ទឹកជំនន់នៅតែវាយលុកខេត្តភាគខាងត្បូងថៃចំនួន៨ ប៉ះពាល់ដល់មនុស្ស​ជាង៨០ម៉ឺនគ្រួសារ

អាជ្ញាធរថៃ បាន​ឲ្យ​ដឹង​ថា ទឹកជំនន់ធ្ងន់ធ្ងរនៅភាគខាងត្បូងប្រទេសថៃនៅតែបន្ត​ផល​រំខាន ដោយមានខេត្តចំនួន៨​នៅតែលិចទឹក និង​ពលរដ្ឋ​ជាង៨១៩ ០០០​គ្រួសាររងផលប៉ះពាល់។

យោង​តាម​ការ​ចុះ​ផ្សាយ​របស់ Khaosod នៅ​ថ្ងៃ​អង្គារ​ទី​២​ខែ​ធ្នូ​ឆ្នាំ​២០២៥ នាយកដ្ឋានបង្ការ និងកាត់បន្ថយគ្រោះមហន្តរាយ (DDPM) បាន​បង្ហាញ​ថា ស្ថានភាព​​ជា​រួម​កំពុងមានភាពប្រសើរឡើងជាលំដាប់ ប៉ុន្តែតំបន់សំខាន់ៗក្នុងខេត្ត Songkhla, Nakhon Si Thammarat, Phatthalung និងខេត្តក្បែរៗនោះនៅតែស្ថិតនៅក្រោមទឹក ខណៈដែលកិច្ចខិតខំប្រឹងប្រែងសង្គ្រោះ និងស្តារឡើងវិញត្រូវបានបង្កើន។

អគ្គនាយកនៃ DDPM លោក Teerapat Katchamat បាននិយាយថា ទឹកជំនន់បានប៉ះពាល់ដល់មនុស្សជាង២,០៨លាននាក់ នៅ​៥៦​​ស្រុក ៣២០ឃុំ និង២​១៨៥ភូមិ។ ខេត្តទាំង​៨ ដែលរងផលប៉ះពាល់គឺ Surat Thani, Nakhon Si Thammarat, Trang, Phatthalung, Songkhla, Pattani, Yala និង Narathiwat។

អាជ្ញាធរថៃ បាន​ប្រាប់​ថា ពួកគេកំពុងបង្កើនល្បឿនក្នុងការផ្តល់ជំនួយដល់សហគមន៍ដែលរងផលប៉ះពាល់ ស្រប​ពេល​ដែលកម្រិតទឹកបានស្រកចុះបន្តិចម្តងៗនៅក្នុងតំបន់មួយចំនួនហើយ។

គិតត្រឹមថ្ងៃចន្ទទី១ខែធ្នូឆ្នាំ២០២៥ ចំនួនមនុស្សស្លាប់ក្នុងគ្រោះទឹកជំនន់នៅភាគខាងត្បូងប្រទេសថៃបានកើនដល់១៧៦នាក់។ នេះ​យោងតាមតួលេខចុងក្រោយពីរដ្ឋាភិបាលថៃ៕

ប្រែសម្រួល៖ ឈាង