មន្ត្រីជាន់ខ្ពស់កិច្ចការនារី៖ ស្ត្រី និងក្មេងស្រី តែងជួបប្រទះបន្ទុកកាន់តែច្រើន ពីផលប៉ះពាល់នៃការប្រែប្រួលអាកាសធាតុ

លោកស្រី ស៊ីវណ្ណ បុទុម រដ្ឋលេខាធិការនៃក្រសួងកិច្ចការនារី បានលើកឡើងថា ស្ត្រី និងក្មេងស្រី តែង​តែជួបប្រទះបន្ទុកកាន់តែច្រើន ពីផលប៉ះពាល់នៃការប្រែប្រួលអាកាសធាតុ​។ លោកស្រីបានលើកឡើងដូច្នេះ ក្នុង “វេទិកា និងកិច្ចសន្ទនាកម្រិតខ្ពស់ ស្តីពីការបញ្ជ្រាបយេនឌ័រនៅក្នុងការប្រែប្រួលអាកាសធាតុ និងការគ្រប់គ្រងគ្រោះមហន្តរាយ ” នាថ្ងៃទី២៩ ខែមិថុនា ឆ្នាំ២០២៦។

វេទិកានេះរៀបចំដោយគណៈកម្មាធិការដឹកនាំ និងសម្រួលសម្រួលការងារយេនឌ័រ និងការប្រែប្រួលអាកាសធាតុនៃក្រសួងកិច្ចការនារី ដោយមានការគាំទ្រពីអង្គការ UNWomen ដោយមានអ្នកចូលរួមសរុបប្រមាណ ១២០នាក់ (ស្រ្តី៦៩នាក់​) នាក់ ដែលជាថ្នាក់ដឹកនាំ និងមន្រ្តីបច្ចេកទេសនៃក្រុមការងារបញ្ជ្រាបយេនឌ័រ​ និងក្រុមការងារប្រែប្រួលអាកាសធាតុ តាមក្រសួង-ស្ថាប័ន ដៃគូអភិវឌ្ឍន៍ អង្គការសង្គមស៊ីវិល សាស្រ្តាចារ្យ និងក្រុមយុវជនជានិស្សិតពីសាកលវិទ្យាល័យនានា។

ក្នុងឱកាសនោះ លោកស្រីបានលើកឡើងថា ការប្រែប្រួលអាកាសធាតុ ជាបញ្ហាសកល ហើយក៏បាននិងកំពុងបង្កឱ្យមានផលប៉ះពាល់ដល់មុស្សគ្រប់ៗគ្នា​​ ដែលផលប៉ះពាល់នេះ ​មាន​លក្ខណៈ​ខុសៗគ្នា ទៅលើបុរស ស្រ្តី និង​ក្រុមជន​ងាយ​រង​គ្រោះ។ ក្នុងនោះ អ្នកដែល​ងាយរងគ្រោះ ភាគច្រើនស្រ្តី និងកុមារ តែងតែប្រឈមនឹងហានិភ័យខ្ពស់ ដោយសារកត្តាជីវសាស្រ្ត និងកត្តាសង្គម ហើយស្ត្រី និងក្មេងស្រី តែង​តែជួបប្រទះបន្ទុកកាន់តែច្រើន ពីផលប៉ះពាល់នៃការប្រែប្រួលអាកាសធាតុ​ រួមទាំងការខ្វះខាតធន​ធាន​ បន្ទុកនៃការងារថែទាំ និងការចូលរួមក្នុងកិច្ចអភិវឌ្ឍ។

បើតាមលោកស្រី ស៊ីវណ្ណ បុទុម  វេទិកានេះ គឺជាសកម្មភាពអាទិភាពមួយ ដែលក្រសួងកិច្ចការនារី រៀបចំឡើងក្នុងគោលបំណង ចែករំលែកមេរៀនបទពិសោធ និងការប្តេជ្ញាចិត្តរបស់ក្រសួងស្ថាប័ន ក្នុងការឆ្លើយតប និងធ្វើស្ថាប័នូបនីយកម្មយេនឌ័រនៅតាមវិស័យ។ ព្រមទាំងអាចកំណត់បាននូវវិធានការ និងតម្រូវការជាក់លាក់ជាបន្ថែមទៀតលើកិច្ចការទាំងនេះ ដើម្បីលើកកម្ពស់សមភាពយេនឌ័រ ឆ្លើយតបទៅនឹងក្នុងការប្រែប្រួលអាកាសធាតុ និងការគ្រប់គ្រងគ្រោះមហន្តរាយ។

លោកស្រី បានបញ្ជាក់ថា ការបញ្រ្ជាបយេនឌ័រនៅក្នុងរបៀបវារៈនៃការប្រែប្រួលអាកាសធាតុ និងការគ្រប់គ្រងហានិភ័យនៃគ្រោះមហន្តរាយ គឺជាកត្តា​សំខាន់​ ដើម្បី​ធានាថា គោលនយោបាយផែនការ និងកម្មវិធីនានាអាចឆ្លើយតបទៅនឹងតម្រូវការពិតប្រាកដរបស់បុរស ស្រ្តី ក្មេងប្រុស ក្មេងស្រី និងក្រុមងាយ​រង​គ្រោះ ​បានយ៉ាងមានប្រសិទ្ធភាព និងបរិយាបន្ន៕