វត្តឧណ្ណាលោម គ្រោងរៀបចំ​ជា​អារាមទេសចរណ៍គំរូ ខណៈជា​វត្តចំណាស់មានអាយុជាង ៦០០ ឆ្នាំ

សម្តេចបណ្ឌិត យ៉ន សេងយៀត បាននិមន្តពិភាក្សាគ្នាជាមួយលោកជំទាវ ឆាយ ស៊ីវលីន ពីការបង្កើតគម្រោងគំរូអារាមទេសចរណ៍នៅភ្នំពេញ។ ការជំរុញឱ្យមានអារាមទេសចរណ៍​គំរូ​ ដើម្បីបន្ថែមជម្រើសឱ្យកាន់តែប្រសើរឡើងដល់ភ្ញៀវទេសចរអន្តរជាតិ។

លោកជំទាវ ឆាយ ស៊ីវលីន សមាគមន៍ទេសចរណ៍កម្ពុជា (CATA) បានលើកឡើងថា ភ្ញៀវទេសចរ ជប៉ុន កូរ៉េ ចិន វៀតណាម អឺរ៉ុប និងអូស្ត្រាលីជាដើម ចង់ឃើញ ចង់ដឹង និងចង់យល់ពីសារៈសំខាន់នៃអត្តសញ្ញាណវប្បធម៌អារាមរបស់ខ្មែរ។ អារាមទេសចរណ៍គឺជាចំណែកដ៏មានសក្កានុពលមួយមិនអាចខ្វះបាន។

សមាគមន៍​ទេសចរណ៍កម្ពុជារំពឹងថា ការបង្កើតឱ្យមានស្ថេរភាពនិងសោភ័ណផ្នែកអនាម័យ សុវត្ថិភាព និងគុណតម្លៃរបស់វត្តអារាមនឹងក្លាយជាកាដូថ្មីមួយទៀតសម្រាប់ភ្ញៀវទេសចរ។

ជុំវិញការស្នើឱ្យមានអារាមទេសចរណ៍គំរូនេះ សម្តេចបណ្ឌិត យ៉ន សេង យៀត មានព្រះថេរដីកាថា វត្តឧណ្ណាលោមរីករាយសហការគ្នាជាមួយសមាគមន៍ទេសចរណ៍កម្ពុជា។

សម្តេចថា មុនឈានដល់អារាមទេសចរណ៍ទូទាំងប្រទេស ត្រូវចាប់ផ្តើមពីឧណ្ណាលោមមួយសិន។ នៅវត្ត​ឧណ្ណាលោម មានកុដិដែលអាយុ ១០០ ឆ្នាំ មានព្រះអង្គស្រការលេញដែល​មាន​អាយុជាង ៦០០ ឆ្នាំ និងប្រាសាទដ៏ចំណាស់នាសម័យអង្គរ។ សក្ដានុពលទាំងនេះ គឺជាចំណុចស្នូលជំរុញឱ្យប្រតិបត្តិករទេសចរណ៍អាចបង្កើតកញ្ចប់កម្សាន្តបាន (Tour Itinerary)។

ការជំរុញទេសចរណ៍ក្នុងស្រុក (Domestic Tour) និងទេសចរណ៍បរទេសមកក្នុងស្រុក (Inbound Tour) គឺជាសរសៃ​ឈាមរបស់សេដ្ឋកិច្ចជាតិ។

ភ្នំពេញកកើតឡើងនៅឆ្នាំ ១៤៣៤ ក្នុងរាជព្រះបាទពញាយ៉ាត។ ព្រះអង្គបានចាត់ឱ្យមន្ត្រីក្រោមឱវាទកសាងវត្តចំនួន ៦។ វត្តទាំង ៦ ដែលបានបង្កើតនៅសម័យកកើតក្រុងភ្នំពេញ ដែលកសាងដោយព្រះបាទពញាយ៉ាត គឺវត្តឧណ្ណាលោម វត្តសាវ័នតេជោ វត្តលង្កា វត្តចិនដំដែក (វត្តពាមផ្លុង) វត្តព្រះពុទ្ធឃោសា (ព្រះពុទ្ធ​ឃោសាចារ្យ​) និងវត្តបទុមតី (ហៅវត្តខ្ពបតាយ៉ង)។ នេះបើយោងតាមសៀវភៅប្រវត្តិភ្នំពញ ដែលស្រាវជ្រាវដោយ ឯកឧត្តមបណ្ឌិតសភាចារ្យ ឆយ អូន បោះពុម្ភឆ្នាំ២០២៤។ វត្តទាំងនេះមានអាយុកាលជិត ៦០០ ឆ្នាំ (៥៩១ឆ្នាំ)។

វត្តអារាមដែលជាជង្រុកវប្បធម៌ខ្មែរយ៉ាងសម្បូរបែប នឹងក្លាយជាភាពទាក់ទាញបំផុតរបស់ជនបរទេស បើកិច្ចការរៀបចំកញ្ចប់សេវាកម្មបានល្អ សុវត្ថិភាពអំឡុងពេលដើរទេសចរណ៍ និងមានការបរិយាយបានល្អពីប្រវត្តិសាស្ត្រ៕