិតតែមើមខ្ជាយ មានលក្ខណៈសម្បត្តិជាឱសថក៏ដោយ ប្រសិនបើបរិភោគអស់រយៈពេលយូរ លើសពីចំនួនកំណត់ នោះវាអាចបង្កឲ្យមានផលប៉ះពាល់ដល់សុខភាព។ ជាពិសេសរោគសញ្ញាក្តៅក្នុង ដំបៅក្នុងមាត់ បញ្ហាអញ្ចាញធ្មេញ និងញ័រទ្រូង នេះក៏ដោយសារមើមខ្ជាយ គឺជាឱសថក្តៅ។ ប្រសិនបើអ្នកហូបច្រើនពេក រាងកាយ អាចបាត់បង់តុល្យភាព។

អ្នកមានជំងឺប្រចាំកាយ មុនហូបឬដាំទឹកជាឱសថ គួរតែត្រូវបានណែនាំដោយគ្រូពេទ្យជំនាញ ឬពិភាក្សាជាមួយដុកទ័រជាមុនសិន។ ចំណែក កុមារ ស្ត្រីមានផ្ទៃពោះ ស្ត្រីបំបៅដោះកូន និងអ្នកជំងឺថ្លើម មិនគួរទទួលទានទេ ព្រោះវានឹងប៉ះពាល់ដល់មុខងារថ្លើម និងតម្រងនោមជាខ្លាំង។

មើមខ្ជាយត្រូវបានក្រុមអ្នកសិក្សានៅប្រទេសថៃស្រាវជ្រាវថា អាចប្រឆាំងកូវីដបាន ១០០ ភាគរយក៏ពិតមែន។ ប៉ុន្តែបច្ចុប្បន្ននេះ ពុំទាន់មានថ្នាំឬថ្នាំបំប៉នណាមួយត្រូវបានគេអនុញ្ញាតឲ្យការពារកូវីដបានទេ។ ក្រសួងសុខាភិបាលគ្រប់ប្រទេស គ្រាន់តែគេណែនាំឲ្យប្រជាជនលាងដៃញឹកញាប់ ជៀសឆ្ងាយពីអ្នកដទៃ ពាក់ម៉ាសបិទមុខរាល់ពេលចេញពីផ្ទះ ហាត់ប្រាណនិងសម្រាកឲ្យបានគ្រប់គ្រាន់ ទើបអាចការពារការពារកូវីដបាន៕

ប្រែសម្រួល៖ សាង ស្រីល័ក្ខ

ប្រភព៖thairath

ចុចអាន៖ល្បីមើមខ្ជាយព្យាបាលកូវីដ តម្លៃលក់ឡើងជាង១ម៉ឺនរៀលក្នុង១គីឡូក្រាម

The post ដុកទ័របកស្រាយលម្អិត ពិតឬចចាមអារ៉ាម ក្រោយមើមខ្ជាយល្បីល្បាញថា អាចប្រឆាំងកូវីដបាន ១០០ ភាគរយ appeared first on Kampuchea Thmey Daily.

ឱសថរុក្ខជាតិ ពិតជាអាចការពារកូវីដបាន ឬគ្រាន់តែជាពាក្យចចាមអារ៉ាម

សាង ស្រីល័ក្ខ — Sun, 08 Aug 2021 02:22:00 +0000

កូវីដកំពុងរាលដាលខ្លាំងនៅលើពិភពលោក ហើយមន្ទីរពេទ្យតាមប្រទេសនីមួយៗ គ្មានគ្រែសម្រាកព្យាបាលឡើយ ខណៈអ្នកជំងឺស្រាលខ្លះ ត្រូវតម្រូវឲ្យព្យាបាលនៅតាមផ្ទះរៀងៗខ្លួន។ ដូច្នេះហើយ ទើបប្រជាជនអាស៊ីមួយចំនួន បានងាកមកដាំទឹកក្ដៅ ដោយប្រើគ្រឿងផ្សំធម្មជាតិដូចជា ខ្ញី មើមខ្ជាយ គល់ស្លឹកគ្រៃ រំដេង ឬក្រូចសើច ជាដើម។

ជាការពិតដែលថា ទឹកដែលផ្សំចេញឱសថរុក្ខជាតិទាំងនេះ អាចជួយការពារកូវីដបានយ៉ាងដូចម្ដេច?

