គិតត្រឹមវេលាម៉ោង១០ព្រឹកថ្ងៃទី៧ ខែតុលា ឆ្នាំ២០២២នេះ រថយន្តស៊េរីទំនើបមួយគ្រឿង ពាក់ស្លាកលេខភ្នំពេញ 2BF-8898 ដែលបានបើករត់គេចក្រោយបង្កគ្រោះថ្នាក់បណ្តាលអោយបុរស២នាក់ ( ម្នាក់ជាមន្ត្រីនគរបាល ) បានស្លាប់ នៅចំណុចផ្លូវលេខ១៨២ កែងផ្លូវ២១៥ ក្នុងសង្កាត់ផ្សារដេប៉ូ១ ខណ្ឌទួលគោក ត្រូវបានកម្លាំងសមត្ថកិច្ចស្រាវជ្រាវឃាត់បានហើយ ខណះម្ចាស់រថយន្តយកទៅប្លុងចោល ។

ការស្រាវជ្រាវរហូតឈានដល់ឃាត់រថយន្តបាននេះ គឺកម្លាំងនគរបាលខណ្ឌទួលគោក សហការជាមួយនគរបាលខណ្ឌបឹងកេងកង ដោយឃាត់នៅចំណុច ផ្លូវលេខ២៧៦ កែងផ្លូវលេខ១៥៧ ស្ថិតក្នុងសង្កាត់អូរឡាំពិច ខណ្ឌបឹងកេងកង ដោយឃាត់បានតែរថយន្តប៉ុណ្ណោះ ។

ជនរងគ្រោះ២នាក់ ដែលបានស្លាប់ក្នុងហេតុការណ៍ខាងលើ មានឈ្មោះ ទី១ឈ្មោះ ម៉ុក ច័ន្ទដា និងម្នាក់ទៀតឈ្មោះ ជួន ច័ន្ទសុផារ៉ា ជាមន្ត្រីនគរបាល ។ អ្នកទាំង២ មានវ័យប្រមាណ២៣ឆ្នាំ ។

គួររំលឹកថា កាលវេលាម៉ោងជាង៣ទាបភ្លឺ ថ្ងៃទី០៧ ខែតុលា ឆ្នាំ២០២២ រថយន្តខាងលើបើកបរដោយបុរសម្នាក់មិនស្គាល់អត្តសញ្ញាណ បានបើកបុកម៉ូតូមួយគ្រឿង ម៉ាកស្គុបពី ពណ៌ស ពាក់ផ្លាកលេខ ភ្នំពេញ 1BN-0345 ជិះធ្វើដំណើរដោយជនរងគ្រោះ២នាក់ខាងលើ តាមបណ្តោយផ្លូវលេខ១៨២ ក្នុងទិសដៅពីកើតមកលិចក្នុងល្បឿនលឿនមធ្យម ចំពីមុខពេញទំហឹង បណ្តាលអោយខ្ទាតផ្លោងទាំងម៉ូតូ និងមនុស្ស ស្លាប់ម្នាក់ភ្លាមៗ នៅហ្នឹងកន្លែង និងម្នាក់ទៀតបានស្លាប់ពេលបញ្ចូនទៅសង្គ្រោះនៅមន្ទីរពេទ្យ ។

ក្រោយបង្កហេតុភ្លាមៗ រថយន្តបង្កបានព្យាយាមបើករត់គេចពីកន្លែងកើតហេតុ ហើយ ក៏ត្រូវសមត្ថកិច្ចជំនាញ ស្រាវជ្រាវតាមរកឃើញ នៅព្រឹកថ្ងៃខែឆ្នាំដដែលនេះតែម្តងទៅ ។ យ៉ាងណាមិញ បច្ចុប្បន្នរថយន្តបង្ក ត្រូវសមត្ថកិច្ចស្ទូចយកទៅកាន់ ការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយទៅតាមផ្លូវច្បាប់នៅពេលក្រោយ ៕

អត្ថបទ៖ លី ហេង