មហាអំណាចអឺរ៉ុបទាំង៥ ចាប់ផ្ដើមអភិវឌ្ឍប្រព័ន្ធការពារដ្រូនតម្លៃទាប យក​គំរូ​តាម​អ៊ុយក្រែន

ប្រទេសអឺរ៉ុបចំនួនប្រាំ រួមមាន បារាំង ប៉ូឡូញ អាល្លឺម៉ង់ ចក្រភពអង់គ្លេស និងអ៊ីតាលី (ក្រុមប្រទេស E5) បានប្រកាសដាក់ចេញនូវកម្មវិធីថ្មីមួយដែលមានឈ្មោះថា «LEAP» ដើម្បីអភិវឌ្ឍប្រព័ន្ធការពារដែន​អាកាសតម្លៃទាប និងដ្រូនស្វ័យប្រវត្តិ។

យោង​តាម​ Independent គំនិតផ្តួចផ្តើមដែលបានប្រកាសកាលពីថ្ងៃសុក្រ​ទី​២០​ខែ​កុម្ភៈ​ នឹងទាញយកជំនាញពីសង្គ្រាមរយៈពេលបួនឆ្នាំនៅអ៊ុយក្រែន ដើម្បីពង្រឹងសន្តិសុខព្រំដែន រួមទាំងការបង្កើត «ជញ្ជាំងដ្រូន» សម្រាប់ស្ទាក់ចាប់ការឈ្លានពានតាមអាកាស។ រដ្ឋមន្ត្រីការពារជាតិអង់គ្លេស លោក Luke Pollard បានបញ្ជាក់ថា អឺរ៉ុបត្រូវតែធ្វើ​ឲ្យ​តម្លៃនៃប្រព័ន្ធការពារមានសមាមាត្រទៅនឹងតម្លៃនៃដ្រូនវាយប្រហារដែលមានតម្លៃថោក។

កិច្ចព្រមព្រៀងនេះផ្តោតលើការវិនិយោគរួមគ្នាលើការផលិត និងការទិញយកបច្ចេកវិទ្យាវាយប្រហារដោយដ្រូន និងប្រព័ន្ធការពារដែលប្រើប្រាស់បញ្ញាសិប្បនិម្មិត (AI)។ រដ្ឋមន្ត្រីការពារជាតិប៉ូឡូញ លោក Władysław Kosiniak-Kamysz បានលើកឡើងថា បច្ចេកវិទ្យាប្រយុទ្ធកំពុងផ្លាស់ប្តូរយ៉ាងឆាប់រហ័ស ដូច្នេះអឺរ៉ុបត្រូវតែឆ្លើយតប​ឲ្យ​បានទាន់ពេលវេលា ជាពិសេសបន្ទាប់ពីព្រឹត្តិការណ៍ក្នុងខែកញ្ញាឆ្នាំ២០២៥ ដែលប៉ូឡូញត្រូវបង្ខំចិត្តប្រើប្រាស់យន្តហោះចម្បាំងតម្លៃរាប់លានដុល្លារ ដើម្បីដេញតាមដ្រូនតម្លៃត្រឹមតែរាប់ពាន់ដុល្លារ។

ការបង្កើនការចំណាយលើវិស័យការពារជាតិនេះ កើតឡើងចំពេលដែលមានភាពមិនច្បាស់លាស់នៃសម្ព័ន្ធភាពជាមួយសហរដ្ឋអាមេរិក ក្រោមការដឹកនាំរបស់ប្រធានាធិបតី ដូណាល់ ត្រាំ។ ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បានកត់សម្គាល់ថា សន្តិសុខរបស់អឺរ៉ុបកំពុងស្ថិតក្នុងភាពប្រកាសអាសន្នបំផុតក្នុងរយៈពេលជាច្រើនទសវត្សរ៍ ដោយសារការឈ្លានពានរបស់រុស្ស៊ី និងភាពតានតឹងក្នុងអង្គការ NATO បន្ទាប់ពីលោកត្រាំ បានរិះគន់សម្ព័ន្ធមិត្ត និងថែមទាំងបានគំរាមដណ្តើមយកដែនដី Greenland ទៀតផង។ កម្មវិធី LEAP ត្រូវបានគេរំពឹងថានឹងជួយ​ឲ្យ​អឺរ៉ុបកាន់តែរឹងមាំនៅក្នុងក្របខ័ណ្ឌអង្គការ NATO៕

ប្រែសម្រួល៖ ឈាង