ក្រុមហ៊ុន ភីធីធី បដិសេធរឿងតំណលីង ដែលកំពុងវាយលុកពេញបណ្តាញទំនាក់ទំនងសង្គម

តំណលីងដែលកំពុងវាយលុកពេញបណ្តាញទំនាក់ទំនងសង្គម ពុំមែនជាសាររបស់ក្រុមហ៊ុន ភីធីធី ឡើយ ហេតុនេះ ដើម្បីសុវត្ថិភាព សូមបងប្អូនកុំចុចលើតំណភ្ជាប់ណាមួយ ដែលមិនមានប្រភពច្បាស់លាស់ និងសូមកុំបំពេញនូវព័ត៌មានផ្ទាល់ខ្លួនឱ្យសោះ។ នេះបើតាមសេចក្តីជូនដំណឹងរបស់ ក្រុមហ៊ុន ភីធីធី កាលពីម្សិលមិញនេះ។

សូមជម្រាបថា ថ្មីៗនេះ ម្ចាស់គណនីហ្វេសប៊ុកជាច្រើន ទទួលបានសារដូចៗគ្នាពីប្រភពក្លែងបន្លំធ្វើជាក្រុមហ៊ុន ភីធីធី ដោយផ្ញើសារបោកបញ្ឆោតថា ទទួលបានរង្វាន់ពីក្រុមហ៊ុន ក៏ដូចជាឱ្យចូលរួមលេងហ្គេមជាដើម។ ប្រការនេះ ជនអនាមិក អាចធ្វើឡើងក្នុងគោលបំណងមិនល្អប្រការណាមួយ ទាក់ទងនឹងបទល្មើសបច្ចេកវិទ្យា ដោយបន្លំទាញយកទិន្នន័យពីទូរសព្ទដៃជនរងគ្រោះ ដូចដែលធ្លាប់មានកន្លងមក។

ជុំវិញករណីនេះ ក្រុមហ៊ុនបញ្ជាក់បន្ថែមថា ក្រុមហ៊ុនពុំមានកម្មវិធីផ្តល់រង្វាន់ ឬលេងហ្គេមអ្វីឡើយ ហើយផេកផ្លូវការរបស់ក្រុមហ៊ុនផ្ទាល់ គឺ PTTOR Cambodia ចំណែកឯផេក ឬបណ្តាញសង្គមផ្សេងទៀត ក្រុមហ៊ុនមិនទទួលស្គាល់នោះឡើយ។

គួររំលឹកថា មនុស្សជាច្រើន បានក្លាយជាជនរងគ្រោះនៃបទល្មើសបច្ចេកវិទ្យាមិនដឹងខ្លួន ដោយសារតែការមិនសូវយល់ច្បាស់ទាក់ទងនឹង បច្ចេកវិទ្យា និងមិនដឹងពីរបៀបនៃការការពារសុវត្ថិភាពប្រព័ន្ធអនឡាញ។ ជាក់ស្តែង បច្ចុប្បន្នបទល្មើស​នៃ​បច្ចេកវិទ្យា កំពុង​កើត​មាន​ឡើង​ជា​បន្ត​បន្ទាប់​ក្រោមរូបភាព​ផ្សេងៗគ្នា បង្កឲ្យអ្នកប្រើប្រាស់ប្រព័ន្ធបច្ចេកវិទ្យាទាំងអស់ ពិបាកក្នុងការ​បែង​ចែក។ ដូចនេះ ដើម្បីការពារសន្តិសុខលើការប្រើប្រាស់ប្រព័ន្ធបច្ចេកវិទ្យា គប្បីកុំចុចចូលលីងដែលមិនដឹងប្រភពច្បាស់ឱ្យសោះ៕

វិធីប្លែកៗ ជនអានាមិកប្រើដើម្បីបោកបញ្ឆោត តាមប្រព័ន្ធបច្ចេកវិទ្យា