កីឡា

ប្រៀបដូចលើកដុំថ្មចេញពីលើក្បាល ពេលនេះ លឹម ពិសុទ្ធ កាន់តែមានទំនុកចិត្ត

បានផុស

៥ ខែ មុន

នៅ

ថ្ងៃអង្គារ ៦ មករា ២០២៦

ដោយ

ខ្សែបម្រើប្រយុទ្ធ លឹម ពិសុទ្ធ រកបានគ្រាប់បាល់ដំបូងឲ្យក្រុមថ្មី វិសាខា ដើម្បីបញ្ចប់ភាពស្ងប់ស្ងាត់អស់រយៈពេលជាងកន្លញរដូវកាល បន្ទាប់ពីរូបគេបានផ្លាស់ពីក្លិបភ្នំពេញក្រោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លឹម ពិសុទ្ធ បានលេងឲ្យភ្នំពេញក្រោនជាច្រើនរដូវកាលគិតចាប់តាំងពីខ្លួនជាយុវជនមកម្ល៉េះ។ រូបគេតែងតែធ្វើបានល្អ និងរកបានគ្រាប់បាល់ឲ្យភ្នំពេញក្រោន រហូតក្លាយជាកីឡាករលេចធ្លោម្នាក់នៅក្នុងក្រុម។ ទោះបីជាយ៉ាងណា នៅរដូវកាលថ្មី ២០២៥-២៦ រូបគេបានផ្លាស់មកចូលរួមជាមួយ វិសាខា។

ចាប់តាំងពីចូលរួមជាមួយ វិសាខា មក លឹម ពិសុទ្ធ មិនសូវមាននាទីលេងច្រើនទេ។ មិនត្រឹមតែប៉ុណ្ណោះរាល់ឱកាសដែលខ្លួនទទួលបាននាទីលេងក៏រកគ្រាប់បាល់មិនទាន់ថែមទៀត។ ស្របពេលក្លិបថ្មីធ្វើមិនសូវបានល្អតាំងពីជើងទី១ រហូតដល់ជើងទី២។

ភាពស្ងប់ស្ងាត់ក្នុងការបង្ហាញខ្លួននៅលើទីលាន និងគ្មានគ្រាប់បាល់នៅក្លិបថ្មីបានក្លាយជាសម្ពាធយ៉ាងធ្ងន់ធ្ងរធ្លាក់ទៅលើកីឡាករ។ មិនត្រឹមតែប៉ុណ្ណោះ អ្នកគាំទ្របានលើកឡើងផ្សេងៗ ដែលរឹតតែធ្វើឲ្យរូបគេពិបាកគ្រប់គ្រងស្មារតី។

ទោះបីជាយ៉ាងណា ការប្រកួតលីគកំពូលកម្ពុជាឈានចូលសប្តាហ៍ទី ១៤ ទើបសម្ពាធដ៏មហាធ្ងន់ត្រូវបានរំសាយប្រៀបដូចជាលើកដុំចេញពីលើក្បាល នៅពេល លឹម ពិសុទ្ធ រកបានគ្រាប់បាល់ដំបូង និងជួយក្រុមឲ្យទទួលបានជ័យជម្នះ។ រូបគេស៊ុតចូល ១ គ្រាប់ដើម្បីឲ្យ វិសាខា តាមស្មើ ព្រះខ័នរាជស្វាយរៀង ១-១ មុនពេលគ្រាប់បាល់ជ័យជម្នះដោយកីឡាករ Park Jungbin កាលពីថ្ងៃអាទិត្យ ទី៤ ខែមករា ឆ្នាំ ២០២៦។ ការប្រកួតនេះរូបគេត្រូវបានជ្រើសរើសជាកីឡាករល្អប្រចាំការប្រកួត។

នៅល្ងាចថ្ងៃចន្ទ ទី៥ ខែមករា ឆ្នាំ ២០២៦ លឹម ពិសុទ្ធ បានប្រាប់«កម្ពុជាថ្មី»ថា ៖«អារម្មណ៍ពេលដែលខ្ញុំអត់បានលេងគឺមិនសូវសប្បាយចិត្ត ហើយបូករួមទាំងខ្ញុំមិនទាន់រកគ្រប់បាល់ជូនក្រុមទៀត វាកាន់តែសម្ពាធមកលើខ្ញុំ។ ជាធម្មតា កីឡាករត្រូវតែឆ្លងកាត់រឿងបែបនេះ ហើយស្មារតី ខ្ញុំមិនបោះបង់នៅតែរក្សាការហ្វឹកហាត់ដើម្បីប្រជែងកៅអី១១នាក់»។

កីឡាករបានបន្តថា បើទោះជារូបគេមិនសូវបានលេង និងរកគ្រាប់បាល់មិនបាន ក៏មិនបានរារាំងដល់ការខិតខំប្រឹងប្រែងឡើយ។ ផ្ទុយទៅវិញ រូបគេកាន់តែព្យាយាមហ្វឹកហាត់ជាប្រចាំដើម្បីជម្នះនឹងឧបសគ្គ។

កីឡាករបានរៀបរាប់ថា ៖«សម្រាប់ការដែលរកគ្រាប់បាល់ដំបូងជូនក្រុម ខ្ញុំរំភើបខ្លាំង ពីព្រោះខ្ញុំខកខានរករកគ្រាប់បាល់ជូនក្រុមរយៈពេលយូរ ហើយបានយកឈ្នះក្រុមខ្លាំង។ សម្រាប់ស្មារតីខ្ញុំពេលនេះមានទំនុកចិត្តជាងមុននឹងរកគ្រាប់បាល់ជូនក្រុមបន្ថែម»៕