សម្តេចសង្ឃ យ៉ន សេងយៀត៖ បើចង់ចេះត្រូវខំរៀន ព្រោះគ្មានអ្វីដែលធ្វើឱ្យចេះដោយមិនបាច់រៀននោះទេ

សម្តេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ មានថេរដីកាថា «បើចង់ចេះត្រូវខំរៀន បើមិនចង់ចេះទេមិនបាច់ខំរៀនទេ ព្រោះគ្មានអ្វីដែលធ្វើឱ្យចេះដោយមិនបាច់រៀននោះដែរ»។ សម្តេច បានលើកឡើងដូច្នេះ ក្នុងការជួបជុំមិត្តសីហនុរាជរបស់សមណនិស្សិត និស្សិតឆ្នាំទី៤ ចំនួនប្រមាណជិត៥០០អង្គ/នាក់ នៃពុទ្ធិកសាកលវិទ្យាល័យព្រះសីហនុរាជ មកពីសាខារាជធានីភ្នំពេញ ,សាខាខេត្តកំពង់ឆ្នាំង និងសាខាខេត្តបាត់ដំបង ដែលបានមកជួបជុំគ្នាប្រារព្ធធ្វើនៅសាកលវិទ្យាល័យអង្គរ ខេត្តសៀមរាប កាលពីសៀលថ្ងៃទី១៤ ខែសីហា ឆ្នាំ២០២៥។

ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ បានមានថេរដីកាថា នៅក្នុងជីវិតមនុស្សយើង គឺតែងតែមានមនុស្សម្នាក់ដែលប្រៀបជាងយើងរហូត មិនថាអ្នកស្អាតឆ្លាត ពូកែ ប៉ុណ្ណាក៍មានអ្នកស្អាត ឆ្លាត ពូកែ ជាងអ្នករហូតដែរដូចពាក្យបូរាណចែងថាភ្នំខ្ពស់ប៉ុណ្ណាក៍គង់ទាបជាងស្មៅ ដូច្នេះក្នុងទ្រឹស្តីនេះ សូមសមណនិស្សិត និស្សិតទាំងអស់ត្រូវប្រុងប្រយ័ត្នរៀនក្នុងដំណើរជីវិត គឺត្រូវ ស្លឱ្យសាប អង្គុយឱ្យទាប នោះទើបជីវិតយើងមានអនាគត គឺយើងត្រូវដាក់ខ្លួនតែកុំទន់ជ្រាយ។

សម្តេច យ៉ន សេងយៀត បានសង្កត់ធ្ងន់ថា «នៅក្នុងសង្គមជាតិ មនុស្សគ្រប់រូប ជាពិសេសសមណសិស្ស សិស្ស ត្រូវតែចេះគឺភាសាជាតិយើង ដែលត្រូវការជួយជ្រុំជ្រែង ការថែរក្សាពីយុវជន បញ្ញវន្តរបស់យើងទាំងអស់គ្នា គឺត្រឹមតែការរៀនអក្សរ និងសរសេរភាសាជាតិឱ្យបានច្បាស់លាស់ និងត្រឹមត្រូវនោះ គឺពិតជាយើងបានលើកតម្កើងតម្លៃអត្តសញ្ញាណជាតិយើងបានហើយ»។ 

ជាមួយគ្នានេះ សម្តេចក៏បានមានថេរដីកា ដល់សមណនិស្សិតនិង និស្សិតទាំងអស់ សូមឱ្យមានជោគជ័យក្នុងជីវិត ដែលបានខិតខំរៀនសូត្របានចេះដឹង និងត្រូវខិតខំរៀនទៀត មនុស្សកាន់តែចាស់ភ្នែកកាន់តែងងឹតតែភ្នែកនេះអាចមើលឃើញអំពីឆាកជីវិតច្បាស់ជាងកាលនៅយុវវ័យ។ ដូច្នេះពេលដែលចាស់ៗឱ្យយោបល់ឱ្យខំរៀន គឺខំរៀនទៅ មិនខុសទេ កុំឱ្យដល់ពេលវ័យ ៦០ឆ្នាំឬ ៧០ឆ្នាំ ទើបស្តាយក្រោយនោះ ទើបហួសពេល។

សូមបញ្ជាក់ថា ពុទ្ធិកសាកលវិទ្យាល័យព្រះសីហនុរាជ គឺជាគ្រឹះស្ថានពុទ្ធិកឧត្តមសិក្សាពុទ្ធសាសនាដំបូង និងឈានមុខគេនៅកម្ពុជា ដែលបានបង្កើតឡើងនៅថ្ងៃទី០១ ខែកក្កដា ឆ្នាំ១៩៥៤ ក្រោមព្រះរាជូបត្ថម្ភរបស់ព្រះករុណាជាម្ចាស់ ព្រះបាទសម្តេចព្រះនរោត្តម សីហនុ ហើយបានបិទទ្វារទៅវិញចាប់ពីឆ្នាំ១៩៧២-១៩៧៩ ដោយសារសង្គ្រាម។ លុះមកដល់ឆ្នាំ១៩៩៦ ពុទ្ធិកសាកលវិទ្យាល័យព្រះសីហនុរាជ ត្រូវបានបើកទ្វារឡើងវិញ ក្នុងឋានៈជាពុទ្ធិកមហាវិទ្យាល័យព្រះសីហនុរាជ ដើម្បីបណ្តុះបណ្តាលសមណនិស្សិត និស្សិត ហើយបានប្រែក្លាយជាពុទ្ធិកសាកលវិទ្យាល័យព្រះសីហនុរាជ ដោយអនុក្រិត្យរបស់រាជរដ្ឋាភិបាលនៅថ្ងៃទី២៣ ខែមករា ឆ្នាំ២០០៦ រហូតមដល់ពេលសព្វថ្ងៃនេះ។

ពុទ្ធិកសាកលវិទ្យាល័យព្រះសីហនុរាជ ត្រូវបានទទួលស្គាល់ទូទៅថា ជាពុទ្ធិកសាកលវិទ្យាល័យរដ្ឋមួយក្នុងការបណ្តុះបណ្តាលពុទ្ធសាសនាដំបូង និងលើការបណ្តុះបណ្តាលជំនាញមានដូចជា ទស្សនវិជ្ជាពុទ្ធសាសនា សង្គមវិទ្យា នីតិសាស្ត្រ រដ្ឋបាលអប់រំ គ្រប់គ្រងទូទៅ អក្សរសាស្ត្រខ្មែរ បរិស្ថានវិទ្យា ភាសាបាលី-សំស្ក្រឹត និងភាសាអង់គ្លេស ប្រកបដោយគុណភាពនិងឧត្តមភាព៕

ដោយ៖ គឿនវេត