ព័ត៌មានជាតិ

ក្រុមសភាប្រើភាសាបារាំងដាក់បញ្ចូលបញ្ហាអរិភាពរវាងកម្ពុជា-ថៃ ក្នុងរបាយការណ៍គណៈកម្មការនយោបាយរបស់ខ្លួន

បានផុស

៤ ខែ មុន

នៅ

ថ្ងៃអង្គារ ៣ កុម្ភៈ ២០២៦

ដោយ

សភានៃក្រុមប្រទេសនិយាយភាសាបារាំងបានសម្រេចដាក់បញ្ជូនរបាយការណ៍ស្ដីពីអរិភាពរវាងកម្ពុជានិងថៃ ទៅក្នុងរបាយការណ៍គណៈកម្មការនយោបាយខ្លួន។ ការដាក់បញ្ចូលនេះគឺបន្ទាប់ពីអនុប្រធានទី១ ព្រឹទ្ធសភាលោក អ៊ុច បូររិទ្ធ បានរាយការណ៍ពីបញ្ហាព្រំដែនកម្ពុជា-ថៃទៅក្នុងអង្គប្រជុំគណៈកម្មាធិការប្រតិបត្តិការនៃសភាប្រើភាសាបារាំងកាលពីចុងខែមករា កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំដែលធ្វើឡើងនៅក្នុងប្រទេសម៉ុងតេណេក្រូ កាលពីថ្ងៃទី៣០ និង៣១ ខែមករា លោក អ៊ុច បូររិទ្ធ បានលើកឡើងថា ស្ថានការណ៍ព្រំដែនកម្ពុជា-ថៃ ជាគំរូមួយដែលគោលការណ៍ និងលិខិតុបករណ៍អន្តរជាតិដែលមានស្រាប់បង្កើតឡើងក្នុងគោលបំណងបង្ការការរីករាលដាលនៃជម្លោះ មិនត្រូវបានគោរពឱ្យបានពេញលេញ ឬអនុវត្តឱ្យមានប្រសិទ្ធភាព។

លោកថា៖ «ឧប្បត្តិហេតុនានានៅតែបន្តកើតមានជាញឹកញាប់ ហើយហានិភ័យនៃការរីករាលដាលជម្លោះនៅតែមានកម្រិតខ្ពស់។ មូលហេតុគឺដោយសារការមិនគោរពរបស់ភាគីថៃចំពោះឯកសារគតិយុត្តិដែលបានរៀបរាប់ខាងលើ ព្រមទាំងការព្យាយាមជាឯកតោភាគីក្នុងការផ្លាស់ប្ដូរស្ថានភាពដើម (Status Quo) នៃដែនដី ដោយផ្អែកលើផែនទីដែលរៀបចំឡើងជាឯកតោភាគីដោយភាគីថៃ ដែលគ្មានមូលដ្ឋានច្បាប់ព្រមព្រៀងគ្នា ឬការទទួលស្គាល់ជាអន្តរជាតិនោះឡើយ»។

លោកបានបង្ហាញទៅតំណាងសភាប្រើភាសាបារាំងថា យន្តការដោះស្រាយវិវាទទាំងកម្រិតតំបន់ និងអន្តរជាតិ ធម្មនុញ្ញអាស៊ាន និងធម្មនុញ្ញនៃអង្គការសហប្រជាជាតិដែលបានចែងយ៉ាងច្បាស់ពីការដោះស្រាយវិវាទដោយសន្ដិវិធី និងគោរពអធិបតេយ្យភាព។ បន្ថែមលើនេះកម្ពុជា-ថៃ មានទាំងសន្ធិសញ្ញា អនុស្សារណៈយោគយល់គ្នាជាមួយគ្នាដែលមានអនុភាពខាងច្បាប់ឱ្យគោរពនិងអនុវត្ត ជាមួយគ្នានេះក៏បង្កើតឱ្យមានគណៈកម្មាធិការព្រំដែនទូទៅ GBC និងគណៈកម្មការចម្រុះព្រំដែន JBC ដើម្បីដោះស្រាយជាមួយគ្នាថែមទៀត។ តែយ៉ាងណាបញ្ហាកើតឡើងដោយសារការមិនគោរពរបស់ថៃដោយចង់យកផែនទីដែលរៀបចំដោយខ្លួនឯងមកបំពានលើច្បាប់អន្តរជាតិទាំងនេះ។

