រថយន្ដដឹកចំណីសត្វមួយគ្រឿងក្រឡាប់ផ្ងារជើងនៅចំណុចផ្លូវកោង

រថយន្ដធុនធំដឹកចំណីសត្វមួយគ្រឿងបានក្រឡាប់ផ្ងារជើងនៅកណ្ដាលទ្រូងផ្លូវ ខណៈពលរដ្ឋសន្និដ្ឋានថា ទំនងអ្នកបើកបរងងុយដេក។

ហេតុការណ៍ក្រឡាប់រថយន្ដដឹកចំណីសត្វនេះ​ បានកើតឡើងនៅលើកំណាត់ផ្លូវលេខ ៥៧ ត្រង់ចំណុចមុខវត្តត្រែង ស្ថិតក្នុងឃុំត្រែង ស្រុករតនៈមណ្ឌល ខេត្តបាត់ដំបង កាលពីវេលាម៉ោង ២រំលងអធ្រាត ឈានចូលយប់ថ្ងៃទី១២ ខែវិច្ឆិកា ឆ្នាំ ២០២៥។

រថយន្ដដឹកចំណីសត្វដែលបើកបរបង្កគ្រោះថ្នាក់ដោយខ្លួនឯង ពាក់ស្លាកលេខ កំពង់ចាម 3A-2645 ធ្វើដំណើរក្នុងទិសដៅពីភ្នំពេញទៅខេត្តប៉ៃលិន មានផ្ទុកចំណីសត្វពេញទ្រុងរថយន្ដ ខណៈបើកមកដល់ចំណុចកើតហេតុ ដែលជាចំណុចផ្លូវកោងក៏ធ្វើឲ្យរថយន្ដក្រឡាប់តែម្ដង។

ទោះបីយ៉ាងណា កម្លាំងសមត្ថកិច្ចស្រុករតនៈមណ្ឌល នៅមិនទាន់បានសួរនាំអ្នកបើកបរពីមូលហេតុអ្វីឲ្យច្បាស់នៅឡើយទេពាក់ព័ន្ធករណីគ្រោះថ្នាក់ក្រឡាប់រថយន្ដនេះ​ខណៈពលរដ្ឋមួយចំនួនសន្និដ្ឋានថា អាចបណ្ដាលមកពីអ្នកបើកបរងងុយដេក៕

អត្ថបទ៖ សោ និយមរ័ត្ន