ក្រុមការងារគណបក្សប្រជាជនកម្ពុជា ទទួលបានអំបុក១៥តោន ដើម្បីយកទៅប្រគល់ជូនកងទ័ពជួរមុខដែលកំពុងវាយទ័ពឈ្លានពាន

អ្នកឧកញ៉ា សុខ សុភាព នៅថ្ងៃទី១៤ ខែធ្នូ ឆ្នាំ២០២៥ បានដឹកនាំក្រុមការងាររៀបចំអំបុកចំនួន ១៥តោន ប្រគល់ជូនក្រុមការងារគណបក្សប្រជាជនកម្ពុជា សម្រាប់បន្តនាំយកទៅចែកជូនដល់វីរកងទ័ពជួរមុខដែលកំពុងច្បាំងតទល់ការពារទឹកដី ប្រឆាំងការឈ្លានពានពីសំណាក់កងទ័ពថៃ មកលើដែនអធិបតេយ្យភាពកម្ពុជា។

សកម្មភាពនេះកើតឡើងស្របតាមការប្រកាសរបស់សម្តេចតេជោ ហ៊ុន សែន អគ្គភស្តុភារជាន់ខ្ពស់​ កាលពីថ្ងៃទី១០ ខែធ្នូ ដែលអំពាវនាវឱ្យមហាគ្រួសារខ្មែរដាល់អំបុក ឬទិញអំបុកជូនជនភៀសសឹក និងកងទ័ព «ទទួលទានអំបុកស្រូវថ្មី វាយសត្រូវឈ្លានពាន» ព្រោះយោធាថៃបានឈ្លានពាន និងបានបើកការវាយប្រហារលើកម្ពុជា ចាប់ពីថ្ងៃទី៧ ខែធ្នូ មក។

ក្នុងពេលរៀបចំវេចខ្ចប់អំំបុក អ្នកឧកញ៉ា សុខ សុភាព ក៏បានអំពាវនាវដល់ប្រជាពលរដ្ឋ និងយុវជនដែលទំនេរពីការងារសូមចូលរួមកម្មវិធីដាល់អំបុកនេះឱ្យបានកាន់តែច្រើន។

អំបុកចំនួន ១៥តោន របស់អ្នកឧកញ៉ា សុខ សុភាព បន្ថែមពីអំណោយប្រគល់ ក្រុមការយុវជនគណបក្សថ្នាក់កណ្តាល គណបក្សប្រជាជនកម្ពុជា ដើម្បីត្រៀមរៀបចំបែងចែក ជូនកងទ័ពជួរមុខកម្ពុជា និងប្រជាពលរដ្ឋជនភៀសសឹក ទៅតាមមណ្ឌលសុវត្ថិភាពនានា ក្រោយពីក្រុមទាហានថៃ បានបាញ់ផ្លោងចូលឈ្លានពានបូរណភាពទឹកដីកម្ពុជា។ អំណោយបន្ថែមរួមមានអង្ករ ចំនួន ១៥តោន, ភេសជ្ជៈ ចំនួន ១,៥០០កេស។

សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា កាលពីព្រឹកថ្ងៃទី១៤ ខែធ្នូ បង្ហាញមោទនភាព ដែលបានឃើញនូវកម្លាំងដ៏រឹងមាំនៃមហាសាមគ្គីជាតិខ្មែរក្នុងកាលៈទេសៈដែលប្រទេសជាតិកំពុងជួបប្រទះនឹងការលំបាកដោយសារការឈ្លានពានពីប្រទេសថៃ។

តាមសម្ដេចធិបតី នាយករដ្ឋមន្រ្តី ព្រះមហាក្សត្រ ថ្នាក់ដឹកនាំ មន្ត្រីរាជការគ្រប់ជាន់ថ្នាក់ ប្រជាពលរដ្ឋខ្មែរគ្រប់និន្នាការ សាសនា ទាំងក្នុងនិងក្រៅប្រទេស បានបង្ហាញនូវស្មារតីសាមគ្គីជាតិជាធ្លុងមួយ នៅពីក្រោយវីរកងទ័ព វីរនគរបាលជាតិគ្រប់រូបដែលកំពុងឈរជើងបំពេញបេសកកម្មយ៉ាងអង់អាចក្លាហាន ក្នុងការពារដែលអធិបតេយ្យភាពនិងបូរណភាពទឹកដីរបស់កម្ពុជា។

សម្ដេច ហ៊ុន ម៉ាណែត សូមឱ្យកម្លាំងមហាសាមគ្គីជាតិខ្មែរនៅបន្តជាថាមពលរឹងមាំ សម្រាប់គាំទ្រនិងផ្ដល់កម្លាំងចិត្តដល់វីរកងទ័ព វីរនគរបាលជាតិរបស់យើង បន្តបេសកកម្មក្នុងការការពារទឹកដី៕