សម្ដេចតេជោដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ពិនិត្យលើសេចក្ដីព្រាងច្បាប់ចំនួន៥

ក្រោយការអនុម័តពីរដ្ឋសភាជាតិ សេចក្តីព្រាងច្បាប់ចំនួន៥ ដែលពាក់ព័ន្ធនឹងវិស័យសេដ្ឋកិច្ច ពាណិជ្ជកម្ម បច្ចេកវិទ្យា សុវត្ថិភាពអាហារ និងយុត្តិធម៌ ត្រូវបានគណៈកម្មាធិការអចិន្ត្រៃយ៍ព្រឹទ្ធសភា លើកយកមកពិនិត្យបន្ត នៅព្រឹកថ្ងៃទី២១ ខែតុលានេះ។

កិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅព្រឹកនេះ គឺបានប្រព្រឹត្តទៅដែលមានសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាអ្នកដឹកនាំកិច្ចប្រជុំ ដើម្បីពិនិត្យសំណើរបស់រដ្ឋសភាសុំពិនិត្យហើយឱ្យយោបល់លើសេចក្តីព្រាងច្បាប់ចំនួន៥។

សេចក្ដីព្រាងច្បាប់ទាំងនេះ គឺរួមមាន៖ ១) ការអនុម័តយល់ព្រមលើកិច្ចព្រមព្រៀងស្តីពីក្របខណ្ឌបទប្បញ្ញត្តិសុវត្ថិភាពម្ហូបអាហារអាស៊ាន។ ២) ការអនុម័តយល់ព្រមលើពិធីសារធ្វើវិសោធកម្មកិច្ចព្រមព្រៀងអាស៊ានស្តីពីបម្លាស់រូបវន្តបុគ្គល។ ៣) ការអនុម័តយល់ព្រមលើពិធីសារទីមួយធ្វើវិសោធកម្មកិច្ចព្រមព្រៀងពាណិជ្ជកម្មសេរីអាស៊ាន-ហុងកុងនៃសាធារណរដ្ឋប្រជាមានិតចិន។ ៤) ការអនុម័តយល់ព្រមលើពិធីសារទីពីរ ធ្វើវិសោធកម្មកិច្ចព្រមព្រៀងបង្កើតតំបន់ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់។ និង៥) ការអនុម័តយល់ព្រមលើអនុសញ្ញាស្តីពីការបង្កើតអង្គការអន្តរជាតិសម្រាប់សន្ធានកម្ម។

បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភាបានសម្រេចបញ្ជូនសេចក្តីព្រាងច្បាប់ទាំង៥ ខាងលើ ទៅឱ្យគណៈកម្មការជំនាញនានារបស់ព្រឹទ្ធសភា ដើម្បីបន្តពិនិត្យសិក្សា និងផ្តល់យោបល់។

គួរឱ្យដឹងថា នៅក្នុងសម័យប្រជុំរដ្ឋសភាជាវិសាមញ្ញ កាលពីថ្ងៃទី១៧ ខែតុលា ឆ្នាំ២០២៥ អង្គរដ្ឋសភាបានអនុម័តទាំងស្រុងលើសេចក្តីព្រាងច្បាប់ទាំង៥ខាងលើ ដែលសេចក្តីព្រាងច្បាប់ទាំងនេះមានសារៈសំខាន់ណាស់ក្នុងវិស័យសេដ្ឋកិច្ច ពាណិជ្ជកម្ម បច្ចេកវិទ្យា សុវត្ថិភាពចំណីអាហារ និងយុត្តិធម៌ ទាំងក្នុងប្រកខណ្ឌនៃប្រទេសកម្ពុជា ទាំងតំបន់អាស៊ាន និងពិភពលោក៕