ពូទីន ព្រមាន ត្រាំ ថា បើសង្គ្រាមមជ្ឈិមបូព៌ានៅតែបន្ត លំហូរប្រេងអាចកាត់ផ្តាច់ទាំងស្រុង រុញតម្លៃកាន់តែខ្ពស់

ក្នុងកិច្ចសន្ទនារយៈពេលជាងមួយម៉ោងកាលពីថ្ងៃចន្ទទី៩ខែមីនាឆ្នាំ២០២៦ ប្រធានាធិបតីរុស្ស៊ី វ្ល៉ាឌីមៀរ ពូទីន បានព្រមានទៅមេដឹកនាំអាមេរិក ដូណាល់ ត្រាំ ថា៖ ប្រសិនបើសង្គ្រាមមជ្ឈិមបូព៌ានៅតែបន្ត លំហូរប្រេងពីតំបន់ឈូងសមុទ្រអាចនឹងត្រូវកាត់ផ្តាច់ទាំងស្រុងនៅប៉ុន្មានសប្តាហ៍ខាងមុខ ដែលនឹងរុញឲ្យសាំងឡើងថ្លៃខ្លាំងលើសនេះទៀត។

លោកពូទីនប្រាប់ទៅត្រាំថា ទិន្នផលប្រេងនៅតំបន់ឈូងសមុទ្រកំពុងតែធ្លាក់ចុះហើយ ដោយសារតែស្តុកមានសភាពពេញណែន ដោយសារប្រេងទាំងនោះមិនអាចដឹកជញ្ជូនឆ្លងកាត់ច្រកសមុទ្រដែលត្រូវបានបិទខ្ទប់បាន។

លោកបានចាត់ទុកស្ថានភាពនេះថាជាវិបត្តិថាមពលសកល ដែលបង្កឡើងដោយគោលនយោបាយ «ដ៏ខុសឆ្គង» របស់បស្ចិមប្រទេស និងសកម្មភាពយោធាប្រឆាំងនឹងប្រទេសអ៊ីរ៉ង់។

ទន្ទឹមនោះ លោកពូទីន ក៏បញ្ចេញមតិសំខាន់ៗមួយចំនួន ដែលមានគោលបំណងឈានទៅរកការដោះស្រាយវិវាទនៅអ៊ីរ៉ង់ តាមផ្លូវនយោបាយនិងការទូតឱ្យបានឆាប់រហ័សផងដែរ។

កិច្ចសន្ទនារវាងមេដឹកនាំទាំងពីរ កើតឡើងចំពេលពិភពលោកកំពុងជួបវិបត្តិនិងព្រួយចិត្តខ្លាំងព្រោះតែសង្គ្រាមនៅមជ្ឈិមបូព៌ា ដែលរុញឲ្យតម្លៃប្រេងហក់ឡើងដល់កម្រិតខ្ពស់បំផុត។

តម្លៃប្រេងអន្តរជាតិ​បាន​ហក់ឡើងកប់ពពកជិត ៣០% ពេលបើកការជួញដូរលើទីផ្សារអាស៊ីនាព្រឹកថ្ងៃចន្ទ ដល់ជិត ១២០ ដុល្លារ/បារ៉ែល ដោយសារតែផលប៉ះពាល់ផ្នែកផ្គត់ផ្គង់ បណ្ដាលមក​ពី​ភាពតានតឹងនៃជម្លោះរវាងអ៊ីស្រាអែល/សហរដ្ឋអាមេរិក និងអ៊ីរ៉ង់។

តម្លៃប្រេងឆៅនាពេលអនាគត ម៉ាក Brent បាន​កើនឡើង ២៥.៩១ ដុល្លារ/បារ៉ែល ឬ ២៧,៩៥% ដល់ ១១៨.៦ ដុល្លារ/បារ៉ែល គិតត្រឹមម៉ោង ១០​ កន្លះ​ ព្រឹក​ នៅទីក្រុងហុងកុង។ ដោយឡែកតម្លៃប្រេងអាមេរិក ម៉ាក WTI វិញ បាន​កើនឡើង ២៧.២៦ ដុល្លារ​ ឬ ២៩,៩៩% ដល់ប្រមាណ ១១៨,៧ ដុល្លារ/បារ៉ែល៕

អត្ថបទ៖ សុខ សុវណ្ណ