ព័ត៌មានអន្ដរជាតិ

វ៉េណេស៊ុយអេឡា នឹងដោះលែងអ្នកទោស ៣០០នាក់ទៀត ក្រោយដោះលែងច្រើននាក់

បានផុស

១ ខែ មុន

នៅ

ថ្ងៃពុធ ២០ ឧសភា ២០២៦

ដោយ

ប្រទេសវ៉េណេស៊ុយអេឡា លើកឡើងកាលពីថ្ងៃអង្គារថា ខ្លួនគ្រោងដោះលែងអ្នកទោសចំនួន ៣០០នាក់ នៅសប្តាហ៍នេះ ដោយផ្អែកលើមូលដ្ឋានមនុស្សធម៌ ហួសពីវិសាលភាពនៃច្បាប់លើកលែងទោសថ្មី។ យោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី២០ ខែឧសភា ឆ្នាំ២០២៦ លោក Jorge Rodriguez ប្រធានរដ្ឋសភាវ៉េណេស៊ុយអេឡា បានប្រកាសពីការសម្រេចចិត្តនេះ អំឡុងសម័យប្រជុំមួយនៅវិមាននីតិបញ្ញត្តិក្នុងរដ្ឋធានីការ៉ាកាស។

លោក Jorge Rodriguez ប្រធានរដ្ឋសភាវ៉េណេស៊ុយអេឡា។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rodriguez សង្កត់ធ្ងន់ថា៖ « ការសម្រេចចិត្តនេះ[ដោះលែងអ្នកទោស] នឹងផ្តល់អត្ថប្រយោជន៍ដល់ប្រជាពលរដ្ឋដែលមានអាយុលើសពី ៦០ និង ៧០ឆ្នាំ អនីតិជន ស្ត្រីមានផ្ទៃពោះ ឬស្ត្រីបំបៅដោះកូន និងអ្នកដែលមានជំងឺប្រចាំកាយ»។

លោក មានប្រសាសន៍ថា វិធានការខាងលើគឺផ្អែកលើលក្ខណៈវិនិច្ឆ័យមនុស្សធម៌យ៉ាងតឹងរ៉ឹង ដោយគិតគូរពីកត្តាអាយុ និងស្ថានភាពសុខភាពរ៉ាំរ៉ៃ។

ក្រុមប្រឆាំង និងអង្គការសិទ្ធិមនុស្សអះអាងថា ការកាត់ក្តីអ្នកទោសគឺមិនយុត្តិធម៌ ហើយបុគ្គលទាំងនោះកំពុងត្រូវបានឃុំខ្លួនដោយសារហេតុផលនយោបាយ។

កាលពីសប្តាហ៍មុន ប្រធានាធិបតីអាមេរិក លោក ដូណាល់ ត្រាំ មានប្រសាសន៍ថា ទីក្រុងវ៉ាស៊ីនតោននឹងធានាការដោះលែងអ្នកទោសនយោបាយដែលនៅសេសសល់ទាំងអស់នៅក្នុងប្រទេសវ៉េណេស៊ុយអេឡា។ លោក ត្រាំ ប្រាប់អ្នកយកព័ត៌មានថា៖ « យើងនឹងដោះលែងពួកគេទាំងអស់គ្នា! ដូចដែលអ្នកបានដឹងអ៊ីចឹង យើងបានដោះលែងអ្នកទោសនយោបាយជាច្រើនរួចហើយ ហើយអ្នកដែលនៅសល់ក៏នឹងត្រូវបានដោះលែងផងដែរ»។

ដោយឡែកកាលពីខែមករា អ្នកតាក់តែងច្បាប់របស់ប្រទេសវ៉េណេស៊ុយអេឡារាយការណ៍ថា មនុស្សរាប់ពាន់នាក់ ចាប់តាំងពីការដោះលែងដោយផ្ទាល់រាប់រយនាក់ រហូតដល់ជាង ៨០០០នាក់ រួមទាំងការដោះលែងដែលទទួលអត្ថប្រយោជន៍ពីច្បាប់លើកលែងទោសថ្មីមួយត្រូវបានអនុម័ត។

ចំណែក អ្នកឃ្លាំមើលឯករាជ្យ និងក្រុមសិទ្ធិមនុស្ស Foro Penal បញ្ជាក់ថា អ្នកទោសជិត ៨០០នាក់ ត្រូវបានដោះលែង ខណៈអ្នកទោសនយោបាយរាប់រយនាក់ទៀតនៅតែជាប់ពន្ធនាគារ៕

សម្រួល៖ ណឺ មិនា

Related Topics:ប្រទេសវ៉េណេស៊ុយអេឡា