មេទ័ពកំពូលអ៊ីស្រាអែល ទៅអាមេរិក ដោយសម្ងាត់ ស្របពេលសភាពការណ៍អ៊ីរ៉ង់ កំពុងក្តៅ

ប្រព័ន្ធផ្សព្វផ្សាយអ៊ីស្រាអែលនិងអាមេរិក បានចេញផ្សាយថា មេទ័ពកំពូលអ៊ីស្រាអែលបានបំពេញទស្សនកិច្ចដោយសម្ងាត់ទៅកាន់មន្ទីរបញ្ចកោណ ដើម្បីជួបពិភាក្សាជាមួយមន្ត្រីអាមេរិក ស្របពេលសភាពការណ៍នៅតំបន់មជ្ឈិមបូព៌ាជាមួយអ៊ីរ៉ង់ កាន់តែតានតឹងឡើងៗ។

ព័ត៌មាននេះ ដែលត្រូវផ្សាយបន្តដោយ RT របស់រុស្ស៊ីបានបង្ហាញថា អគ្គសេនាធិការ IDF លោក Eyal Zamir បានដឹកនាំគណៈប្រតិភូអ៊ីស្រាអែលមួយក្រុម ធ្វើដំណើរដោយសម្ងាត់ទៅកាន់ទីក្រុងវ៉ាស៊ីនតោន កាលពីចុងសប្តាហ៍ ដើម្បីជួបពិភាក្សាជាមួយប្រធានអគ្គសេនាធិការចម្រុះ Dan Caine និងមន្ត្រីការពារជាតិជាន់ខ្ពស់ដទៃទៀតរបស់សហរដ្ឋអាមេរិកនៅឯមន្ទីរបញ្ចកោណ។

ប្រភពខាងលើបន្តថា ក្នុងអំឡុងពេលនោះដែរ គណៈប្រតិភូអ៊ីស្រាអែល បានបង្ហាញនូវព័ត៌មានសម្ងាត់ដ៏រសើប ហើយជជែកអំពីជម្រើសយោធាប្រឆាំងអ៊ីរ៉ង់។

ជំនួបសម្ងាត់នេះកើតឡើងបន្ទាប់ពីមន្ត្រីអ៊ីរ៉ង់ឯណោះ ក៏ស្កាត់ទៅជួបប្រធានាធិបតីរុស្ស៊ី វ្ល៉ាឌីមៀរ ពូទីន ផងដែរនៅទីក្រុងមូស្គូ។

តាមការផ្សាយរបស់ TRT ដែលដកស្រង់ប្រភពពីវិមានក្រឹមឡាំង, លោកពូទីន បានជួបជាមួយលេខាធិ​ការក្រុមប្រឹក្សាសន្តិសុខជាតិកំពូលនៃសាធារណរដ្ឋឥស្លាមអ៊ីរ៉ង់លោក Ali Larijani កាលពីថ្ងៃសុក្រ។

យ៉ាងណា មិនមានការបញ្ជាក់ព័ត៌មានលម្អិតឡើយអំពីជំនួបនោះ ប៉ុន្តែស្ថានទូតអ៊ីរ៉ង់ប្រចាំនៅទីក្រុងមូស្គូ បានបង្ហោះនៅលើបណ្តាញសង្គមថា កិច្ចពិភាក្សារវាងលោក ពូទីន និង Larijani គឺផ្ដោតសំខាន់ទៅលើទំនាក់ទំនងសេដ្ឋកិច្ច និង បញ្ហាតំបន់និងអន្តរជាតិសំខាន់ៗ។

សូមជម្រាបថា ស្ថានការណ៍រវាងអាមេរិកនិងអ៊ីរ៉ង់ នាពេលនេះ កំពុងស្ថិតក្នុងដំណាក់កាលគ្រោះថ្នាក់បំផុត ដែលពិភពលោកកំពុងតាមដានយ៉ាងយកចិត្តទុកដាក់។

រដ្ឋបាលលោក ដូណាល់ ត្រាំ បានបញ្ជូនកងនាវាចម្បាំងដ៏មហិមា ទៅកាន់តំបន់ឈូងសមុទ្រពែរ្ស ដើម្បីគំរាមកំហែងអ៊ីរ៉ង់ឲ្យត្រឡប់មកតុចរចា និងបញ្ឈប់កម្មវិធីនុយក្លេអ៊ែរ។

យ៉ាងណា អ៊ីរ៉ង់មិនបានបង្ហាញសញ្ញាចុះចាញ់ឡើយ ដោយមេដឹកនាំកំពូល Khamenei បានថ្លែងជាសាធារណៈថា អ៊ីរ៉ង់មិនខ្លាចការគំរាមកំហែងតាមរយៈនាវាចម្បាំងនោះទេ៕

អត្ថបទ៖ សុខ សុវណ្ណ