ក្រសួងកិច្ចការនារី និងសមាគមសហគ្រិនស្រ្តីកម្ពុជា ចុះ MOU ផ្តោតលើចំណុចសំខាន់ៗចំនួន៣

នៅថ្ងៃទី ១៩ ខែមីនា ឆ្នាំ២០២៦ លោកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអនុញ្ញាតឱ្យគណៈប្រតិភូសមាគមសហគ្រិនស្រ្តីកម្ពុជា (CWEA) ដឹកនាំដោយ លោកស្រី ចាន់ ភារី ប្រធានសមាគម ជួបសម្ដែងការគួរសម និងរាយការណ៍ពីវឌ្ឍនភាពការងារ។ ក្នុងជំនួបនោះ ក្រសួងកិច្ចការនារី និងសមាគមសហគ្រិនស្រ្តីកម្ពុជា បានឈានដល់ការចុះ អនុស្សរណៈនៃការយោគយល់គ្នា (MoU) ដែលផ្តោតលើចំណុចសំខាន់ៗចំនួន៣ ដូចខាងក្រោ៖

១.លើកកម្ពស់ភាពជាដៃគូររវាងវិស័យសាធារណៈនិងវិស័យឯកជន ក្នុងការគាំទ្រដល់ការអភិវឌ្ឍសមត្ថភាពផ្នែកសេដ្ឋកិច្ចនិងសហគ្រិនភាពស្រ្តីនៅកម្ពុជា រួមទាំងការចូលរួមរបស់វិស័យឯកជន ការវិនិយោគ និងគំនិត ផ្តួចផ្តើមនានា ដើម្បីគាំទ្រអាជីវកម្មដែលដឹកនាំដោយស្ត្រី។

២.រៀបចំ និងអនុវត្តកម្មវិធី និងគំនិតផ្តួចផ្តើមរួមគ្នា ដើម្បីអភិវឌ្ឍន៍ជំនាញ សមត្ថភាពប្រកួតប្រជែង និងភាពធន់ របស់ស្រ្តីសហគ្រិន រួមទាំងកម្មវិធីបណ្តុះបណ្តាលនិងកម្មវិធីពាក់ព័ន្ធនឹងការលើកកម្ពស់ការចូលរួមពង្រឹងបណ្តាញ ទំនាក់ទំនង ការតភ្ជាប់ទីផ្សារ និងការអភិវឌ្ឍសមត្ថភាព សហគ្រិនស្រ្តីនៅកម្ពុជា។

៣.លើកកម្ពស់ភាពជាតំណាង សំឡេង និងតួនាទីរបស់ស្ត្រី ក្នុងប្រព័ន្ធអេកូឡូស៊ីសហគ្រិនភាព ដោយគាំទ្រដល់វិសាលភាព និងភាពសកម្មរបស់សមាគម និងបណ្តាញសហគ្រិនស្រ្តី និងចូលរួមលើកកម្ពស់ការអនុវត្តគោលនយោបាយនិងកម្មវិធីពាក់ព័ន្ធវិស័យធុរកិច្ច ដែលឆ្លើយតបយេនឌ័រ។

នាឱកាសនោះ លោកស្រី ប្រធានសមាគមសហគ្រិនស្រ្តី បានថ្លែងអំណរគុណយ៉ាងជ្រាលជ្រៅចំពោះលោកស្រី កិត្តិបណ្ឌិត និងក្រសួងកិច្ចការនារី ដែលតែងតែគាំទ្រ តម្រង់ទិស និងផ្តល់ឱកាសនានាដល់សមាគមសហគ្រិនស្រ្តីកម្ពុជា ដើម្បីអនុវត្តសកម្មភាព និងបំពេញបេសកកម្មប្រកបដោយប្រសិទ្ធភាព និងប្រសិទ្ធផល។

ជាមួយគ្នានេះដែរ លោកស្រី យូ បូរី អនុប្រធានសមាគមសហគ្រិនស្រ្តីកម្ពុជា បានជម្រាបជូនអំពីចក្ខុវិស័យ និងបេសកកម្មក្នុងការជំរុញសហគ្រិនស្រ្តីកម្ពុជា តាមរយៈគម្រោងអាទិភាពចំនួន ៥ រួមមាន៖ ១. WE Academy ២. WE Share ៣. WEE Market Hub ៤. WE Talk ៥. WE Financial Support Hub។

ជាការឆ្លើយតប លោកស្រីរដ្ឋមន្រ្តីក្រសួងកិច្ចការនារី បានកោតសរសើរ និងវាយតម្លៃខ្ពស់ចំពោះសមិទ្ធផលរបស់សមាគមសហគ្រិនស្រ្តីកម្ពុជា៕