អាមេរិក​ឲ្យ​លុយ​លក់​ប្រេង​៣០០​លាន​ដុល្លារ​ទៅ​វ៉េណេស៊ុយអេឡា ដើម្បី​ពង្រឹង​រូបិយប័ណ្ណជាតិ

ប្រធានាធិបតីបណ្តោះអាសន្ន លោកស្រី Delcy Rodriguez បានមានប្រសាសន៍កាលពីថ្ងៃអង្គារ​ទី​២០​ខែ​មករា​ឆ្នាំ​២០២៦​ថា ប្រទេស​វ៉េណេស៊ុយអេឡា​ទទួលបានថវិកាចំនួន ៣០០លានដុល្លារ ក្រោម​ការ​ធ្វើ​ពាណិជ្ជកម្ម​​ប្រេង​ជាមួយ​អាមេរិក ហើយនឹងប្រើប្រាស់ចំណូលនេះ ដើម្បីជួយរក្សាស្ថិរភាពរូបិយប័ណ្ណជាតិដែលកំពុងធ្លាក់ចុះដុនដាប។

យោង​តាម​សារព័ត៌មាន TAG24 លោកស្រី Rodriguez បានបញ្ជាក់ថា ថវិកានេះគឺជាផ្នែកមួយនៃចំណូលដែលរំពឹងទុកចំនួន​៥០០​លានដុល្លារ ពីកិច្ចព្រមព្រៀងផ្គត់ផ្គង់ប្រេងចំនួន​៥០​លានបារ៉ែលជាមួយសហរដ្ឋអាមេរិក។ ថវិកានេះនឹងត្រូវដាក់បញ្ចូលទៅក្នុងទីផ្សារប្តូរប្រាក់បរទេស ធនាគារជាតិ និងធនាគារកណ្តាល ដើម្បីគាំទ្រដល់សេដ្ឋកិច្ច ព្រមទាំងការពារប្រាក់ចំណូល និងអំណាចទិញរបស់កម្មករនិយោជិត។

ប្រធានាធិបតីអាមេរិក លោក ដូណាល់ ត្រាំ បាន​និយាយ​ថា ប្រេងអាចនឹងត្រូវលក់ក្នុងតម្លៃទីផ្សារ ហើយចំណូលដែលទទួលបាននឹងត្រូវគ្រប់គ្រងដោយទីក្រុងវ៉ាស៊ីនតោន ប៉ុន្តែទិន្នន័យដឹកជញ្ជូនបង្ហាញថា ប្រេងឆៅទាំងនោះមិនទាន់ត្រូវបាននាំចេញនៅឡើយទេ។

រូបិយប័ណ្ណ Bolivar បានធ្លាក់ថ្លៃយ៉ាងខ្លាំងចំពេលមានវិបត្តិសេដ្ឋកិច្ចជាច្រើនឆ្នាំ និងការដាក់ទណ្ឌកម្មរបស់​អាមេរិកលើប្រេងរបស់វ៉េណេស៊ុយអេឡា ដែលបង្ខំ​ឲ្យ​អាជីវកម្ម និងប្រជាពលរដ្ឋពឹងផ្អែកខ្លាំងលើប្រាក់ដុល្លារអាមេរិក។ ក្រុមអ្នកវិភាគបានលើកឡើងថា ការចាក់បញ្ចូលរូបិយប័ណ្ណបរទេសនេះ មានគោលបំណងកាត់បន្ថយគម្លាតរវាងអត្រាប្តូរប្រាក់ផ្លូវការ និងទីផ្សារងងឹត។

សូម​ជម្រាប​ថា ការលើកឡើងរបស់លោកស្រី Rodriguez ធ្វើឡើងបន្ទាប់ពីប្រតិបត្តិការយោធាដ៏ចម្រូងចម្រាសរបស់សហរដ្ឋអាមេរិកកាលពីដើមខែមករា​ ដែលបានឈានទៅដល់ការចាប់ខ្លួនមេដឹកនាំកាន់អំណាចយូរអង្វែង លោក Nicolás Maduro និងការស្បថចូលកាន់តំណែងនៃរដ្ឋាភិបាលបណ្តោះអាសន្នរបស់លោកស្រី ដែលកំពុងស្វែងរកការចាប់ផ្តើមនាំចេញប្រេងឡើងវិញ ក្រោមការត្រួតពិនិត្យរបស់ក្រុង​វ៉ាស៊ីនតោន៕

ប្រែសម្រួល៖ ឈាង