ព័ត៌មានជាតិ

អាជ្ញាធរសង្កាត់ទឹកល្អក់ទី ៣ ដាក់លូថ្មីប្រវែងជាង ២០០ ម៉ែត្រ ជូនប្រជាពលរដ្ឋ

បានផុស

៥ ខែ មុន

នៅ

ថ្ងៃអង្គារ ៣០ ធ្នូ ២០២៥

ដោយ

អាជ្ញាធរសង្កាត់ទឹកល្អក់ទី ៣ ចុះស្តារ និងកាយប្រព័ន្ធលូចាស់ ដើម្បីផ្លាស់ប្ដូរដាក់បំពង់លូថ្មី ប្រវែងជាង ២០០ ម៉ែត្រ ជូនប្រជាពលរដ្ឋ ជៀសវាងមានការកកស្ទះបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណាត់ផ្លូវលេខ ២០៤ ក្នុងសង្កាត់ទឹកល្អក់ទី ៣ ខណ្ឌទួលគោក អាជ្ញាធរសង្កាត់ កំពុងផ្លាស់ប្ដូរលូចាស់ ប្រវែង ២៤០ ម៉ែត្រ ដើម្បីសម្រួលទៅដល់ប្រព័ន្ធលំហូរទឹក កុំឲ្យលិចលង់ នារដូវធ្លាក់ភ្លៀង ដែលកន្លងមកប្រព័ន្ធលូមួយខ្សែនេះ ខូចខាតជាច្រើនកំណាត់ ព្រោះតែដល់អាយុកាល។

លោក វឌ្ឍនា សុធាវង្ស ពលរដ្ឋរស់នៅអមសងខាងផ្លូវ ប្រាប់ឲ្យដឹងថា ចំណុចផ្លូវលេខ ២០៤ នេះ តែងតែស្ទះលូ ដោយសារតែប្រព័ន្ធលូចាស់ហូរយឺតខ្លាំង និងពេលខ្លះស្ទះលូថែមទៀត បង្កការលំបាកដល់ពួកគាត់ជាប្រជាពលរដ្ឋ។ បន្ថែមនេះ លោក និងពលរដ្ឋរស់នៅតំបន់ខាងលើ ក៏បានកោតសរសើរចំពោះអាជ្ញាធរ បន្ទាប់ពីការយកចិត្តទុកដាក់ដល់សុខទុក្ខលើការរស់នៅ និងធ្វើដំណើរ ដើម្បីកុំឲ្យមានការលិចលង់ជួបផលលំបាកបន្តទៀត។

ចំពោះការអភិវឌ្ឍនេះ លោក នៅ ភក្ដី ចៅសង្កាត់រងទី ១ ទឹកល្អក់ទី ៣ បានលើកឡើងថា ប្រព័ន្ធលូ ប្រវែង ២៤០ ម៉ែត្រ មុខកាត់ ៦ តឹក គឺជាថវិការបស់សង្កាត់ សម្រាប់រៀបចំអភិវឌ្ឍន៍ហេដ្ឋារចនាសម្ព័ន្ធក្នុងមូលដ្ឋាន ដើម្បីសម្រួលបន្ទុក ផ្តល់ភាពងាយស្រួលលើការរស់នៅជូនប្រជាពលរដ្ឋ។

លោកចៅសង្កាត់រងទី ១ បានបន្តថា ចំពោះការផ្លាស់ប្ដូរប្រព័ន្ធលូនេះ ដើម្បីសម្រួលដល់ការរស់នៅរបស់ប្រជាពលរដ្ឋក្នុងមូលដ្ឋាន។ លោកបានបន្តថា ដោយមានកញ្ចប់ថវិកាគ្រប់គ្រាន់សម្រាប់អភិវឌ្ឍន៍ លោកបានចាត់ឲ្យកម្លាំងជំនាញចុះទៅដាក់គ្រឿងចក្រកាយលូចាស់ដែលខូចខាតមួយខ្សែចេញមកក្រៅ ដើម្បីដាក់ប្រព័ន្ធលូថ្មីឡើងវិញ ស្របតាមបច្ចេកទេសស្តង់ដារ គ្មានការកកស្ទះបន្តទៀត។

ជាមួយនេះ សាលាសង្កាត់ទឹកល្អក់ទី ៣ ក៏បានសំណូមពរពលរដ្ឋដែលប្រកបអាជីវកម្ម និងរស់នៅជាលក្ខណៈគ្រួសារ ក្នុងមូលដ្ឋាន សូមមេត្តាជួយថែរក្សាអនាម័យទាំងអស់គ្នា ជៀសវាងមានថង់ប្លាស្ទិក ឬកាកសំណល់ហូរចូលប្រព័ន្ធលូ បង្កការកកស្ទះ ទៅជាជន់លិច៕

អត្ថបទ ៖ រដ្ឋា