ត្រាំ គំរាមអ៊ីរ៉ង់ថា រឿងអាក្រក់នឹងកើតឡើង បើមិនចុះកិច្ចព្រមព្រៀង

សង្គ្រាមពាក្យសម្តីកាន់តែក្តៅគគុករវាងអាមេរិកនិងអ៊ីរ៉ង់ ដោយមានការនិយាយឌឺដងនិងគំរាមគ្នាទៅវិញទៅមកឥតល្ហែ ខណៈពេលនេះ ប្រមុខសេតវិមានព្រមានថា ទីក្រុងតេហេរ៉ង់នឹងជួបរឿងអាក្រក់ បើគ្មានកិច្ចព្រមព្រៀងណាមួយកើតឡើងទេនោះ។

តាមការផ្សាយរបស់ Anadolu ដែលដកស្រង់សម្តីលោកត្រាំ ថ្លែងប្រាប់អ្នកសារព័ត៌មាននៅសេតវិមានកាលពីថ្ងៃចន្ទទី២ខែកុម្ភៈឆ្នាំ២០២៦, ប្រធានាធិបតីអាមេរិក បានបង្ហើបពីភាពមហន្តរាយ ដោយលោកនិយាយថា៖ «ឥឡូវ យើងមាននាវាចម្បាំងជាច្រើនកំពុងឆ្ពោះទៅកាន់ប្រទេសអ៊ីរ៉ង់ ដែលសុទ្ធសឹងជានាវាធំៗ ធំបំផុតនិងល្អបំផុតទៀត ហើយយើងក៏កំពុងមានការចរចាជាមួយអ៊ីរ៉ង់ផងដែរ។ យើងនឹងចាំមើលថាតើវាវិវឌ្ឍទៅជាយ៉ាងណា»។

លោកបន្ថែមថា «យ៉ាងណានៅពេលនេះ យើងកំពុងជជែកជាមួយពួកគេ។ យើងកំពុងជជែកជាមួយអ៊ីរ៉ង់ ហើយប្រសិនបើយើងអាចរកដំណោះស្រាយរួមគ្នាបាន នោះវានឹងជារឿងដ៏អស្ចារ្យ ប៉ុន្តែប្រសិនបើយើងធ្វើមិនបានទេ រឿងអាក្រក់ៗប្រហែលជានឹងកើតឡើងហើយ»។

កាលពីសប្តាហ៍មុន លោក ត្រាំ បានដាក់លក្ខខណ្ឌ២ចំណុចរួចហើយ ឲ្យទីក្រុងតេហេរ៉ង់ អនុវត្តតាម ប្រសិនបើពួកគេមិនចង់ទទួលធម៌ក្តៅទេនោះ។

ប្រមុខរដ្ឋាភិបាលទីក្រុងវ៉ាស៊ីនតោន បញ្ជាក់យ៉ាងច្បាស់ថា បើអ៊ីរ៉ង់មិនចង់ឲ្យអាមេរិក ធ្វើសកម្មភាពយោធាទេនោះ អ៊ីរ៉ង់ត្រូវតែបោះបង់ចោលកម្មវិធីនុយក្លេអ៊ែរ និងឈប់សម្លាប់បាតុករ។

ទោះបែបនេះ អ៊ីរ៉ង់មិនញញើតឡើយ ហើយថែមទាំងគំរាមតបទៅវិញថែមទៀតផងថា ឲ្យតែអាមេរិកហ៊ានវាយប្រហារខ្លួនមែន នោះសង្គ្រាមក្នុងតំបន់នឹងផ្ទុះឡើងភ្លាមជាក់ជាមិនខានឡើយ។

មេដឹកនាំកំពូលអ៊ីរ៉ង់ Ayatollah Ali Khamenei ព្រមានថា៖ «អាមេរិកគួរតែដឹងហើយ បើពួកគេចាប់ផ្តើមសង្គ្រាមនោះ ពេលនេះនឹងក្លាយជាសង្គ្រាមក្នុងតំបន់តែម្តង។ លោក ត្រាំ តែងនិយាយថា លោកនាំយកនាវាចម្បាំងមក តែទោះយ៉ាងណា ប្រជាជាតិអ៊ីរ៉ង់នឹងមិនមានការភ័យខ្លាចចំពោះរឿងទាំងនេះឡើយ»៕

អត្ថបទ៖ សុខ សុវណ្ណ