សេដ្ឋកិច្ច

ពាណិជ្ជកម្មទ្វេភាគីកម្ពុជា-ចិន មានទំហំជាង ១៧,៦ ពាន់លានដុល្លារ ក្នុងរយៈពេល ១១ ខែ

បានផុស

៦ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

ការដោះដូរទំនិញកម្ពុជា-ចិន សម្រេចបានជាង ១៧,៦៩ ពាន់លានដុល្លារ នៅក្នុងរយៈពេល ១១ ខែ ឆ្នាំ ២០២៥ មានការកើនឡើង ២៨,៦% ធៀបនឹងរយៈពេលដូចគ្នានៅក្នុងឆ្នាំ ២០២៤ ដែលធ្វើឱ្យចិនក្លាយជាដៃគូពាណិជ្ជកម្មធំជាងគេរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា គិតចាប់ពីខែមករា ដល់ខែវិច្ឆិកា ឆ្នាំ ២០២៥ ពាណិជ្ជកម្មទ្វេភាគីកម្ពុជា-ចិន សម្រេចបាន ១៧,៦៩ ពាន់លានដុល្លារ កើនឡើង ២៨,៦% ក្នុងនោះ កម្ពុជានាំចេញទៅកាន់ទីផ្សារចិនមានតម្លៃ ១,៥ ពាន់លានដុល្លារ ធ្លាក់ចុះ ៦% ចំណែកឯចិននាំចូលមកវិញ មានតម្លៃប្រមាណ ១៦ ពាន់លានដុល្លារ កើន ៣៣,៣%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា កម្ពុជាអនុវត្តនូវកិច្ចព្រមព្រៀង RCEP ធ្វើឱ្យពាណិជ្ជកម្មកម្ពុជា-ចិនកើនឡើង ខណៈកម្ពុជា ក៏មានកិច្ចព្រមព្រៀងពាណិជ្ជកម្មសេរីជាមួយចិន។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ប្រាប់កម្ពុជាថ្មីនៅថ្ងៃទី ១១ ខែវិច្ឆិកា ឆ្នាំ ២០២៥ ថា ទំហំពាណិជ្ជកម្មកម្ពុជា-ចិន កើនឡើង ឆ្លុះបញ្ជាំងពីភាពរីកចម្រើនរវាងប្រទេសទាំងពីរ។

លោកបណ្ឌិត ជ័យ តិចបញ្ជាក់ថា គម្លាតការនាំចេញតូចជាងការនាំចូលក៏ជាចំណុចល្អសម្រាប់កម្ពុជា ខណៈចិនជាប្រទេសដែលមានអ្នកវិនិយោគច្រើនជាងគេបំផុតនៅកម្ពុជាដែលមានប្រមាណ ៦០% ដែលភាគច្រើនវិនិយោគលើវិស័យផលិត និងដំឡើងរោងចក្រ ហើយដើម្បីឱ្យដំណើរការផលិតបានគឺពាក់ព័ន្ធនឹងវត្ថុធាតុដើម ដូច្នេះការនាំចូលពីចិនមកកម្ពុជាដ៏ច្រើនលើសលប់ដោយសារតែការនាំចូលវត្ថុធាតុដើម ជាពិសេសទៅលើវិស័យវាយនភណ្ឌកាត់ដេរសម្លៀកបំពាក់ ដែលត្រូវការក្រណាត់ និងសម្ភារផ្សេងៗ សម្រាប់ការផលិត។

ទំនិញកម្ពុជានាំទៅប្រទេសចិនភាគច្រើនគឺជាផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ ចំណែកទំនិញដែលប្រទេសចិននាំមកកម្ពុជា មានដូចជា វត្ថុធាតុដើមសម្រាប់រោងចក្រ សហគ្រាស ផលិតផលប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ គ្រឿងអគ្គិសនី អេឡិចត្រូនិក។

នៅក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា-ចិន សម្រេចបាននូវទំហំទឹកប្រាក់ជាង ១៥,១៨ ពាន់លានដុល្លារ កើនឡើង ២៣,៨% ធៀបនឹងឆ្នាំ ២០២៣ ក្នុងនោះកម្ពុជានាំចេញទំនិញទៅចិនមានតម្លៃ ១,៧៥ ពាន់លានដុល្លារ កើនឡើង ១៨,៤% និងទំនិញចិននាំចូលមកកម្ពុជាមានតម្លៃ ១៣,៤៣ ពាន់លានដុល្លារ កើនឡើង ២៤,៦%៕

អត្ថបទ៖ ឡេង ដេត