វិធីប្លែកៗ ជនអានាមិកប្រើដើម្បីបោកបញ្ឆោត តាមប្រព័ន្ធបច្ចេកវិទ្យា

មនុស្សជាច្រើន បានក្លាយជាជនរងគ្រោះនៃល្មើសបច្ចេកវិទ្យាមិនដឹងខ្លួន ដោយសារតែការមិនសូវយល់ច្បាស់ទាក់ទងនឹង បច្ចេកវិទ្យា និងមិនដឹងពីរបៀបនៃការការពារសុវត្ថិភាពប្រព័ន្ធអនឡាញ។ ជាក់ស្តែង បច្ចុប្បន្នបទល្មើសនៃបច្ចេកវិទ្យា កំពុង​កើត​មាន​ឡើង​ជា​បន្ត​បន្ទាប់​ក្រោមរូបភាព​ផ្សេងៗគ្នា បង្កឲ្យអ្នកប្រើប្រាស់ប្រព័ន្ធបច្ចេកវិទ្យាទាំងអស់ ពិបាកក្នុងការ​បែង​ចែក។

នាយកដ្ឋានបទល្មើសបច្ចេកវិទ្យា បានចែករំលែកវិធីប្លែកៗមួយចំនួន ដែលជនទុច្ចរិត​បានយកមកប្រើដើម្បីបោកបញ្ឆោត ជនរងគ្រោះ និងកើតមានកន្លងមករួមមាន៖

១. ប្រើឈ្មោះនិងនិមិត្តសញ្ញា ស្រដៀងនឹងទំព័រផ្សព្វផ្សាយក្រុមហ៊ុនហ្វេសប៊ុក ផ្ញើលីង ដើម្បីបញ្ឆោតឱ្យទាញយកមេរោគ
នាយកដ្ឋានប្រឆាំងបទល្មើសបច្ចេកវិទ្យា បានរកឃើញព័ត៌មានស្តីពីការបោកបញ្ឆោតថ្មី ចំពោះអ្នកដែលគ្រប់គ្រងផេក អាជីវកម្ម កំពុងព្យាយាមប្រើប្រាស់ឈ្មោះ និងនិមិត្តសញ្ញាស្រដៀងទៅនឹងក្រុម ឬទំព័រផ្សព្វផ្សាយរបស់ក្រុមហ៊ុន Facebook ក្នុងការផ្ញើដំណរលីង (Fake Link) បញ្ឆោតឱ្យជនរងគ្រោះទាញយកមេរោគរបស់ពួកគេ។ នេះបើតាមការជូនដំណឹង ដោយផុសផ្សាយនៅលើផេកផ្លូវការរបស់នាយកដ្ឋាន នៅថ្ងៃទី២៥ ខែឧសភា ឆ្នាំ២០២៣ ។

ពាក់ព័ន្ធនឹងករណីតំណលីងនេះដែរ នាយកដ្ឋានណែនាំថា បើមិនស្គាល់តំណរភ្ជាប់ (Link) ច្បាស់ទេ មិនត្រូវចុចលើវា ដាច់ខាត និងត្រូវលុបចោលដើម្បីសុវត្ថិភាពលើឧបករណ៍គណនី (ដូចភ្ជាប់ក្នុងរូបភាពខាងក្រោម)។

២. បន្លំជាអ្នកចង់ទិញទំនិញពីផេក ហើយផ្ញើ file ឲ្យម្ចាស់ផេកបើកតាមកុំព្យូរទ័រ ដោយប្រាប់ថារូបភាពដែលត្រូវកុម្ម៉ង់
ជារឿងដែលកើតឡើងនាពេលថ្មីៗនេះដែរ អ្នកលក់អនឡាញម្នាក់ ទទួលបានការបញ្ជាទិញពីគណនីហ្វេសប៊ុកឈ្មោះ Sy Kosal ដែលបានឆាតទៅកុម្ម៉ង់ឥវ៉ាន់ ១៥ឈុតពីម្ចាស់ផេក និងបានផ្ញើ file link មួយ (តាមការគូសបញ្ជាក់ file នោះ មិនអាចបើកតាមទូរស័ព្ទដៃបានទេ គឺតម្រូវឲ្យបើកតាមកុំព្យូទ័រ)។ ជនសង្ស័យបានប្រាប់ថា ខ្លួនបានរើសម៉ូដ និងទំហំ​ដាក់ក្នុងហ្វាល់នោះ។

លុះក្រោយពេល​ដែលម្ចាស់ផេកបើកមើល file នោះរួច ស្រាប់តែគណនីជនខាងលើ លែងឆ្លើយឆ្លងជាមួយគាត់ ហើយមួយសន្ទុះក្រោយមក គណនីធនាគាររបស់គាត់ ក៏លោតបញ្ជាក់ពីការបង់លុយមិនជោគជ័យ ទៅឲ្យកូដហ្វេសប៊ុកមួយ ចំនួន២ដង ដោយលើកទីមួយ​ ៥០០ដុល្លារ និងលើកទីពីរ ៣០០ដុល្លារ។ ជាសំណាង ម្ចាស់ផេកលក់ទំនិញអនឡាញខាងលើ មិនមានសាច់ប្រាក់គ្រប់គ្រាន់តាមទំហំដែល Hacker បានដាក់ និងធ្វើឲ្យគាត់បានដឹង​ទាន់ពេលវេលា និងប្តូរលេខសម្ងាត់ភ្លាមៗ។

