ទាហាន​អាមេរិកម្នាក់លួច​ប្រើព័ត៌មានចាប់ខ្លួនលោកម៉ាឌូរ៉ូ ភ្នាល់​ល្បែង​​ឈ្នះ​ជាង​៤០ម៉ឺន​ដុល្លារ

រឿងរ៉ាវដ៏មិនគួរ​ឲ្យ​ជឿ​មួយបានកើតឡើងនៅក្នុងជួរកងទ័ពអាមេរិក នៅពេលដែលទាហានពិសេសម្នាក់ត្រូវ​គេរកឃើញថា បានប្រើប្រាស់ព័ត៌មានសម្ងាត់របស់រដ្ឋាភិបាលទៅធ្វើការភ្នាល់ ដើម្បីរកប្រាក់ចំណេញផ្ទាល់ខ្លួន។

លោក Gannon Ken Van Dyke ដែលជាទាហានពិសេសក្នុងជួរ​កងទ័ពជើងគោកអាមេរិក កំពុងប្រឈមមុខនឹងការកាត់ទោសពីបទប្រើប្រាស់ព័ត៌មានផ្ទៃក្នុងក្នុងប្រតិបត្តិការយោធាដ៏រស៊ើប​បំផុតមួយ។

យោងតាមពាក្យបណ្តឹងដែល​ប្រកាសកាលពីថ្ងៃទី២៣ខែមេសា​ឆ្នាំ​២០២៦ ដែល​ត្រូវ​បាន​ចុះផ្សាយ​ដោយ​ AFP លោក Van Dyke បានបើកគណនីនៅលើគេហទំព័រភ្នាល់អន្តរជាតិមួយកាលពីចុងឆ្នាំ២០២៥។ លោកបានដាក់ប្រាក់ភ្នាល់ជាង ៣៣ ០០០ ដុល្លារ ដោយចាក់ថា លោកប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ នឹងត្រូវគេទម្លាក់ពីអំណាចមុនដាច់ខែមករា​ឆ្នាំ​២០២៦។ អ្វីដែលគួរ​ឲ្យ​កត់សម្គាល់នោះគឺ លោក Van Dyke ខ្លួនឯងគឺជាអ្នកដែលចូលរួមដោយផ្ទាល់ក្នុងរៀបចំផែនការ និងអនុវត្តយុទ្ធនាការយោធាដើម្បីចាប់ខ្លួនលោកម៉ាឌូរ៉ូ​នេះតែម្តង។ លោកបានភ្នាល់ដល់ទៅ ១៣ដង ហើយទទួលបានប្រាក់ចំណេញត្រឡប់មកវិញរហូតដល់ជាង ៤០៩ ០០០ដុល្លារ។

អាជ្ញាធរអាមេរិកបានរកឃើញថា បន្ទាប់ពីយុទ្ធនាការបានបញ្ចប់ជោគជ័យ លោក Van Dyke បានដកប្រាក់ចំណេញទាំងនោះទៅដាក់ក្នុងកាបូបលុយអេឡិចត្រូនិក (Crypto wallet) នៅក្រៅប្រទេស ដើម្បីបិទបាំងដាន។ សូម្បីតែគណនីភ្នាល់ ក៏លោកបានស្នើសុំ​ឲ្យគេលុបចោលដែរ ដោយយកលេសថាបាត់បង់ការគ្រប់គ្រងអ៊ីមែល។ ទោះជាយ៉ាងណា ខាងក្រុមហ៊ុនភ្នាល់បានសហការជាមួយក្រសួងយុត្តិធម៌អាមេរិក បន្ទាប់ពីសង្ស័យថាមានអ្នកប្រើប្រាស់ព័ត៌មានសម្ងាត់មកលេងបែបនេះ។

នៅពេលដឹងរឿងនេះ លោកប្រធានាធិបតី ដូណាល់ ត្រាំ បានសម្តែងការមិនពេញចិត្តយ៉ាងខ្លាំង។ លោកបានមានប្រសាសន៍ថា លោកមិនចូលចិត្តអ្វីដែលពាក់ព័ន្ធនឹងការភ្នាល់ឡើយ ហើយវាជារឿងគួរឲ្យ​សោកស្តាយដែលពិភពលោកបច្ចុប្បន្នបានប្រែខ្លួនទៅជាកាស៊ីណូ ស្ទើរតែទាំងអស់ទៅហើយ។ ចំណែកឯនាយក FBI លោក Kash Patel បានសង្កត់ធ្ងន់ថា ករណីនេះគឺជាភស្តុតាងដែលបង្ហាញថា គ្មាននរណាម្នាក់ស្ថិតនៅពីលើច្បាប់នោះទេ ហើយ FBI នឹងធ្វើគ្រប់យ៉ាងដើម្បីការពារអាថ៌កំបាំងជាតិ។

សូមរំលឹកផងដែរថា កាលពីថ្ងៃទី៣មករា អាមេរិកបានបើកប្រតិបត្តិការ «Operation Absolute Resolve» ដោយប្រើប្រាស់យន្តហោះប្រមាណ ១៥០គ្រឿង បើកការវាយប្រហារតាមអាកាសក្នុងប្រទេសវ៉េណេស៊ុយអេឡា ដើម្បីបើកផ្លូវ​ឲ្យ​កងទ័ពពិសេសចូលទៅចាប់ខ្លួនលោកម៉ាឌូរ៉ូ និងភរិយាដល់ក្នុងរដ្ឋធានីការ៉ាកាស។ បច្ចុប្បន្ន លោកម៉ាឌូរ៉ូ ត្រូវបានឃុំខ្លួននៅក្នុងមន្ទីរឃុំឃាំងមួយនៅទីក្រុងញូវយ៉ក ដោយត្រូវបានអនុញ្ញាតឲ្យ​ទាក់ទងតែជាមួយគ្រួសារ និងមេធាវីក្នុងរយៈពេលខ្លីប៉ុណ្ណោះ។ ចំណែកឯអំណាចដឹកនាំនៅវ៉េណេស៊ុយអេឡា បច្ចុប្បន្នបានធ្លាក់ទៅលើដៃលោកស្រី Delcy Rodriguez ដែលជាប្រធានាធិបតីបណ្តោះអាសន្ន៕

ប្រែសម្រួល៖ ឈាង