លោកពូទីន បង្ហាញការគាំទ្រដល់គុយបា ប៉ុន្តែមិនទាន់សន្យាផ្តល់ជំនួយជាក់ស្តែង

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបញ្ជាក់ជាថ្មីនូវការឈរនៅខាងប្រទេសគុយបា ក្នុងអំឡុងពេលជំនួបជាមួយរដ្ឋមន្ត្រីការបរទេសគុយបា លោក Bruno Rodriguez កាលពីថ្ងៃពុធ​ទី១៨​ខែ​កុម្ភៈ​ឆ្នាំ​២០២៦ ខណៈដែលប្រទេសដីកោះមួយនេះកំពុងប្រឈមមុខនឹងវិបត្តិថាមពលយ៉ាងធ្ងន់ធ្ងរ និងការរារាំងការដឹកជញ្ជូនប្រេងពីសំណាក់សហរដ្ឋអាមេរិក។

លោកពូទីន បានលើកឡើងថា «យើងតែងតែនៅខាងគុយបាក្នុងការតស៊ូដើម្បីឯករាជ្យ» ប៉ុន្តែវិមានក្រឹមឡាំងនៅតែមិនទាន់ប្រកាសពីផែនការជាក់លាក់ណាមួយ ដើម្បីផ្តល់ជំនួយសេដ្ឋកិច្ច ឬថាមពលនៅឡើយទេ។ ចំណែកលោក Rodriguez បានចោទប្រកាន់ទីក្រុងវ៉ាស៊ីនតោនថា កំពុងធ្វើ​ឲ្យ​សណ្តាប់ធ្នាប់អន្តរជាតិកាន់តែដុនដាប ហើយបានអះអាងថា គុយបានឹងមិនប្តូរទិសដៅនយោបាយតាមការដាក់សម្ពាធឡើយ។

ក្នុងជំនួបជាមួយសមភាគីរុស្ស៊ី​លោក Sergei Lavrov ភាគីទាំងពីរបានពិភាក្សាអំពីជម្រើសផ្សេងៗដើម្បីជួយដល់គុយបា ដែលកំពុងខ្វះខាតអគ្គិសនីប្រើប្រាស់យ៉ាងខ្លាំង។ លោក Lavrov បានអំពាវនាវ​ឲ្យ​អាមេរិក «ប្រើប្រាស់វិចារណញាណ» និងបោះបង់ចោលនូវផែនការបិទផ្លូវទឹក។ ទោះបីជាមានសេចក្តីរាយការណ៍ថា រុស្ស៊ីអាចនឹងបញ្ជូនប្រេងទៅកាន់គុយបាក៏ដោយ ក៏អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា មិនទាន់មានការប្រកាសអំពីផែនការច្បាស់លាស់ណាមួយក្នុងការផ្តល់ប្រេងឥន្ធនៈ ឬការសង្គ្រោះសេដ្ឋកិច្ចជាក់ស្តែងនៅឡើយទេ។

ទំនាក់ទំនងរវាងទីក្រុង​ឡាហាវ៉ាន និងទីក្រុងមូស្គូ នៅតែមានភាពជិតស្និទ្ធ ទោះបីជាមានការរិះគន់ពីអន្តរជាតិពាក់ព័ន្ធនឹងសង្រ្គាមនៅអ៊ុយក្រែនក៏ដោយ។ កាលពីខែតុលាឆ្នាំ២០២៥ អ៊ុយក្រែនបានសម្រេចបិទស្ថានទូតរបស់ខ្លួនប្រចាំនៅទីក្រុងឡាហាវ៉ាន ដោយចោទប្រកាន់គុយបាថាមាន «ការសមគំនិតក្នុងសកម្មភាពឈ្លានពាន» តាមរយៈការជ្រើសរើសពលរដ្ឋគុយបាប្រមាណ ៥០០០នាក់​ឲ្យ​ទៅប្រយុទ្ធក្នុងជួរកងទ័ពរុស្ស៊ី។ ទោះជាយ៉ាងណាក៏ដោយ គុយបាបានបដិសេធការចោទប្រកាន់នេះ ដោយចាត់ទុកថាវាជា «ការចោទប្រកាន់មិនពិត» ដែលចែកចាយដោយរដ្ឋាភិបាលសហរដ្ឋអាមេរិក៕

ប្រែសម្រួល៖ ឈាង