៣. ផ្ញើតំណរលីងឲ្យតាម​ SMS ដើម្បីឲ្យអ្នកចូលទៅបំពេញព័ត៌មានក្នុងតេឡេក្រាម ដើម្បីយកគណនីនោះមកគ្រប់គ្រង
បើតាមនាយកដ្ឋានប្រឆាំងបទល្មើសបច្ចេកវិទ្យា ករណីនេះ គឺជនអនាមិកបានផ្ញើដំណរលីង Link ក្លែងក្លាយ ដូចភ្ជាប់ ក្នុងរូបភាពខាងក្រោម) ទៅ​កាន់​សារ​ទូរស័ព្ទ​ SMS ឲ្យយើងបំពេញព័ត៌មានតាមកម្មវិធី Telegram។ ក្នុងនោះ នាយកដ្ឋានអះអាងថា បើសិនជាយើងធ្វើតាមការណែនាំនោះ គេនឹងយកគណនីតេឡេក្រាមរបស់យើងមកគ្រប់គ្រងបាន។

៤. ស្នើសុំឱ្យផ្ញើ Screenshot របស់កម្មវិធី Telegram
ជនខិលខូច បានធ្វើការលួងលោមបោកបញ្ឆោត ដើម្បីលួចយកលេខកូដសម្ងាត់ពីជនរងគ្រោះ ដោយការស្នើឲ្យជនរងគ្រោះ ធ្វើការថតស្រ្គីនទូរសព្ទ (Screenshot) ខណៈពេលជនខិលខូច កំពុងព្យាយាមចូលទៅក្នុងគណនីរបស់ជនរងគ្រោះ ស្របពេលលេខកូដសម្ងាត់ (OTP) លោតលើស្រ្គីនទូរស័ព្ទ និងបានផ្ញើទៅជនខិលខូចដោយមិនដឹងខ្លួន។ បន្ទាប់មកជននោះនឹងចូលទៅប្រើប្រាស់តេឡេក្រាមរបស់ជនរងគ្រោះ និងធ្វើការប្ដូរលេខទូរសព្ទដើម្បីកាន់កាប់តេឡេក្រាម នោះទាំងស្រុងតែម្តង។

៥. បន្លំជាសមាជិកណាម្នាក់របស់ជនរងគ្រោះ ប្រាប់ឲ្យផ្ទេរប្រាក់
ជនខិលខូច បានឆបោកប្រាក់ជនរងគ្រោះ ដោយប្រើគណនីបណ្តាញសង្គមនៃសមាជិកណាមួយរបស់គ្រួសារ សាច់ញាតិ មិត្តភក្តិ ឬថ្នាក់ដឹកនាំស្ថាប័ននៃជនរងគ្រោះ ដែលជនទុច្ចរិតនោះលួចបាន រួចផ្ញើសារជាអក្សរ ឬជាសំឡេង បន្លំជាសមាជិក​ណាមួយ​របស់ជនរងគ្រោះ ដើម្បីសុំខ្ចីប្រាក់ ឬផ្ទេរប្រាក់ឲ្យបន្ទាន់ក្នុងរយៈពេលខ្លី តាមកម្មវិធីទូរស័ព្ទចល័ត តាមភ្នាក់ងារគ្រឹះស្ថានធនាគារ និងហិរញ្ញវត្ថុ ឬគ្រឹះស្ថានផ្តល់សេវាទូទាត់សងប្រាក់ ដែលអាចផ្ទេរប្រាក់បានងាយស្រួល និងឆាប់រហ័ស។

៦. បន្លំជាបុគ្គលិកស្ថាប័ន្ថណាមួយ ឬធនាគារ
ថ្មីៗនេះ ក៏កើតផងដែរនូវករណីដែលជនខិតខូច បន្លំខ្លួនជាបុគ្គលិកអគ្គិសនីកម្ពុជា ហើយទាក់ទងទៅជនរងគ្រោះ ឲ្យផ្ទេរប្រាក់តាមមធ្យាបាយផ្សេងៗឲ្យខ្លួន ក្រោមហេតុផលបង់ថ្លៃប្រើប្រាស់អគ្គិសនីប្រចាំខែ ថ្លៃប្តូរនាឡិកាស្ទង់ ប្តូរឌីស្យុងទ័រ ប្តូរបរិក្ខារអគ្គិសនីមួយចំនួន ដើម្បីចៀសវាងការផ្អាកកាផ្គត់ផ្គង់ ឬការកាត់ផ្តាច់ចរន្តអគ្គសនីជាដើម។ មួយទៀត គឺបន្លំខ្លួនជាបុគ្គលិកធនាគារ ទាក់ទងទៅជនរងគ្រោះឲ្យប្រាប់ពីលេខសម្ងាត់គណនី ឬព័ត៌មានជាក់លាក់ណាមួយពីគណនីធនាគាររបស់ជនរងគ្រោះ។

ក្រៅពីនេះ នៅមានមធ្យោបាយជាច្រើនទៀត ដែលជនខិតខូចបានប្រើ ដើម្បីបោកបញ្ឋោតជនរងគ្រោះ ហើយកន្លងមក សមាគមធនាគារកម្ពុជា រួមនឹងនាយកដ្ឋានប្រឆាំងបទល្មើសបច្ចេកវិទ្យា ក៏បានចែករំលែក និងចេញសេចក្តីណែនាំ ជាច្រើនលើក នូវរបៀបនៃការការពារសុវត្តិភាពលើប្រព័ន្ធបច្ចេកវិទ្យាផងដែរ៕