សម្តេច ម៉ែន សំអន ៖ ម្លប់សន្តិភាព និងសន្តិសុខ មានសារៈសំខាន់បំផុតមិនអាចកាត់ថ្លៃបាន សម្រាប់គ្រប់ជាតិសាសន៍លើពិភពលោកប្រាថ្នាចង់បាន

សម្តេចកិត្តិសង្គហបណ្ឌិត ម៉ែន សំអន ឧត្តម​ប្រឹក្សា​ផ្ទាល់​ព្រះមហាក្សត្រ និង​ជា​ប្រធាន​សមាគម​នារី​កម្ពុជា ដើម្បី​សន្តិភាព និង​អភិវឌ្ឍន៍ បាន​ថ្លែង​ថា ម្លប់​សន្តិភាព និង​សន្តិសុខ មាន​សារៈសំខាន់​បំផុត​មិន​អាច​កាត់ថ្លៃ​បាន​សម្រាប់​ស្ត្រី និងគ្រួសារខ្មែរ​ទូទាំងប្រទេស ក៏​ដូច​ប្រជាជន​ទូទាំង​ពិភពលោក​ប្រាថ្នា​ចង់​បាន។

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ​ក្នុង​ពេលអញ្ជើញជា​អធិបតីក្នុង​ពិធី​អបអរសាទរ​ខួប​លើក​ទី ១១៥ ទិវាអន្តរជាតិនារី ៨ មីនា ឆ្នាំ ២០២៦ ក្រោម​ប្រធានបទ “សន្តិភាព និងសន្តិសុខ​សម្រាប់​ស្ត្រី និងគ្រួសារ” និងសន្និបាតបូកសរុប​លទ្ធផល​ការងារ​ប្រចាំ​ឆ្នាំ ២០២៥ និង​លើកទិសដៅ​បន្ត​ឆ្នាំ ២០២៦ របស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពត កាលពី​ព្រឹកថ្ងៃ​សៅរ៍ ៤ រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី ៧ ខែមីនា ឆ្នាំ ២០២៦។

លោកស្រី ហ៊ុន ចាន់ធី មៅ ធនិន ប្រធាន​កិត្តិយស​សាខា​សមាគមនារីកម្ពុជា ដើម្បីសន្តិភាព និង​អភិវឌ្ឍន៍​ខេត្តកំពត បានអនុវត្តតាម​លក្ខន្តិកៈ​របស់សមាគម គោលនយោបាយរបស់រាជរដ្ឋាភិបាល និងផែនការ​សកម្មភាព​របស់​សាខា​សមាគម ដោយសម្រេចបានបាននូវ​លទ្ធផល​គួរជាទីមោទនៈ ដោយបានចូលរួមដោះស្រាយបាននូវបញ្ហាបានជាច្រើន ជាពិសេស ពាក់ព័ន្ធជាមួយនឹងស្ត្រី និងការ​ដោះស្រាយ​ក្រៅ​ប្រព័ន្ធ​តុលាការ ជាដើម ។ល។

មានប្រសាសន៍ក្នុងពិធីនោះ លោកអភិបាលខេត្ត បានលើកឡើងថា រដ្ឋបាលខេត្ត បាន​យក​ចិត្ត​ទុក​ដាក់​ខ្ពស់ក្នុង​ការ​លើក​កម្ពស់​សិទ្ធិ អំណាច និង​បង្កើន​ភាពអង់អាចដល់ស្ត្រី រីឯ​រាល់កិច្ច​អភិវឌ្ឍន៍​លើ​គ្រប់​វិស័យនៅទូទាំងខេត្ត គឺមិនអាចខ្វះបាននូវការចូលរួមចំណែកពីស្ត្រីនៅគ្រប់ជាន់ថ្នាក់។ បច្ចុប្បន្ន​នេះ ខេត្តកំពត មាន ៖ ស្ត្រីជាក្រុមប្រឹក្សាខេត្ត ៤ រូប អភិបាលស្រុក ក្រុង ២ រូប មេឃុំ ៧ រូប ក្រុម​ប្រឹក្សា​ឃុំ-សង្កាត់ ៥៦១ រូប (មានស្ត្រី ១១១ រូប)។

សម្តេចកិត្តិសង្គហបណ្ឌិត ក៏បានថ្លែង​កោតសរសើរ​ចំពោះ លោកស្រី ហ៊ុន ចាន់ធី មៅ ធនិន បាន​ខិតខំ​ប្រឹងប្រែង​អស់ពី​សមត្ថភាព កម្លាំងកាយ ចិត្ត ប្រាជ្ញា ស្មារតី​អនុវត្ត​ឱ្យបាន​នូវ​ទិសដៅ ភារកិច្ច ដោយ​ឈរ​លើ សាមគ្គីភាព ឯកភាព សហការគ្នាល្អ និងមានទំនាក់ទំនង​ជិតស្និទ្ធ​ជាមួយ​អាជ្ញាធរ​គ្រប់​លំដាប់ថ្នាក់ ដៃគូពាក់ព័ន្ធ ព្រមទាំងប្រជាពលរដ្ឋ។ ពិសេស ទទួលបានការគាំទ្រពី លោក ម៉ៅ ធនិន អភិបាល នៃគណៈអភិបាលខេត្តកំពត ដែលបាន​ជំរុញ​លើកទឹកចិត្ត។

សម្តេចកិត្តិសង្គហបណ្ឌិត បានលើកឡើងថា ទិវានារីអន្តរជាតិ ៨ មីនា ឆ្នាំ ២០២៦ នេះ ត្រូវបាន​ប្រារព្ធ​ធ្វើឡើង​ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ» ក្នុង​គោលបំណង​បង្ហាញ​អំពី​សារៈសំខាន់​មិនអាចកាត់ថ្លៃបាន នៃសន្តិភាព និងសន្តិសុខសម្រាប់ស្ត្រី និងក្រុមគ្រួសារ និង​ការចូលរួមចំណែក​យ៉ាង​សកម្ម​របស់​ស្ត្រី ក្នុងកិច្ចខិតខំប្រឹងប្រែងដើម្បីកសាង និង​ថែរក្សា​សន្តិភាព ព្រមទាំងអំពាវនាវឱ្យមានកិច្ច​អន្តរាគមន៍​បន្ទាន់ក្នុង​ការ​ការពារ និងលុបបំបាត់​នូវ​រាល់​ឧបសគ្គ​រារាំង​ដែលមានផលអវិជ្ជមានដល់ស្ត្រី និងគ្រួសារ ដើម្បីទាញ​យក​អត្ថប្រយោជន៍​ពី​ភាគលាភ​យេនឌ័រ​ជូន​គ្រួសារ ពង្រឹង​សហគមន៍ និង​វឌ្ឍនភាព​សង្គម ជំរុញការអភិវឌ្ឍប្រកបដោយចីរភាព ពិធី​អបអរសាទរ​ខួបលើកទី ១១៥ ទិវានារីអន្តរជាតិ ៨ មីនា (៥-មីនា-២០២៦) ស្ថិរភាព​សង្គម និង​វិបុលភាព​សង្គម៕

អត្ថបទ ៖ វិមាន