ទំនុកចិត្តលក់រាយថៃធ្លាក់ចុះយ៉ាងខ្លាំង ដោយសារ កង្វល់​សេដ្ឋកិច្ច និងនយោបាយ​

សន្ទស្សន៍ទំនុកចិត្តសេដ្ឋកិច្ចសម្រាប់សហគ្រិនលក់រាយនៅ​ខែមករា ​បានធ្លាក់ចុះ ២៩,៩ ពិន្ទុ បើប្រៀបធៀបទៅនឹងសន្ទស្សន៍ខែធ្នូ ឆ្នាំ​មុន។ នេះបើតាម​លទ្ធផល​ស្ទង់មតិ​របស់សមាគមអ្នកលក់រាយថៃ ដែល​សហការជាមួយធនាគារកណ្តាលថៃ និងចុះផ្សាយដោយកាសែត The Nation កាលពីថ្ងៃព្រហស្បតិ៍។

ការធ្លាក់ចុះដ៏គំហុកនៃទំនុកចិត្តនេះ ឆ្លុះបញ្ជាំងអំពីក្តីបារម្ភកាន់តែខ្លាំងឡើង​ក្នុងវិស័យលក់រាយថៃ ដែលជំរុញជាចម្បងដោយភាពមិនប្រាកដប្រជាផ្នែកនយោបាយក្រោយការបោះឆ្នោតនៅដើមខែនេះ និងបញ្ហាប្រឈមសេដ្ឋកិច្ច​ដែលបន្តអូសបន្លាយ។ ​

​លទ្ធផលនៃការស្ទង់មតិបាន​បង្ហាញថា អ្នកលក់រាយថៃ​បារម្ភកាន់តែខ្លាំងឡើងអំពីការពន្យារពេលក្នុងការបង្កើតរដ្ឋាភិបាលចម្រុះដែលប្រកបដោយ​ស្ថិរភាព ដែលអាចរារាំងដល់ការអនុវត្តគោលនយោបាយដើម្បីជំរុញការចំណាយ​ក្នុងស្រុក ​និងការស្ទុះងើបឡើងវិញនៃសេដ្ឋកិច្ច។

លទ្ធផល​ក៏បានបង្ហាញផងដែរអំពីការថយចុះគួរឱ្យកត់សម្គាល់នៃសូចនាករលក់រាយសំខាន់ៗ ដូចជាកំណើនការលក់​ក្នុងហាងដដែល (SSSG) ការចំណាយក្នុងមួយវិក្កយបត្រ និង​ប្រេកង់នៃការទិញទំនិញ។

ការចំណាយ/វិក្កយបត្រ បានធ្លាក់ចុះយ៉ាងខ្លាំងពី ៥៤,៩ ​ពិន្ទុ នៅខែធ្នូ ឆ្នាំ ២០២៥ មកត្រឹម ២៦,៣ ​ពិន្ទុក្នុងខែមករា ឆ្នាំ ២០២៦ ដែលជាការធ្លាក់ចុះរហូតដល់ ២៨,៦ ពិន្ទ។ ​ដូចគ្នាដែរ ប្រេកង់នៃការទិញទំនិញ បានធ្លាក់ចុះ ២៣ ពិន្ទុ មកត្រឹម ៣១,៩ ពិន្ទុ នៅខែមករា។ ​

និន្នាការទាំងនេះបង្ហាញថា អ្នកប្រើប្រាស់ថៃកំពុងប្រុងប្រយ័ត្នក្នុងការចំណាយរបស់ពួកគេ ជាពិសេសបន្ទាប់ពីថ្ងៃឈប់សម្រាកឆ្នាំថ្មី ដោយសារតែបរិយាកាសនយោបាយមិនប្រាកដប្រជា និងការព្រួយបារម្ភអំពីសេដ្ឋកិច្ច។​

មែនទែនទៅ អ្នកលក់រាយនៅគ្រប់តំបន់ទាំងអស់ កំពុងប្រឈមមុខនឹង​កង្វល់សេដ្ឋកិច្ច និងនយោបាយ។ នៅទីក្រុងបាងកក និងតំបន់ជុំវិញ ដែលតំណាងឱ្យ ៤៣% នៃទីផ្សារលក់រាយ និងលក់ដុំទូទាំងប្រទេស ការលក់​ក្នុងវិស័យភាគច្រើន ជាពិសេសហាងលក់ទំនិញធំៗ ម៉ូដ និងគ្រឿងសំអាង បានបង្ហាញពីការធ្លាក់ចុះគួរឱ្យកត់សម្គាល់។ ​

ក្នុងតំបន់ផ្សេងទៀត ដូចជាតំបន់កណ្តាល ភាគខាងកើត និងភាគខាងលិច ដែលប្រាក់ចំណូលពឹងផ្អែកយ៉ាងខ្លាំងទៅលើតំបន់ឧស្សាហកម្ម និងកសិកម្ម ខ្សែច្រវ៉ាក់ហាង​ធំៗ និងភោជនីយដ្ឋាននានា ក៏កត់ត្រាពីការធ្លាក់ចុះនៃការលក់ដូចគ្នា។ ​ទាំងអស់នេះហើយ សុទ្ធសឹងតែបង្ហាញពីកម្សោយនៃ​អំណាចចំណាយរបស់ប្រជាជនថៃ៕