ត្រាំ ថា អ៊ីរ៉ង់ខ្លួនឯងទេ ដែលទម្លាក់គ្រាប់បែកលើសាលារៀន សម្លាប់មនុស្ស១៧៥នាក់

សោកនាដកម្មនៃការវាយប្រហារលើសាលារៀនបឋមសិក្សាកុមារីក្នុងប្រទេសអ៊ីរ៉ង់ ដែលសម្លាប់មនុស្ស១៧៥នាក់ពេលផ្ទុះសង្គ្រាមដំបូង បានបង្កក្តីរន្ធត់និងតក់ស្លុតទូទាំងពិភពលោក ហើយជំរុញឲ្យមានការថ្កោលទោសជាសកលចំពោះអ្នកប្រព្រឹត្តទង្វើដ៏សាហាវនេះ។

មានការចោទប្រកាន់ដាក់គ្នាជុំវិញសកម្មភាពដ៏ព្រៃផ្សៃ ប៉ុន្តែឥឡូវប្រធានាធិបតីអាមេរិក ដូណាល់ ត្រាំ បែរជាចេញមុខអះអាងថា ការវាយប្រហារនោះគឺជាស្នាដៃរបស់អ៊ីរ៉ង់ ខ្លួនឯងទៅវិញ។

ថ្លែងកាលពីចុងសប្តាហ៍កន្លងទៅ លោកត្រាំចោទថា អ៊ីរ៉ង់ខ្លួនឯងទេដែលជាអ្នកទម្លាក់គ្រាប់បែកចំសាលារៀន ពោលគឺមិនមែនជាស្នាដៃរបស់អាមេរិកឬអ៊ីស្រាអែលឡើយ។

លោកនិយាយថា៖ «តាមខ្ញុំគិត ផ្អែកលើអ្វីដែលខ្ញុំបានឃើញ វាជាស្នាដៃអ៊ីរ៉ង់»។ ក្រោយមកអ្នកកាសែ​តក៏ទៅសួររដ្ឋមន្ត្រីក្រសួងសង្គ្រាម Pete Hegseth ថា៖ «តើពិតជា អ៊ីរ៉ង់ជាអ្នកធ្វើ?»។ លោកឆ្លើយថា៖ «ពិតហើយ ជាស្នាដៃអ៊ីរ៉ង់មែន ប៉ុន្តែយើងកំពុងស៊ើប! មានតែអ៊ីរ៉ង់ទេ ដែលកំណត់គោលដៅលើជនស៊ីវិល»។ 

យ៉ាងណា សម្តីលោកត្រាំ គឺផ្ទុយពីការស៊ើបអង្កេតរបស់ទីភ្នាក់ងារសារព័ត៌មាន AP, CNN, New York Times និង Washington Post ដែលសុទ្ធតែសន្និដ្ឋានថា បើផ្អែកលើរូបភាពពីផ្កាយរណប និងព័ស្តុតាងដែលមើលឃើញផ្សេងទៀត សហរដ្ឋអាមេរិកទំនងជាបានបំផ្លាញសាលាបឋមសិក្សាកុមារីក្នុងក្រុង Minab ភាគខាងត្បូងប្រទេសអ៊ីរ៉ង់ អំឡុងពេលទម្លាក់គ្រាប់បែកថ្ងៃទី២៨ខែកុម្ភៈ។

រដ្ឋាភិបាលក្រុងតេហេរ៉ង់បានចោទប្រកាន់ចំៗទៅលើសហរដ្ឋអាមេរិក និងអ៊ីស្រាអែលថា ជាអ្នកនៅពីក្រោយ «ឧក្រិដ្ឋកម្មសង្រ្គាម» ដ៏សាហាវឃោរឃៅមួយនេះ។

ផ្ទុយទៅវិញ កងទ័ពអ៊ីស្រាអែលបានឆ្លើយតបថា ខ្លួនមិនបានដឹង ឬមានប្រតិបត្តិការណាមួយនៅក្នុងតំបន់កើតហេតុនាពេលនោះឡើយ។ ការបដិសេធនេះកំពុងត្រូវបានមជ្ឈដ្ឋានអន្តរជាតិជជែកដេញដោលយ៉ាងខ្លាំង ព្រោះកន្លងមក អ៊ីស្រាអែលធ្លាប់បានបដិសេធការវាយប្រហារស្រដៀងគ្នានេះ រួចទើបសុខចិត្តទទួលស្គាល់ ឬកែប្រែលទ្ធផលស៊ើបអង្កេតរបស់ខ្លួនវិញ នៅពេលដែលមានភស្តុតាងជាក់ស្តែងលេចឡើង៕

អត្ថបទ៖ សុខ សុវណ្ណ