រដ្ឋមន្រ្តីសុខាភិបាល បន្លំជាពលរដ្ឋសាមញ្ញចុះតាមមណ្ឌលសុខភាព ដើម្បីធ្វើតេស្តការផ្តល់សេវាសាធារណៈ

រដ្ឋមន្ត្រីក្រសួងសុខាភិបាល លោកសាស្ត្រាចារ្យ ឈាង រ៉ា កាលពីថ្ងៃទី ២៩ខែតុលា ឆ្នាំ២០២៥ ដែលជាថ្ងៃឈប់សម្រាកបុណ្យជាតិ បានក្លែងបន្លំជាប្រជាពលរដ្ឋសាមញ្ញអញ្ជើញចុះពិនិត្យការផ្តល់សេវានៅមណ្ឌលសុខភាពវិហារសួគ៌ ស្ថិតនៅស្រុកខ្សាច់កណ្តាល ខេត្តកណ្តាល ដោយពុំជូនដំណឹងជាមុន ដើម្បីកែលម្អការផ្តល់សេវាជូនប្រជាពលរដ្ឋនៅតាមជនបទកាន់តែប្រសើរ។

លោករដ្ឋមន្ត្រី មានប្រសាសន៍ថា ការចុះពិនិត្យនេះគឺជាការឆ្លុះបញ្ចាំងពីការប្តេជ្ញារបស់ថ្នាក់ដឹកនាំគ្រប់លំដាប់នៃក្រសួងសុខាភិបាលក្នុងការពង្រឹងអភិបាលកិច្ច លើទីលានអនុវត្ត ការស្តាប់ពីក្រុមការងារមូលដ្ឋាន ការគាំទ្រចំពោះបុគ្គលិកសុខាភិបាលក្នុងសហគមន៍ និងធានាថាប្រជាពលរដ្ឋគ្រប់រូប ទោះនៅទីណាក៏ដោយ ទទួលបានសេវាសុខាភិបាលសមរម្យ និងប្រសើរឡើងព្រមទាំងរស់នៅដោយសុខដុម។ លោកបន្តទៀតថាការកែលម្អគុណភាពសេវាសុខាភិបាលត្រូវការភាពហ្មត់ចត់ សេចក្តីថ្លៃថ្នូរ និងការគោរពតាមស្តង់ដារបច្ចេកទេស និងអនាម័យ។ មណ្ឌលសុខភាពនីមួយៗត្រូវក្លាយជាគំរូនៃការជឿទុកចិត្តសម្រាប់ប្រជាពលរដ្ឋ។

ក្នុងឱកាសនោះ លោករដ្ឋមន្ត្រីបានធ្វើការវាយតម្លៃថាបន្ទាប់ពីមានការចុះពិនិត្យជាក់ស្តែងនៅមណ្ឌលសុខភាពវិហារសួគ៌ឃើញថា អ្នកជំងឺទទួលបានការពេញចិត្ត ដោយមានស្មារតីសហការល្អ និងអាកប្បកិរិយារួសរាយរាក់ទាក់ល្អហើយការត្រួតពិនិត្យ និងព្យាបាលជំងឺបានអនុវត្តទាន់ពេលវេលា បង្ហាញពីការខិតខំរបស់បុគ្គលិកសុខាភិបាល។ចំណែកការទុកដាក់ថ្នាំសង្កូវ និងសម្ភារៈពេទ្យមានកម្រិតមធ្យម ត្រូវបន្តរៀបចំ និងតាមដានឱ្យបានប្រសើរជាងមុន។ រីឯភាពស្អាត និងអនាម័យវិញត្រូវបន្តការកែលម្អឱ្យបានប្រសើរឡើងផងដែរ។

ប​ន្ទាប់ពីទទួលបានកែណែនាំ ក្រុមការងារនៃមណ្ឌលសុខភាពវិហារសួគ៌ទាំងអស់បានទទួលយកការកែលម្អ និងប្តេជ្ញាចិត្តពង្រឹងការខិតខំប្រឹងប្រែង ដើម្បីធានាបាននូវបរិស្ថានផាសុខភាព អនាម័យ សុវត្ថិភាព ក្នុងការបម្រើសេវាសុខាភិបាលដែលមានគុណភាពជូនប្រជាពលរដ្ឋឱ្យបានទូលំទូលាយក្នុងមូលដ្ឋាន៕

អត្ថបទ៖ សំអឿន