អគ្គិភ័យឆេះផ្ទះពលរដ្ឋជាច្រើនខ្នងនៅផ្លូវរថភ្លើង ក្នុងសង្កាត់បឹងកក់ទី២

ផ្ទះប្រជាពលរដ្ឋជាច្រើនខ្នងនៅតាមបណ្ដោយផ្លូវរថភ្លើង ក្នុងមូលដ្ឋានសង្កាត់បឹងកក់ទី២ ខណ្ឌទួលគោកត្រូវបានអណ្ដាតភ្លើងលេបត្របាក់អស់ទាំងស្រុង ខណៈមួលហេតុនៃការឆាបឆេះសមត្ថកិច្ចកំពុងស្រាវជ្រាវ។ ហេតុការណ៍គ្រោះអគ្គិភ័យនេះកើតឡើងកាលពីវេលាម៉ោង០៨និង៤០នាទីយប់​ ថ្ងៃទី១៨ ខែមីនា ឆ្នាំ២០២៦ នៅចំណុចផ្ទះជួល តាមបណ្តោយផ្លូវរថភ្លើង សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

តាមការបញ្ជាក់ពីប្រជាពលរដ្ឋបានអោយដឹងថា មុនកើតហេតុពលរដ្ឋក្បែរខាងមានឮសំឡេងផ្ទុះដោយសង្ស័យឆ្លងចរន្តអគ្គិសនី។ លុះមួយសន្ទុះក្រោយក៏មានផ្សែងខ្មៅហុយចេញមកក្រៅ។ ភ្លាមៗ ក៏ផ្អើលឆោរឡោរ ឃើញមានផ្សែងលាយលំអណ្តាតភ្លើងកំពុងលេបត្របាក់ផ្ទះបាត់ទៅហើយ។ ខណៈនោះទើបប្រញាប់នាំគ្នារាយការណ៍ជូនសមត្ថកិច្ចជំនាញដើម្បីចុះមកជួយអន្តរាគមន៍ទប់ស្កាត់ជៀសវាងបង្កការរាលដាលកាន់តែខ្លាំង។

ក្នុងនោះក៏មានវត្តមានលោក សុខ ពេញវុធ អភិបាលរងរាជធានីភ្នំពេញ លោក ជា ពិសី អភិបាលខណ្ឌទួលគោក រួមនឹងលោក សុឹម ពិសិដ្ឋ អធិការខណ្ឌទួលគោក ដឹកនាំមន្រ្តីចុះមកកាន់ទីតាំងអគ្គិភ័យផងដែរ។

អគ្គិភ័យនេះដែរបង្កការខូចខាតផ្ទះឈើប្រក់ស័ង្កសី ជាច្រើនខ្នង រួមមានសម្ភារៈមួយចំនួនធំ និងបានប្រើប្រាស់រថយន្ត របស់ការិយាល័យបង្ការពន្លត់អគ្គិភ័យ និងសង្រ្គោះជាច្រើនគ្រឿងបាញ់អោយរលត់ជាស្ថាពរ។ ចំពោះមូលហេតុច្បាស់លាស់ដែលបង្កើតទៅជាអណ្តាតភ្លើងលេបត្របាក់ ផ្ទះពលរដ្ឋនេះ សមត្ថកិច្ចកំពុងបើកការស្រាវជ្រាវ៕

អត្ថបទ៖ រដ្ឋា