ព័ត៌មានជាតិ

វិទ្យាស្ថាន RPITSE នៅខេត្ដក្រចេះ ផ្តល់អាហារូបករណ៍ជាង ៣ ពាន់កន្លែង ដល់យុវជនមកពីគ្រួសារក្រីក្រ តាមរយៈកម្មវិធី ១,៥ លាននាក់

បានផុស

១ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

វិទ្យាស្ថានពហុបច្ចេកទេសភូមិភាគតេជោសែនឦសាន (RPITSE) នៅខេត្ដក្រចេះ នៃក្រសួងការងារ និង បណ្ដុះបណ្ដាលវិជ្ជាជីវៈ បានផ្តល់អាហារូបករណ៍ចំនួន ៣ ១៤៥ កន្លែង ដល់ប្រជាពលរដ្ឋ និង យុវជនមកពីគ្រួសារក្រីក្រ និង ងាយរងហានិភ័យ ក្រោមកម្មវិធីបណ្ដុះបណ្ដាលជំនាញវិជ្ជាជីវៈ និង បច្ចេកទេស (TVET 1.5M) របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមវិទ្យាស្ថាន RPITSE បានឱ្យដឹងថា វិទ្យាស្ថាន បានទទួលសិស្សចុះឈ្មោះចូលរៀនសរុបចំនួន ២ ២៦៣ នាក់ គិតចាប់ត្រឹមឆ្នាំ ២០២៤ មកដល់ត្រឹមឆមាសទី ១ នៃឆ្នាំ ២០២៦ នេះ។ មុខជំនាញដែលសិស្សានុសិស្សចាប់អារម្មណ៍ចុះឈ្មោះចូលរៀនច្រើនជាងគេរួមមាន ៖ ១-ការងារកំបោរ , ២-ការដំឡើងបណ្តាញអគ្គិសនីក្នុងអគារ , ៣-សេវាកម្មបរិក្ខារត្រជាក់ក្នុងគេហដ្ឋាន , ៤-ការថែទាំ និង ជួសជុលទោចក្រយានយន្ត , ៥-ការថែទាំ និង ជួសជុលរថយន្ត។

ជាមួយគ្នា វិទ្យាស្ថាន RPITSE បានផ្តល់អាហារូបករណ៍ទៅលើ ១២ មុខជំនាញ មានដូចជា ៖ ១-ការងារកំបោរ , ២-ការដំឡើងបណ្តាញអគ្គិសនីក្នុងអគារ , ៣-សេវាកម្មបរិក្ខារត្រជាក់ក្នុងគេហដ្ឋាន , ៤-ការថែទាំ និង ជួសជុលទោចក្រយានយន្ត , ៥-ការថែទាំ និង ជួសជុលរថយន្ត , ៦-ការផ្សារអគ្គិសនី , ៧-ការដំឡើង និង ថែទាំកាមេរ៉ាសុវត្ថិភាព , ៨-ការរចនាក្រាហ្វិចដោយកុំព្យូទ័រ , ៩-សេវាកម្មកុំព្យូទ័រ , ១០-សេវាកម្មសម្អាងកាយ , ១១-សេវាកម្មកាត់សក់បុរស និង ១២-ការធ្វើម្ហូបខ្មែរ។

ចំពោះវគ្គសិក្សាថ្មី នឹងចាប់ផ្តើមចុះឈ្មោះចូលរៀនចាប់ពីថ្ងៃជូនដំណឹងនេះតទៅ ដោយចុះឈ្មោះចូលរៀនតាមរយៈលេខទូរសព្ទលេខ ០៩៧ ៧៦៧ ៤០០១/ ០១២ ៧៨៤ ៩៤៨/០៩៧ ៧៥២ ៣៣៤៦ ឬ អញ្ជើញមកវិទ្យាស្ថានពហុបច្ចេកទេសភូមិភាគតេជោសែនឦសាន ដែលមានទីតាំងស្ថិតនៅភូមិអូរឫស្សីទី ២ សង្កាត់អូរឫស្សី ក្រុងក្រចេះ ខេត្ដក្រចេះ។

កម្មវិធីបណ្ដុះបណ្ដាលជំនាញវិជ្ជាជីវៈ និង បច្ចេកទេស ដល់យុវជនគោលដៅមកពីគ្រួសារក្រីក្រ និង គ្រួសារងាយរងហានិភ័យនៅទូទាំងប្រទេសចំនួនប្រមាណ ១,៥ លាននាក់ ក្នុងកម្រិតសញ្ញាបត្របច្ចេកទេស និង វិជ្ជាជីវៈ ត្រូវបានផ្ដួចផ្ដើមឡើងដោយ សម្តេចអគ្គមហាសេនាបតីតេជោ ហ៊ុន សែន ក្នុងឆ្នាំ ២០២៣ និង ប្រកាសដាក់ឱ្យអនុវត្តដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី ១៤ ខែវិច្ឆិកា ឆ្នាំ ២០២៣៕