ព័ត៌មានជាតិ

ផ្លូវកៅស៊ូទៅស្រុកសៀមប៉ាងស្ថិតក្នុងគម្រោងសិក្សា ភ្ជាប់ទៅគម្រោងវិនិយោគសាងសង់ទីលានយន្តហោះថ្មី

បានផុស

២ ខែ មុន

នៅ

ថ្ងៃសុក្រ ២០ មីនា ២០២៦

ដោយ

បើតាមការគូសបញ្ជាក់ពីលោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានឲ្យដឹងថា ផ្លូវមួយខ្សែដែលបំបែកពីស្រុកបុរីអូរស្វាយឆ្ពោះទៅទីប្រជុំជនស្រុកសៀមប៉ាងស្ថិតនៅក្នុងគម្រោងសិក្សាជាផ្លូវកៅស៊ូ ខណៈដែលកំណាត់ផ្លូវនេះមានសារសំខាន់ក្នុងការតភ្ជាប់ទៅគម្រោងវិនិយោគទីលានយន្តហោះថ្មីដែលកំពុងដំណើរការសាងសង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សរ សុពុត្រា បានបញ្ជាក់ថា រដ្ឋបាលខេត្តបានដាក់លិខិតស្នើទៅកាន់រាជរដ្ឋាភិបាលកាលពីខែមុន ដើម្បីសាងសង់ផ្លូវកៅស៊ូតភ្ជាប់ពីស្រុកបុរីអូរស្វាយ ឆ្ពោះទៅកាន់ស្រុកសៀមប៉ាង។ យ៉ាងណាមិញដោយសារប្រទេសជាតិស្ថិតក្នុងបរិការណ៍ក្នុងស្ថានភាពសេដ្ឋកិច្ចរងផលប៉ះពាល់ពីបញ្ហាព្រំដែនជាមួយប្រទេសថៃ រាជរដ្ឋាភិបាលត្រូវមានភាពសន្សំសំចៃលើការចំណាយណាដែលមិនទាន់ចាំបាច់។

«ការស្នើសុំសាងសង់ផ្លូវតភ្ជាប់ពីស្រុកបុរីអូរស្វាយឆ្ពោះទៅប្រជុំជនសៀមប៉ាង គឺបានធ្វើឡើងរួចរាល់ហើយរង់ចាំការសម្រេចនឹងចាត់ចែងបន្ត»។ លោក សរ សុពុត្រា បញ្ជាក់មុនលោកបន្តថា «ផ្លូវដែលស្ថិតនៅក្នុងគម្រោងសិក្សាដើម្បីសាងសង់ជាផ្លូវកៅស៊ូនេះ មានតម្លៃសេដ្ឋកិច្ចសម្រាប់ពលរដ្ឋក្នុងស្រុកសៀមប៉ាង ខណៈនៅទីនោះក៏មានក្រុមហ៊ុនវិនិយោគមួយកំពុងសាងសង់ព្រលានយន្តហោះខ្នាតតូច សម្រាប់ទទួលភ្ញៀវទេសចរដោយមិនបាច់ធ្វើដំណើរតាមផ្លូវគោក»។

ក្រៅពីផ្លូវកៅស៊ូដែលស្ថិតនៅក្នុងផែនការជំរុញការសាងសង់ ទីលានយន្តហោះខ្នាតតូចមួយក៏កំពុងដំណើរការសាងសង់នៅស្រុកសៀមប៉ាង ដែលមានចម្ងាយជាង ១០០ គីឡូម៉ែត្រពីក្រុងស្ទឹងត្រែង។

លោក ម៉េង ហៀង ម្ចាស់គម្រោងវិនិយោគតំបន់អេកូទេសចរណ៍ Siempang Forest Lodge បានប្រាប់ថា ទីលានយន្តហោះខ្នាតតូចនេះ កំពុងដំណើរការសាងសង់សម្រេចបានប្រមាណ ៥០% ដែលគ្រោងនឹងរួចរាល់ដាក់ឲ្យដំណើរការនៅឆ្នាំក្រោយនេះ។

លោកថា ទីលានយន្តហោះខ្នាតតូចដែលក្រុមហ៊ុនបានវិនិយោគ មានផ្លូវរត់ប្រវែង ៨០០ ម៉ែត្រ និងទទឹង ២៤ ម៉ែត្រ និងអភិវឌ្ឍន៍នៅលើផ្ទៃដីទំហំ ២៥ ហិចតា។ តាមរយៈទីលានយន្តហោះដ៏មានសក្តានុពលនេះ នឹងពង្រីកការតភ្ជាប់ផ្តល់មធ្យោបាយធ្វើដំណើរសម្រាប់ទេសចរណ៍ក្នុងស្រុក ដែលចង់មកកម្សាន្តនៅដែនជម្រកសត្វព្រៃក្នុងខេត្តស្ទឹងត្រែង និងគោលដៅទេសចរណ៍ដ៏ទាក់ទាញផ្សេងទៀតក្នុងខេត្ត៕