ពលរដ្ឋបង្ហាញភាពឈឺចាប់ និងចង់ឲ្យសហគមន៍អន្តរជាតិអន្តរាគម៍បន្ទាន់ លើការបន្តរំខានឥតឈប់ឈររបស់ថៃមកលើកម្ពុជា

បន្ទាប់ពីមើលឃើញពីការឈ្លានពាន និងរំខានម្ដងហើយម្ដងទៀតពីសំណាក់ភាគីថៃមកលើប្រជាពលរដ្ឋខ្មែរដែលរស់នៅជាប់ព្រំដែនកម្ពុជា ថៃ នៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ប្រជាពលរដ្ឋបានសម្ដែងការឈឺចាប់ និងស្នើឲ្យសហគមន៍អន្តរជាតិជួយអន្តរាគម៍បន្ទាន់លើសកម្មភាពរបស់សៀមទាំងនេះ។

លោក ប៊ុន ឃៀង ជាប្រជាពលរដ្ឋបានសម្តែងក្តីឈឺចាប់យ៉ាងក្រៃលែង និងស្នើសុំដោយទទូចចង់ឲ្យសហគមន៍អន្តរជាតិជួយអន្តរាគម៍បន្ទាន់ លើសកម្មភាពដែលបន្តយាយីឥតឈប់ឈរពីសំណាក់ប្រទេសថៃមកលើដែនអធិបតេយ្យភាពរបស់កម្ពុជា។

លោក ប៊ុន ឃៀង ក៏សូមធ្វើការថ្កោលទោសបំផុត ចំពោះអំពើរំលោភបំពានឥតស្រាកស្រានពីភាគីសៀម មកលើកម្ពុជា ពិសេសថ្មីៗនេះ តាមរយៈសកម្មភាពជាច្រើន ដូចជាការចូលមកឈូសឆាយដី លើទឹកដីកម្ពុជា បង្កភាពចលាចលនានា ចាក់ភ្លេងជាសម្លេងខ្មោច រំខានការរស់នៅរបស់ប្រជាពលរដ្ឋ ជារៀងរាល់យប់។

បើទោះបីបច្ចុប្បន្ន ស្ថានភាពនៅតំបន់ព្រំដែននៅតែតានតឹងក៏ពិតមែន ក៏ប៉ុន្តែ សម្តេចធិបតី ហ៊ុន ម៉ាណែត ប្រមុខថ្នាក់ដឹកនាំ នៃកម្ពុជា តែងតែរក្សាគោលជំហរអំណត់អត់ធ្មត់ខ្ពស់ ប្រឹងប្រែងដោះស្រាយ និងចរចាដោយសន្តិវិធី តាមរយៈយន្តការការទូត សំដៅធ្វើយ៉ាងណា គឺដើម្បីរក្សាបាននូវសុខសន្តិភាពជូនប្រជាជន និងប្រទេសជាតិ ជាជាងការតតាំងគ្នាដោយជម្លោះប្រដាប់អាវុធ៕

អត្ថបទ៖ សុភា