លោក អ៊ុច បូររិទ្ធ បានបន្ថែមថាបន្ទាប់ពីសម្រេចបានបទឈប់បាញ់ជាលើកទី២ ទោះបីមានសេចក្ដីថ្លែងការណ៍រួមក្ដីតែថៃនៅតែបន្តលុកលុយចូលដីកម្ពុជា រាយបន្លាលួស ដាក់ទូរកុងតឺន័រ រារាំងការវិលត្រលប់របស់ប្រជាជនខ្មែរទៅកាន់ទីលំនៅរបស់ពួកគេវិញថែមទៀត។

លោកថា៖ «អំពើអស់ទាំងនេះបានភ្ជាប់មកជាមួយនឹងវត្តមាន និងការគ្រប់គ្រងត្រួតត្រាជាបន្តបន្ទាប់នូវតំបន់មួយចំនួនដែលស្ថិតនៅយ៉ាងច្បាស់ក្នុងទឹកដីកម្ពុជា ដែលនេះបង្កើតឱ្យមានជាការកាន់កាប់ដោយខុសច្បាប់ ព្រមទាំងសកម្មភាពបំផ្លិចបំផ្លាញលំនៅឋាន និងហេដ្ឋារចនាសម្ព័ន្ធស៊ីវិល»។

អនុប្រធានទី១ ព្រឹទ្ធសភាក៏បានរាយការណ៍ពីការបំផ្លាញដល់រូបសំណាក់ និងទីតាំងបុរាណជាច្រើន រួមទាំងបេតិកភណ្ឌពិភពលោកប្រាសាទព្រះវិហារដោយសកម្មភាពរបស់ថៃ ដល់គណៈកម្មាធិការប្រតិបត្តិនៃសភាប្រើភាសាបារាំងផងដែរ។

លោកបានអំពាវនាវឱ្យអង្គការអន្តរជាតិមួយនេះចូលរួមចំណែកដល់ការថែរក្សាសន្ដិភាព និងស្ថិរភាពក្នុងតំបន់ និងអះអាងថាព្រះរាជាណាចក្រកម្ពុជាសូមបញ្ជាក់សារជាថ្មីនៅចំពោះមុខសភាប្រើភាសាបារាំងនូវគោលការណ៍គ្រឹះ មិនប្រើប្រាស់កម្លាំងទ័ព ការគោរពអធិបតេយ្យ និងបូរណភាពទឹកដីនៃរដ្ឋនានា ជំរុញឱ្យមានការគោរពបទឈប់បាញ់ ក៏ដូចជាការលើកកម្ពស់ការប្រើប្រាស់យន្តការដែលមានស្រាប់ប្រកបដោយសន្តិវិធី និងការសន្ទនានៅក្នុងស្មារតីទទួលខុសត្រូវ ភាពអត់ធ្មត់ និងកិច្ចសហប្រតិបត្តិការ។

ជាលទ្ធផល អង្គប្រជុំបានស្វាគមន៍ និងបង្ហាញនូវសាមគ្គីភាពចំពោះបទអន្តរាគមន៍របស់ លោកអនុប្រធានទី១ ព្រឹទ្ធសភាកម្ពុជា និងបានសម្រេចបញ្ចូលរបាយការណ៍ស្តីពីអរិភាពរវាងកម្ពុជា និងថៃ នៅក្នុងរបាយការណ៍គណៈកម្មការនយោបាយ នៃសភាប្រើភាសាបារំាង (APF) ដែលត្រូវបានផ្សព្វផ្សាយនៅលើគេហទំព័ររបស់ APF ចុះថ្ងៃទី៣១ ខែមករា ឆ្នាំ២០២៦៕

អត្ថបទដោយ ហ៊ុន សិរីវឌ្ឍន៍