លោកបណ្ឌិត Wanaporn Thongcham អ្នកជំនាញអាហារូបត្ថម្ភក្រុមអាហារបំប៉ន មហាវិទ្យាល័យវេជ្ជសាស្ត្រនៃមន្ទីរពេទ្យ Ramathibodi សាកលវិទ្យាល័យ Mahidol បានបញ្ជាក់ថា ឱសថរុក្ខជាតិ ដូចជាខ្ទឹមបារាំង ខ្ទឹមក្រហមនិងស ខ្ញី រំដេង គល់ស្លឹកគ្រៃ គ្រឿងទេសទាំងនេះមានលក្ខណៈសម្បត្តិជួយ បំបាត់ការក្អក ជំងឺផ្ដាសាយ ការកកស្ទះច្រមុះ។ ជាពិសេសគ្រឿងផ្សំនីមួយៗ មានសារធាតុសំខាន់ៗដូចជា quercetin, kaempferol, allicin, gingerol, ដែលអាចប្រឆាំងនឹងការរលាក និងពង្រឹងប្រព័ន្ធភាពស៊ាំបានយ៉ាងល្អ។

លើសពីនេះទៀត មហាវិទ្យាល័យវិទ្យាសាស្ត្រនៃសាកលវិទ្យាល័យ Mahidol បានស្រាវជ្រាវនិងរកឃើញថាការដកយកសារធាតុពីមើមខ្ជាយ គឺរួមចំណែកជួយទប់ស្កាត់រលូតលាស់របស់កូវីដ បានយ៉ាងមានប្រសិទ្ធភាព។ ដោយមើមខ្ជាយមានសារធាតុ ២ សំខាន់ៗរួមគ្នា គឺ Panduratin A និង Pinostrobin ។

ដូច្នេះអាចនិយាយបានថា រាល់លក្ខណៈសម្បត្តិទាំងអស់នៃឱសថរុក្ខជាតិទាំងនេះ មិនត្រឹមត្រូវបានគេមើលឃើញថា មានអត្ថប្រយោជន៍សម្រាប់រាងកាយ ទាក់ទងនឹងការព្យាបាលជំងឺផ្តាសាយតែមួយមុខឡើយ។ តែវាក៏អាចជួយកាត់បន្ថយការរលាក និងបង្កើនភាពស៊ាំដល់រាងកាយ ហើយក៏ជួយការពារកូវីដបាន ១០០% ។

ប៉ុន្តែទន្ទឹមនឹងគ្រឿងទេសទាំងនោះ មានប្រយោជន៍ដល់សុខភាពរាងកាយ វាក៏អាចបង្កគ្រោះថ្នាក់ដល់រាងកាយ ប្រសិនបើអ្នកហូបមិនបានត្រឹមត្រូវ។

លោកបណ្ឌិត Wanaporn បានបញ្ជាក់ថា យើងគួរតែសិក្សាពីបរិមាណនៃសារធាតុសំខាន់ៗ ដែលមាននៅក្នុងវត្ថុធាតុដើម ព្រោះអ្វីដែលប្រើច្រើនពេក ក៏អាចជាគ្រោះថ្នាក់ផងដែរ។ ចំពោះសារធាតុខ្លះ អាចមានប្រតិកម្មទៅនឹងថ្នាំមួយចំនួន ដែលមានផលប៉ះពាល់អវិជ្ជមានដល់មនុស្ស ជាជាងទទួលបានផលប្រយោជន៍។ ឧទាហរណ៍អ្នកជំងឺទឹកនោមផ្អែម នៅពេលដែលមានរសជាតិឆ្ងាញ់ អ្នកជំងឺនឹងញ៉ាំច្រើន ជាលទ្ធផល កម្រិតជាតិគ្លុយកូសក្នុងឈាមក៏កំពុងកើនឡើងផងដែរ។

ឱសថរុក្ខជាតិគឺជាគ្រឿងទេសមានប្រយោជន៍ និងមានសុវត្ថិភាព ហើយជួយការពារឬពង្រឹងភាពស៊ាំបានយ៉ាងល្អ។ ប៉ុន្តែក៏ត្រូវពិចារណាលើអំពីកម្រិតនៃការប្រើប្រាស់ដោយសុវត្ថិភាព កុំឲ្យឱសថធម្មជាតិ ក្លាយជារបស់ដាក់ទណ្ឌកម្មលើរាងកាយជំនួសវិញ៕

ប្រែសម្រួល៖ សាង ស្រីល័ក្ខ

ប្រភព៖sanook

ចុចអាន៖ក្រុមអ្នកជំនាញបញ្ជាក់ច្បាស់ៗថា កូវីដមិនឆ្លងតាមរយៈអាហារដែលយើងហូបឡើយ

The post ឱសថរុក្ខជាតិ ពិតជាអាចការពារកូវីដបាន ឬគ្រាន់តែជាពាក្យចចាមអារ៉ាម appeared first on Kampuchea Thmey Daily.