សម្តេច ម៉ែន សំអន ៖ «យើងបន្តរួមកម្លាំងគ្នា ដើម្បីមនុស្សធម៌»

សម្តេចកិត្តិសង្គហបណ្ឌិត ម៉ែន សំអន ប្រធានគណៈកម្មាធិការកិត្តិយសសាខាកាកបាទក្រហមកម្ពុជាខេត្តស្វាយរៀង បានសម្តែងនូវការចូលរួមអបអរសាទរចំពោះមូលបទ «បន្តរួមកម្លាំងគ្នា ដើម្បីមនុស្សធម៌»។

សម្តេចកិត្តិសង្គហបណ្ឌិត ម៉ែន សំអន សម្តែងការសាទរបែបនេះក្នុងពេលប្រគល់ និងទទួលមូលនិធិពីសប្បុរសជន ដើម្បីអបអរសាទរខួបលើកទី ១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌» ដែលបានរៀបចំនៅស្នាក់ការកាកបាទក្រហមកម្ពុជាខេត្តស្វាយរៀង កាលពីរសៀលថ្ងៃសៅរ៍ ១ រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី ២ ខែឧសភា ឆ្នាំ ២០២៦។

សម្តេចកិត្តិសង្គហបណ្ឌិត បានគោរពថ្លែងអំណរគុណយ៉ាងជ្រាលជ្រៅចំពោះព្រះទ័យជ្រះថ្លារបស់ ព្រះសុមេធវង្ស បណ្ឌិត សុខ ប៊ុនធឿន សមាជិកថេរសភា និងអគ្គលេខាធិការរងថេរសភា ព្រះពុទ្ធសាសនានៅកម្ពុជា ព្រះអនុគណខណ្ឌមានជ័យ និងជាព្រះចៅអធិការវត្តនន្ទមុនី រាជធានីភ្នំពេញ ដែលបានឧបត្ថម្ភ អង្ករ ៣ តោន ទឹកបរិសុទ្ធ ៥០ កេស ទឹកក្រូច ២០ កេស មី ៣០ កេស បន្លុង ១០ បច្ច័យ ចំនួន ៨,០០០,០០០ រៀល និងថ្លែងអំណរគុណចំពោះ លោកបណ្ឌិតសភាចារ្យ អ៊ុក រ៉ាន់ប៊ុន ទេសរដ្ឋមន្ត្រីទទួលបេសកកម្មពិសេស ថវិកាចំនួន ៥ លានរៀល , លោកស្រី យី សុភាព និងលោក ពៅឃាង ថវិកាចំនួន ២.០០០ ដុល្លារ ដើម្បីអបអរសាទរខួបលើកទី ១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ក្រាមមូលបទ ៖ «បន្តរួមកម្លាំងគ្នា ដើម្បីមនុស្សធម៌»។

សម្តេចកិត្តិសង្គហបណ្ឌិត ក៏បានថ្វាយព្រះពរជ័យសព្វសាធុការ ថ្វាយប្រគេនដល់ព្រះសង្ឃ និងព្រះត្ថេរានុថេរៈគ្រប់ព្រះអង្គ ឯកឧត្តម លោកជំទាវ លោក លោកស្រី ដែលបានចូលរួមចំណែកជួយដល់សាខាកាកបាទក្រហមកម្ពុជាខេត្តស្វាយរៀងនាពេលនេះ ព្រមទាំងទទួលបាននូវពុទ្ធពរទាំង ៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
អត្ថបទ ៖ វិមាន