ធ្ងន់ធ្ងរហើយ! អង់គ្លេសរកឃើញ ជំងឺកូវីដ ១៩ បំប្លែងខ្លួនថ្មី និងកាចសាហាវមួយប្រភេទទៀតមកពីឥណ្ឌា

ជំងឺកូវីដ ១៩ បំប្លែងខ្លួនថ្មី និងកាចសាហាវមួយប្រភេទទៀតត្រូវបានគេរកឃើញនៅក្នុងចក្រភពអង់គ្លេស បន្ទាប់ពីមានករណីឆ្លង ៧៧ ករណីត្រូវបានរកឃើញដោយស្ថាប័នសុខភាពសាធារណៈ ។

នោះគឺ វ៉ារ្យ៉ង់ឥណ្ឌា ដែលគេស្គាល់ថាជា B1617 ត្រូវបានរកឃើញជាលើកដំបូងកាលពីថ្ងៃព្រហស្បតិ៍ដោយមាន ៧៣ ករណីនៅក្នុងប្រទេសអង់គ្លេស និង ៤ ករណីនៅប្រទេសស្កុតលែន ។

សុខភាពសាធារណៈអង់គ្លេស (PHE) បានកំណត់ការវិវត្តនេះថាជា “វ៉ារ្យ៉ង់ក្រោមការស៊ើបអង្កេត” ដោយក្រុមអ្នកជំនាញមានការព្រួយបារម្ភចំពោះសមត្ថភាពរបស់វីរុសក្នុងការគេចពីការឆ្លើយតបរបស់ប្រព័ន្ធភាពស៊ាំ ។

អ្នកស្រាវជ្រាវនៅ PHE និយាយថា វ៉ារ្យង់ថ្មីនេះមានផ្ទុកនូវការវិវត្តចំនួនពីរ ដែលនឹងជួយឲ្យវីរុសគេចពីការឆ្លើយតបរបស់ប្រព័ន្ធភាពស៊ាំរបស់រាងកាយ និងធ្វើឲ្យអង់ទីគ័រការពារគ្មានប្រសិទ្ធភាព ។ ទន្ទឹមនោះក៏មានការព្រួយបារម្ភផងដែរថា វ៉ារ្យ៉ង់នេះអាចនឹងឆ្លងច្រើនជាងវ៉ារ្យ៉ង់ដំបូងដែលបានលេចឡើងនៅចុងឆ្នាំមុនទៅទៀត ។

យោងតាម ​​COG-UK/ME ជាមូលដ្ឋានទិន្នន័យដែលប្រមូល និងផ្តល់ព័ត៌មានស្តីពីការវិវត្ត និងបម្រែបម្រួលភ្ជាប់ទៅនឹងវីរុសបានឲ្យដឹងថា ករណីដំបូងនៃវ៉ារ្យង់ឥណ្ឌាចំនួន ៧៧ ករណីដែលបញ្ជាក់នៅចក្រភពអង់គ្លេសត្រូវបានគេរកឃើញនៅក្នុងគំរូនានានៅចុងខែកុម្ភៈឆ្នាំនេះ ។ វាបានរកឃើញថា ចំនួនគំរូដែលមានបម្រែបម្រួលនេះបានកើនឡើងជារៀងរាល់សប្តាហ៍ ។

ការរកឃើញនូវវ៉ារ្យង់ថ្មីរបស់ឥណ្ឌា បន្ទាប់ពីមានការកើនឡើងនូវចំនួននៃការឆ្លងវ៉ារ្យង់អាហ្វ្រិកខាងត្បូងនៅក្នុងរដ្ឋធានីឡុងដ៍ ។ មានករណីឆ្លងចំនួន ៤៥ ករណីដែលបានបញ្ជាក់នៅក្នុងសង្កាត់ធំៗទាំងបីនៃរាជធានី ហើយក្រុមប្រឹក្សាមូលដ្ឋានបានជំរុញឲ្យប្រជាជននៅក្នុងតំបន់ទាំងនេះមានការប្រុងប្រយ័ត្នខ្ពស់ដដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មេ WHO ថា ពេលនេះជំងឺកូវីដ ១៩ កំពុងឈានដល់កម្រិតខ្ពស់បំផុត ក្រោយមានករណីឆ្លងឡើងជិតទ្វេដង

ចុចអាន ៖ កាន់តែមានសង្ឃឹមហើយ! ថ្នាំលេបព្យាបាលកូវីដនៅ អាមេរិក កំពុងធ្វើតេស្តដំណាក់កាលចុងក្រោយ