សហគមន៍កសិកម្មក្នុងស្រុកព្រែកប្រសព្វ ចុះកិច្ចសន្យា​ផ្គត់ផ្គង់គ្រាប់ស្វាយចន្ទី ៦ ​ពាន់​តោននៅឆ្នាំ២០២៦

សហគមន៍កសិកម្មចំនួន ៦ ក្នុងស្រុកព្រែកប្រសព្វ ខេត្តក្រចេះ បានចុះកិច្ចសន្យាផលិតកម្មកសិកម្មស្ដីពីការផលិត និងផ្គត់ផ្គង់គ្រាប់ស្វាយចន្ទីសើមពូជ អឹម២៣ ជាមួយនិងក្រុមហ៊ុនខ្មែរ អាហ្រ្គោ ឃែស៊ូ ឯ.ក ក្នុងបរិមាណ ៦,០០០តោន សម្រាប់ឆ្នាំ២០២៦ ក្រោមការសម្របសម្រួលពីមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ជាមួយ អង្គការ GIZ។ នេះតាមការឱ្យដឹងពីមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ។

ប្រភពពីមន្ត្រីនៃមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ បានឱ្យដឹងថា សម្រាប់លក្ខខ័ណ្ឌក្រុមហ៊ុនទិញគ្រាប់ស្វាយចន្ទី គឺពុំមានអ្វីច្រើននោះទេ ដោយសារក្រុមហ៊ុនទិញគ្រាប់ស្វាយចន្ទីសើម​ពូជ អឹម​២៣ ក្នុងរដូវប្រមូលផលឆ្នាំ២០២៦ ចាប់ផ្តើមពី ខែមីនា ឆ្នាំ២០២៦ ដល់ ខែឧសភា ឆ្នាំ ២០២៦ ដែលជាផលិតផលរបស់សហគមន៍។ ក្នុងនោះខាងមន្ទីរក៏បានចូលរួមចំណែកមួយផ្នែកផងដែរ ពាក់ព័ន្ធបច្ចេកទេសក្នុងការប្រមូលផលគ្រាប់ស្វាយចន្ទី ដែលជ្រុះទុំល្អស្អាត ហើយអត់មានសាច់ផ្លៃជាប់និងគ្រាប់ ដោយក្នុង ១ សហគមន៍ ទទួលការផ្គត់ផ្គត់គ្រាប់ស្វាយចន្ទី ចំនួន ១ពាន់តោន។

ក្រុមហ៊ុនខ្មែរ អាហ្គោ ឃែស៊ូ ឯ.ក (Khmer Agro Cashew Co Ltd) មានចក្ខុវិស័យក្នុងការបង្កើតទំនាក់ទំនង និង ចាប់ជាដៃគូយូរអង្វែងជាមួយសហគមន៍កសិកម្មក្នុងការទិញ លក់ គ្រាប់ស្វាយចន្ទីពូជ អឹម២៣។ ដោយក្រុមហ៊ុនអាចផ្តល់នូវធាតុចូលផ្សេងៗសំខាន់ៗ ដូចជា៖ ការបណ្តុះបណ្តាល ការត្រួតពិនិត្យគុណភាព ឧបករណ៍ និងហេដ្ឋារចនាសម្ព័ន្ធខ្សែសង្វាក់ផ្គត់ផ្គង់។

រីឯតម្លៃ គឺមានការប្រែប្រួលទៅតាមទីផ្សារ ដោយមធ្យមភាគទីផ្សារវៀតណាម ក្នុងតំបន់ និង​ខេត្តកំពង់ធំ។ ចំណុចពិសេស គឺក្រុមហ៊ុនមានតម្លៃបន្ថែម ៥០ រៀល ក្នុង ១គីឡូក្រាម សម្រាប់គ្រាប់ស្វាយចន្ទី ដែលអនុលោមតាមស្តង់ដារគុណភាពដែលបានកំណត់ តម្លៃមធ្យមភាគនឹងផ្តល់ជូនមួយថ្ងៃមុនពេលការបញ្ជាទិញ។

អាជ្ញាធរស្រុក​ព្រែក​ប្រសព្វ បានបញ្ជាក់ឱ្យដឹងថា ស្រុកព្រែកប្រសព្វ មានផ្ទៃដីដាំស្វាយចន្ទី សរុបចំនួន ៣៥,១៦៦ ហិកតា៕

អត្ថបទ៖ ប្រុញ វិធិន