ជនបរទេស ១៨នាក់ ស្ថិតក្នុងចំណោម មនុស្ស ២១នាក់ ដែលស្លាប់ ក្នុងគ្រោះអគ្គិភ័យ ឆេះសណ្ឋាគារឥណ្ឌា

តួលេខមនុស្សស្លាប់ ក្នុងគ្រោះអគ្គិភ័យដ៏កាចសាហាវ ឆាបឆេះសណ្ឋាគារ Flourish Stay B&B ក្នុងរដ្ឋធានីរបស់ប្រទេសឥណ្ឌា បានកើនដល់ ២១នាក់ហើយ ប៉ុន្តែអ្វីដែលកាន់តែរន្ធត់នោះគឺថា ក្នុងចំណោមអ្នកទាំង២១ គឺមានជនបរទេសរហូតដល់ទៅ ១៨នាក់។

តាមការផ្សាយរបស់ Al Jazeera នៅថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ ជនបរទេសទាំង ១៨នាក់ ដែលអស់ជីវិតក្នុងគ្រោះអគ្គិភ័យនេះ គឺមានសញ្ជាតិបង់ក្លាដែស នីហ្សេរីយ៉ា ម៉ូសំប៊ិក និងលីបេរីយ៉ា ទោះគ្មានការបញ្ជាក់ថា ជនជាតិណាប៉ុន្មាននាក់ ជនជាតិណាប៉ុន្មាននាក់ ក៏ដោយ។

ទន្ទឹមនោះ សារព័ត៌មានក្នុងស្រុកឥណ្ឌា អះអាងថា ក្នុងចំណោមជនបរទេសទាំងអស់នេះ គឺមានខ្លះ មកទីក្រុងញូវដែលី ដើម្បីព្យាបាលជំងឺ ប៉ុន្តែសម្រេចស្នាក់នៅក្នុងសណ្ឋាគារ នេះជំនួសវិញ។

សូមជម្រាបថា អគ្គិភ័យកើតឡើង នាវេលាម៉ោង ៩ព្រឹក ថ្ងៃពុធ ទី៣ ខែមិថុនា ឆ្នាំ២០២៦ ដែលផ្តើមចេញពីភោជនីយដ្ឋានមួយ នៅជាន់ផ្ទាល់ដី រួចក៏រាលដាលទៅជាន់ ខាងលើ។

ភ្លាមៗ កងពន្លត់អគ្គិភ័យ ត្រូវបានបញ្ជូនទៅ ដើម្បីប្រយុទ្ធជាមួយអណ្តាតភ្លើង ហើយក្រុមសង្គ្រោះ ជួយបានមនុស្សប្រមាណ ៤០នាក់ ខណៈអ្នកខ្លះ បង្ខំចិត្ត លោតចេញតាមបង្អួច រួចក៏របួស ត្រូវបញ្ជូនទៅកាន់ មន្ទីរពេទ្យ។

ទោះបីជាយ៉ាងណាក៏ដោយ មកទល់ពេលនេះ គេមិនទាន់ដឹងឡើយថាតើ អគ្គិភ័យនេះ កើតឡើងដោយសារអ្វី។

ក្នុងប្រវត្តិសាស្រ្តឥណ្ឌា គ្រោះអគ្គិភ័យ ឆេះសណ្ឋាគារ ដែលសម្លាប់មនុស្សច្រើនបំផុត គឺករណីឆេះសណ្ឋាគារ Siddharth Continental ក្នុងទីក្រុង ញូវដែលី នៅឆ្នាំ ១៩៨៦ ដែលកាលនោះ បានបណ្តាលឲ្យមនុស្សរហូតដល់ទៅ ៣៨នាក់ បាត់បង់ជីវិត៕

អត្ថបទ៖ សុខ សុវណ្ណ